Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 ULUTAGA LEVU | E YAGA NA MASU?

Cava Eda Dau Masu Kina?

Cava Eda Dau Masu Kina?

“Au bobula ena veimauilavo. Au dau masulaka mada ga meu rawata e dua na ilavo levu. Ia qai sega ni yaco.”—Samuel, * Kenya.

“E dua ga na masu keimami cavuqaqataka tiko mai koronivuli keimami a vakavulici kina.”—Teresa, Yatu Filipaini.

“Au dau masulaka na noqu leqa. Au kerea me vosoti noqu ivalavala ca, meu dua tale ga na lotu vaKarisito vinaka.”—Magdalene, Ghana.

Mai na ka ratou kaya o Samuel, o Teresa, kei Magdalene, eda raica ni duidui na vuna eda dau masu kina. So e dau vinaka sara na inaki ni nodra masu, so e vu mai lomadra, so tale era masu ga me rawa. E levu na vuna era masu kina e drau vakamilioni, mera rawata na veitarogi, me qaqa nodra timi ni qito, me dusimaka nodra vuvale na Kalou, se so tale na ka. E tukuni ena dua na vakadidike ni so mada ga era sega ni dau lotu era masu wasoma.

Vakacava, o dau masu tale ga? Cava o dau masulaka? Ke o dau masu se sega, o na rairai vaqaqa: ‘E yaga na masu? Ena rogoci?’ E kaya e dua na dauvolaivola ni dua ga na “iwalewale ni veivakacegui” na masu “me vaka ga nomu vosa tiko vua na ika o susuga e vale.” E va tale ga qori na nodra rai eso na dau veiqaravi vakavuniwai, era vakatoka na masu me “isosomi ni wainimate.” Vakacava o ira na dau masu, e ivakarau ga ni nodra bula qori se dua na kena yaga vei ira?

Ia e levu tale na ka e kaya na iVolatabu me baleta na masu, e sega wale ga ni dau vu ni veivakacegui. E kaya ni na rogoci dina na masu ke caka ena inaki donu, e vinaka tale ga. E dina qori? Meda dikeva mada na kena ivakadinadina.

^ para. 3 So na yaca sa veisau.