Vakacava, o nanuma ni vakadonuya na ivalu na Kalou? Ke vaka kina, ena to vei cei ni veivaluvaluti e rua na mataivalu nikua? Ni o sa kila na isaunitaro qori ena qai vakatau kina na nomu rai baleta na ivalu. Kena ivakaraitaki, ke o kila ni vakadonuya na Kalou na ivalu, qai to ena mataivalu o taleitaka, o na rawa ni vakadeitaka ni donu na nomu rai, ena qaqa tale ga na mataivalu qori. Ia vakacava ke o kila ni to na Kalou ena mataivalu o sega ni tokona? De dua ena veisautaka na nomu rai.

E tiko e dua tale na vuna e bibi sara. Nomu kila na rai ni Kalou me baleta na ivalu, ena qai vakatau kina nomu rai me baleti koya. Ke o dua vei ira na vica vata na milioni era vakararawataki ena vuku ni ivalu, macala ga ni o na via kila na isaunitaro qo: Vakacava e dau bukana na Kalou na ivalu me vaka era vakabauta eso, se uqeta na veivakararawataki e yaco kina, se vakawelewele qai sega ni kauaitaki ira na vakalolomataki kina?

De dua o na kidroataka ni duidui sara na ka e tukuna na iVolatabu ni vakatauvatani kei na levu ni rai sa tukuni oti mai qori. E sega ni veisau na rai ni Kalou me baleta na ivalu ena gauna makawa sara me yacova mai nikua. Meda dikeva mada qo na ka e kaya na iVolatabu me baleta na rai ni Kalou ena vuku ni ivalu ena gauna makawa vaka kina na imatai ni senitiuri, ni se bula tu e vuravura o Jisu. Eda na kila kina na rai ni Kalou me baleta na ivalu nikua, se na yaco tiko ga na veivaluvaluti ena noda veigauna se bera mai se sega.