Raica sara na lewena

Raica na lewenivola

ULUTAGA LEVU | E KAUAITAKI IKO NA KALOU?

E Vinakata na Kalou mo Nona iTokani

E Vinakata na Kalou mo Nona iTokani

“Ena sega ni lako mai vei au e dua ke sega ni vagolei koya mai o Tamaqu e talai au mai.”​—JONI 6:44.

VUNA ERA VAKATITIQA KINA ESO: E levu vei ira na vakabauta na Kalou era nanuma nira sega ni rawa ni veivolekati kei koya. E tukuna o Christina e dua na marama mai Ailadi qai dau gumatua ena lotu: “Au raici koya ga me Kalou e bulia na ka kece. Au sega ni kilai koya. Sega vakadua niu bau volekati koya.”

KA E TUKUNA NA VOSA NI KALOU: O Jiova ena sega vakadua ni soro ni vukei keda. A tukuna o Jisu ena dua na vosa vakatautauvata me baleta na nona dauveikauaitaki na Kalou: “Ke dua na tagane e duanadrau nona sipi qai yali e dua, ena sega beka ni biuta tu mada e ciwasagavulukaciwa ena ulunivanua me vaqara na dua e yali?” Na cava eda vulica? “E sega tale ga ni taleitaka na Tamaqu mai lomalagi me rusa e dua vei ira na lalai qo.”​—Maciu 18:12-14.

Era ka vakamareqeti vua na Kalou na “lalai qo.” Ia e ‘vaqara vakacava na Kalou o koya e yali’? E kaya na tikinivolatabu mai cake, ni o Jiova e vagolei ira na tamata vua.

O cei nikua era wasea e veivale kei na veivanua tale eso na itukutuku mai na iVolatabu me baleti koya na Kalou?

Dikeva mada na sala a vakaliuliu kina na Kalou me vagolei ira na tamata yalomalumalumu vua. Ena imatai ni senitiuri S.K., a talai Filipi na tisaipeli lotu vaKarisito me tavaka na matanivanua ni Iciopea ena nona kareti, me vakamacalataka tale ga vua na ibalebale ni parofisai vakaivolatabu e wilika tiko. (Cakacaka 8:26-39) Ena dua tale na gauna, a dusimaka na yapositolo o Pita me gole ina vale i Konilio e dua na vakailesilesi ni sotia ni Roma e gumatua tiko ena masu kei na sokalou. (Cakacaka 10:1-48) A dusimaka tale ga na yapositolo o Pita kei na nona itokani mera gole ina dua na uciwai ena taudaku ni koro o Filipai. Eratou mani sotavi Litia e dua na marama “e dau qarava na Kalou,” qai “dolava na lomana o Jiova me rogoca na veika” eratou tukuna.​—Cakacaka 16:9-15.

E laurai ena itukutuku kece qori ni saga tiko o Jiova mera kunei koya o ira kece era vakasaqarai koya tiko. O cei nikua era wasea e veivale kei na veivanua tale eso na itukutuku mai na iVolatabu me baleti koya na Kalou? E levu era na rairai tukuna, na “iVakadinadina i Jiova.” Tarogi iko, ‘De dua e vakayagataki ira tiko na Kalou meu rawa ni volekati koya kina?’ Keimami uqeti kemuni moni masuta na Kalou me vukei kemuni moni volekati koya. *

^ para. 8 Me ikuri ni ivakamacala, sarava na vidio Vuna mo Vulica Kina na iVolatabu ena www.jw.org.