Raica sara na lewena

Raica na lewenivola

 ULUTAGA LEVU | E YAGA NA MASU?

Vuna e Sureti Keda Kina na Kalou Meda Masu

Vuna e Sureti Keda Kina na Kalou Meda Masu

E via veitokani kei keda.

Era dau veivosaki na veitokani me vinaka tiko ga nodra veimaliwai. E sureti keda tale ga na Kalou meda dau vosa vua, meda veitokani vinaka tiko ga kina. E kaya: “Oni na tagici au, oni na lako mai moni masuti au, au na rogoci kemuni.” (Jeremaia 29:12) Nida vosa vua na Kalou eda na ‘toro voleka vua, ena qai toro voleka mai vei keda o koya.’ (Jemesa 4:8) E vakadeitaka na iVolatabu: “E voleka o Jiova vei ira kece na kacivi koya.” (Same 145:18) Na levu ga ni noda masu vua, na dei ni noda veitokani kei koya.

“E voleka o Jiova vei ira kece na kacivi koya.”Same 145:18

E via vukei keda.

E kaya o Jisu: “O cei mada vei kemudou e kere madrai vua o luvena qai solia vua na vatu? Se kere ika, ena solia vua na gata? O koya gona, ke sa rawa . . . mo dou solia na ka vinaka vei ira na luvemudou, sa na qai wacava sara na Tamamudou mai lomalagi ni na solia na ka vinaka vei ira era kerea vua!” (Maciu 7:9-11) Io, e sureti keda na Kalou meda dau masu baleta ni ‘kauaitaki keda,’ e via vukei keda tale ga. (1 Pita 5:7) Nida sotava mada ga na leqa, e vinakata meda masu yani vua. E kaya na iVolatabu: “Moni kua ni lomaocaocataka e dua na ka, ia na ka kece me vakaraitaki vua na Kalou ena masu kei na kerekere salavata kei na vakavinavinaka.”Filipai 4:6.

Eda vinakata tale ga meda vakacegui vakayalo.

Era kaya o ira na dau vakadikeva na bula, ni vica vata na drau na milioni era dau vinakata mera masu. Era wili tiko kina eso era sega ni vakabauta ni bula dina tiko na Kalou, se me kauaitaki keda mai. * E vakadinadinataka ga nida a buli meda gadreva tale ga na veika vakayalo. E kaya o Jisu: “Era marau o ira na kauaitaka na nodra bula vakayalo.” (Maciu 5:3) Dua na sala e vakacegui kina na gagadre qori oya na noda dau vosa vua na Kalou.

Ena yaga vakacava na noda muria na veisureti ni Kalou meda dau masu vua?

^ para. 8 E dua na vakadidike a caka ena 2012 ena vanua ni vakadidike qo na Pew Research Center, qai laurai kina e Merika ni 11 na pasede vei ira qori era dau masu vakadua ena loma ni dua na vula.