Nodra Tuvaitutu na ika130 ni Kalasi e Kiliati

Siga Namaki Qai Marautaki

E SEGA ni vakabekataki ni siga namaki qai marautaki na nodra tuvaitutu na ika130 ni kalasi ni Watchtower Bible School of Gilead. Era tabili yani ena tuvaitutu qori ena Vakarauwai, 12 Maji, 2011, e le 8,500 vakacaca, wili kina o ira na gonevuli, nodra dui vuvale kei na nodra itokani. Era sega ni marautaka wale ga na siga oya, era marautaka tale ga na nodra sa vakarau veilesiyaki e veiyasa i vuravura na daukaulotu era tuberi vinaka mera veivakavulici ena ka dina ena iVolatabu.

“Era Kalougata ko Ira Kecega Era sa Waraki” Jiova

Na vakasama veivakacegui qori e lavetaki mai na Aisea 30:18, e ulutaga ni nona ivunau o Geoffrey Jackson, e lewe ni iLawalawa Dauvakatulewa ni iVakadinadina i Jiova, e jeameni tale ga ni soqo. A sega ni rawarawa na vuli ra qai tavariri na gonevuli ena nodra tuvaitutu, ia e vosa vakayalololoma qai veiwali toka vakalailai o Geoffrey Jackson ni vakavinavinakataki ira qai vakacaucautaki ira na gonevuli era vakacavara na vuli e Kiliati. Na cava mera namaka na gonevuli ena veigauna sa tu mai liu? E vakamacalataka e tolu na vakasama yaga ena Aisea 30:18-21.

Kena imatai, e kaya o Brother Jackson: “Moni nuidei ni na rogoca o Jiova na nomuni masu.” E vakamacalataka na vosa veivakadeitaki qo ena tikina e 19: “Ni sa rogo na domo ni nomu tagi, ena lomani iko sara ko koya [Kalou].” Ena vosa vakaIperiu taumada, na tikinivolatabu qori e sega ni tukuna tiko na nona rogoca na Kalou e dua na ilawalawa, ia na nona rogoca sara ga e dua. E tukuna sara o Brother Jackson ni rogoca na noda masu yadua o Jiova. “Ni dua na Tama, e sega ni taroga o Jiova: ‘Na cava o sega ni yaloqaqa kina vakataki ka ya?’ Ia e vakarogoci keda yadua qai sauma na noda masu.”

Kena ikarua, a tukuna o koya e vunau nida na sega ni galala mai na leqa. “E sega ni yalataka o Jiova ni na rawarawa na noda bula; ia ena vukei keda.” E vakaraitaka na tikina e 20 ni parofisaitaka na Kalou ni gauna e bukudruadruataki kina o Isireli, na rarawa kei na veivakasaurarataki ena yacovi ira ena ka ni veisiga me vaka ga na kana madrai kei na gunu wai. Ia e dau tu vakarau o Jiova me vakabulai ira na nona tamata. Ena tarai ira tale ga na gonevuli e Kiliati na leqa kei na ituvaki dredre era sega ni nanuma ena yaco! E tomana o Brother Jackson: “Oni rawa ni nuidei ni na vukei kemuni o Jiova moni walia rawa na leqa yadua oni sotava.”

Kena ikatolu, a vakadreti ira na gonevuli o Brother Jackson ena ka e tukuna na tikina e 20 kei na 21: “Oni rawa ni nuidei moni dusimaki, ia moni qara na veidusimaki qori!” E tukuna ni vinakati vei ira na lotu vaKarisito kece nikua mera vakatudaliga vinaka ena vosa i Jiova ena iVolatabu kei na ivola vakaivolatabu. A vakauqeti ira vakayalololoma na gonevuli mera wilika tiko ga e veisiga na iVolatabu ni na rawati kina na bula.

‘Moni Rerevaki Jiova’

O Anthony Morris e lewe ni iLawalawa Dauvakatulewa, a vakamacalataka na ibalebale ni matavosa “rerevaki Jiova” e dau tukuni ena iVolatabu. (2 Veigauna 19:7) Na vosa oya e sega ni vakaibalebaletaka na rere vakalialia, ia e vakaibalebaletaka na nona vinakata dina e dua me cakava na ka e dodonu. E rawa ni vakaibalebaletaka tale ga na levu ni nona veidokai e dua kei na kena vu dina mai lomana me lai vakavuna sara na nona ninini se tavariri. Mani vakamasuti ira na gonevuli o Brother Morris:  “Me laurai tale ga vei kemuni na rere va qori ena nomuni ilesilesi vakadaukaulotu.” Era na vakaraitaka vakacava nira dokai Jiova? A tukuna o koya e rua na sala vinaka.

Kena imatai, a vakauqeti ira na gonevuli o Brother Morris mera muria na ivakasala ena Jemesa 1:19: “Totolo ni vakarorogo, . . . berabera ni vosa.” E kila ni levu sara na ka era sa vulica ena lima na vula ni nodra vuli, ia mera qarauna mera kua ni raqataka na veika era kila ena vanua era lesi kina. E kaya: “Moni vakarorogo mada. Rogoci ira ena ivavakoso oni na lewena kei ira era liutaka na cakacaka ena vanua oni veiqaravi kina; ni rogoca na ka era tukuna me baleta na vanua kei na kena itovo. Ni kua ni madua na kaya: ‘Au sega ni kila.’ Ni levu tiko ga na ka oni vulica, oni sa na qai vakadinata ga ni lailai sara na ka oni kila, na rai qori e vakaraitaka ni sa yaga na nomuni vuli mai Kiliati.”

Kena ikarua, a wilika o Brother Morris na Vosa Vakaibalebale 27:21: “Sa vakatovolei na siliva e na kuro, kei na koula e na lovo; sa vakakina na tamata e na gusu i koya sa dokai koya.” E vakamacalataka ni koula kei na siliva ena vinakati me vakatovolei se vakasavasavataki, eda rawa tale ga ni vakatovolei nida vakacaucautaki. Ena sala cava? Na veivakacaucautaki ena kilai kina se da tamata vakacava. E rawa ni vakavuna meda dokadoka qai vakaleqa na noda veiwekani kei Jiova, e rawa tale ga ni uqeti keda meda vakadinata ni dodonu ga meda vakavinavinakataki Jiova da qai vakadeitaka meda muria tiko ga na nona ivakatagedegede savasava. A mani uqeti ira na gonevuli o Brother Morris me donu na nodra rai nira vakacaucautaki—mera vakaraitaka kina nira “rerevaki Jiova.”

“Vakamareqeta Nomu iLesilesi”

A vosa ena ulutaga levu ni porokaramu o Guy Pierce e lewe ni iLawalawa Dauvakatulewa. A vakamacalataka kina ni vosa “kaulotu,” e kena ibalebale “e dua e talai ena dua na ilesilesi.” E kaya, sa rauta me levu na isoqosoqo e duidui na ilesilesi era talai kina na nodra daukaulotu. E levu era kauai ga ena veivakabulai ra qai qara na iwali ni leqa ena veika vakapolitiki. Ia “oni duidui o kemuni.” Ena sala cava?

Era vulica ena iVolatabu na gonevuli e levu sara na ka me baleta na veivakabulai. Ni vakabula e dua na goneyalewa lailai o Jisu, ‘dua na ka na nodrau marau’ na nona itubutubu. (Marika 5:42) Era reki tale ga na mataboko nira vakabulai vakacakamana. Na inaki ni cakamana qori meda kila kina na ka ena cakava o Karisito ena vuravura vou sa voleka. Era na vakabulai mai na veimataqali mate na “isoqosoqo levu” ni tamata yalododonu era na bula ni muduki na ituvaki ca kei vuravura. (Vakatakila 7:9, 14) Era sa na bulabula vinaka tale ga vakayago na wekadra lomani era na vakaturi. Raitayaloyalotaka mada na gauna marautaki oya!

Ia e vakamacalataka o Brother Pierce ni sega ni bibi duadua na veivakabulai vakayago. O ira na tauvimate e vakabulai ira o Jisu era tauvimate tale. Era mate tale o ira era vakaturi. O ira mada ga na mataboko era a vakabulai era mataboko tale nira mate. Na ka bibi duadua a vakayacora o Jisu na nona vukei ira na tamata mera veiyaloni kei na Kalou, mera veiwekani voleka kei koya. E nodra ilesilesi tale ga na daukaulotu e Kiliati mera veivakabulai vakayalo. Era vukei ira na tamata mera veiyaloni kei na Tamada vakalomalagi mera vakabulai kina vakayalo. O ira ga era vakabulai vakayalo era na vakaicovitaki mera bula tawamudu. E kaya o Brother Pierce ni “veivakabulai vakayalo qori ena vakalagilagi kina na Kalou. Ena vuavuaivinaka kina na nomuni cakacaka vakaitalatala.”

Tolu Tale na ka Talei ena Porokaramu

“Ena Siga Vinaka Nikua?” E tau donu sara ga na taro a taroga qori o Robert Rains e lewe ni Komiti ni Tabana e Merika. A uqeti ira na gonevuli mera vakadeitaka mera marautaka na siga yadua ni nodra cakacaka vakaulotu nira vakayagataka vinaka na gauna, ra dikeva na Vosa ni Kalou nira nuiqawaqawa ra qai nuitaki Jiova ena masu.

“O na Vakavoutaka na ka Makawa?” O Mark  Noumair na qasenivuli e Kiliati a taroga qori ena nona ivunau. A vakamacalataka na 1 Joni 2:7, 8, a tukuna kina na yapositolo o Joni na “ivunau makawa” e “ivunau vou” tale ga. Erau dusia ruarua e dua ga na ivunau—ni o ira na imuri i Karisito era veilomani nira sega ni nanumi ira ga ra qai vakuai ira ena so na ka ena vukudra eso tale. (Joni 13:34, 35) E makawa na ivunau ni se tukuna sara qori o Jisu vei ira na nona imuri taumada ena vicasagavulu na yabaki sa oti; e vou tale ga ni vinakati vei ira na lotu vaKarisito mera veilomani nira sotava eso na ituvaki e vou vei ira. Ena basika e levu na ituvaki era na vulagi kina, ena vinakati gona mera qara na sala vovou mera vakaraitaka kina na loloma ra qai cakava vinaka sara. Ena rawa vakacava qori?

A vakamasuti ira o Brother Noumair: “Kua ni cakava na ka o sega ni taleitaka.” A tukuna ke da raica eso na itovo eda sega ni taleitaka da qai cakava, qori ena vakaleqai keda ga. Ena yasana adua, nida raica eso na sala vovou meda vakaraitaka kina na loloma ena ituvaki dredre va qori, eda sa vakacilava tiko na “rarama dina” da qai vakaseavutaka na butobuto vakayalo.

“Cola na iColacola.” E dua tale na qasenivuli e Kiliati o Michael Burnett, a vosa ena ulutaga veiganiti qori. A tukuni ira ena vanua vakaAferika e dau taqa e uludra na icolacola bibi. Era vakayagataka na kata, e dua na tikinisulu vivigi e biu e uludra me dabe vinaka qai toka dei kina na icolacola e taqa tu e uludra, mera kua tale ga ni leqataka ni na lutu nira taubale. E levu tale ga na itavi era na colata na daukaulotu ena veivanua era veilesiyaki kina, ia e soli tale ga vei ira e dua na ka e vaka na kata: oya na nodra vakavulici vinaka ena iVolatabu. Nira bulataka na ka era vulica, era na veiraurautaka na nodra icolacola ra qai cakava vinaka sara.

iRogo

E okati ena vuli e Kiliati na cakacaka vakavunau kei ira na iVakadinadina i Jiova ena ivavakoso era lesi kina. O William Samuelson ena tabana e qarava na vuli vakayalo (Theocratic Schools Department), a lesuva eso na nodra irogo na gonevuli qai vosa ena ulutaga: “Me Kakua ni Cegu na Ligamu.” (Dauvunau 11:6) Ni vakatasuasuataki na ka e yaco dina, era vakaraitaka kina na gonevuli na nodra gugumatua ena cakacaka vakaitalatala nira vunautaka na itukutuku vinaka ena waqavuka, valenikana kei na vanua ni vakatawa benisini. Era vunau e veivale, vunau tawalokuci, era volavola tale ga. E sega ni cegu na ligadra qai totoka sara na ka e rawati kina.

O Kenneth Stovall e veiqaravi e Kiliati e vakataroga e levu na ka eratou sotava ena cakacaka vakaulotu o Barry Hill a veiqaravi mai Ecuador kei na Dominican Republic, o Eddie Mobley a veiqaravi mai Côte d’Ivoire, kei Tab Honsberger a veiqaravi mai Senegal, Benin, kei Haiti. E totoka na nodratou ivakamacala ena ulutaga “Vakatovolei Jiova, o na Vakalougatataki Kina.” (Malakai 3:10) Me kena ivakaraitaki, e vakamacalataka o Brother Hill na dredre ni nodrau saga vakaveiwatini me rau vakamatauni rau ena draki e Ecuador, e dau katakata qai levu na kuvu, ena so tale na gauna e katakata qai soso na vanua. E vakasamataka tale ga na rua na veimama na yabaki erau vakayagataka voli kina na vokete ni rau sili. Ia erau sega ni bau vakasamataka me rau biubiu, erau kila ni nodrau ilesilesi e veivakalougatataki i Jiova. A tukuna o Brother Hill: “Qori sara ga na neirau bula.”

Ni cava na porokaramu, a wilika e dua na gonevuli na nodra ivola ni vakavinavinaka vakaciriloloma na lewenikalasi. E tukuni ena ivola: “Sa toso cake na neimami vakabauta ina dua na kena ivakatagedegede vou, ia keimami kila ni se levu na ka me keimami cakava.” Era tauri sitivikiti kece na gonevuli, qai tukuni vei ira na duidui vanua era lesi kina. A tinia na porokaramu o Brother Jackson ni vakadeitaka vei ira na gonevuli mera nuidei ni na vukei ira o Jiova ena veigauna sa tu qo e liu, vakauasivi ena ituvaki dredre era na sotava. Nira biubiu o ira na tiko ena tuvaitutu, e sa qai dei ga na veika era vakanuinuitaka ra qai nanamaki kina. E sega tale ni lomatarotarotaki ni na vakayagataki ira na daukaulotu vou qo o Jiova mera vakayacora e levu sara na veika vinaka.

 [Chart/​Mape ena tabana e 31]

VEIKA ME BALETA NA KALASI

9 vanua era cavutu mai kina

34.0 ivakatautauvata ni yabaki

18.6 ivakatautauvata ni yabaki mai na gauna e papitaiso kina

13.1 ivakatautauvata ni yabaki ena cakacaka vakaitalatala vakatabakidua

[Mape]

(Raica tale na ivola)

Era lesi na lewenikalasi ina vanua e volai toka e ra

NODRA ILESILESI NA DAUKAULOTU

ARGENTINA

ARMENIA

BURKINA FASO

BURUNDI

CONGO (KINSHASA)

CZECH REPUBLIC

HAITI

HONG KONG

IDONISIA

KENYA

LITHUANIA

MALESIA

MOZAMBIQUE

NEPAL

PAPUA NEW GUINEA

ROMANIA

SENEGAL

TANZANIA

UGANDA

ZIMBABWE

iYaloyalo ena tabana e 31]

Nodra Tuvaitutu na Kalasi 130 ni Watchtower Bible School of Gilead

E nabataki na iyatu me tekivu mai liu me yaco i muri, e tuvai na yaca me tekivu mai na imawi me gole ina imatau.

(1) Molina, Z.; Bassolino, S.; Alatsis, C.; Arroyo, A.; Niño, L.; Merkling, S.; Clark, M.

(2) Little, C.; Tibaudo, S.; Jakobsson, S.; Moreno, J.; Rodriguez, A.; Lee, K.; Cárdenas, H.; Aguilar, L.

(3) Clairbush, A.; Polley, A.; Caldwell, S.; Adame, J.; Hildebrandt, S.; Shoemaker, I.; Grohman, N.; Galvez, G.

(4) Clark, J.; Bassolino, A.; Packham, K.; Adame, J.; Knaus, M.; Niño, M.; Moreno, R.; Galvez, J.

(5) Rodriguez, D.; Geynes, M.; Molina, J.; Aguilar, A.; Alatsis, I.; Manno, A.; Grohman, R.; Packham, J.

(6) Geynes, S.; Cárdenas, M.; Arroyo, C.; Manno, C.; Merkling, J.; Lee, H.; Clairbush, X.; Jakobsson, P.

(7) Little, J.; Hildebrandt, B.; Shoemaker, M.; Knaus, K.; Caldwell, J.; Tibaudo, F.; Polley, C.