Raica sara na lewena

Raica na lewenivola

ULUTAGA LEVU | E KAUAITAKI IKO NA KALOU?

E Raici Iko na Kalou ena Nona Kauai

E Raici Iko na Kalou ena Nona Kauai

“Ni sa rai tiko na matana ki nai valavala ni tamata, ka sa raica kecega na nonai lakolako.”—JOPE 34:21.

Era dau vinakata na gone mera kauaitaki vakalevu mai vei nodra itubutubu

VUNA ERA VAKATITIQA KINA E SO: E laurai ena dua na vakadidike a caka ena dua na gauna lekaleka sa oti, ni tiko ena noda isoso kalokalo e rauta ni 100 na bilioni na vuravura lalai. Ni laurai gona na rabailevu ni noda maliwalala, era taroga kina e so, ‘Na cava me kauaitaka kina na Dauveibuli kaukaua na veika eda cakava na ibulibuli somidi ena dua na vuravura?’

KA E TUKUNA NA VOSA NI KALOU: E sega wale ga ni vakarautaka na Kalou na iVolatabu qai guilecavi keda. E vakadeitaka vei keda o Jiova: “Ka’u na rai tiko vei iko ka tuberi iko.”—Same 32:8.

Dikeva mada na ivakaraitaki i Eka, na marama ni Ijipita ena ika20 ni senitiuri B.S.K. A sega ni dokai Serai na nona marama, mani vakamaduataki, qai dro ina vanualiwa. Vakacava ena sega ni kauaitaki Eka na Kalou ena vuku ni cala e cakava? E sauma na iVolatabu: “A sa kunei koya na agilosi i Jiova.” Qai vakadeitaka vua: “Sa . . . kila na nomu rarawa ko Jiova.” E tukuna kina o Eka vei Jiova: “Kemuni na Kalou ka raici au tiko.”—Vakatekivu 16:4-13.

E “raici” iko tale ga na Kalou. Vakasamataki ira mada na tina dauloloma era dau vakaraici luvedra vinaka, era na rairai vinakata na gone mera kauaitaki vakalevu mai vei nodra itubutubu. Na Kalou tale ga e dau vakaraici keda ena kauai ena gauna eda malumalumu se yalolailai kina. E kaya o Jiova: “Au sa tiko e na tikina cecere ka tabu, kei koya talega sa ramusu ka malumalumu na yalona, me vakabula na yalo i koya sa yalomalumalumu, ka vakabula na lomadra sa bibivoro.”—Aisea 57:15.

Ia o na rairai taroga: ‘E raici au vakacava na Kalou ena kauai? E dau yavutaka nona vakatulewa ena kequ irairai e sau, se dikeva na lomaqu qai kilai au vinaka?’