Raica sara na lewena

Raica na lewenivola

 ULUTAGA LEVU | KA MO CAKAVA NI O LOMAOCAOCA

Lomaocaoca e Veivanua!

Lomaocaoca e Veivanua!

“Niu lai voli kakana sa tu ga na bisikete kamica, ia sa va ga ya na kena isau! Siga ga e tarava sa sega tale ni dua na kakana e vo ena sitoa.”—Paul, Zimbabwe.

“E tukuna vei au o watiqu ni sa na biuti keitou. Meu na vosota vakacava na nona tawayalodina? Ratou na qai qaravi vakacava na gone?”—Janet, Merika.

“Ni tagi na alamu, totolo ga noqu vaqara na vanua meu vuni kina, kacakacabote na rokete au qai cokataki au yani ena fuloa. Ni oti mada ga e vica na aua se ninini ga na ligaqu.”—Alona, Isireli.

Eda bula tu qo ena dua na gauna ni lomaocaoca e “vakilai kina e levu na ka dredre.” (2 Timoci 3:1) E levu era rarawataka tu na leqa vakailavo, kavoro ni bula vakavuvale, ivalu, veitauvi ni mate rerevaki, se leqa tubukoso kei na kena eda vakavuna ga. Kena ikuri noda dau nuiqawaqawataka tu eso na ka va qo: ‘Ena tini ena kenisa na ka e vuce tiko qo e yagoqu?’ ‘Ena vakacava tu mada na vuravura era na susugi kina na makubuqu?’

Eda dau lomaleqataka ga eso na ka me vaka na veitarogi, itavi eda vakacolati kina, se nida kacivi meda lai veivosaki kei na dua eda kere cakacaka kina. Eso na ka eda lomaleqataka me baleta noda bula e itataqomaki tale ga. Ia e ca ke sa sivia tale na veika eda lomaocaoca kina. E vica na vakadidike se qai caka wale tiko ga qo vei ira e sivia na le 68,000 na uabula, qai laurai ni rawa ni matedole sara ga e dua ke lomaocaoca mada ga vakalailai. E veiganiti gona nona taroga o Jisu: “O cei vei kemudou ena vuku ni nona lomaocaoca e rawa ni vakadedetaka tale vakalailai na nona bula?” Ena lekaleka na bula ke da dau lomaocaoca. E veivakasalataki kina o Jisu: ‘Kua ni lomaocaoca.’ (Maciu 6:25, 27) Eda na rawa ni cakava vakacava qori?

Qo ena noda saga meda rawata na vuku, da vakabauta dina na Kalou, kei na noda nuitaka tiko na bula vinaka e se bera mai. Eda rairai sega ni vakila tiko nikua na bula dredre, de dua ena qai yaco ga mai na kena gauna. Meda raica sara mada qo eso na ivakasala yaga eratou muria o Paul, Janet, kei Alona me ratou kua kina ni lomaocaoca vakalevu.