Raica sara na lewena

Raica na lewenivola

O Bau Kila?

O Bau Kila?

 O Bau Kila?

E dau vakau vakacava na ivola ena gauna vakaivolatabu?

E dau vakayagataka na matanitu o Perisia na tabana ni vakau ivola ni vanua ya me dau vakauta na ivola e vauca na ka e baleta na matanitu. E vakamacalataka na ivola na Esiteri ena iVolatabu na ka e dau cakava na matanitu o Perisia me vakauta kina na ivola: “A sa volavola ko [Moatekai] ka cavuti Easuerosi na tui, ka tabaka e na mama ni tui, ka vakauta na veivola vei ira era daucicitaka nai vola, kei ira sa vodo ose, kei ira sa vodo meule, kei na kameli, kei na manumanu totolo.” (Esiteri 8:10) Na matanitu o Roma e tiko tale ga na nona taba ni veiqaravi va qori me dau kauta na ivola ni matanitu se mataivalu.

Ke dua e vola ga na nona ivola, me vaka na nona ivola na yapositolo o Paula kei na so tale, ena sega ni vakatarai me soli ena tabana ni veiqaravi va qori. Ke dua e vutuniyau, e rawa ni tala ga e dua na bobula me kauta na nona ivola. Ia e levu era dau solia ga vei ira na nodra itokani voleka, se so na vulagi era gole tiko ena vanua e vakau kina na ivola. Era rawa ni kauta na ivola na lewenivuvale, itokani, sotia, se so na dauveivoli. E macala ga ni na laurai vinaka o koya ena kauta na ivola, me dau nuitaki, e rawa ni tukuna vakavinaka na itukutuku e vinakati me vakasavui qai taqomaka tale ga vakavinaka na ivola. E tukuna na iVolatabu ni o Paula e dau solia eso na nona ivola vei ira na tacina lotu vaKarisito era gole tiko ena dua na vanua.​—Efeso 6:21, 22; Kolosa 4:7.

E dau caka vakacava na veivoli e Isireli makawa?

Na ivurevure ni ilavo ni matanitu o Isireli na iteitei, susu manumanu kei na veivoli. Na iVolatabu e cavuta na makete era tiko ena matamata ni koro​—“matamata-ni-koro ni sipi,” “matamata-ni-koro ni ika” kei “matamata-ni-koro mai na tu-i-cake.” (Niemaia 3:1, 3; Jeremaia 19:2) Na yaca kece qori e vakaibalebaletaka na ivoli era volitaki ena dui vanua era volitaki kina. Na iVolatabu tale ga e cavuta na nodra ‘gaunisala na dauvavavi’ e Jerusalemi kei na levu na ivoli era volitaki kina.​—Jeremaia 37:21.

Vakacava na kedra isau? E tukuna e dua na ivakamacala vakaivolatabu: “E dau veiveisau na isau ni iyaya ena veisenitiuri sa oti, qai dredre me vakadeitaki na isau ni dua na ivoli ena dua na gauna kei na vanua e volitaki kina.” Ia ena so na itukutuku makawa okati kina na iVolatabu, e tukuni ni dau tubu na isau ni iyaya ena gauna ya. Kena ivakaraitaki, era dau volitaki vakalevu ena gauna makawa na bobula. A volitaki o Josefa ena 20 na tikinisiliva​—de dua ena sikeli​—kena irairai qori na ivakatautauvata ni isau ni dua na bobula ena ika18 ni senitiuri B.S.K. (Vakatekivu 37:28) Ena tolu na drau na yabaki tarava sa 30 na sikeli na kena isau. (Lako Yani 21:32) Ena ikawalu ni senitiuri B.S.K., sa tubu cake tale ena 50 na sikeli. (2 Tui 15:20) Ena rua tale na senitiuri tarava, qo na gauna e veiliutaki kina na matanitu o Perisia, sa qai tubu sara ina 90 na sikeli se sivia. Koya gona, na veitubuyaki ni isau ni iyaya, e dua na leqa e yaco ena veitabagauna sa oti me yacova mai nikua.

[iYaloyalo ena tabana e 22]

Dua e dau kauta na ivola ni Perisia

[iYaloyalo ena tabana e 22]

iVakatakarakara ni makete e volitaki kina na vuata

[[Credit Line]

© DeA Picture Library/​Art Resource, NY