Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

E Veivakavulici Tiko o Lotu ena iTovo Savasava?

E Veivakavulici Tiko o Lotu ena iTovo Savasava?

E kaya o Sylvia e dau veiqaravi ena vale ni malumalumu: “Au vuli vata kei ira era kaya nira lotu. Ia era dau lawaki ena veitarogi ra qai dau vakayagataka na wainimategaga. E yacana wale ga na lotu.”

E kaya e dua na turaga o Lionel: “Era dau qiri mai na noqu itokani vakacakacaka mera lasutaka nira tauvimate. Era dau lai lotu, ia e yacana wale ga, e vaka ga e dua na iyaya e ukuuku wale tu ga.”

Sa vodi mai na sasaga ni lotu me veisautaka na nodra ivalavala na tamata. E levu nikua era “qarava na Kalou,” ia e sega vei ira na “kena dina.” (2 Timoci 3:5) Era sega ni vakaraitaki vinaka na nodra iliuliu ni lotu, era sega tale ga ni vakavulici ira na lewenilotu ena ivakasala vakaivolatabu me baleta na itovo savasava. Era nanuma kina e levu ni sega ni kauaitaka na Kalou na ka era cakava.

KA E KAYA NA IVOLATABU

E tukuna na iVolatabu ni dau kauaitaki keda na Kalou qai tarai koya na ka eda cakava. E “vakararawataki koya” mada ga nodra talaidredre na Isireli. (Same 78:40) Ia era na “marautaka vakalevu cake mai lomalagi” na nona veisau e dua mai na nona ivakarau ca. (Luke 15:7) Ni dua e vakatotomuria na itovo vakasakiti ni Tamada vakalomalagi, ena lomani koya vakalevu, cata na ka e cata na Kalou qai vinakata na ka e vinakata.Emosi 5:15.

VAKACAVA O IRA NA IVAKADINADINA I JIOVA?

E tukuna na Deseret News ena siti o Salt Lake, Utah, e Merika, ni o ira na iVakadinadina i Jiova “era dau vukei ira na lewenivanua me vinaka nodra bula vakavuvale, mera dau veivukei qai daudina.” E tomana: “Era dau saga mera muria na ivakatagedegede ni bula savasava. Era vakabauta tale ga ni na vakaleqa na nodra veiwekani kei na Kalou na vakatavako, gunusivia, vakayagataki ni wainimategaga, veimauilavo, veiyacovi vakasisila kei na veimoceri vakamataqali vata.”

Vakacava o ira na iliuliu ni lotu era sa bau vukei ira nodra lewenilotu mera muria na ivakatagedegede savasava ni Kalou?

E vukei ira vakacava na iVakadinadina na nodra vulica na itovo ni Kalou? E tukuna o Sylvia, sa cavuti oti mai: “E takalevu ena vanua ni cakacaka na veidabui, qai rawarawa meda vakamuai kina. Ia na noqu mai kila ni cata o Jiova * na veidabui, e uqeti au meu cakava na ka dodonu. Au marau qai lomavakacegu.” E vakadeitaka o Sylvia ni nona bulataka na ka e vakabauta e vinaka kina nona ivakarau ni bula.

^ para. 9 O Jiova na yaca ni Kalou e volai ena iVolatabu.