Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 ULUTAGA LEVU | KA MO CAKAVA NI O LOMAOCAOCA

Lomaocaoca ena Vuvale

Lomaocaoca ena Vuvale

E kaya o Janet: “Ni se qai mate ga o tamaqu, e kaya vei au o watiqu ni sa lasa tiko kei na dua tale na yalewa. Oti ga vakalailai sa kauta kece nona isulu, keitou qai biu tu mai na veitinani, sega tale ni tatau se vakamoce.” E cakacaka sara o Janet, ia e sega ni veirauti na ilavo e rawata me saumi kina na vale. Me ikuri ni nona leqa vakailavo e kaya: “Au lomaocaocataka niu sa mai veiqaravi duadua tiko. E ca noqu lewaeloma niu sega ni vakarautaka rawa vei rau na gone na ka era dau cakava na vo ni itubutubu. Nikua mada ga, au se lomaleqataka tiko ga nodra rai eso tale me baleti au kei rau na gone. De dua era na kaya niu sega ni saga meu taqomaka noqu bula vakawati.”

O Janet

E vukei Janet na masu me lewa vinaka na ivakarau ni lomana, me veiwekani voleka tale ga kei na Kalou. “E dau dredre sara ena bogi ni vakanomodi na vanua, qai levu na ka au veinanuyaka. Na wili iVolatabu ga kei na masu e vukea noqu moce vinaka. Au taleitaka vakalevu na Filipai 4:6, 7: ‘Moni kua ni lomaocaocataka e dua na ka, ia na ka kece me vakaraitaki vua na Kalou ena masu kei na kerekere salavata kei na vakavinavinaka, ena qai taqomaka na lomamuni kei na nomuni vakasama na vakacegu ni Kalou e uasivia na vakasama kece.’ Au masu wasoma ena bogi, au qai vakila nona veivakacegui o Jiova.”

Na vosa ni veivakadeitaki i Jisu me baleta na masu ena Ulunivanua ni Veiolive e rawa ni vukei keda ena gauna eda lomaocaoca kina, e kaya: “Ni kila na Tamamudou na ka dou vinakata ni bera mada ga ni dou kerea.” (Maciu 6:8) Ena vinakati ga meda kerekere vua. E bibi na masu meda “toro voleka [kina] vua na Kalou.” Na kena yaga? “Ena qai toro voleka mai vei kemuni o koya.”—Jemesa 4:8.

E dau veivakacegui na masu nida lomaocaoca, ia e levu tale na ka e dau yaga kina noda masu. E “Daurogo  masu” o Jiova, qai yavala me vakacegui ira na vakasaqarai koya ena vakabauta. (Same 65:2) Qori na vuna e vakavulici ira kina nona imuri o Jisu mera “masu tiko ga mera kua ni soro koso.” (Luke 18:1) Meda kerea tiko ga nona veidusimaki kei na nona veivuke na Kalou, da qai vakadeitaka ni na vakaicovitaka noda vakabauta. Meda kua ni vakatitiqataka ni na rawa ni yavala me veivukei. Na noda ‘sega ni cegu ena masu’ e vakaraitaka nida vakabauta dina.—1 Cesalonaika 5:17.

NA IBALEBALE DINA NI VAKABAUTA

Na cava sara mada na vakabauta? Qo e okati kina noda “vulica” se kila “tiko ga” na veika me baleta na Kalou. (Joni 17:3) Na imatai ni ka eda na cakava oya meda kila na nona rai ena iVolatabu. Eda na raica kina ni kilai keda yadudua o koya, e via vukei keda tale ga. Ia na vakabauta e sega ni nomu kila ga eso na ka me baleti koya. Ena vinakati tale ga mo drau veitokani voleka ena veidokai. Me vaka ga na veitokani kei na dua, ena sega ni yaco ga vakasauri. Ena “dei vinaka” noda vakabauta na Kalou ke da vulica e levu tale na ka me baleti koya, da “cakava na ka e vinakata” kei na noda vakadinadinataka na nona veivuke. (2 Korinica 10:15; Joni 8:29) Na mataqali vakabauta qori e vukei Janet me kua kina ni lomaocaoca vakalevu.

E kaya o Janet: “E dei na noqu vakabauta niu raica nona veivuke o Jiova. Levu na gauna e vakayacori vei keitou na ivalavala tawadodonu, dau dredre toka kena taqei. Au sega ni walia rawa neitou leqa ena noqu kaukaua ga, ia ni keitou masu wasoma, e dau taqomaki keitou o Jiova. Niu vakavinavinakataki koya, au nanuma lesu na veika e dau cakava vei keitou. E vukei keitou vakalevu ena gauna sara ga keitou vinakata kina. E vakalougatataki au tale ga me so noqu itokani lotu vaKarisito dina. Era dau tu vakarau e veigauna mera vukei au, ra ivakaraitaki vinaka tale ga vei rau na luvequ.” *

“Au kila na vuna e kaya kina o Jiova ena Malakai 2:16: ‘Au cata na veisere.’ Ena mosimosi ga vua e sega ni cala ni tawayalodina o watina. Sa vakayabaki nona biubiu o tamai keitou, ia so na gauna au dau galili. Ni yaco qori au na saga meu vukea e dua, ni na yaga tale ga vei au.” Ni muria o Janet na ivakavuvuli vakaivolatabu me kua ni dau tiko taudua, e sega kina ni lomaocaoca vakalevu. *Vosa Vakaibalebale 18:1.

Na Kalou e “tamadra na sega ni vakatamani qai nodra ivakatawa na yada.”Same 68:5

E kaya o Janet: “Dua na veivakacegui levu noqu kila ni ‘tamadra na sega ni vakatamani’ na Kalou ‘qai nodra ivakatawa na yada.’ Ena sega ni biuti keitou me vakataki watiqu.” (Same 68:5) E kila o Janet ni sega ni dau vakatovolei keda na Kalou ena “ka ca.” Ia e “lomasavu” ni solia na vuku “vei keda kece” kei na “kaukaua e uasivia na kaukaua ni tamata” meda kua ni lomaocaoca vakalevu.Jemesa 1:5, 13; 2 Korinica 4:7.

Ia vakacava ke da lomaocaoca ni leqataki noda bula?

^ para. 9 Raica na 1 Korinica 10:13; Iperiu  4:16.

^ para. 10 Me ikuri ni ivakamacala me baleta na ivakasala meda kua kina ni lomaocaoca vakalevu, raica na ulutaga levu “O Dau Lewa Vinaka Nomu Bula?” ena Yadra! ni Julai 2015, sa tiko tale ga ena Internet ena www.jw.org.