Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

O Bau Kila?

O Bau Kila?

E vakacava na levu ni cakacaka i Eroti me tara tale kina na valenisoro e Jerusalemi?

A tara sara ga e liu o Solomoni na valenisoro e Jerusalemi ena dua na delana. Ena vanua e dabe toka kina na valenisoro, qai tara kina na lalaga e tarova na sisi ni qele ena yasana ina tokalau kei na ra, me rawa ni vakaikabakaba wavoki na lomanibai tabu. Ia e vinakata o Eroti me siviti Solomoni, e veisautaka gona na kena itaratara qai vakalevutaka.

Era vakalevutaka na idinia nei Eroti na vanua rabaraba ena vualiku ni valenisoro me levu kina na ikabakaba. E vakarabailevutaki tale ga na ceva ena 32 na mita. Me rawa ni caka qori ena tuva kina e vica vata na vatu me tekivutaki kina na kena yavu, vaka kina na lalaga e dau tarova na sisi ni qele. Dua na gauna e 50 sara na mita na cere ni lalaga qo.

E sega ni via vakacacana o Eroti na veika era kauai kina vakalevu na Jiu, kei na nodra veiqaravi ena valenisoro vaka kina nodra vakacaboisoro. E kaya e dua na Jiu e daunitukutuku makawa o Josephus ni vakavulici ira sara mada ga na bete era Jiu o Eroti mera cakacaka vakamatai, ra matai tale ga ni vatu, me kua kina ni dua e torova yani vakaveitalia na vanua tabu.

A takali o Eroti ni se bera ni oti na cakacaka qo. Me yacova na 30 G.V., sa 46 kina na yabaki na dede ni cakacaka qo. (Joni 2:20) A qai vakaotia na kena tara na makubui Eroti vakarua, o Akaripa II, ena lomaloma ni imatai ni senitiuri G.V.

Cava era nanuma kina na lewe i Melita ni daulaba o Paula?

Na kalou yalewa ni lewadodonu (imawi) e mokuta tiko na kalou yalewa e sega ni dau lewadodonu

Eso na lewe i Melita era vakamuai tu ena nodra ivakavuvuli ni lotu na kai Kirisi. Vakasamataka mada na veika e yaco ni voca oti na waqa a vodo tiko kina o Paula e Melita, me vaka e volaitukutukutaki ena Cakacaka. Na gauna e utura vinaka kina na buka sa waqa tu mera vakatakatai kina na qalo bula mai waqa, e vivi sara mai ligana e dua na gata poisoni. Nira raica qori na lewe ni yanuyanu era kaya sara: “E daulaba dina o ka qo. E sa cabebula mai wasawasa, ia e sega ni laivi koya me bula o Lewadodonu.”Cakacaka 28:4.

Na vosa vaKirisi ni “Lewadodonu” e vakayagataki tiko e ke na “di’ke.” E rawa ni kena ibalebale na lewadodonu ena dua tale na vakasama. Ia ena itukuni vaKirisi, na Dike e yaca ni kalou yalewa ni lewadodonu. E dau nanumi tu ni vakaraica tiko na ka era cakava na tamata, oti qai tukutuku vua na kalou lasu ni Kirisi o Seusi ke raica ni sega ni laurai na lewadodonu, mera totogitaki kina o ira na cala. E vakamacalataki gona ena dua na itukutuku nira nanuma na lewe i Melita: “E dro bula mai wasawasa o Paula, ia sa na wanonovi koya tiko na kalou yalewa o Dike . . . ni vakayagataka na gata poisoni.” E qai veisau ga nodra rai nira raica ni sega ni bau mavoa o Paula.