Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 TORO VOLEKA VUA NA KALOU

Ena “Vakamamautaka na Lomamuni” o Koya

Ena “Vakamamautaka na Lomamuni” o Koya

Vakacava e kauaitaki keda dina o Jiova, se vakawaletaka na rarawa eda sotava? Ena vakacegui keda na kena isau ena iVolatabu. Na Kalou e kauaitaki keda dina na kawatamata, qai vinakata meda marautaka na bula. E vinakata mada ga mera marautaka vakatautauvata na tamata vinaka kei na tamata ca na veika totoka e vakarautaka. Meda dikeva mada na ka e tukuna na yapositolo o Paula.Wilika Cakacaka 14:16, 17.

Ni vosa tiko vei ira era sega ni qarava na Kalou ena siti o Lisitira, e kaya o Paula: “Ena veitabatamata sa oti, a vakatarai ira na veimatanitu [na Kalou] mera cakava na ka ga era vinakata, ia e raici votu na ivakadinadina ni nona caka vinaka tiko ga, e vakatauca vei kemuni na uca mai lomalagi, e solia na gauna vinaka ni tatamusuki, qai vakamamautaka na lomamuni ena kakana kei na marau.” Na cava e vakaibalebaletaka tiko o Paula?

O ira mai Lisitira era dauteitei ra qai tu ena vanua bulabula. Era kila gona na ka e tukuna tiko o Paula. Ia e vakadreti ira o Paula ni vakavuna na Kalou na tau ni uca kei na vula e vuavuaivinaka kina na nodra itei. Ni levu na ka era tamusuka ra qai marautaka na kakana totoka, era sa vakila sara tiko ga na nona yalovinaka na Kalou.

Eda rawa ni vulica e levu na ka me baleta na Kalou o Jiova ena vosa i Paula vei ira mai Lisitira.

E solia vei keda o Jiova na galala ni vakatulewa. Dikeva ni vakatarai ira na veimatanitu o Jiova mera “cakava na ka ga era vinakata.” E tukuna e dua na ivoladusidusi vei ira na dauvakadewa iVolatabu, ni vosa qori e rawa ni vakaibalebaletaka mera “caka lomadra” se “cakava na ka era nanuma ni donu.” E sega ni vakasaurarataka e dua o Jiova me sokaloutaki koya. E solia vei keda na galala ni vakatulewa, oya meda digitaka na ivakarau ni bula meda muria.Vakarua 30:19.

E vinakata o Jiova meda kilai koya. E kaya o Paula, ni laurai “votu na [nona] ivakadinadina.” E kaya na ivoladusidusi se qai cavuti oti mai, ni vosa qori e rawa ni kena ibalebale ni “vakadinadinataka sara ga vei keda se mataqali Kalou vakacava o koya.” Era vakadinadinataka na ibulibuli ni Kalou na “veika tawarairai me baleti koya,” wili kina na nona yalovinaka, vuku, kaukaua, kei na loloma. (Roma 1:20) E vakaraitaka o Jiova e levu na ka me baleti koya ena iVolatabu. (2 Timoci 3:16, 17) Vakacava e vakadinadinataka qori ni vinakata meda kilai koya?

E vinakata mada ga mera marautaka vakatautauvata na tamata vinaka kei na tamata ca na veika totoka e vakarautaka

E vinakata o Jiova meda marau. E kaya o Paula ni ‘vakamamautaka na lomada ena kakana kei na marau.’ O ira mada ga era sega ni via kilai Jiova era rawa ni mamau ra qai marau ena so na gauna. Ia na Kalou e vinakata meda vakila na marau dina qai tawamudu. Ena rawa qori ke da vulica na ka dina me baleta na Kalou da qai bulataka.Same 144:15; Maciu 5:3.

E yaga vei keda e veisiga na nona yalovinaka o Jiova. Vakacava mo vulica e levu tale na sala o rawa ni vakaraitaka kina ni o vakavinavinakataka na Kalou e ‘vakamamautaka na lomamu ena kakana kei na marau’?

Wili iVolatabu e Vakatututaki ena Julai

Cakacaka 11-28