Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 IVAKASALA VUKU MAKAWA E YAGA NIKUA

Veivosoti Vakarawarawa

Veivosoti Vakarawarawa

IVAKAVUVULI VAKAIVOLATABU: “Moni dau . . . veivosoti tale ga vakarawarawa ke dua e didivaka e dua na ka vua e dua tale. Moni dau veivosoti me vaka ga na nona vosoti kemuni vakarawarawa o Jiova.”Kolosa 3:13.

Kena ibalebale? E dau vakatauvatani na ivalavala ca ena iVolatabu me dinau, ia na veivosoti e dau vakatauvatani kei na kena bokoci e dua na dinau. (Luke 11:4) E tukuni ena dua na ivoladusidusi ni ibalebale ni vosa vaKirisi ena iVolatabu e vakadewataki me “veivosoti,” e tiko kina na vakasama mo “guilecava e dua na dinau, mo kua ni taroga tale.” O koya gona nida vosota e dua e cala vei keda, eda na sega ni namaka tale vua e dua na ka. Na noda yalorawarawa ni veivosoti e sega ni kena ibalebale nida vakadonuya na ka ca e cakava, se me kua ni mositi keda vakalevu. Ia eda sa sega tale ni qai rarawataki koya tiko, dina ni tu na yavu vinaka meda “didivaki” koya kina.

Se yaga tiko nikua? Nida kawa ivalavala ca eda dau cala kece. (Roma 3:23) E vinaka gona meda dau vosoti ira eso tale, ni tiko na gauna eda na vinakata kina meda vosoti. Ena yaga tale ga na noda dau veivosoti. Ena sala cava?

Ke da katona da qai cudruvaka tiko ga na ca e caka vei keda, oti da qai sega ni veivosoti, eda na leqa ga kina. Na rai cala va qori ena vakalatilati ena noda marau, eda na sega ni via veimaliwai vakalevu, da qai bula rarawa kina. E rawa ni rivarivabitaki tale ga kina noda bula vakayago. E kune ena dua na itukutuku ena Journal of the American College of Cardiology, e vakarautaka o Doketa Yoichi Chida kei na dua na Parofesa ni Vakasama e kilai me Psychology o Andrew Steptoe: “E kune wale tiko ga qo ni rivarivabitaki na kena rawa ni vakavuna na mate ni uto na cudrucudru kei na yalototolo.”

Ena yasana adua, vakasamataka na yaga ni veivosoti. Nida veivosoti vakarawarawa, eda na uqeta na duavata kei na vakacegu, ena vinaka tiko ga noda bula veimaliwai. Koya e bibi sara nida na vakadinadinataka nida vakatotomuria na Kalou, e dau vosoti ira vakarawarawa na ivalavala ca, qai namaka meda cakava tale ga qori.Marika 11:25; Efeso 4:32; 5:1.