Raica sara na lewena

Raica na lewenivola

Na Veika Era Vosota Voli na Yalewa

Na Veika Era Vosota Voli na Yalewa

 Na Veika Era Vosota Voli na Yalewa

“Niu raica na nodra dau vakalolomataki na yalewa, au sega sara ga ni via dua vei ira.”​—ZAHRA, YABAKI 15, lavetaki ena mekesini na GEO, ilavelave ni vosa vakaVaranise.

NA VEIKA e tukuna na goneyalewa qori e vakaraitaka sara ga na leqa e yaco tiko e vuravura, qori na nodra vakila tiko na goneyalewa kei na marama na itovo kaukaua kei na veivakaduiduitaki ena nodra bula taucoko. Dikeva mada eso na tikina qo.

Vakaduiduitaki na tagane kei na yalewa. E levu na itubutubu mai Esia era vinakata na luvedra mera tagane, sega ni yalewa. E laurai ena dua na ripote ni Matabose kei Vuravura ena 2011 mai na yasayasa qori, ni voleka ni 134 na milioni na yalewa era sa yali mai na iwiliwili ni lewenivanua ena vuku ni vakalutu, nodra vakamatei nira se gonedramidrami, kei na nodra vakaweleweletaki.

Vuli. E rauta ni rua na ikatolu na marama kei na yalewa e veiyasai vuravura era sega ni vuli se sega ni sivia e va na yabaki na nodra vuli.

Nodra vakasagai. E sivia na 2.6 na bilioni na yalewa era tiko ena veivanua e raici tu kina me sega ni basulawa na nodra dau vakasaurarataki na yalewa mai vei watidra mera veiyacovi.

Tabana ni bula. Ena veivanua era vakatorocaketaki tiko, era mate ena veiyarua na miniti na yalewa bukete se gauna ni nodra vakasucu baleta nira sega ni qaravi vinaka vakavuniwai.

Na ka e dodonu mera taukena. E dina nira teivaka na yalewa e sivia na veimama na itei e vuravura, ia ena levu na matanitu e sega ni vakatarai vakalawa mera taukena e dua na ka se me dua na nodra ivotavota ni qele.

Na cava e kau tani kina vei ira na yalewa na dodonu qori? Eso na itovo ni vanua era muria na vakabauta se na ivalavala vakalotu e uqeta se vakadonuya na nodra vakalolomataki na yalewa kei na kena caka vei ira na ivalavala kaukaua. E tabaki ena niusiveva mai Varanise na ka e tukuna o Chandra Rami Chopra e loya mai Idia: “E dua na ka e tautauvata kina na lawa ni veimatalotu kece: Era tokona na nodra vakaduiduitaki na yalewa.”

Vakacava e va tale ga qori nomu rai? Vakacava o nanuma nira beci na yalewa ena iVolatabu me vaka e tukuna eso tale na ivola ni lotu? Eso era kaya ni so na tikinivolatabu e rairai tiko kina na vakasama qori. Ia e vakacava na Kalou e cavuti ena iVolatabu, cava mada nona rai me baleti ira na yalewa? E dina ni levu na tamata era raica vakabibi na vakasama qori, ia na noda dikeva vinaka na ka dina e kaya na iVolatabu ena vukei keda meda kila na kena isau.

[Credit Line]

© G.M.B. Akash/​Panos Pictures