Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

Eda Marau​—Nida Cakacaka Vata kei na Kalou

Eda Marau​—Nida Cakacaka Vata kei na Kalou

“Ena neitou cakacaka vata kei koya, keitou uqeti kemuni tale ga moni kua ni ciqoma wale ga na loloma soli wale ni Kalou qai lecava na kena inaki.”—2 KOR. 6:1.

SERE: 75, 74

1. E Cecere duadua o Jiova, ia na cava e sureta kina eso?

E CECERE duadua o Jiova, e bulia na ka kece, e sega ni vakaiyalayala na nona vuku kei na kaukaua. Qori sara ga na ka e kila o Jope ni vukei koya kina o Jiova. E kaya o Jope: “Au sa qai kila qo ni oni rawata na ka kece e sega tale ga ni dredre moni cakava na ka oni vakasamataka.” (Jope 42:2) E rawa ni cakava duadua o Jiova na ka kece e vinakata. Ia me tekivu mai na iVakatekivu, e sureta eso mera cakacaka vata kei koya me vakayacori kina na nona inaki.

2. Na itavi bibi cava e lesia o Jiova vei Jisu?

2 Na imatai sara ga ni ibulibuli i Jiova na Luvena e duabau ga. E vakadonuya o Jiova me vukei koya o Luvena ena buli ni veika tale eso. (Joni 1:1-3, 18) E vola na yapositolo o Paula me baleti Jisu: “E vakaitavi o koya ena buli ni ka kece tale eso mai lomalagi kei vuravura, na ka e laurai kei na ka e sega ni laurai, se ra idabedabe vakatui se veiliutaki se matanitu se lewa. E vakaitavi ena buli ni veika tale eso,  era buli tale ga ena vukuna.” (Kolo. 1:15-17) Koya gona, e sega wale ga ni solia o Jiova na itavi bibi vei Luvena, e tukuna tale ga meda kila.

3. Na cava e vinakata o Jiova me cakava o Atama? Na vuna?

3 O Jiova e sureta tale ga eso mera cakacaka vata kei koya. Kena ivakaraitaki, e lesi Atama me vakayacana na manumanu. (Vkte. 2:19, 20) Sa na wacava na marau nei Atama me saravi ira na manumanu, me vulica na veika kece me baleti ira, qai digia na yacadra veiganiti! A rawa ni cakava duadua qori o Jiova ni buli ira. Ia ena nona loloma, e lesi Atama me cakava qori. A lesi Atama tale ga me vakatetea na Parataisi me sivita na iyalayala kei Iteni. (Vkte. 1:27, 28) E rarawataki ni sega ni digia o Atama me cakacaka vata kei na Kalou, e yacovi koya kina na leqa kei ira nona kawa.—Vkte. 3:17-19, 23.

4. Era cakacaka vata vakacava kei na Kalou eso me vakayacori kina nona inaki?

4 Toso na gauna, e sureta na Kalou eso tale ena vakayacori ni nona inaki. A taya na waqa o Noa me ratou bula kina vakavuvale ena Waluvu. O Mosese e liutaki ira na Isireli mai na vanua o Ijipita. O Josua e liutaki ira na Isireli ina Vanua Yalataki. E tara o Solomoni na valenisoro e Jerusalemi. E tinai Jisu o Meri. O ira na dausokalou yalodina qori, era cakacaka vata kei Jiova me vakayacori kina nona inaki.

5. Na cakacaka cava eda lesi kina? Cava e ka dokai kina me lesi keda o Jiova? (Raica na imatai ni iyaloyalo.)

5 Nikua, e sureti keda o Jiova meda tokona ena noda vinaka kece na Matanitu vakaMesaia. Levu na sala eda rawa ni veiqaravi kina, eso eda na sega ni qarava kece. Ia e rawa nida vakaitavi kece ena vunautaki ni itukutuku vinaka ni Matanitu ni Kalou. E rawa ni cakava duadua qori o Jiova. E rawa ni vosa vakadodonu vei keda e vuravura. E tukuna mada ga o Jisu ni rawa ni vakayagataka o Jiova na vatu me kacivaka na veika e baleta na Tui ni Matanitu vakaMesaia. (Luke 19:37-40) Ia e lesi keda o Jiova meda “cakacaka vata” kei koya. (1 Kor. 3:9) E vola na yapositolo o Paula: “Ena neitou cakacaka vata kei koya, keitou uqeti kemuni tale ga moni kua ni ciqoma wale ga na loloma soli wale ni Kalou qai lecava na kena inaki.” (2 Kor. 6:1) E iloloma soli wale na noda cakacaka vata kei na Kalou, eda marautaka vakalevu. Meda dikeva mada eso na vuna e vakavumarau kina.

VAKAMARAUTAKI KEDA

6. Na cava e tukuna na ulumatua ni Kalou me baleta nona cakacaka kei Tamana?

6 Era marautaka na dauveiqaravi ni Kalou mera cakacaka vata kei Jiova. Ni bera ni gole mai vuravura na ulumatua ni Kalou, e kaya: “E buli au o Jiova meu itekitekivu ni nona cakacaka . . . Au a tiko e yasana meu matai ligamaqosa. E taleitaki au vakalevu ena veisiga, au marau tiko e matana ena gauna kece.” (Vkai. 8:22, 30) E marau o Jisu me cakacaka vata kei Tamana ni levu na ka e qarava rawa, e kila tale ga ni lomani koya. Ia vakacava o keda?

Sega tale ni dua na cakacaka veivakacegui me tautauvata kei na noda vakavulica e dua ena ka dina (Raica na parakaravu 7)

7. Na cava e marautaki kina na cakacaka vakavunau?

7 E tukuna o Jisu ni marautaki na soli ka kei na noda taura na ka. (Caka. 20:35) Eda marau nida mai kila na ka dina, eda marautaka tale ga meda  wasea. Nida cakava qori, era na marau na waloloi vakayalo mera vulica na ka dina ena iVolatabu, ra qai veiwekani voleka kei Jiova. Eda marau meda raica na veiveisau era cakava, e veisau na nodra rai kei na nodra ivakarau. Eda kila ni bibi duadua na vunautaki ni itukutuku vinaka. E rawa nira bula tawamudu kina o ira na duavata kei na Kalou. (2 Kor. 5:20) Vakacava e tiko e dua na cakacaka marautaki qai veivakacegui, ena vukei ira e levu mera bula tawamudu?

8. Na cava era marautaka eso nira cakacaka vata kei Jiova?

8 Nida vukea eso tale mera kila na Kalou, eda kila ni marautaka qori o Jiova qai kauaitaka na noda veiqaravi. E vakavumarau dina qori. (Wilika 1 Korinica 15:58.) E kaya o Marco mai Itali: “Au marautaka dina niu kila niu solia tiko noqu vinaka taucoko vei Jiova, ena sega ni guilecava na ka au cakava.” Tukuna tale ga o Franco mai Itali: “E vakayagataka o Jiova nona Vosa kei na isolisoli vakayalo me vakaraitaka e veisiga nona lomani keda, e kauaitaka na ka kece eda cakava vua ke mani lailai mada ga. Qori na vuna au marautaka kina meu cakacaka vata kei na Kalou, e vakainaki tale ga kina noqu bula.”

EDA VOLEKATI JIOVA KEI IRA NA TACIDA

9. E vakacava nodrau veiwekani o Jiova kei Jisu, na vuna?

9 Nida cakacaka vata kei ira eda lomana, eda na veivolekati, eda na kila vinaka tale ga nodra itovo. Eda na kila na ka era vinakata me caka kei na kena icakacaka. Rairai vica vata na bilioni na yabaki nona cakacaka vata kei Jiova o Jisu, erau veivolekati sara kina qai sega ni dua me tawasea rawa. E tukuna o Jisu me baleta nodrau veivolekati: “Keirau duavata kei Tamaqu.” (Joni 10:30) E talei dina nodrau veivolekati, ni rau cakacaka vata ena duavata.

10. Nida vakaitavi ena vunau, eda volekati Jiova vakacava kei ira na tacida?

10 E kerei Jiova o Jisu me taqomaki ratou nona tisaipeli. Na vuna? E masulaka: “Me ratou duavata kina me vaka na nodaru duavata.” (Joni 17:11) Nida muria na ivakatagedegede i Jiova da qai vakaitavi ena vunau, eda na kila vinaka na nona itovo talei. Eda vulica ni ka vakayalomatua meda nuitaki koya da qai muria nona veidusimaki. Nida toro voleka vua na Kalou, ena volekati keda o koya. (Wilika Jemesa 4:8.) Eda volekati ira tale ga na tacida vakayalo ni tautauvata na noda isausau, na ka eda marautaka kei na leqa eda sotava. Io, eda cakacaka vata, marau vata qai vosota vata. E kaya o Octavia mai Peritania: “Niu cakacaka  vata kei Jiova, au volekati ira kina na taciqu. E sega tale ga ni vovodea na noqu veikilai se noqu veitokani qori, ni tautauvata na neimami isausau kei na veidusimaki keimami muria.” Vakacava o duavata kina? Nida raica na sasaga era cakava na tacida mera vakamarautaki Jiova, eda volekati ira kina.

11. Na cava eda vakabauta kina nida na veivolekati sara kei Jiova kei ira na tacida ena vuravura vou?

11 Nikua e dei na noda lomani Jiova kei ira na tacida, ia ena kaukaua sara na ivau qori ena vuravura vou. Vakasamataka mada na cakacaka e tu mai liu! Eda na sotavi ira na vakaturi da qai vakavulici ira ena sala i Jiova. Ena vinakati tale ga me veisautaki na vuravura me parataisi. Qo e sega ni itavi lailai, ia ena marautaki mada ga nida cakacaka vata me vakalesui mai na bula uasivi ena veiliutaki ni Matanitu vakaMesaia! Era na veivolekati sara na kawatamata ra qai veivolekati kei na Kalou ni na “vakaceguya na veika era gadreva na kabula kece.”—Same 145:16.

ITATAQOMAKI

12. E taqomaki keda vakacava na cakacaka vakavunau?

12 Eda bula ena vuravura e lewa tu o Setani na Tevoro da qai sega ni uasivi, ena rawarawa meda muria na rai ni vuravura kei na kena ivalavala. Bibi gona meda taqomaka noda veiwekani kei Jiova. Na yalo ni vuravura e rawa ni vakatauvatani kei na uciwai e kuitaki keda ina vanua eda sega ni via gole kina. Me kua ni yacovi keda qori, e vinakati meda solia noda igu taucoko meda qalo ena dua tale na vanua. E va tale ga qori na noda sasaga meda kua ni rawai ena yalo ni vuravura i Setani. Nida vunau, eda na vakasamataka ga na ka e bibi kei na ka dodonu, eda na sega ni vakasamataka na ka ena vakaleqa noda vakabauta. (Fpai. 4:8) E vakaukauataka noda vakabauta na noda vunau, eda na sega ni guilecava kina na yalayala ni Kalou kei na nona ivakatagedegede e yavutaki ena nona loloma. Ena vakaukauataka tale ga noda isasabai vakayalo.—Wilika Efeso 6:14-17.

13. E yaga vakacava vua e dua na tacida mai Ositerelia na cakacaka vakavunau?

13 Nida ogaoga ena vunau kei na so tale na itavi vakayalo, ena taqomaki keda, ena sega na gauna meda kauaitaka kina vakasivia na noda leqa. E kaya o Joel mai Ositerelia: “E vukei au na cakacaka vakavunau meu kua ni guilecava na ituvaki ni bula nikua, na veika dredre eda sotava kei na yaga ni noqu muria na ivakavuvuli vakaivolatabu. E vukei au na cakacaka vakavunau meu yalomalumalumu; meu nuitaki Jiova kei ira na taciqu vakayalo.”

14. E vakaraitaka vakacava na veitokoni ni yalo tabu nida vunau tiko ga?

14 Na cakacaka vakavunau e vaqaqacotaka noda vakabauta ni tokoni keda na yalo tabu. Vakasamataka mada qo: Kaya mada ke nomu cakacaka mo veisoliyaka na madrai kana vinaka ena nomu itikotiko, o qai sega ni saumi kina. Ia e levu era sega ni taleitaka na madrai, eso mada ga era sega ni taleitaka nomu gole yani. Ena vakacava na dede ni nomu cakacaka? O na yalolailai sara ga, de dua ena sega na kaukaua mo tomana na cakacaka qori. Ia eda tomana tiko ga na cakacaka vakavunau e  veiyabaki. Eda vakayagataka ga noda ilavo, era cudruvi keda se vakalialiai keda e levu. E vakadinadinataka qori ni tokoni keda na yalo tabu.

IVAKARAITAKI NI NODA LOLOMA

15. E veisemati vakacava na cakacaka vakavunau kei na vakayacori ni inaki ni Kalou?

15 Vakasamataka mada na veisemati ni cakacaka vakavunau kei na inaki i Jiova me baleti keda. E nona inaki taumada meda bula tawamudu e vuravura. Ni valavala ca o Atama, e sega ni veisau na inaki qori. (Aisea 55:11) E vakarautaka ga o Jiova na sala meda sereki kina mai na ivalavala ca kei na mate. Oya na vuna e gole mai kina e vuravura o Jisu me solia nona bula ena vukudra na kawatamata talairawarawa. Ia me rawa nida talairawarawa, e vinakati meda vulica na ka e vinakata na Kalou. E mani vakavulica na kawatamata o Jisu ena ka e vinakata o Jiova, e vakaroti ira tale ga nona tisaipeli mera cakava qori. Nida vukea eso tale mera veiyaloni kei na Kalou, eda sa vakaitavi tiko ena vakayacori ni inaki i Jiova meda sereki na kawatamata mai na ivalavala ca kei na mate.

16. E veisemati vakacava na noda cakacaka vakavunau kei na ivunau levu duadua?

16 Nida vukea eso tale mera vulica na sala ni bula tawamudu, e vakaraitaka nida lomani ira, eda lomani Jiova tale ga “ni nona inaki me bula na tamata kece ga, mera mai kila vinaka na ka dina.” (1 Tim. 2:4) Ni tarogi o Jisu se cava na ivunau levu duadua e soli vei ira na Isireli, e sauma: “‘Mo lomani Jiova na nomu Kalou ena lomamu taucoko, ena nomu vinaka taucoko, kei na nomu vakasama taucoko.’ Qo na ivunau levu duadua, na kena imatai tale ga. E vaka kina na kena ikarua, ‘Mo lomana na kainomu me vaka nomu lomani iko.’” (Maciu 22:37-39) Nida vakaitavi ena vunau, eda sa talairawarawa tiko ena ivunau ruarua qori.—Wilika Cakacaka 10:42.

17. Na cava nomu rai me baleta na itavi dokai meda vunautaka na itukutuku vinaka?

17 Eda kalougata dina ni lesia vei keda o Jiova na cakacaka e vakavumarau, e vakavolekati keda vua kei ira na tacida qai taqomaki keda vakayalo. E rawa tale ga nida vakaraitaka noda lomani koya kei ira na kainoda. E duidui na keda ituvaki na dauveiqaravi ni Kalou e veiyasa i vuravura, ke da gone se uabula, vutuniyau se dravudravua, tauvimate se bula vinaka, vica vata na milioni era wasea tiko nodra vakabauta. De dua o na duavata kei Chantel mai Varanise. E kaya: “Qo na ka e tukuna vei au na Kalou Kaukaua Duadua ena lomalagi kei na vuravura, e bulia na ka kece qai Kalou mamarau: ‘Lako! Mo vosa ena vukuqu! Me vu mai lomamu. Au sa solia vei iko na kaukaua, noqu Vosa na iVolatabu, era tokoni iko tale ga na veika bula e lomalagi, ira nomu itokani e vuravura, o sa vakavulici, o vakasalataki tale ga ena kena gauna.’ E ka dokai dina meda cakava na ka e vinakata o Jiova, e ka dokai tale ga meda cakacaka vata kei koya!”