Raica sara na lewena

Raica na lewenivola

Yalololoma e Bibi Duadua Vua na Kalou

Yalololoma e Bibi Duadua Vua na Kalou

 Yalololoma e Bibi Duadua Vua na Kalou

NA NONA dau yalololoma e dua sa kena turaga e uqeta sara ga e dua na gonetagane mai Japani. Na turaga yalomalua qori e daukaulotu, sa oti e vica vata na yabaki qai butuka tale na vanua qori, e se sega tale ga ni kila vinaka na vosa vakaJapani. Ia e dau lai sikovi koya na gonetagane qori e veimacawa me rau veitalanoataka na iVolatabu. E dau matadredredre qai yalovinaka, e dau vosovoso tale ga ena gauna e sauma kina eso na ka e lomatarotarotaka na gonetagane.

Na nona yalololoma na daukaulotu ena sega vakadua ni guilecava na gonetagane ya. A vakasamataka kina na gonetagane: ‘Ke vakavuna na iVolatabu me dau yalololoma qai yalovinaka e dua, au na vinakata sara ga meu vulica.’ Qori e uqeti koya me vulica kina na veika e se bera ni kila. Io, na yalololoma e tara na loma ni tamata, ena veilauti vakalevu cake mai na ka eda tukuna.

Na iTovo e Kilai Tani Kina na Kalou

E dau kena ivakarau meda yalololoma vei ira na wekada voleka, baleta na yalololoma e kena ibalebale na veilomani e kune ena dua na veiwekani dina. * Ia na yalololoma e dua na itovo e kilai tani kina na Kalou. E tukuna o Jisu ni sega wale ga ni dau yalololoma na Tamana vakalomalagi vei ira era lomani koya, vei ira tale ga na “sega ni dau vakavinavinaka.” A uqeti ratou kina nona imuri o Jisu me ratou dau yalololoma vei ira kece na tamata: “Moni uasivi, ni uasivi na Tamamuni vakalomalagi.”​—Luke 6:35; Maciu 5:48; Lako Yani 34:6.

A buli na tamata me ucuya na Kalou, e rawa kina nira bulataka se vakaraitaka na yalololoma. (Vakatekivu 1:27) Io, eda rawa ni vakatotomuri koya na Kalou qai sega ni yalani ga vei ira na wekada na noda vakaraitaka na yalololoma. E vakamacalataka na iVolatabu ni yalololoma e dua na itovo talei e umani ena vua ni yalo tabu ni Kalou, se igu tawarairai. (Kalatia 5:22) Koya gona, eda rawa ni bucina na itovo qori ena noda vulica e levu na ka me baleta na Kalou na Dauveibuli, da qai toro voleka vua.

E noda ivakarau ni bula na tamata na yalololoma, e raica tale ga vakabibi na itovo qori na Kalou, e veiganiti gona me tukuna vei keda meda “veilomani.” (Efeso 4:32) Eda vakadreti tale ga: “Ni kua ni guilecava na veikauaitaki,” se yalololoma vei ira na vulagi.​—Iperiu 13:2.

Vakacava eda rawa ni yalololoma vei ira eso tale, se vei ira mada ga na vulagi ena vuravura qo e sega ni vakilai vakalevu kina na vakavinavinaka kei na yalololoma? Na cava ena vukei keda meda vakaraitaka qori? Na cava meda kauaitaka kina vakabibi?

E Bibi Vua na Kalou

Ni oti nona vakamacalataka na yapositolo o Paula na bibi ni kena vakaraitaki na itovo na yalololoma vei ira na tani, e tomana: “Eso mada ga era sega ni kila nira a vakacegui ira na agilosi ena nodra veikauaitaki.” Vakasamataka mada qo, ena tarai iko vakacava ke tukuni mo vakacegui ira na agilosi? Ia o Paula a tukuna rawa e liu na matavosa qo, “era sega ni kila.” E rawa ni biu va qo, e vakabibitaka o Paula ke sa matau vei keda meda yalololoma vei ira tale na so, okati kina o ira na vulagi se o ira eda sega ni kila, de dua eda na vakalougatataki ena sala eda sega ni namaka.

E levu na iVolatabu era vakamacalataka na vosa i Paula me salavata kei na itukutuku me baleti rau o Eparama kei Loti ena Vakatekivu wase 18 kei na 19. Ena ituvaki ruarua qori a rairai vei rau na agilosi me vaka na vulagi qai vakasavuya e dua na itukutuku bibi. Na itukutuku a vakasavui vei Eparama e baleta na vakayacori ni vosa ni Kalou vei luvena. Ia vei Loti, e baleta na nona vakabulai mai na kena vakarusai na siti o Sotoma kei Komora.​—Vakatekivu 18:1-10; 19:1-3, 15-17.

Ke o wilika na tikinivolatabu e cavuti mai cake, o na raica ni rau vakaraitaka na yalololoma o Eparama kei Loti vei ira na vulagi dina ga nira sega ni veikilai. Ena gauna vakaivolatabu, e kena ivakarau mera vakacegui ira na dau taubale kei ira na tavali​—se ra itokani, veiwekani se vulagi. Era vakaroti mada ga na Isireli ena Lawa i Mosese mera dau kauaitaki ira na sega ni Isireli ena kedra maliwa. (Vakarua 10:17-19) Ia ni bera ni vakaroti qori ena Lawa, erau sa vakaraitaka na itovo qori o Eparama kei Loti. Erau saga vagumatua me rau vakaraitaka na itovo na yalololoma vei ira na vulagi, rau qai vakalougatataki kina.

Na nona dau yalololoma o Eparama e sega wale ga ni vakalougatataki kina ena dua na luvena tagane, eda vakalougatataki tale ga kina. Ena sala cava? E bibi dina na ka rau a cakava o Eparama kei na luvena o Aisake ena kena vakayacori na inaki ni Kalou. Na nodrau kawa sara ga ena qai basika kina na Mesaia, o Jisu. Na nodrau vakabauta e vakatayaloyalotaka na ka ena cakava na Kalou meda vakabulai kina na kawatamata ena vuku ni nona loloma kei na nona yalololoma soli wale.​—Vakatekivu 22:1-18; Maciu 1:1, 2; Joni 3:16.

Na italanoa qori e vakaraitaka na veika e vinakata na Kalou vei ira e lomana mera cakava kei na nona raica vakabibi na itovo qo na yalololoma. Qori e bibi sara ga meda vakaraitaka ena mata ni Kalou.

Nida Yalololoma, ena Vukei Keda Meda Kila Vinaka na Kalou

E tukuna na iVolatabu ni levu ena gauna qo “era na sega ni dau vakavinavinaka, era na sega ni yalodina, sa na yali vei ira na veilomani vakaveiwekani.” (2 Timoci 3:1-3) Sega ni vakabekataki ni o dau sotava e veisiga e levu na tamata era vakaraitaka na itovo qori. Ia e sega ni kena ibalebale qori meda sega sara ga ni dau yalololoma. Era vakadreti na lotu vaKarisito: “Kua ni sauma na ca e caka vei kemuni. Caka vinaka vei ira na tamata kece.”​—Roma 12:17.

Ke da dau yalololoma vakalevu eda na rawa ni caka vinaka vei ira na tani da qai veikauaitaki. E tukuna na iVolatabu: “O koya yadua e dau loloma . . . e kila tale ga na Kalou.” Dua na sala eda rawa ni vakaraitaka kina na noda loloma oya na noda dau yalololoma. (1 Joni 4:7; 1 Korinica 13:4) Io, nida yalololoma vei ira tale na so, eda na kilai koya vinaka na Kalou, eda na marau tale ga kina. E tukuna o Jisu ena nona iVunau ena Ulunivanua: “Era marau na dau yalololoma​—nira na kunea na yalololoma. Era marau na loma vinaka​—nira na raica na Kalou.”​—Maciu 5:7, 8, Young’s Literal Translation.

Dikeva mada na ivakaraitaki i Aki, e dua na radinivale mai Japani e rua na luvena tagane. A sega ni tadra me takali o tinana, mani lomabibi kina vakalevu. Na levu ni nona lomabibi ena gadrevi vua me lai raica e dua na vuniwai ena so na gauna. Ena dua na gauna, a toki yani ena nona yasayasa e dua na vuvale. O ratou na vuvale qo e se qai takali ga na tamadratou ena dua na vakacalaka, e se bula tiko ga o watina kei na lima na luvena eratou se gone. Dua na ka na nona lomani ratou o Aki, mani saga me kilai ratou kece vakavuvale. E cakava na ka ga e rawata me vukei ratou kina​—kena wasei na kakana, soli na isulu eratou sa sega ni vakayagataka, kei na so tale​—qori e seavu kina na nona lomabibi o Aki. E vakadinata na ka e tukuna na iVolatabu: “E marau vakalevu o koya e solia na ka, vakalailai o koya e taura na ka.” (Cakacaka 20:35) Io, na ka vinaka duadua eda rawa ni cakava nida lomabibi oya meda yalololoma.

“Soli ka Vei Jiova”

E sega ni gadrevi sara mo vakayagataka e levu na ilavo mo vakaraitaka kina na yalololoma. E sega tale ga ni vakatau ena ka o rawa ni cakava se na nomu kaukaua. E levu era dau marautaka nida matadredredre, tauca na vosa ni veinanumi, veivuke, solia e dua na iloloma, se nomu laivi ira eso tale mera liu vei iko ena vanua ni wawa. Ke o sega ni kila na ka mo tukuna se na ka mo cakava ni o sotava e dua na ituvaki, tukuna se cakava ga na ka vinaka. A uqeti koya vakalevu na gonetagane a cavuti mai ena itekitekivu ni ulutaga qo na nona yalololoma na daukaulotu, qori e veilauti vakalevu mai na ka e tukuna. Sa rauta me vinakata na Kalou vei ira na sokaloutaki koya mera “vinakata na yalololoma”!—⁠Maika 6:⁠8.

“Ni tau vakayalololoma e dua na vosa, e rawa ni veivakatakatai ena tolu na vula ni draki batabata.” Ena ivosavosa qori vakaEsia e vakamacalataka sara ga vakamatata ni gauna eda vakaraitaka kina vakalailai na yalololoma, e rawa ni yaco kina e levu na ka vinaka. Ni donu na inaki e vakaraitaki kina na yalololoma, salavata kei na nona lomana na Kalou e dua, ena vakamarautaki ira na kena vo. Ke sega mada ga ni kauaitaki na nomu dau yalololoma, e sega ni kena ibalebale ni sega ni yaga. E raica qori vakabibi na Kalou. Ke da dau yalololoma, e vakadeitaka vei keda na iVolatabu ni vaka eda “soli ka vei Jiova.” (Vosa Vakaibalebale 19:17) Vakacava mo raica na sala o rawa ni vakaraitaka kina na yalololoma vei ira era tiko tikivi iko?

[iVakamacala e ra]

^ para. 5 Na Oxford English Dictionary e vakamacalataka na ibalebale taumada ni “yalololoma,” oya na “veiwekani veivolekati; e vakilai kina na veilomani dina.”

 [iYaloyalo ena tabana e 19]

A vakalougatataki vakalevu nona dau yalololoma o Eparama

 [Tikina bibi ena tabana e 20]

Ni o sega ni kila na ka mo tukuna se cakava, tukuna se cakava ga na ka vinaka

[iYaloyalo ena tabana e 20]

Nida dau yalololoma, e vaka meda “soli ka vei Jiova”