Raica sara na lewena

Raica na lewenivola

Me Uqeti Keda na “iLoloma e Sega ni Vakamacalataki Rawa”

Me Uqeti Keda na “iLoloma e Sega ni Vakamacalataki Rawa”

“Me vakavinavinakataki na Kalou ena nona loloma soli wale, na iloloma e sega ni vakamacalataki rawa.”​—2 KOR. 9:15.

SERE: 121, 63

1, 2. (a) Na cava e okati ena ‘iloloma soli wale e sega ni vakamacalataki rawa’? (b) Cava eda na veivosakitaka ena ulutaga qo?

NI TALA mai vuravura o Jiova na luvena duabau, e solia kina vei keda na iloloma vinaka duadua! (Joni 3:16; 1 Joni 4:9, 10) E vakatoka qori na yapositolo o Paula me ‘iloloma soli wale e sega ni vakamacalataki rawa.’ (2 Kor. 9:15) Cava e cavuta kina na matavosa qori?

2 E kila o Paula ni na yaco dina na yalayala kece ni Kalou ena mate vakaisoro i Jisu. (Wilika 2 Korinica 1:20.) Koya gona, na ‘iloloma soli wale e sega ni vakamacalataki rawa’ qori, e okati kece kina na nona yalovinaka o Jiova kei na dei ni nona loloma e vakaraitaka vei keda ena vuku i Jisu. E vakatubuqoroqoro dina qori, e sega nida vakamacalataka rawa. Me uqeti keda vakacava na iloloma qori? Ena uqeti keda vakacava na iloloma qori nida vakanamata ena iVakananumi ni mate i Karisito ena Vukelulu, ika23 ni Maji, 2016?

 ILOLOMA TALEI NI KALOU

3, 4. (a) Na cava e yaco ni soli vei iko e dua na iloloma? (b) Ena veisautaka vakacava nomu bula na iloloma talei?

3 Ni soli vei iko e dua na iloloma, o na marautaka. Ia eso na iloloma e talei sara qai veisautaka noda bula. Kena ivakaraitaki, kaya mada ke o basulawa o qai totogimate. Ni o vakarau vakamatei sara tu ga, e gole mai e dua o sega ni kila qai bolea na kemu itotogi. E tu vakarau me mate ena vukumu! Vakacava ena tarai iko na nona loloma?

4 Ni o vakasamataka na ka e cakava, ena uqeti iko mo dikeva nomu itovo, o via veisautaka tale ga na ivakarau ni nomu bula. De dua o sa na yalololoma vakalevu, o veikauaitaki qai vosoti ira era cala vei iko. Ena nomu bula kece, o kila ni o dinau tu vua a solia nona bula ena vukumu.

5. Na cava e uasivi duadua kina na iloloma ni Kalou?

5 Na iloloma e solia vei keda o Jiova ena vuku i Karisito, e uasivia na iloloma eda veivosakitaka mai. (1 Pita 3:18) Qo na vuna: Nida sucu ivalavala ca, eda sa totogimate kece. (Roma 5:12) Ni yalololoma o Jiova, e tuvanaka me gole mai vuravura o Jisu me “mate ena vukuda na tamata kece.” (Iper. 2:9) E sega ni vakabulai keda wale ga o Jiova, e vakarautaka tale ga na sala me kau laivi vakadua kina o mate. (Aisea 25:7, 8; 1 Kor. 15:22, 26) O ira kece era vakaraitaka nodra vakabauti Jisu era na rawata na bula vakacegu kei na marau me tawamudu ena veiliutaki i Karisito kei ira na lumuti ena Matanitu ni Kalou. (Roma 6:23; Vkta. 5:9, 10) Na ka vinaka cava tale e okati ena iloloma talei i Jiova?

6. (a) Na iloloma talei cava i Jiova o vakanamata kina? (b) Tukuna e tolu na sala ena uqeti keda kina na loloma i Jiova?

6 E okati ena loloma i Jiova na nona vakabulai keda mai na veimataqali mate, nona veisautaka na vuravura me parataisi, kei na nodra vakaturi na mate. (Aisea 33:24; 35:5, 6; Joni 5:28, 29) Eda lomani Jiova dina kei na Luvena lomani ena vuku ni ‘iloloma soli wale e sega ni vakamacalataki rawa.’ Ia na cava eda na cakava kina? Meda dikeva mada qo na sala e uqeti keda kina na loloma ni Kalou (1) meda muria voleka na ivakaraitaki i Karisito Jisu, (2) meda vakaraitaka nida lomani ira na tacida, (3) meda veivosoti tale ga mai vu ni lomada.

“UQETI KEITOU NA LOLOMA I KARISITO”

7, 8. Me uqeti keda vakacava na loloma i Karisito?

7 Kena imatai, e dodonu me uqeti keda qori meda vakayagataka noda bula ena vuku i Karisito Jisu. E tukuna na yapositolo o Paula: “Ni uqeti keitou na loloma i Karisito.” (Wilika 2 Korinica 5:14, 15.) E kila o Paula ke da vakabauta na loloma levu i Karisito, ena uqeti keda se gu na lomada meda rokovi Jisu qai lomani koya. Io, nida kila vinaka na ka e cakava o Jiova ena vukuda, ena uqeti keda meda muri Karisito Jisu mai vu ni lomada. Eda na cakava vakacava qori?

8 O ira na lomani Jiova era na via vakatotomuria na ivakaraitaki i Karisito, era na muria voleka na weniyavana. (1 Pita 2:21; 1 Joni 2:6) Nida talairawarawa, eda sa vakaraitaka tiko nida lomani Jiova kei Jisu. E tukuna o Jisu: “O koya e vakabauta na noqu  ivakaro qai muria, e lomani au. Ia o koya e lomani au ena lomani koya o Tamaqu, au na lomani koya, au na vakatakilai au tale ga vua.”—Joni 14:21; 1 Joni 5:3.

9. Na cava na ka eda vakatovolei kina?

9 Ena vula ni iVakananumi, e vinaka meda vakasamataka na ivakarau ni noda bula. Meda dui taroga: ‘Sala cava au sa muri Karisito Jisu tiko kina? Cava meu vakavinakataka?’ Bibi dina meda dau dikevi keda, nida vakatovolei e veisiga meda muria na ivakarau ni veika vakavuravura. (Roma 12:2) Ke da sega ni qaqarauni, eda rawa ni nodra tisaipeli na tamata vuku ni vuravura qo se o ira na tamata rogo kei ira na dauqito. (Kolo. 2:8; 1 Joni 2:15-17) Eda na valuta vakacava?

10. Na cava meda tarogi keda kina ena vula ni iVakananumi? Ena yaga vakacava qori? (Raica na imatai ni iyaloyalo.)

10 Na vula ni iVakananumi e gauna vinaka meda dikeva tale kina noda isulu, iyaloyalo kei na ivakatagi, se ka e maroroi tu ena noda kompiuta, talevoni kei na tablet. Ni o vakaraica na nomu isulu, mo taroga: ‘Keu lako ena dua na vanua ena tiko tale ga kina o Jisu, ena vinaka noqu lewaeloma niu dara na isulu qo?’ (Wilika 1 Timoci 2:9, 10.) ‘Keu dara qo, ena kilai niu dua na imuri i Karisito?’ Meda taroga tale ga qori ena ka e vauca na iyaloyalo kei na ivakatagi eda digia. ‘Ke sarava o Jisu na iyaloyalo, se rogoca na ivakatagi au taleitaka, vakacava ena marautaka? Ke kerea na noqu talevoni se tablet, au na madua ni solia niu kila na ka e tu kina?’ Me baleta na qito ena vidio, qo na ka mo taroga: ‘Ena rawarawa meu vakamacalataka vei Jisu na vuna au taleitaka kina na qito qo?’ Nida lomani Jiova ena uqeti keda meda kauta laivi kece na ka e sega ni ganiti keda na tisaipeli i Karisito, se mani vakacava na sasaga e caka kina. (Caka. 19:19, 20) Eda bubuluitaka ena gauna eda yalayala kina nida na sega ni bula tale tiko ena vukuda, eda na bula ena vuku i Karisito. Koya gona, meda kua tale ni kabita e dua na ka ena vakaleqa noda muria voleka na weniyava i Jisu.—Maciu 5:29, 30; Fpai. 4:8.

11. (a) E uqeti keda vakacava noda lomani Jiova kei Jisu meda cakacaka vakavunau? (b) Ena uqeti keda vakacava na loloma meda vukei ira na tacida ena ivavakoso?

11 Nida lomani Jisu, ena uqeti keda tale ga me vu mai lomada noda vunau kei na veivakatisaipelitaki. (Maciu 28:19, 20; Luke 4:43) Ena vula ni iVakananumi, eda rawa ni painia veivuke meda vakayagataka e 30 se 50 na aua ena cakacaka vakavunau. Vakacava o rawa ni cakava qori ni o dikeva na kemu ituvaki? E nanuma e dua na tacida tagane e yabaki 84 ni sega ni rawa ni painia ena vuku ni tautauvimate kei na bula vaqase. Ia era tokoni koya na painia era toka voleka ena vanua e vakaitikotiko kina. Era vakavodoki koya, era digia vinaka na yalava me cakacaka kina, me rawata vinaka e 30 na aua. Vakacava o rawa ni vukea e dua ena nomu ivavakoso me painia veivuke ena vula ni iVakananumi? Ia ena sega ni rawa nida painia veivuke kece. Koya gona, meda vakayagataka vakalevu na gauna kei na noda kaukaua meda vakacaucautaki Jiova kina. Nida cakava qori eda duavata kei Paula, oya ni uqeti keda na loloma i Karisito. Na cava tale ena uqeti keda kina na loloma ni Kalou?

 DODONU MEDA VEILOMANI

12. Na cava e uqeti keda kina na loloma ni Kalou?

12 Kena ikarua, e uqeti keda na loloma ni Kalou meda lomani ira na tacida. E kila qo na yapositolo o Joni, e vola: “Kemuni na wekaqu lomani, ke sa va qo na nona lomani keda na Kalou, e dodonu meda veilomani tale ga.” (1 Joni 4:7-11) Koya gona, ke da vakabauta na loloma ni Kalou, eda na lomani ira na tacida. (1 Joni 3:16) Eda na lomani ira vakacava?

13. E vakaraitaka vakacava o Jisu ni dauloloma?

13 Vakasamataka mada na ivakaraitaki i Jisu. Ena nona bula e vuravura, e dau kauaitaki ira na vakaloloma. E vukei ira e vakaleqai tu na yagodra—na lokiloki, mataboko, didivara kei na galu. (Maciu 11:4, 5) E taleitaka me vakavulici ira na walokai tu vakayalo, nira okati mera “tamata cudruvi” vei ira na iliuliu ni lotu vakaJiu. (Joni 7:49) E lomani ira dina qai gumatua ni vukei ira.—Maciu 20:28.

O rawa ni vukei ira na itabaqase ena cakacaka vakaitalatala? (Raica na parakaravu 14)

14. Na cava o rawa ni cakava mo lomani ira kina na tacimu?

14 E gauna vinaka na vula ni iVakananumi meda vakatotomuri Jisu nida kauaitaki ira na tacida ena ivavakoso. Nida cakava qori, eda na raica ni tiko eso era vinakata mera vukei. De dua era vinakata na veivuke na tacida itabaqase. Vakacava mo sikovi ira? O rawa ni vakarautaka na kedra, vukei ira ena cakacaka ni vale, kauti ira ena soqoni, se sureti ira mera tomani iko ena cakacaka vakaitalatala? (Wilika Luke 14:12-14.) Me uqeti keda na loloma ni Kalou meda vukei ira na tacida!

VOSOTI IRA NA TACIDA

15. Na cava meda nanuma tiko?

15 Kena ikatolu, e dodonu me uqeti keda na loloma i Jiova meda vosoti ira na tacida. Nida kawa i Atama, e takavi keda na ivalavala ca kei na mate. Sega ni rawa nida kaya, “Au sega ni vinakata na ivoli.” Na dausokalou yalodina mada ga ena nuitaka na iloloma tawayalani i Jiova ena vuku i Karisito. Meda nanuma tiko ni sa bokoci na noda dinau vakaitamera. Cava e bibi  kina meda vakasamataka qori? E tiko na kena isau ena dua na vosa vakatautauvata i Jisu.

16, 17. (a) Na cava eda vulica ena vosa vakatautauvata i Jisu me baleta na tui kei na dauveiqaravi? (b) Ni o vakasamataka vakatitobu na vosa vakatautauvata i Jisu, na cava o na via cakava?

16 E talanoataka o Jisu ni vosota na tui e dua na dauveiqaravi e dinautaka e 10,000 na taledi, se 60,000,000 na dinari. E vosoti vakalevu na dauveiqaravi, ia e sega ni yalorawarawa me vosota na nona itokani dauveiqaravi e dinautaka ga vua e 100 na dinari. Dua na ka nona katakata na tui ni rogoca nona yalodredre na dauveiqaravi se qai vosota ga. E tukuna vua na tui: “O iko na dauveiqaravi torosobu, au bokoca kece nomu dinau ni o mai vakamasuti au. E dodonu mo vosoti nomu itokani dauveiqaravi me vaka ga na noqu vosoti iko!” (Maciu 18:23-35, vmr) Io, a dodonu me uqeti koya na talei ni nona veivosoti na tui me vosota kina nona itokani dauveiqaravi. Nida vakasamataka tale ga na veivosoti kei na loloma i Jiova, na cava meda cakava?

17 Ena vula ni iVakananumi, e vinaka meda vakasamataka ke da lomacataka tiko e dua na tacida. Ke dina qori, bibi meda vakatotomuri Jiova, ni dau ‘tu vakarau me veivosoti.’ (Niem. 9:17; Same 86:5) Ke da doka na ka e cakava o Jiova ena vukuda me bokoca noda dinau vakaitamera, eda na via veivosoti mai vu ni lomada. Me lomani keda se vosoti keda o Jiova, ena vinakati meda dau veilomani qai veivosoti. (Maciu 6:14, 15) Eda kila ni na sega ni veisautaka na veika sa yaco oti na noda veivosoti, ia ena vinaka kina noda veimaliwai.

18. E uqeta vakacava e dua na tacida yalewa na loloma ni Kalou me vosota kina nona malumalumu na tacina?

18 E sega ni rawarawa meda vosota na nodra malumalumu na tacida. (Wilika Kolosa 3:13, 14; Efeso 4:32.) Kena ivakaraitaki o Lili e dua na tacida yalewa dawai e dau vukea e dua na yada o Kara. [1] E dau vakavodoki Kara, e volivoli se cakava eso tale na ka, qai kauaitaki koya ena levu na sala. Se mani cava e cakava o Lili, e vakalewai koya tu ga o Kara qai yalodredre. E kauaitaka ga o Lili na itovo vinaka i Kara. E tokoni koya tiko me vica vata na yabaki me yacova ni tauvimate bibi o Kara qai takali. E sega ni rawarawa vei Lili me vukei Kara, ia e tukuna: “Au vakanamata meu sotavi Kara ena veivakaturi. Au na via kilai koya vinaka ni sa na uasivi.” Io, na loloma ni Kalou ena uqeti keda meda vosota nodra malumalumu na tacida da qai vakanamata ena gauna ena sega tale kina na ivalavala ca.

19. Me uqeti iko vakacava na ‘iloloma ni Kalou e sega ni vakamacalataki rawa’?

19 E solia vei keda o Jiova na “iloloma e sega ni vakamacalataki rawa.” Meda kua mada ga ni vakawalena. Ena vula ni iVakananumi qo, meda vakasamataka vakatitobu na ka erau cakava ena vukuda o Jiova kei Jisu. Io, me uqeti keda mada ga nodrau loloma meda muria kina na weniyava i Jisu, meda lomani ira na tacida qai veivosoti mai vu ni lomada.

^ [1] (parakaravu 18) Sa veisau eso na yaca ena ulutaga qo.