Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

O Bau Kila?

O Bau Kila?

Vakayagataki vakacava na vatu ni qaqaqi ena gauna makawa?

E vakayagataki na vatu ni qaqaqi me qaqi kina na covuata me falawa, oti qai buli kina na madrai. Ena vuvale kece, era dau vakayagataka e veisiga na marama se na dauveiqaravi na vatu ni qaqaqi. E ivakarau tu ni nodra bula ena gauna makawa mera rogoca na qaqaqi.—Lako Yani 11:5; Jeremaia 25:10.

E laurai ena droini kei na iyaya makawa e Ijipita na nodra dau vakayagataka na vatu qo. Ena biu na covuata ena dua na vatu raraba e vakalomana e via kala toka, so na gauna e vakatokai me saddle-quern ni vaka tu na irairai ni idabedabe ni ose. Ena tekiduru o koya e qaqaqi qai tabaka ena ligana ruarua na vatu e toka e cake, e via ka lailai toka, nona veitosoyaka tiko na vatu sa qaqia sara tiko ga na covuata. Tukuni ena dua na itukutuku ni bi ni vatu qo e rauta ni 2 ina 4 na kilokaramu. Rawa ni veivakamatei ke vakayagataki me iyaragi.—Dauveilewai 9:50-54.

Bibi dina ena bula vakavuvale na qaqi covuata ni vakaroti sara ga ena dua na lawa me kua ni kovei me ivakadei ni dinau. E kaya kina na Vakarua 24:6: “Me kua ni dua e kovea na iqaqaqi se na kena vatu e cake me ivakadei ni dinau, ni sa taura o koya me ivakadei na ka me bula kina e dua.”

E vakaibalebaletaki ina cava na “lomasere i”

E kaya na iVolatabu ni o Jisu e “tiko ena lomasere i Tamana.” (Joni 1:18, ivakamacala e ra) Na matavosa qori e vakaibalebaletaki ina nodrau veivolekati na Kalou kei Jisu, vaka kina nona vakadonui koya. E vakayagataki tale ga ena nodra ivakarau na Jiu nira kanavata tiko.

Ena gauna i Jisu, nira vakacegu na Jiu era dau dabe ena idabedabe balavu e tuva yavoki ena teveli ni kana. Era na vakanaulu ina teveli, na yavadra ga e dodo sobu, ra qai tataba toka ena duru ni ligadra imawi. Ena galala kina na ligadra imatau. E tukuni ena dua na itukutuku nira vakayagataka na yasadra imawi kece mera davo kina, ra davo veitaravi tale ga, “na ulu i koya e dabe toka e liu ena volekata sara na lomasere i koya e dabe tiko e dakuna, dau tukuni gona ni davo tiko ena lomaserena e dua tale.”

E ka dokai qai lagilagi nona mai davo e dua ena lomasere i ulunivuvale se o koya e veisureti ena kana magiti. Ena iotioti gona ni ivakayakavi ni Lakosivia, a davo toka ena lomasere i Jisu na yapositolo o Joni, qo na “tisaipeli e dau lomana o Jisu.” E rawa ni “ravi yani vei Jisu” me taroga e dua na taro.Joni 13:23-25; 21:20.