Raica sara na lewena

Raica na lewenivola

 E Veisautaka na Bula na iVolatabu

“Au sa Qai Kila ni Sega ni Noqu iTavi Meu Veisautaka na iTuvaki ni Vuravura Qo”

“Au sa Qai Kila ni Sega ni Noqu iTavi Meu Veisautaka na iTuvaki ni Vuravura Qo”
  • SUCU: 1966

  • VANUA: FINILADI

  • KA E KILAI KINA: DAUVALATAKA NODRA TAQOMAKI NA MANUMANU

NOQU BULA E LIU:

Keitou tiko ena siti o Jyväskylä, ena loma kei Finiladi. Au dau taleitaka na veika bula niu se gone. Keitou dau lai sarava vakavuvale na veikauloa totoka kei na drano e voleka ena neitou itikotiko. Au taleitaki ira tale ga na manumanu niu se gone; au dau roqota na pusi kei na koli! Niu sa uabula, au rarawataka na nodra dau vakalolomataki na manumanu. Au lai lewena sara e dua na isoqosoqo e dau valataka nodra vakalolomataki na manumanu.

E levu na ka keimami cakava me tarovi kina na nodra vakalolomataki na manumanu. Keimami vakarautaka eso na ivola, keimami tayabe ena neimami kudruvaka na kena dau volitaki na kulinimanumanu, kei na nodra vakayagataki na manumanu ena vakadidike vakasaenisi. Keimami tauyavutaka e dua tale na isoqosoqo ni nodra taqomaki na manumanu. Era sega ni taleitaka na vakailesilesi na ka keimami cakava ni sa rui sivia tale. Levu na gauna au vesu qai veilewaitaki.

Au dau rarawataka tale ga na veika vakaloloma e yaco tu e vuravura. Au lai lewena eso tale na isoqosoqo, wili kina na Amnesty International kei na Greenpeace. Au tokona vakalevu na nodra sasaga. Au valataka na nodra dodonu na dravudravua, waloloi, kei ira na vakaloloma.

Toso na gauna, au qai kila niu na sega ni rawa ni veisautaka na ituvaki e yaco tu e vuravura. Era sa walia rawa na isoqosoqo qori eso na leqa lalai, ia era sega ni walia rawa na leqa lelevu. Au raica ni sa qai ca ga vakalevu na ituvaki ni vuravura qo, ra qai sega ni bau kauai kina na tamata. Au yalolailai sara ga.

VEISAUTAKI AU NA IVOLATABU:

Dua na ka noqu rarawa ni sa dreve na noqu sasaga, au mani saga meu kila na Kalou  kei na iVolatabu. Au a vulica tu na iVolatabu kei ira na iVakadinadina i Jiova. Era dau kauaitaki au, ia au sega ni bau vakasamataka ena gauna qori meu veisautaka na noqu ivakarau ni bula. E rairai sa kena gauna qo meu veisau.

Niu tekivu wilika na iVolatabu au vakila sara ga na vakacegu. E levu sara na ka au wilika kina me baleta na nodra dau karoni na manumanu. Kena ivakaraitaki, e tukuna na Vosa Vakaibalebale 12:10: “Na tamata vinaka ena taqomaka na nona manumanu.” (Good News Translation) Au dikeva tale ga ni sega ni vakavuna na Kalou na leqa e yaco tu e vuravura. Sa qai ca ga na ituvaki kei vuravura ni levu era sega ni muria nona veidusimaki. E uqeti au sara ga na loloma i Jiova kei na nona vosovoso vakadede.Same 103:8-14.

Au mani volavola vei ira na iVakadinadina i Jiova ena noqu vakayagataka na kuponi ni mekesini meu kerea kina na ivola Na Cava Sara Mada e Kaya na iVolatabu? Sega ni dede rau sikovi au mai e dua na veiwatini iVakadinadina, au mani vakadonuya nodrau veisureti meu vulica na iVolatabu. Au sa dau tiko tale ga ena nodra sokalou ena nodra Vale ni Soqoni. Qori e vakavuna meu taleitaka na ka au vulica tiko ena iVolatabu.

E vukei au na iVolatabu meu veisautaka noqu ivakarau ni bula. Au sa muduka na vakatavako, gunusivia, vosavosa ca, qai savasava na kequ irairai. Au dokai ira na veiliutaki. (Roma 13:1) Au sa biuta tale ga na noqu ivakarau ni bula vakasisila au a bobula tu kina.

E sega ni rawarawa meu biuta na isoqosoqo au lewena tu. Au nanuma niu sa liumuritaki ira keu vakacegu mai na cakacaka. Ia niu vulica na iVolatabu au kila kina ni Matanitu ga ni Kalou ena veisautaka na ituvaki kei vuravura. Au vakadeitaka niu na tokona na veika e vauca na Matanitu qori, qai vukei ira eso tale mera mai kila.Maciu 6:33.

KENA YAGA:

Au dau veivakaduiduitaki tu e liu. Au dau vinakata tale ga me saumi vei ira na tamata ca na ka era cakava. Ia e vukei au na iVolatabu meu veisautaka noqu rai, meu lomani ira na tamata kece. (Maciu 5:44) Dua na sala au vakaraitaka kina na loloma qori, oya na noqu vunautaka na itukutuku vinaka ni Matanitu ni Kalou vei ira eso tale. Au marau ni cakacaka totoka qo e veivakacegui, vakavu marau, qai vakadeitaka vei ira na tamata ni sa voleka ni veisau na ituvaki ca qo.

Au lomavakacegu niu dau nuitaki Jiova ena noqu leqa. Au vakadeitaka ni na sega ni vakalaiva na Dauveibuli mera vakalolomataki na kawatamata kei na manumanu me tawamudu, se me vakacacani tiko ga na vuravura totoka qo. Ena yasana adua, ena vakayagataka na nona Matanitu me veisautaka na ituvaki ca kei vuravura. (Aisea 11:1-9) Dua na ka na noqu marau niu mai kila na ka dina qori, kei na noqu vukei ira eso tale mera kila tale ga. Au sa qai kila ni sega ni noqu itavi meu veisautaka na ituvaki ni vuravura qo.