Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

E Nuitaki Nomu Lewaeloma?

E Nuitaki Nomu Lewaeloma?

“Na inaki sara ga ni ivakaro qo me savasava kina na noda loloma, me vinaka na noda lewaeloma.”1 TIM. 1:5.

SERE: 57, 48

1, 2. O cei e solia na noda lewaeloma? Na cava meda vakavinavinakataka kina qori?

NI BULI keda o Jiova, e solia vei keda na galala ni vakatulewa. E solia na Kalou e dua na idusidusi yaga vei rau na imatai ni tagane kei na yalewa, vaka kina nodrau kawa—na lewaeloma, me vakalewa na ka e dodonu kei na ka e cala. Ke vakayagataki vinaka, ena dusimaki keda meda caka vinaka, meda kua ni cakacala. Ni solia o Jiova noda lewaeloma e dusia ni lomani keda, e vinakata meda duavata ena caka ni lomana.

2 Nikua, e tiko vei keda kece na lewaeloma. (Wilika Roma 2:14, 15.) Levu era sega ni muria na ivakatagedegede vakaivolatabu, ia eso era dau caka vinaka ra qai cata na ka ca. Na lewaeloma e tarovi ira e levu mera kua ni cakava na veika torosobu. Ke sega na lewaeloma, sa na ca ga na bula e vuravura! De dua ena levu sara na veika ca ni vakatauvatani nikua. Eda vakavinavinaka ni solia vei keda na Kalou na lewaeloma!

3. E veiuqeti vakacava na lewaeloma ena ivavakoso vaKarisito?

3 Ni vakatauvatani kei ira e levu nikua, o keda na dauveiqaravi ni Kalou eda na via vakavulica na noda lewaeloma. Eda vinakata me salavata noda lewaeloma kei na ivakatagedegede  ni ka e dodonu kei na ka e cala, na ka e vinaka kei na ka ca e vakatakilai ena iVolatabu. Ena yaga vakalevu ena ivavakoso na lewaeloma e vakavulici vinaka. Ia e sega ni ka ni vakasama ga noda vakavulica kei na noda vakayagataka noda lewaeloma. E dau cavuti vata ena iVolatabu na lewaeloma vinaka, na vakabauta kei na loloma. E vola o Paula: “Na inaki sara ga ni ivakaro qo me savasava kina na noda loloma, me vinaka na noda lewaeloma, me kua ni veivakaisini na noda vakabauta.” (1 Tim. 1:5) Nida vakavulica na noda lewaeloma da qai muria sara, ena titobu noda lomani Jiova, ena dei tale ga noda vakabauta. Ena kilai na keda ituvaki dina vakayalo, na ivakarau ni lomada, kei na levu ni noda via vakamarautaki Jiova ena sala eda vakayagataka kina noda lewaeloma. Io, ena vakatakila na noda lewaeloma se da tamata vakacava.

4. Eda na vakavulica vakacava na noda lewaeloma?

4 Eda na vakavulica vakacava noda lewaeloma? E bibi meda vulica wasoma na iVolatabu, vakasamataka vakatitobu na ka eda wilika, da qai kerei Jiova me vukei keda meda muria na ka eda vulica. Kena ibalebale eda na sega ni vulica wale ga na iVolatabu kei na kena lawa. Na inaki ni noda vulica na iVolatabu meda kilai Jiova vinaka kina, nona itovo, na ka e taleitaka kei na ka e cata. Ni caka qori ena salavata na noda lewaeloma kei na ka e vinakata na Kalou o Jiova. Qori ena uqeta na lomada, eda na via vakatotomuri koya vakalevu.

5. Na cava ena veivosakitaki ena ulutaga qo?

5 De dua eda na taroga: Ena veivuke vakacava na lewaeloma e vakavulici vinaka nida vakatulewa? Eda na doka vakacava na nodra vakatulewa na tacida? Ena uqeti keda vakacava na noda lewaeloma meda gumatua? Meda veivosakitaka mada qo e tolu na ituvaki e rawa ni yaga kina noda lewaeloma: (1) noda bulabula vakayago, (2) ka ni veivakamarautaki, kei na (3) cakacaka vakaitalatala.

MO YALORAWARAWA

6. Na ituvaki cava ena vinakati kina na vakatulewa?

6 E uqeti keda na iVolatabu meda qarauna na ivalavala e rawa ni vakaleqai keda. E uqeti keda tale ga meda lewai keda vinaka ena so tale na ka, me vaka na kana kei na gunu. (Vkai. 23:20; 2 Kor. 7:1) Eda kila nida na tauvimate, eda na vakila tale ga na bula vaqase. Ia nida muria na ivakavuvuli vakaivolatabu qori, eda na qarauna na noda bula. E tiko ena so na vanua na veiqaravi vakavuniwai kei na kena e sega ni vauci kina na veiqaravi e valenibula. Levu na gauna e ciqoma na valenivolavola ni tabana na nodra ivola na mataveitacini nira kere ivakasala me baleta na duidui veiqaravi vakavuniwai. Levu era taroga, “E rawa nida ciqoma na tamata i Jiova na veiqaravi qo?”

7. Eda na vakatulewataka vakacava na ka e vauca na veiqaravi vakavuniwai?

7 Ke taro ivakasala mada ga e dua, ena sega ni lewa na valenivolavola ni tabana se o ira na qase ni ivavakoso na veiqaravi vakavuniwai me digia. (Kala. 6:5) Era na vakamacalataka ga na ka e tukuna o Jiova me vukea na lotu vaKarisito me vakatulewa vinaka. Kena ivakaraitaki, e bibi me nanuma tiko na lotu vaKarisito na ivakaro vakaivolatabu me ‘vakatabui koya mai na dra.’ (Caka. 15:29) Kena ibalebale sa na sega tu ga ni ciqoma na veiqaravi e okati kina na kena tauri na dra se iwasewase lelevu ni dra. Qori sa rawa ni cakacaka kina nona lewaeloma me taura se sega na iwasewase lailai e vidavidai mai  na iwasewase lelevu ni dra. * Na ivakasala vakaivolatabu cava tale ena vukei keda nida vakatulewataka na ka e vauca na veiqaravi vakavuniwai?

8. E yaga vakacava na Filipai 4:5 ena ka e vauca na noda bulabula vakayago?

8 E kaya na Vosa Vakaibalebale 14:15: “Na tamata yalowai e vakabauta na vosa kece, ia o koya e yalomatua e vakasamataka na nona ilakolako kece.” Eso na tauvimate sa na rairai sega tu ga na kena iwali. E ka vakayalomatua meda qarauna na veiqaravi e tukuni wale tu ga ni yaga vakalevu qai sega ni bau vakadinadinataki. E uqeti vakalou o Paula me vola: “Me kilai na nomuni yalorawarawa vei ira na tamata kece ga.” (Fpai. 4:5) Nida yalorawarawa, eda na vakaliuca tiko ga na veika vakayalo, eda na sega ni vakayagataka vakalevu noda gauna ena ka e vauca noda bulabula vakayago. Ke da kauaitaka vakalevu na noda bulabula vakayago, eda sa kauaitaka ga na ka e baleti keda. (Fpai. 2:4) E bibi duadua na noda bula vakayalo. Me donu tale ga noda rai me baleta noda bulabula vakayago.—Wilika Filipai 1:10.

O dau togoraka ga nomu rai? (Raica na parakaravu 9)

9. E yaga vakacava na Roma 14:13, 19 ena vakatulewa me baleta na noda bulabula vakayago? Ena rawa ni vakaleqai vakacava noda duavata?

9 Na lotu vaKarisito e yalorawarawa ena sega ni togoraka nona nanuma. Erau veiuqeti e dua na veiwatini ena dua na vanua vakaUrope me vakayagataki na isosomi ni kakana kei na kanamusu. Erau uqeti ira eso na tacida mera cakava qori, ia eso era bese ni muria. Toso na gauna, e sega ni mana na veiqaravi qori, e vakaleqai sara ga kina nodra veimaliwai. E nodrau dodonu na veiwatini me rau digia na isosomi ni kakana me rau vakayagataka kei na ituvatuva ni kanamusu. Ia vakacava e ka vakayalomatua me vakaleqa na duavata ni ivavakoso na ka e vauca na bulabula vakayago? Ena gauna makawa e Roma, e duidui na nodra rai eso na lotu vaKarisito me baleta na kakana kei na so na siga. Ia na cava e qai vakasalataki ira kina o Paula? E kaya: “E dua na tamata e okata me bibi e dua na siga mai na vo ni siga, e dua tale e okata mera tautauvata kece ga na siga. Me vakadeitaka na tamata yadua na ka e nanuma.” Ena bibi mera kua ni veivakatarabetaki.—Wilika Roma 14:5, 13, 15, 19, 20.

10. Na cava meda doka kina na nodra vakatulewa eso tale? (Raica na imatai ni iyaloyalo.)

10 Ke da sega ni kila na vuna e duidui kina nona vakatulewa e dua na tacida, meda kua ni totolo ni vakalewai koya se meda vakasaurarataki koya me veisautaka nona vakatulewa. De dua e se “malumalumu” na nona lewaeloma qai vinakati me vakavulici tale se sa rui kauai vakasivia ena so na ituvaki. (1 Kor. 8:11, 12) Ena dua tale na yasana, de dua ena vinakati  meda dikeva noda lewaeloma, ena rairai vinakati me vakavulici vinaka tale me salavata kei na ivakavuvuli vakalou. Ena ka e vauca na noda bulabula vakayago, dodonu meda vakatulewa ga kina da qai colata na kena itavi.

NA KA NI VEIVAKAMARAUTAKI E YAGA

11, 12. Nida digia na ka ni veivakamarautaki, na ivakasala vakaivolatabu cava meda nanuma tiko?

11 E buli keda o Jiova meda marautaka na ka ni veivakamarautaki, me yaga tale ga vei keda. E vola o Solomoni ni tiko “na gauna ni dredre” kei “na gauna ni meke.” (Dauv. 3:4) Ia e sega ni yaga kece se veivakabulabulataki na ka ni veivakamarautaki. E sega tale ga ni vinaka meda vakaitavi vakalevu se wasoma ena ka ni veivakamarautaki. Ena vukei keda vakacava noda lewaeloma meda marautaka na ka ni veivakamarautaki e veivakabulabulataki qai yaga?

12 E veivakasalataki na iVolatabu ena itovo e kilai me “vua ni itovo vakayago.” E okati kina na “veiyacovi tawadodonu, ivalavala dukadukali, ivalavala vakasisila, qaravi matakau, qaravi tevoro, veicati, veivala, vuvu, cudru, duiyaloyalo, veisei, muritamata, veivuvutaki, daumateni, marau vakalialia, kei na veika va ya.” A vola o Paula ni o ira “na cakava na ka kece qo era na sega ni rawata na Matanitu ni Kalou.” (Kala. 5:19-21) E vinaka kina meda tarogi keda: ‘Vakacava e dau uqeti au noqu lewaeloma meu kua ni sarava na qito e laurai kina na ivalavala kaukaua, veiqati, valataki vanua, se kena e voravora? E dau vakasalataki au noqu lewaeloma niu temaki meu sarava na iyaloyalo vakasisila se iyaloyalo e uqeta na ivalavala tawadodonu, mateni se ka vakatevoro?’

13. E yaga vakacava na ivakasala ena 1 Timoci 4:8 kei na Vosa Vakaibalebale 13:20 nida digia na ka ni veivakamarautaki?

13 Na ivakavuvuli vakaivolatabu e rawa ni vukea na noda lewaeloma nida digia na ka ni veivakamarautaki. Kena ivakaraitaki, e tukuna na iVolatabu ni “yaga vakalailai ga na vakaukaua yago.” (1 Tim. 4:8) Levu era vakadinata ni vakaukaua yago e caka vakarauta qai wasoma, e bulabula ina yago kei na vakasama. Ia vakacava ke da via vakaukaua yago kei na so tale, ena vinakati meda digia vinaka noda ilala? E kaya na Vosa Vakaibalebale 13:20: “O koya e vakailala kei ira na vuku ena vuku, ia o koya e veitokani kei ira na lialia ena tini ca.” E bibi gona meda vakayagataka noda lewaeloma e vakavulici vakaivolatabu nida digia na ka ni veivakamarautaki.

14. E yaga vakacava ina dua na vuvale na Roma 14:2-4?

14 E rua tiko na luvedrau yalewa o Christian kei Daniela. E tukuna o Christian: “Keitou veivosakitaka ena neitou Sokalou Vakavuvale na ka ni veivakamarautaki. Keitou vulica ni so na ka ni veivakamarautaki e vinaka, eso e sega. O cei era ilala vinaka? E taroga qori e dua na luvequ yalewa baleta ni raica ni so na itabagone era iVakadinadina i Jiova e koronivuli e sega ni dau vinaka nodra itovo ena gauna ni vakacagicagi. E voleka sara ga ni rawai me vakatotomuri ira. Keitou mani veivosakitaka ni tiko yadua na noda lewaeloma, ena vinakati me dusimaki keda ena ka meda cakava kei ira meda vakailala vata.”—Wilika Roma 14:2-4.

Na nomu lewaeloma e vakavulici vakaivolatabu e rawa ni vukei iko mo qaqarauni (Raica na parakaravu 14)

15. Ena yaga vakacava na Maciu 6:33 nida vakasamataka tiko na ka ni veivakamarautaki?

15 Me vakasamataki tale ga na gauna ni veivakamarautaki. Vakacava e dau bibi vei iko na veika vakayalo, me vaka na soqoni, cakacaka vakaitalatala, kei na vuli  vakataki iko se dau liu na ka ni veivakamarautaki? Na cava e bibi duadua vei iko? E kaya o Jisu: “Dou vakaliuca tiko ga na Matanitu ni Kalou kei na nona yalododonu, ena qai vakaikuritaki vei kemudou na ka kece qo.” (Maciu 6:33) Vakacava e dau totolo ni dusimaki iko nomu lewaeloma mo muria na ivakasala i Jisu?

UQETI MEDA GUMATUA ENA VUNAU

16. E uqeti keda vakacava na noda lewaeloma meda vunau?

16 Na lewaeloma vinaka ena sega ni uqeti keda ga meda qaqarauni mai na cakacala. E uqeti keda meda dau caka vinaka me vaka na noda vunau e veivale kei na noda vunau tawalokuci ena gauna veiganiti. Na lewaeloma i Paula e uqeti koya me cakava sara ga qori. E vola: “E noqu itavi ga. Au sa na kalouca dina keu sega ni tukuna na itukutuku vinaka!” (1 Kor. 9:16) Nida vakatotomuri koya, ena vosa vei keda noda lewaeloma, ena vakadeitaka tale ga nida cakava tiko na ka e dodonu. Nida vunautaka na itukutuku vinaka, eda sa uqeta tiko nodra lewaeloma o ira eda vunau vei ira. E kaya o Paula: “Keitou vakavotuya ga na dina. Koya gona ena mata ni Kalou, keitou ivakaraitaki vinaka kina ena nodra lewaeloma na tamata kece.”—2 Kor. 4:2.

17. E muria vakacava e dua na tacida yalewa na veidusimaki ni nona lewaeloma?

17 Ni se yabaki 16 o Jacqueline, a vulica e koronivuli na lesoni na biology. E vulici kina vakamatailalai na bula vakaidewadewa. “Eliu au dau vakaitavi kina, ia qo e sega ni donu ena noqu lewaeloma meu vakaitavi. Ena sega ni rawa niu tokona na ivakavuvuli ni bula vakaidewadewa. Au gole sara vei qasenivuli, au vakamacalataka na vuna au na sega ni tokona kina. Au kurabui ni kauaitaka o qasenivuli na noqu rai, mani tukuna meu vakamacalataka ena kalasi na ulutaga me baleta na veika buli.” E lomavakacegu o Jacqueline ni rogoca qai muria na veidusimaki ni nona lewaeloma e vakavulici vakaivolatabu. Vakacava e dau uqeti iko tale ga nomu lewaeloma mo cakava na ka e dodonu?

18. Na cava meda saga kina me vinaka qai nuitaki noda lewaeloma?

18 E ka talei dina nida saga me salavata kei na noda bula na ivakatagedegede i Jiova kei na nona ivalavala! Ena vukei keda gona noda lewaeloma meda cakava qori. Nida vulica wasoma na Vosa ni Kalou, vakananuma vakatitobu da qai muria sara, eda sa vakavulica tiko noda lewaeloma. Ena yaga dina na isolisoli talei qori ena bula vaKarisito!

^ para. 7 Raica na “Taro na Dauwiliwili” ena Vale ni Vakatawa ni June 15, 2004, t. 29-31.