Raica sara na lewena

Raica na lewenivola

“Ka ra na Kila na Veimatanitu ni Sai au ko Jiova”

“Ka ra na Kila na Veimatanitu ni Sai au ko Jiova”

 Toro Voleka Vua na Kalou

“Ka ra na Kila na Veimatanitu ni Sai au ko Jiova”

KAYA mada ke o beitaki ena dua na cala o sega ni cakava, ena tarai iko vakacava? Vakacava ke vakararawataki ira eso tale na cala qori, okati kina e levu na tamata tawacala? O na vinakata sara ga mo vakadinadinataka ni o sega ni cakava na cala qori! O bau kila ni dau tarai Jiova tale ga na ituvaki va qori? E levu nikua era beitaka vakailasu na Kalou ni vakavuna tiko na veika tawadodonu kei na rarawa e vuravura. Ena vinakata beka o Jiova me vakadinadinataka ni sega ni dina qori? Io, ena kauai sara ga! Raica mada na ka e tukuna na Isikeli.​—Wilika Isikeli 39:7.

E tukuna o Jiova, “Au na sega . . . ni laiva me vakacacani tale na yacaqu tabu.” Ena gauna era beitaki koya kina na tamata ni vakavuna na veika tawadodonu, era sa vakarogorogocataka sara tiko ga na yacana. Ena sala cava? Ena iVolatabu na ‘yaca’ e dau vakaibalebaletaka na kena irogorogo e dua. E tukuna e dua na ivola ni yaca ni Kalou e dusia na “ka e kilai me baleti koya​—e vakatakilai koya kina; e dusia tale ga na nona rogo kei na nona rokovi.” Na yaca i Jiova e okati kina na kena irogorogo. Na cava na nona rai o Jiova me baleta na veika tawadodonu? E cata! Qai lomani ira na vakalolomataki ena veika tawadodonu. * (Lako Yani 22:22-24) Ena gauna era tukuna kina na tamata ni vakavuna na Kalou na ka sara ga e cata, era sa vakarogorogocataka na yacana. Koya gona era sa ‘vosacataka tiko na yacana.’​—Same 74:10.

O na raica ni vakayagataka vakarua o Jiova na malanivosa “yacaqu tabu.” (Tikina 7) Ena iVolatabu, na yaca i Jiova e vakaibalebaletaki vakalevu ena vosa “tawacala” kei na “savasava.” Na vosa “savasava” e basika kina na vakasama ni wasei tani; e dusia tale ga ni uasivi qai sega ni vakamelei rawa. Na yaca i Jiova e savasava baleta ni Kalou savasava​—e wasei tani sara ga mai na ivalavala ca se ka duka. O raica rawa na vuna e tukuni kina nira vosavakacacataka vakalevu na “yaca tabu” i Jiova o ira era beitaki koya tiko ni vakavuna na veika ca?

Na usutu ni iVolatabu oya ni inaki i Jiova me vakarokorokotaki tale na yacana ena nona vakayagataka nona Matanitu. Na usutu qori e vakabibitaki ena ivola na Isikeli, qai tukuni wasoma kina nira “na kila na veimatanitu ni sai au ko Jiova.” (Isikeli 36:23; 37:28; 38:23; 39:7) Dikeva ni o ira na veimatanitu ena sega ni soli vei ira na digidigi mera na kilai Jiova se sega. Ia era na ‘qai kila.’ E rawa tale ga ni tukuni ni nona inaki o Jiova me cakava e dua na ka era na vakasaurarataki kina na veimatanitu e vuravura mera vakadinata ni na vakayacora na ka e yalataka​—o Jiova na Turaga Cecere Duadua, na yacana e dusia na ka kece e savasava, uasivi qai sega ni vakamelei rawa.

Ni cavuti wasoma na yalayala qo, “ka ra na kila na veimatanitu ni sai au ko Jiova,” e itukutuku marautaki vei ira kece era vinakata me vakaoti na veika tawadodonu kei na rarawa. Sa vakarau vakayacora o Jiova na ka e yalataka qori, ena vakawabokataka tale ga na ka kece e dau vakarogorogocataka na yacana. Ena vakaotia na veika ca kei ira era vakavuna tiko, ia ena vakabulai ira ga era kila qai doka na ibalebale ni yacana. (Vosa Vakaibalebale 18:10) Vakacava e uqeti iko qori mo vulica na sala o rawa ni toro voleka kina vei Jiova, na Kalou savasava, qai dau “vinakata na ka dodonu”?​—Same 37:9-11, 28.

Wili iVolatabu e Vakatututaki ena Seviteba:

Isikeli 39Taniela 3

[iVakamacala e ra]

^ para. 4 Raica na ulutaga ni “Draw Close to God​—A Lover of Justice,” ena Watchtower 1 Noveba, 2008.