Raica sara na lewena

Raica na lewenivola

Qo au sa Qai Kilai Koya na Kalou au Qarava

Qo au sa Qai Kilai Koya na Kalou au Qarava

 Qo au sa Qai Kilai Koya na Kalou au Qarava

Talanoataka o Marieta Manuel Bacudio

A veisiko mai e dua na italatala ni lotu Penitiko e tukuni ni tu vua na kaukaua ni veivakabulai. Ena gauna e tarai au kina, au bale qai sega ni vakilai au, au “curumi yalo tabu.” Niu vakilai au tale, au kila ni sa tu vei au na kaukaua ni veivakabulai, na ka sara ga au dau vinakata tu. Au mai sotava vakacava na ituvaki qori? A tara vakacava noqu bula? Ni bera niu tukuna na kena isau, meu vakamacalataka mada na noqu isususu.

AU SUCU ena 10 Tiseba, 1968 e Ilocos Norte, ena Yatu Filipaini. Keitou le tini na veitacini, au kena ikavitu. Keitou susu ena lotu Katolika me vakataki ira ga e levu na kai Filipaini. Au rawata noqu vuli ena sekeneri ena 1986, au qai vinakata meu dua na nasi. Ia a mai seva na inakinaki qori ni a tauvi au e dua na mate levu. Au nanuma niu na mate. Ena levu ni noqu rarawa, au masuta kina na Kalou me vukei au, au tukuna tale ga vua niu na qaravi koya ena noqu bula taucoko ke vakabulai au.

Niu sa bula mai ena noqu davo balavu voli, au se nanuma tiko ga na noqu yalayala vua na Kalou. Koya gona, ena June 1991 au curu ena koronivuli ni vuli iVolatabu ni lotu Penitiko. E okati ena lawa ni koronivuli qori na nomu saga mo rawata na “isolisoli soli wale ni yalo tabu.” Au vinakata meu rawata na kaukaua ni veivakabulai. Keimami vulica e koronivuli ni na rawati qori ena neimami dau lolo kei na masumasu. Ena dua na gauna au via vakaraitaka niu sa rawata na “isolisoli” qori, au lai vakarogoca lo e dua na yalewa keirau kalasi vata ni masu tiko vakadomoilevu ena gauna ni masumasu. Ni sa voleka ni oti nona masu, au lesu totolo sara ena vanua au tekiduru tu kina. Oti, au qai tukuna vua na ka sara ga a kerea ena nona masu, a vakabauta sara niu sa rawata na “isolisoli soli wale” qori!

E levu na ka au dau taroga ena gauna au se vuli tiko kina. Kena ivakaraitaki, na Maciu 6:9 e tukuna na ka e baleta na ‘Tamada’ kei na ‘yacana.’ Au dau taroga, “O cei na Tamada e tukuna tiko o Jisu?” kei “Na yaca i cei e dodonu me dokai?” Na nodra isau ni taro na noqu qasenivuli e sega ni matata qai sega ni veivakacegui. Era vakamacalataka na Le Tolu Vakalou, era tukuna tale ga ni sega ni dodonu mera kila e levu. E vakavu veilecayaki vei au. Ia au tomana tiko ga noqu vuli talatala.

Sotavi Ira na iVakadinadina i Jiova

Keimami vakavulici ena koronivuli ni vuli iVolatabu ni o ira na iVakadinadina i Jiova era uqeta na ivakavuvuli ni lotu lasu ena kena ivakatagedegede e ca sara. Era kilai tale ga mera meca i Karisito. Dua na ka na noqu sevaka na lotu qori.

Ena ikarua ni yabaki ni noqu vuli, au lai sikovi rau na noqu itubutubu ena gauna ni sereki. A mai sikovi au tale ga o Carmen e dua na tuakaqu yalewa, ni rogoca niu sereki mai vale. E sa papitaiso o Carmen me dua na iVakadinadina i Jiova qai nona cakacaka vakatabakidua na vunau. Ena gauna e via vakavulici au kina ena ka me baleta na Kalou, ena levu ni noqu katakata, au tukuna vua: “Au sa kilai koya tiko na Kalou au qarava!” Ni oti noqu karaci koya, au biligi koya, au qai sega ni solia vua na galala me vosa kina vei au.

Niu lesu tale e koronivuli, a vakauta yani o Carmen e dua na ilavelave ni brochure E Dodonu Li Mo Vakabauta Na Tikovakalewetolu? * Au taura ga, lobiraka qai vakama. Au se rarawataki koya tiko ga.

Au sa iTalatala

Ni toso tiko noqu vuli ena koronivuli e vulici kina na iVolatabu, au sa rawai ira eso mera mai lewe ni noqu lotu. Dua na ka na noqu marau ni rau sa mai tomani au ena lotu Penitiko o tinaqu kei ganequ.

Ena Maji 1994, au taura kina na noqu ivola mai na koronivuli ni vuli iVolatabu ni lotu Penitiko. A veisiko tale ga yani ena gauna qori e dua na italatala me vaka ga e vakamacalataki ena itekitekivu ni talanoa. Keimami vinakata kece na tauri ivola me keimami veimaliwai kei koya baleta ni tiko vua na isolisoli ni veivakabulai. Keimami lai duri vata kei koya ena buturara, vakasausau, qai lade ni keimami vakamuria na ivakatagi. Era bale kece o ira e tara, era “curumi yalo tabu.” * Au bale tale ga ena gauna e tarai au kina, au qai sega ni vakilai au. Niu vakilai au tale, au rere, ia dua na ka na noqu marau niu vakila niu sa rawata na kaukaua ni veivakabulai.

Au vakayagataka sara na kaukaua qo meu vakabula kina e dua na gone e tauvimate qai katakata sivia na yagona. Ena gauna au masulaki koya kina, e tekivu buno mani yali sara na katakata. Au nanuma kina niu sa rawa ni vakayacora na ka au yalataka vua na Kalou. Ia au vakila ni se vo tiko e dua tale na ka meu cakava. Au vakabauta dei ni dua ga na Kalou, ia au sega ni kila se o cei o koya. Au dau lomatarotarotaka tale ga e levu na ivakavuvuli ni lotu au lewena.

Na Cava e Veisautaka na Noqu Rai?

Ni oti na veika kece qori, au sa qai sevaki ira ga vakalevu na iVakadinadina i Jiova. Ena gauna au kunea kina na nodra ivola, au na vakama. Ia a qai yaco e dua na ka tawanamaki. Au kidacalataka ni sa sega tale ni qai lewena na noqu lotu o tinaqu. A vakavulici koya tiko ena iVolatabu o Carmen. Dua na ka na noqu katakatataki Carmen.

Dua na siga au kunea na mekesini na Yadra! ena vale nei tinaqu. Au via vakama sara ga. Ia na noqu via kila na cava e wilika tiko, au cega sara e vica na tabana. E dreta na mataqu e dua na ulutaga me baleta e dua na turaga a kaukaua tale ga nona vakabauta na ivakavuvuli ni lotu au lewena. Ia na gauna e vakawilika kina na nodra ivola na iVakadinadina qai vakadinadinataka vakaivolatabu, e vakadeitaka kina ni sega ni ivakavuvuli vakaivolatabu na Le Tolu Vakalou, eli, kei na ivakavuvuli ni bula tale tiko na yalo ena gauna e mate kina e dua. E tarai au sara ga qori. Qo sara ga na ka au dau via kila tu. Tekivu mai na gauna qori, au vinakata sara ga meu na kila na ka dina ena iVolatabu.

Au sa qai taleitaka ga vakalevu na nodra ivola na iVakadinadina ena gauna au wilika kina e dua tale na italanoa ena Yadra! me baleta na veisau levu a cakava e dua a bobula tu ena gunusivia kei na wainimate gaga ena gauna e sa vulica kina na iVolatabu. Au kunea sara e dua brochure Na Yaca Vakalou Ka Na Tudei Tu Ga Ka Sega Ni Mudu. * Niu wilika, au sa qai kila ni yaca ni Kalou o Jiova. Dua na ka noqu marau niu vulica na ka dina me baleta na Kalou dina duadua ga!​—Vakarua 4:39; Jeremaia 10:10.

Au tomana tiko ga na noqu dau wilika lo na ivola qori, au qai vulica kina e levu na ka dina mai na iVolatabu. Kena ivakaraitaki, au vakavulici ena koronivuli ni lotu Penitiko ni Kalou o Jisu, ia au sa qai kila ena iVolatabu ni o koya e “Luve ni Kalou bula.”​—Maciu 16:15, 16.

Veisau na Lomaqu

Ena gauna keirau sota tale kina kei Carmen, a kurabui ena gauna au kerea kina me dua na noqu ilavelave ni brochure Na Yaca Vakalou Ka Na Tudei Tu Ga Ka Sega Ni Mudu kei na so tale na ivola. E vica na yabaki noqu vuli tiko ena koronivuli ni vuli iVolatabu qori, ia au sega ni vakavulici ena ka dina; au a vakamatabokotaki tu. Dua na ka noqu marau ena gauna qo niu sa mai kila na ka dina ena iVolatabu. Au vakadinata na vosa i Jisu: “Oni na kila na ka dina, na ka dina ena qai sereki kemuni.” (Joni 8:32) Na ka dina kece qo a tekivu me veisautaka na noqu bula.

Au dau nanuma tu niu na rawa ni tomana tiko ga na noqu itavi vakaitalatala, ena gauna vata qori me kua ni kilai na noqu qarava na Kalou o Jiova. Au qai raica ni sega ni rawa niu tomana tiko ga na noqu vakavulica e levu na ivakavuvuli ni lotu. Ia dua na ka noqu lomaleqa. Ena rawa vakacava meu qarava noqu bula keu kere vakacegu ena noqu itavi vakaitalatala? Ena vakamadua ina lotu ke dua na nodra italatala e tavuki me dua na i Vakadinadina i Jiova. Au mani tomana tiko ga na noqu veivakavulici me vaka e dua na italatala, ia au sega ga ni vakavuvulitaka na ka lasu.

Ni keirau sota tale kei Carmen, a tukuna meu lai tiko ena nodra soqoni na iVakadinadina i Jiova. Me vaka niu dau gole vakalevu ena valenivolavola liu ni lotu Penitiko e Laoag City, au na vaqara lo na nodra Vale ni Soqoni na iVakadinadina i Jiova e kea. Au veikilai sara kei Alma Preciosa Villarin ena ivavakoso ekea, e dau kilai tu ena yaca “Precious,” e nona cakacaka vakatabakidua na vunau. Dina ni se cala tiko ga noqu rai me baleti ira na iVakadinadina, ia au ciqoma nona veisureti me vakavulici au ena iVolatabu.

A dau yalovosovoso na tuakaqu ena gauna e wasea kina vei au na ka dina mai na iVolatabu. Au raica tale ga na itovo qori vei Precious. E vukei au vakalevu meu kila vinaka na iVolatabu, dina ga ni vakacudrui au, au dau saqata na ka e tukuna, so na gauna e dau kaukaua sara ga na noqu vosa niu vakabibitaka tiko ga na ka au vakavulici kina. E tarai au sara ga na nona dau veikauaitaki, yalomalumalumu kei na nona yalomalua o Preciuos kei na so tale na iVakadinadina. E uqeti au qori meu via qaravi Jiova.

Ena Julai 1995, au raica ni gadrevi meu vakacegu mai na noqu itutu vakaitalatala keu via vakamarautaki Jiova. Na vuna? E vakatayaloyalotaki lotu lasu na ka e tukuna na Vakatakila 18:4: “Ni lako tani vua na noqu tamata, ke oni sega ni via vakaivotavota ena nona ivalavala ca, ke oni sega tale ga ni vinakata me yacovi kemuni na nona rarawa.” Au na qai rawata vakacava na noqu bula? Au vulica ena Iperiu 13:5 ke da cakava na loma ni Kalou, e yalataka o koya: “Au na sega sara ni biuti iko se vakanadakui iko.”

E dina ni dau kaukaua na nodrau tusaqati au o tamaqu kei ganequ, ia ni vo e rua na macawa meu papitaiso meu dua na iVakadinadina, au doudou meu gole i vale qai vakama na veika kece au dau vakayagataka ena noqu itavi vakaitalatala. Niu cakava qori, au vakila ni sa yali kece na kaukaua a tu vei au e liu. Au sa sega ni qai vakila tale me bi na yagoqu, me vaka e bikai au tiko e dua na ka ena gauna au moce kina. Sa sega tale ga na iyaloyalo ni tamata au dau raica ena katubaleka. Au vulica ena iVolatabu ni so na isolisoli era sa tu nikua, me vaka na kaukaua ni veivakabulai, e sega ni vu vakalou, ia era vakavuna ga na yalo velavela. Au marautaka dina na noqu sa galala mai na nodra veivakamuai, me vaka na goneyalewa bobula a “curumi koya na timoni” qai cemuria o Paula.​—Cakacaka 16:16-18.

E dua na ka marautaki niu duri vata kei tinaqu ena gauna me keirau papitaiso kina me keirau dua na iVakadinadina i Jiova ena Seviteba, 1996! Ni oti ga noqu papitaiso, au curu ena taba ni veiqaravi ni cakacaka vakatabakidua ni iVakadinadina i Jiova, qai marautaka noqu veiqaravi tu me vica vata na yabaki.

Au sa vakawati ena gauna qo kei Silver. Keirau dau sasagataka me keirau tuberi luvei keirau yalewa ena ka dina mai na iVolatabu. Keitou sa duavata kei na so tale na taciqu ena qaravi Jiova. Au veivutunitaka na vica na yabaki noqu sega ni mai kilai koya vinaka na Kalou, ia au marau ena gauna qo niu sa kilai koya na Kalou au qarava.

[iVakamacala e ra]

^ para. 10 Tabaka na iVakadinadina i Jiova, sa sega ni tabaki nikua.

^ para. 13 Na “curumi yalo tabu” e vakaibalebaletaki ena ka e dau yaco ena so na lotu, e vakabauti kina ni curuma vakaukaua e dua na lewenilotu na “yalo tabu” qai vakavuna nona bale.

^ para. 18 Tabaka na iVakadinadina i Jiova.

 [iYaloyalo ena tabana e 13]

Au tauri ivola meu dua na italatala

[Tikina bibi ena tabana e 13]

Au vakayagataka sara na kaukaua qo meu vakabula kina e dua na gone e tauvimate qai katakata sivia na yagona

 [iYaloyalo ena tabana e 14]

 Vakavulici au ena iVolatabu o Preciuos

[Tikina bibi ena tabana e 14]

Na ka dina kece qo a tekivu me veisautaka noqu bula

[iYaloyalo ena tabana e 15]

Na gauna keirau papitaiso kina ei tinaqu

[iYaloyalo ena tabana e 15]

Au sa dua na iVakadinadina i Jiova qai noqu cakacaka vakatabakidua na vunau

[iYaloyalo ena tabana e 15]

Na watiqu, luvei keirau yalewa kei ira na wekaqu era tomani keitou ena sokalou dina

[Tikina bibi ena tabana e 15]

Dua na ka noqu marau niu vulica na ka dina me baleta na Kalou dina duadua ga!