1, 2. Me vaka e tukuna na yapositolo o Joni, e vakaraitaka vakacava o Jiova na sala meda lomani koya kina?

NA SALA vinaka duadua me vakavulici luvena kina e dua na tama, oya na nona ivakaraitaki. E vola na yapositolo o Joni nida “veilomani baleta ni a liu sara ga na nona lomani keda na Kalou.” (1 Joni 4:19) Macala gona ni kotora o Jiova na ivakaraitaki uasivi ni loloma vakatama, ni na uqeti keda qori meda lomani koya.

² Eda kila vakacava ni “liu sara ga na nona lomani keda” na Kalou? E kaya na yapositolo o Paula: “E vakaraitaka na Kalou na nona lomani keda ni mai mate na Karisito ena vukuda nida se ivalavala ca tu.” (Roma 5:8) Ni vakuai koya o Jiova me soli Luvena duabau me keda ivoli na kawatamata vakabauta, e vakatakila kina na ibalebale dina ni loloma. Qori na lomasoli e caka ena veinanumi se nona vakuai koya e dua. Na loloma i Jiova e rawa kina nida torovi koya meda vakila na yaga ni nona loloma, da qai dolea ena noda lomani koya.—1 Joni 4:10.

3, 4. Eda na vakaraitaka vakacava nida lomana na Kalou?

³ Na loloma e itovo talei duadua i Jiova. Sa rauta me tukuna o Jisu ni imatai ni ivakaro ni Kalou: “Mo lomani Jiova na nomu Kalou ena lomamu taucoko, ena nomu vinaka taucoko, ena nomu vakasama taucoko, kei na nomu kaukaua taucoko.”  (Marika 12:30) Eda vulica ena vosa i Jisu ni noda lomana na Kalou e okati taumada kina na lomada. E taleitaka o Jiova ni vu mai lomada noda lomani koya. Eda vulica ni okati tale ga kina na noda vinaka taucoko, noda vakasama kei na noda kaukaua. Kena ibalebale na noda lomani Jiova dina e sega ni ka ga eda vakila e lomada. E okati kina noda bula kece vakayalo, vakayago tale ga. E tukuna na parofita o Maika ni vinakata qori o Jiova.—Wilika Maika 6:8.

⁴ Eda na vakaraitaka vakacava nida lomana dina na Tamada vakalomalagi? Me kua tale ni dua na ka e vo nida lomani koya. Me vaka ga e tukuna o Jisu, ena okati kina na noda bula vakayago, ivakarau ni lomada, kei na noda bula vakayalo. Ena ulutaga sa oti, eda vulica e va na sala e vakaraitaka kina o Jiova ni lomani keda vakalevu. Meda veivosakitaka mada na sala eda rawa ni vakaraitaka qai vakatitobutaka na noda lomani Jiova ena sala e vakadonuya o koya.

5. Nida vakasamataka na levu ni ka e cakava ena vukuda o Jiova, na cava eda na cakava?

⁵ Na cava o na cakava ke soli vei iko e dua na iloloma? Macala ga ni o na vakavinavinakataka. O na vakayagataka vinaka tale ga, o na sega ni raica vakamamada. E vola na tisaipeli o Jemesa: “Na iloloma vinaka kece kei na isolisoli uasivi kece e vu mai cake, e solia mai na Tama ni rarama vakalomalagi, e sega ni dau veiveisau o koya, e sega ni vaka na veitosoyaki ni yaloyalo.” (Jeme. 1:17) E vakarautaka e veigauna o Jiova na ka eda gadreva meda bula kina, meda marau tale ga. Vakacava e sega ni uqeti iko qori mo dolea nona loloma?

6. Na cava mera cakava na Isireli me vakalougatataki ira tiko ga kina o Jiova?

⁶ Rauta ni vica na drau na yabaki nodra vakila voli mai na Isireli na nona loloma kei na nona veitaqomaki o Jiova. Dua na ka na levu ni nodra vakalougatataki vakayago, vakayalo tale ga. (Vkru. 4:7, 8) Me rawa nira vakalougatataki tiko ga, ena vinakati mera talairawarawa ina Lawa ni Kalou, okati kina nodra cabora wasoma vei Jiova na “ka vinaka duadua mai na isevu” ni nodra qele. (Lako 23:19) Nira cakava qori, era na sega kina ni raica vakamamada na loloma i Jiova kei na nona veivakalougatataki.—Wilika Vakarua 8:7-11.

7. Eda na vakayagataka vakacava na noda “iyau” meda vakaraitaka kina nida lomani Jiova?

⁷ Vakacava o keda? Eda sa sega ni vakacaboisoro nikua, ia eda na vakaraitaka nida lomana na Kalou ena noda rokovi koya ena noda “iyau.” (Vkai. 3:9) Eda na cakava vakacava qori? Rawa nida vakayagataka na noda iyau meda tokona kina na cakacaka ena vanua eda tiko kina se vuravura raraba. Qo e sala vinaka meda vakaraitaka kina noda lomani Jiova, ke mani levu se lailai na ka e tu vei keda. (2 Kor. 8:12) E tiko eso tale na sala eda rawa ni vakaraitaka vei Jiova nida lomani koya.

8, 9. E veisemati vakacava na noda nuitaka na yalayala i Jiova kei na noda lomani koya? Vakamacalataka.

⁸ Nanuma lesu na nona vakasalataki ratou nona imuri o Jisu me ratou kua ni lomaocaocataka na kakana kei na isulu, me ratou vakaliuca tiko ga na Matanitu ni Kalou. E tukuna ni kila vinaka na Tamada na ka eda gadreva dina. (Maciu 6:31-33) Na ivakarau ni noda nuitaka na yalayala qori ena kilai kina na levu ni noda lomani Jiova, ni rau veisemati na loloma kei na veinuitaki. Eda sega ni rawa ni lomana e  dua ke da sega ni nuitaki koya. (Same 143:8) Meda tarogi keda gona: ‘E laurai ena ka au vakaliuca kei na ivakarau ni noqu bula niu lomani Jiova dina? E laurai ena ka au cakava e veisiga niu nuitaka ni rawa ni vakarautaka o Jiova na ka au gadreva?’

⁹ E vakaraitaka na loloma kei na veinuitaki qori e dua na lotu vaKarisito o Mike. Ni se gone, dua na ka nona vinakata me qaravi Jiova ena dua tale na vanua. A mani vakawati qai rua na luvena, ia e sega ni seavu na nona via veiqaravi. Ni uqeti koya e levu na ulutaga kei na ripote e baleta na veiqaravi ena vanua e vinakati kina vakalevu na veivuke, e nanuma kina o Mike kei na nona vuvale me ratou bula rawarawa ga. Ratou volitaka nodratou vale, ratou lai saumi rumu ga. E vakalailaitaka sara o Mike nona bisinisi ni sasamaki, e vulica tale ga na sala me vakayagataka kina na Internet mai vanuatani me qarava kina nona bisinisi. Eratou toki sara, ni oti e rua na yabaki e vanuatani, e kaya o Mike: “Keitou vakadinata na vosa i Jisu ena Maciu 6:33.”

10. Me vakataki Tevita ga, ena yaga vakacava nida vakasamataka vakatitobu na ka dina e vakavulica o Jiova?

¹⁰ Rauta na 3,000 na yabaki sa oti, e uqeti Tui Tevita na ka e raica e lomalagi. E vola: “Na lomalagi e tukuna na lagilagi ni Kalou; na maliwalala e cake e vakarogoya na cakacaka ni ligana.” E uqeti koya tale ga na vuku e tiko ena Lawa ni Kalou, e kaya: “E uasivi na lawa i Jiova, e veivakaukauataki. E nuitaki na veivakadreti i Jiova, e vakavukui koya e yalowai.” E yaga vakacava vei Tevita na nona vakavinavinaka? E tomana o koya: “Na vosa ni gusuqu, kei na vakanananu ni lomaqu me talei vei kemuni, i Jiova, na noqu Uluvatu kei na noqu iVakabula.” Macala ga ni rau veivolekati sara ga kina o Tevita kei na Kalou.—Same 19:1, 7, 14.

11. Eda na vakayagataka vakacava na levu ni ka eda kila ena iVolatabu meda vakaraitaka kina nida lomani Jiova? (Raica na imatai ni iyaloyalo.)

¹¹ Nikua, eda vakalougatataki nida kila e levu na ka me baleta na ibulibuli i Jiova kei na vakayacori ni lomana. E uqeta o vuravura na vuli torocake kei na vulici ni veika vovou. Ia e laurai ni levu e luluqa nodra vakabauta qai seavu nodra lomani Jiova nira vakaliuca qori. E uqeti keda na iVolatabu meda taleitaka na kilaka, me tiko tale ga vei keda na vuku kei na yalomatua. Kena ibalebale meda vulica meda vakayagataka na kilaka e solia na Kalou, me yaga kina vei keda kei na so tale. (Vkai. 4:5-7) E nona “inaki [na Kalou] me bula na tamata kece ga, mera mai kila vinaka na ka dina.” (1 Tim. 2:4) Eda vakaraitaka nida lomani Jiova ni vu mai lomada noda kacivaka na itukutuku vinaka ni Matanitu ni Kalou da qai vukei ira na tamata mera kila na loma ni Kalou vei keda.—Wilika Same 66:16, 17.

12. Na cava e tukuna e dua na itabagone ena nona vakavinavinakataka na isolisoli vakayalo i Jiova?

¹² E rawa nira vakaraitaka tale ga na itabagone nodra lomani Jiova, nira vakavinavinakataka na isolisoli vakayalo e vakarautaka. E nanuma lesu o Shannon na gauna e se yabaki 11 kina. Erau tiko kei tacina e yabaki 10 kei na nodrau itubutubu ena Soqo ni Tikina e kena usutu “Yalo ni Qaravi Kalou.” Ni caka tiko na soqo, era kerei na itabagone mera dabe ena dua na vanua vakarautaki. E taqaya o Shannon, ia e muria ga na ka e tukuni. Dua na ka nona marau nira yadua na itabagone na iloloma totoka na ivola Questions Young People Ask—Answers  That Work. Vakacava na rai i Shannon? E kaya: “Au sa qai liaca ena gauna ya ni bula dina tiko o Jiova, e lomani au tale ga vakalevu.” E tomana: “Eda marau ni solia wale noda Kalou vinaka o Jiova na iloloma talei qai uasivi!”

13, 14. Na cava meda cakava ni vakadodonutaki keda o Jiova? Na vuna?

¹³ E tukuna vei keda na iVolatabu: “Ni o koya e lomana o Jiova e vunauca, me vaka ga e vakayacora na tama vua na luvena e lomana.” (Vkai. 3:12) Na cava gona meda cakava? E tukuna vakamatata na yapositolo o Paula: “E sega ni dau marautaki na veivakadodonutaki ena gauna e tau kina, e dau kauta mai na rarawa.” E sega ni tukuna tiko o Paula ni ca na veivakadodonutaki, ni tomana: “Ia e muri, vei ira na vakavulici kina, ena kauta mai vei ira na vakacegu, ena dodonu na nodra ivalavala.” (Iper. 12:11) Ke da lomani Jiova, eda na sega ni vakawelewele se cata na nona ivakasala. Ena dredre sara ga vei ira eso mera cakava qori. Ia na noda lomani Jiova ena vukei keda vakalevu.

¹⁴ Ena gauna i Malakai, levu na Jiu era sega ni kauaitaka na ivakasala i Jiova. Era kila vinaka na Lawa me baleta na vakacaboisoro, ia era vakawelewele, e mani vakasalataki ira vakaukaua o Jiova. (Wilika Malakai 1:12, 13.) E vakacava na bibi ni ka era cakava ya? Qo na ka e tukuna vei ira: “Au na cudruvi kemuni, au na veisautaka me ca na ka oni vakalougatataki kina. Io, au sa vakacacana na veivakalougatataki, ni oni sega ni tugana [noqu ivakaro] e lomamuni.” (Mala. 2:1, 2) Macala eke nida na sotava ga na leqa ke da nakita se vakamatauni keda meda vakalecalecava na ivakasala yalololoma i Jiova.

15. Na itovo cava e takalevu tu e vuravura nikua meda qarauna?

¹⁵ E takalevu ena vuravura nikua na yalo ni nanumi keda ga. Era sega ni vinakata kina e levu mera vakadodonutaki  se me tukuni vei ira na ka mera cakava. O ira mada ga era ciqoma na ivakasala se veivakadodonutaki, era na muria tu ga ena voraki. Eda vakasalataki gona na lotu vaKarisito meda “kua ni muria na ivakarau ni veika vakavuravura qo.” Me vaka ni “uasivi na loma ni Kalou,” e dodonu meda kila da qai muria. (Roma 12:2) E vakayagataka o Jiova na nona isoqosoqo me vakasalataki keda ena kena gauna, me vaka na noda veimaliwai kei ira na tagane ke da yalewa, se yalewa ke da tagane, noda ilala, kei na ka ni veivakamarautaki. Nida ciqoma qai muria na ivakasala qori, eda vakaraitaka nida vakavinavinakataki Jiova da qai lomani koya mai vu ni lomada.—Joni 14:31; Roma 6:17.

16, 17. (a) Ni bera nida vakatulewa, na cava meda kauaitaka kina na ka e vinakata o Jiova? (b) Era vakaraitaka vakacava na Isireli nira sega ni lomani Jiova se nuitaki koya?

¹⁶ Nira kidava na gonelalai na leqa, era dau totolo ni golevi ira nodra itubutubu. Ni toso tiko nodra yabaki ni bula na gone, era sa tekivu vakatulewa ga vakataki ira. Qori e tiki ni nodra bula na tamata uabula. Ia vei ira na gone era dau volekati nodra itubutubu, era na taroga na nodra nanuma ni bera nira vakatulewa. E va tale ga qori noda bula vakayalo. E solia vei keda o Jiova na yalona tabu, me uqeti keda meda ‘kua ni vinakata wale ga, ia meda cakava sara ga.’ Ke laurai ena noda vakatulewa nida sega ni kauaitaka na ka e vinakata o Jiova, e vakaraitaka qori nida sega ni lomani koya se nuitaki koya.—Fpai. 2:13.

¹⁷ Ena gauna i Samuela, o ira na Filisitia era vakadrukai ira vakaca na Isireli ena ivalu. Era vinakata sara ga na tamata ni Kalou mera vukei ra qai taqomaki. Na cava era qai cakava? Era vakatulewataka: “Meda kauta mai Sailo na kato ni veiyalayalati i Jiova, me tiko vata kei keda me vakabulai keda mai na ligadra na keda meca.” Cava e qai yaco? “Levu sara era mate; era mate vei ira na Isireli e le 30,000 na sotia era dau taubale. E kovei tale ga na Kato ni Kalou.” (1 Sam. 4:2-4, 10, 11) Era nanuma na Isireli ni nodra kauta tiko na Kato ni Kalou e dusia nira nuitaka na veivuke i Jiova. Ia era sega mada ga ni kerea nona veidusimaki, era cakava ga na ka era nanuma, ra qai sotava kina na leqa.—Wilika Vosa Vakaibalebale 14:12.

18. Me vakataki Tevita, me vakacava na ivakarau ni lomada nida kerea na veivuke i Jiova?

¹⁸ E vakaraitaka na daunisame na ka e dodonu meda cakava, ni vola: “Waraka na Kalou, niu na vakacaucautaki koya ni noqu iVakabula Cecere. Na noqu Kalou, au sa yalolailai. Qori na vuna au nanumi kemuni kina.” (Same 42:5, 6) E titobu dina nona lomani Jiova o Tevita! Vakacava o dau lomani Jiova qai nuitaki koya va qori? Ke o vakaio mada ga, o se rawa tiko ga ni nuitaki koya vakalevu me salavata kei na ka e tukuna na iVolatabu: “Mo nuitaki Jiova ena lomamu taucoko, mo kua ni vakararavi ena nomu yalomatua. Mo nanumi koya ena ka kece o cakava, ena vakadodonutaka na nomu ilakolako o koya.”—Vkai. 3:5, 6.

19. O na vakaraitaka vakacava nomu lomani Jiova?

¹⁹ Ni lomani keda e liu o Jiova, sa vakaraitaka o koya na sala meda lomani koya kina. Meda kua ni guilecava na levu ni ka e cakava ena vukuda. Meda vakaraitaka tale ga nida lomani koya ena ‘lomada taucoko, ena noda vinaka taucoko, ena noda vakasama taucoko, kei na noda kaukaua taucoko.’—Mari. 12:30.