Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

Vakasamataka Tiko ga Vakatitobu na Veika Vakayalo

Vakasamataka Tiko ga Vakatitobu na Veika Vakayalo

“Vakasamataka vakabibi na ka kece qo, me tara sara na lomamu, mera raica na tamata kece na nomu toso.”1 TIM. 4:15.

SERE: 57, 52

1, 2. E duatani vakacava na noda mona?

E YAGA vakalevu na vosa, ni rawa nida wilika, vola, vosataka, rawa nida kila na ka e cavuti. E rawa tale ga nida masu, da qai sere ena vakacaucau vei Jiova. Na ka kece qori e vakaitavi kina na noda mona, kei na nodra cakacaka vata na nave. Era se vaqaqa tiko ga qori nikua na sainitisi. Ni vakasakiti na noda mona, e rawa kina nida vulica na vosa. E tukuna e dua na daunivosa: “Nodra rawa ni vulica na gonelailai e dua na vosa, qori na ka eda kilai kina na [tamata].”

2 E isolisoli ni Kalou noda rawa ni vulica e dua na vosa. (Same 139:14; Vkta. 4:11) E tiko e dua tale na ka e duatani kina noda mona. Eda duidui vei ira na manumanu, nida buli meda “ucuya na Kalou.” E soli vei keda na galala ni vakatulewa, da qai rawa ni vakayagataka na vosa meda vakacaucautaki Jiova kina.—Vkte. 1:27.

3. Na isolisoli totoka cava e vakarautaka o Jiova meda vuku kina?

3 Ke da via rokovi koya a bulia na vosa, e vakarautaka gona na Kalou na isolisoli totoka na iVolatabu. E tabaki taucoko se vakatikina ena 2,800 vakacaca na vosa. Nida vakasamataka vakatitobu na ka e tukuna na iVolatabu, eda na vakatawana ena noda vakasama na rai ni Kalou. (Same 40:5; 92:5; 139:17)  Io, sa rawa nida vakasamataka vakatitobu na ka e rawa ni ‘vakavukui keda me rawa kina nida vakabulai.’—Wilika 2 Timoci 3:14-17.

4. Na cava na vakasama vakatitobu? Na taro cava eda na dikeva tiko?

4 Na vakasama vakatitobu e kena ibalebale na noda vagolea vakatabakidua noda vakanananu ina dua na ka, e vinaka se ca. (Same 77:12; Vkai. 24:1, 2) Na rua na ulutaga vinaka duadua meda dau vakasamataka vakatitobu, oya na veika me baleta na Kalou o Jiova kei na Luvena o Jisu Karisito. (Joni 17:3) De dua eda na vaqaqa se veisemati vakacava na wiliwili kei na vakasama vakatitobu? Na cava e rawa nida vakasamataka vakatitobu, kei na cava meda cakava meda dau marautaka kina?

VAKADEITAKA ME YAGA NOMU VULI

5, 6. Na cava meda cakava meda vakasama kina vakavinaka da qai nanuma na ka eda wilika?

5 E vakasakiti na ka e dau cakava na noda mona, ke sega mada ga nida vakayagataka kina noda vakasama. Kena ivakaraitaki, nida cegu, taubale, vodo basikeli, se taipa. Ena so na gauna, e okati tale ga kina na wiliwili. E bibi gona meda kauaitaka na ibalebale ni ka eda wilika. Nida sa yacova na iotioti ni parakaravu se ni bera nida tekivu ena dua na ulutaga lailai, ena vinaka meda cegu vakalailai meda vakasamataka na ka eda sa qai wilika, me vakadeitaki kina ni sa donu na ka eda kila. Ia eso na ka e rawa ni vakalatilati qai vakavuna me ciri yawa noda vakasama, lai sega kina ni yaga noda wiliwili. Na cava e rawa ni caka me kua kina ni yaco qori?

6 Era dikeva na sainitisi ni rawarawa meda nanuma e dua na vosa ke rogo na ka eda wilika. E kila vinaka qori o koya e bulia noda mona. Oya na vuna e vakaroti Josua kina me wilika “toka e ra” na ivola ni Lawa. (Wilika Josua 1:8.) Eda na vakadinata ni gauna eda wilika kina vakamalua na iVolatabu se wilika e ra, ena kasa ena noda vakasama. Ena vukei keda tale ga qori meda kauaitaka na ka eda dau wilika.

7. Na gauna vinaka cava meda vakasamataka kina vakatitobu na Vosa ni Kalou? (Raica na imatai ni iyaloyalo.)

7 Nida wiliwili, de dua ena sega nida solia kece kina noda igu, ia ena vinakati kina meda vakasamataka matua. Oya na vuna e dau rawarawa kina ina noda mona ivalavala ca me vakasamataka eso tale na ka e sega soti ni bibi. Na gauna vinaka duadua meda vakasama vakatitobu kina na gauna ni vakacegu, e vanua vakanomodi qai sega ni dua na ka me vakalatilati. E gauna vinaka vua na daunisame me vakasama vakatitobu ena bogi ena nona imocemoce. (Same 63:6) E uasivi na vakasama i Jisu, ia e kila ni yaga vakalevu me tiko ena dua na vanua vakanomodi me vakasama vakatitobu qai masu.—Luke 6:12.

VEIKA VINAKA MEDA VAKASAMATAKA VAKATITOBU

8. (a) Na cava tale meda vakasamataka vakatitobu? (b) E raica vakacava o Jiova na gauna eda vakayagataka meda tukuni koya kina?

8 Me ikuri ni noda wili iVolatabu, e tiko eso tale na ka eda rawa ni vakasamataka vakatitobu. Kena ivakaraitaki, nida sarava na veika vakatubuqoroqoro e bulia na Kalou, meda cegu qai vakasama. Qori ena uqeti iko mo vakacaucautaki Jiova ena nona yalovinaka. O na vinakata tale ga mo talaucaka vei ira eso tale. (Same 104:24; Caka. 14:17) Vakacava e kauaitaka o Jiova na noda vakasama vakatitobu, noda masu kei na noda dau  tukuni koya? E vakadeitaka vei keda na iVolatabu: “Era veivosaki ena gauna oya o ira na dokai Jiova, o ira yadua kei na nodra itokani, e vakarorogo tiko qai vakatudaliga o Jiova. E volai e matana e dua na ivola ni ivakananumi me baleti ira era dokai Jiova kei ira era vakananuma tiko na yacana.”—Mala. 3:16.

Vakacava o dau vakasamataka vakatitobu na ituvaki kei na ka era gadreva na nomu vuli iVolatabu? (Raica na parakaravu 9)

9. (a) Na cava e tukuna o Paula me vakasamataka vakatitobu o Timoci? (b) Eda na muria vakacava na ivakasala i Paula nida vakavakarau ina cakacaka vakaitalatala?

9 E tukuna na yapositolo o Paula vei Timoci me “vakasamataka vakabibi” na sala e rawa ni tarai ira kina eso na nona vosa, ivalavala, kei na nona ivakavuvuli. (Wilika 1 Timoci 4:12-16.) Me vakataki Timoci, dua na ka na levu ni itavi vakayalo meda vakasamataka. Kena ivakaraitaki, nida vakavakarau tiko ena caka vuli iVolatabu, e bibi meda vakasama vakatitobu. Nida vakasamataka tiko e dua na gonevuli, de dua eda na nanuma e dua na taro vakavure vakasama se dua na vosa vakatautauvata me vukei koya me toso vakayalo. E veivakabulabulataki na gauna ni vakavakarau va qori, ni na vaqaqacotaka noda vakabauta, ena bulabula qai mana noda caka vuli. Eda na vakarautaka tale ga na lomada nida gole ina cakacaka vakavunau. (Wilika Esera 7:10.) Nida wilika e dua na wase ni iVolatabu na Cakacaka, ena “vakacaudreva me vaka na buka” na noda gugumatua ena cakacaka vakaitalatala. Nida vakasamataka vakatitobu na tikinivolatabu eda na via vakayagataka kei na ivola eda na solia, ena vukei keda meda qarava vinaka noda itavi dokai. (2 Tim. 1:6) Vakasamataki ira ena yalava, kei na ka era na taleitaka mera rogoca. Na vakavakarau va qori eda na maqosa kina ni vakayagataka na iVolatabu ena vunau.—1 Kor. 2:4.

10. Na cava eso tale na ka vinaka eda rawa ni vakasamataka vakatitobu?

 10 Vakacava o dau vakavola eso na ka o rogoca ena ivunau, soqo ni tabacakacaka kei na soqo ni veiwasewase? Nida lesuva na ka eda vakavola, qori e gauna vinaka meda vakasamataka vakatitobu na ka eda vulica ena Vosa ni Kalou kei na nona isoqosoqo. E rawa tale ga nida wilika da qai vakasamataka vakatitobu na ka e dau tabaki e veivula ena Vale ni Vakatawa, na Yadra! kei na kena e dau sevutaki ena soqo ni veiwasewase. Ni o wilika na Yearbook, de dua ena vinaka mo cegu vakalailai ni bera ni o wilika e dua tale na irogo. Ni o cakava qori, o na rawa kina ni vakasamataka na ka o wilika, ena tara tale ga na lomamu. De dua o na via toqarukutaka e dua na vakasama se vakavola eso tale na ka ena tutu ni ivola. Ena veivuke qori ni o vakavakarau tiko ena veisikovi lesu, veivakatawani se dua na nomu itavi ena soqoni. Koya e bibi sara, na noda cegu vakalailai meda vakasamataka vakatitobu na ka eda wilika ena ivola vakaivolatabu, eda sa vakalaiva sara tiko ga me tara na lomada na veika eda wilika da qai vakavinavinakataki Jiova ena veika eda sa vulica.

VAKASAMATAKA VAKATITOBU E VEISIGA NA VOSA NI KALOU

11. Na ivola cava ena bibi duadua meda vakasamataka vakatitobu? Na vuna? (Raica tale ga na ivakamacala e ra.)

11 E bibi duadua meda vakasamataka vakatitobu na iVolatabu. Kaya mada ke o sotava e dua na ituvaki, e sega kina ni vakatarai me tiko nomu iVolatabu. * E se rawa ga ni o vakasamataka vakatitobu na ka sa tiko rawa ena nomu vakasama, me vaka na tikinivolatabu o dau taleitaka kei na qaqa ni noda sere. (Caka. 16:25) Ena rawa ni vukei iko na yalo tabu me vakalesuya mai na nomu vakasama na ka vinaka o sa vulica.—Joni 14:26.

12. Meda tuvanaka vakacava noda wili iVolatabu?

12 Meda tuvanaka eso na siga ena loma ni macawa meda wilika qai vakasamataka vakatitobu na iwase ni iVolatabu e dau veivosakitaki ena Koronivuli ni Vuli Vunau. Eso tale na siga e rawa nida vakasamataka vakatitobu na ka e tukuna kei na ka e cakava o Jisu. O na vakadinata ni ivola kilai levu ena iVolatabu na Kosipeli, ni volatukutukutaki kina na bula i Jisu kei na nona cakacaka vakaitalatala. (Roma 10:17; Iper. 12:2; 1 Pita 2:21) Sa tabaki tale ga e dua na ivola e vakamacalataki kina na veitaravi ni ka e yaco ena bula i Jisu. Ena vukei keda vakalevu qori nida wilika tiko na Kosipeli.—Joni 14:6.

BIBI NI VAKASAMA VAKATITOBU

13, 14. Na cava e bibi kina meda vakasamataka tiko ga vakatitobu na veika vakayalo? Ena uqeti keda vakacava qori?

13 Eda na matua vakayalo nida vakasamataka vakatitobu na veika vakayalo. (Iper. 5:14; 6:1) Ke lailai ga na gauna eda vakayagataka meda vakasamataki Jiova kina kei Jisu, ena luluqa noda vakabauta. Sa na rawarawa sara meda ciri da qai yawaka na ka dina. (Iper. 2:1; 3:12) A vakasalataki keda o Jisu meda rogoca se ciqoma na Vosa ni Kalou “ena loma e vinaka,” ke sega, eda na sega ni “taura dei.” Ena rawarawa kina meda ‘vakacalai ena nuiqawaqawa, na iyau, na marau ni bula qo, da qai sega ni vua.’—Luke 8:14, 15.

14 Bibi gona meda vakasamataka tiko ga vakatitobu na Vosa ni Kalou. Ena uqeti keda qori meda vakavotuya na lagilagi i Jiova kei na nona itovo qoroi.  (2 Kor. 3:18) Io, eda rawa ni vulica tiko ga na veika me baleta na Tamada vakalomalagi da qai vakatotomuri koya me tawamudu. Qori e ka dokai duadua.—Dauv. 3:11.

15, 16. (a) Ena yaga vakacava na noda vakasamataka vakatitobu na veika vakayalo? (b) Na cava ena dredre kina ena so na gauna meda vakasama vakatitobu? Cava meda sasaga tiko ga kina?

15 Nida vakasamataka tiko ga vakatitobu na veika vakayalo, ena sega ni seavu noda taleitaka na ka dina. Ena uqeti ira na tacida na noda gugumatua, kei ira na tataleitaki ena yalava. Nida vakasamataka vakatitobu na iloloma talei duadua ni Kalou, na isoro ni veivoli i Jisu, ena uqeti keda meda vakamareqeta na noda veiwekani voleka kei na Tamada vakalomalagi o Jiova. (Roma 3:24; Jeme. 4:8) A bala i valeniveivesu me tolu na yabaki e dua na tacida mai Sauca Aferika o Mark ena nona tawaveitovaki, e kaya: “Na vakasama vakatitobu e via tautauvata kei na noda lako ena dua na vanua eda vulagi kina. Na levu ga ni noda vakasamataka vakatitobu na veika vakayalo, na levu tale ga ni ka vou eda na kila me baleti Jiova. Eso na gauna niu yalolailai se lomaleqataka na ka ena yaco ena veisiga se bera mai, au na taura na iVolatabu qai vakasamataka vakatitobu e dua na tikinivolatabu. Au dau vakila ni vakacegui au sara ga.”

16 Na levu ni ka ni veivakawelei ena gauna qo e rawa ni vakadredretaka noda vakasamataka vakatitobu na veika vakayalo. E tukuna e dua tale na tacida yalodina mai Aferika, o Patrick: “Na noqu vakasama e vaka na katonimeli, e tu kina na veimataqali itukutuku, kena e taleitaki kei na kena e sega, ena vinakati me wasewasei e veisiga. Niu dikeva na ka au dau vakasamataka, au dau raica ni tiko eso na vakanananu ca, au masulaka vei Jiova ni bera niu vakasama vakatitobu. Ena taura toka na gauna meu qai vakasamataka vakatitobu na veika vakayalo, ia au vakila niu volekati Jiova kina. E dolava na noqu vakasama meu kila vinaka na ka dina.” (Same 94:19.) Io, era na vakalougatataki vakalevu o ira era “dikeva vinaka na iVolatabu e veisiga” ra qai vakasamataka vakatitobu na ka era vulica.—Caka. 17:11.

O NA QARA VAKACAVA NA GAUNA?

17. Na gauna cava o dau vakasama kina vakatitobu?

17 Eso era yadra vakamataka mera wili iVolatabu, mera vakasama vakatitobu ra qai masu. Eso tale era cakava qori nira cegu ena vakasigalevu. De dua o na vakadinata ni rawa tale ga ni caka qori ena yakavi bogi se bera ni o moce. Eso era taleitaka mera wilika na iVolatabu ena mataka, ni bera tale ga nira moce. Koya gona, era sa “wilika . . . ena siga kei na bogi,” se wasoma. (Josua 1:8) Na ka ga e bibi, meda volia na gauna eda dau vakayagataka ena ka e sega soti ni bibi meda vakasamataka kina vakatitobu e veisiga na Vosa ni Kalou.—Efeso 5:15, 16.

18. Na cava e yalataka na iVolatabu ke da vakasamataka vakatitobu e veisiga na Vosa ni Kalou da qai saga meda muria na ka eda vulica?

18 E dau yalataki ena iVolatabu na veivakalougatataki era na rawata o ira era vakasamataka vakatitobu na ka era vulica ra qai saga mera muria sara. (Wilika Same 1:1-3.) E kaya o Jisu nira na “marau o ira na rogoca na vosa ni Kalou ra qai muria tiko ga.” (Luke 11:28) Koya e bibi sara, noda vakasamataka vakatitobu na Vosa i Jiova e veisiga, ena uqeti keda meda cakava na ka e vakalagilagi kina. Eda na vakila na marau ena gauna qo, eda na rawata tale ga na bula tawamudu ena nona vuravura vou ni yalododonu.—Jeme. 1:25; Vkta. 1:3.

^ para. 11 Raica na ulutaga “Neitou Sasaga me Keitou Kaukaua Tiko Vakayalo” ena Vale ni Vakatawa, Tiseba 1, 2006.