Raica sara na lewena

Raica na lewenivola

Sala e Lomani Keda Kina o Jiova

Sala e Lomani Keda Kina o Jiova

“Ni raica mada na levu ni nona lomani keda na Tamada!”​—1 JONI 3:1.

SERE: 91, 13

1. Na cava e uqeti keda kina na lotu vaKarisito na yapositolo o Joni? Na vuna?

E BIBI dina meda vakasamataka vakatitobu na ka e tukuni ena 1 Joni 3:1. E tukuna kina o Joni: “Ni raica mada na levu ni nona lomani keda na Tamada.” E uqeti keda tiko na lotu vaKarisito o Joni meda vakasamataka na loloma levu ni Kalou, kei na sala e lomani keda kina. Nida cakava qori, eda na veivolekati kei koya da qai lomani koya vakalevu.

2. Na cava e dredre kina vei ira eso mera vakabauta ni lomani ira na Kalou?

2 E dredre vei ira eso mera vakabauta ni lomani keda na Kalou. Era nanuma ni dodonu meda rerevaki koya da qai talairawarawa vua. De dua e yavutaki qori ena so na ivakavuvuli lasu sa vakawakana tu, era nanuma kina ni sega ni dauloloma na Kalou, se dredre meda lomani koya. Ia e tiko eso era nanuma ni Kalou e lomani ira kece na tamata, se mani cava era cakava. Ni o sa vulica na iVolatabu, o kila ni idivi kei Jiova na loloma, e uqeti koya qori me solia na Luvena me keda ivoli. (Joni 3:16; 1 Joni 4:8) Ia na noda isususu se vanua eda cavutu mai kina, ena rairai vakadredretaka na noda kila na levu ni nona lomani keda o Jiova.

3. Eda kila vakacava ni lomani keda na Kalou?

 3 Ia e lomani keda vakacava o Jiova? Na isaunitaro qori e yavutaki ena ka e cakava vei keda na Kalou, oya ni buli keda na kawatamata. (Wilika Same 100:3-5.) Oya na vuna e vakatokai Atama kina na iVolatabu me “luve ni Kalou.” E vakavulici ira na nona imuri o Jisu mera kaciva na Kalou “Tamai keimami mai lomalagi.” (Luke 3:38; Maciu 6:9) Ni solia vei keda na bula o Jiova, sa okati me Tamada; na noda veivolekati e vaka ga e dua na tama kei na luvena. E lomani keda vakalevu o Jiova me vaka ga e dua na tama vinaka e lomana na luvena.

4. (a) E duidui vakacava o Jiova vei ira na tama nikua? (b) Na cava eda na dikeva ena ulutaga qo kei na kena e tarava?

4 Era sega ni uasivi na tama nikua. Se mani vakacava nodra sasaga, era na sega ni vakaraitaka vinaka sara na loloma vakatama i Jiova. Eso era se nanuma vinaka tu na ka vakadomobula era sotava nira se gone ena nodra veivakalolomataki na tamadra, ni vakaleqa sara ga na ituvaki ni nodra vakasama kei na lomadra. Ia o Jiova e sega ni va ya. (Same 27:10) Eda na veivolekati kei Jiova nida vulica na sala e lomani keda kina kei na nona dau kauaitaki keda. (Jeme. 4:8) Ena ulutaga qo, eda na dikeva tiko e va na sala e lomani keda kina o Jiova. Ena ulutaga e tarava, eda na dikeva e va na sala meda lomani koya kina.

VAKARAUTAKA VAKAYALOLOLOMA NA KA EDA GADREVA

5. Na cava e kaya vei ira na kai Aceni o Paula me baleta na Kalou?

5 Ni tiko mai Aceni e Kirisi na yapositolo o Paula, dua na ka na levu ni ivakatakarakara ni kalou tagane kei na kalou yalewa e raica ena siti. Era vakabauta na lewenivanua ni nodra kalou qori e solia vei ira na bula kei na ka era gadreva. E mani kaya vei ira o Paula: “Na Kalou e buli vuravura kei na ka kece e tu kina . . . e solia vei keda kece na bula, na icegu, kei na ka kece ga. . . . O koya ga e buli keda, e vakavuna tale ga noda bula tiko kei na noda yavala.” (Caka. 17:24, 25, 28) Io, ena nona loloma o Jiova, e vakarautaka “na ka kece ga” eda gadreva meda bula kina. Vakasamataka mada na ibalebale ni matavosa qori.

6. E laurai vakacava ena noda vuravura ni lomani keda na Kalou? (Raica na imatai ni iyaloyalo.)

6 Vakasamataka mada na vuravura qo, e bulia o Jiova qai ‘solia vei ira na luve ni tamata.’ (Same 115:15, 16) Dua na ilavo levu era vakayagataka na sainitisi mera vaqara kina e maliwalala eso tale na vuravura e tautauvata kei na noda vuravura. Sa laurai e vicanadrau na vuravura, ia era rarawataka na sainitisi ni sega ni dua vei ira na vuravura qori e tiko kina na ka eda gadreva meda bula kina. E duatani sara na noda vuravura vei ira na ibulibuli kece ni Kalou. Vakasamataka mada, e sega ni wiliki rawa na levu ni vuravura e tiko ena isoso kalokalo e vakatokai na Milky Way kei na so tale, ia e bulia o Jiova na noda vuravura me tawani, me marautaki, totoka qai rawarawa kina na bula! (Aisea 45:18) E dusia qori na levu ni nona lomani keda o Jiova.—Wilika Jope 38:4, 7; Same 8:3-5.

7. E laurai vakacava ena nona buli keda o Jiova ni lomani keda dina?

7 Ni bulia na vuravura totoka qo o Jiova meda tiko kina, e kila ni na sega ni vinakati ga na veika vakayago meda marau kina da qai lomavakacegu. Ena nuidei e dua na gone ke vakila na nodrau loloma kei na nodrau kauai na itubutubu. E buli keda o Jiova meda ucui koya, e vakarautaka na veika vakayalo me rawa  nida vakila na nona loloma da qai dolea lesu vua. (Vkte. 1:27) E tukuna tale ga o Jisu: “Era marau o ira na kauaitaka nodra bula vakayalo.” (Maciu 5:3) Ni Tama dauloloma o Jiova, ena “vakarautaka vakayauyau vei keda na ka kece meda marau kina,” qori na veika vakayago kei na veika vakayalo.—1 Tim. 6:17; Same 145:16.

VAKAVULICI KEDA VAKAYALOLOLOMA ENA KA DINA

8. Na cava me dusimaki keda kina na “Kalou daudina”?

8 Era lomani luvedra na tama, ra qai via taqomaki ira mera kua ni vakacalai se lawakitaki. Levu na itubutubu era sega ni muria na ivakatagedegede vakaivolatabu mera dusimaki luvedra kina. E dau tini ga ena veilecayaki kei na rarawa ena vuvale. (Vkai. 14:12) Ena yasana adua, o Jiova e “Kalou daudina.” (Same 31:5) E lomani ira na luvena, e vinakata me dusimaka nodra bula kece na nona rarama ni ka dina, vakabibi ena ka e vauca na sokalou. (Wilika Same 43:3.) Na cava na ka dina sa vakatakila o Jiova? E vakaraitaka vakacava qori ni lomani keda?

Era vakatotomuri Jiova na tama lotu vaKarisito nira vakavulici luvedra ena ka dina, mera veiwekani tale ga kei na Tamadra vakalomalagi (Raica na parakaravu 8-10)

9, 10. E vakaraitaka vakacava o Jiova nona lomani keda ni vakatakila na ka dina (a) me baleti koya? (b) me baleti keda?

9 Kena imatai, e vakatakila sara ga o Jiova na ka dina me baleti koya. E vakatakila na yacana, ni basika vakalevu duadua ga ena iVolatabu ni vakatauvatani kei na so tale na yaca. Qori na sala e volekati keda kina o Jiova, me rawa nida kilai koya. (Jeme. 4:8) E vakatakila tale ga na nona itovo, se mataqali Kalou vakacava o koya. E laurai na nona kaukaua kei na vuku ena lomalagi kei na vuravura, ia e vakatakila sara ga ena iVolatabu na nona lewadodonu, vakabibi na levu ni nona loloma. (Roma 1:20) O Jiova e vaka e dua na tama e tu vua na kaukaua, na vuku, lewadodonu, yalololoma, e rawarawa kina vei ira na luvena mera veiwekani voleka kei koya.

10 E vakatakila tale ga o Jiova na ka dina me baleti keda, qori na noda itavi ena ka e vauca na nona inaki. Qori e rawati kina na duavata kei na veiyaloni ena vuvale ni Kalou. Eda vulica ena iVolatabu ni sega nida buli na tamata meda lewai keda ga se meda yawaka na Kalou. Nida vakalecalecava na ka dina qori, eda na sotava ga na leqa. (Jere. 10:23) E bibi dina qori ena noda bula. Nida ciqoma na lewa ni Kalou, eda na lomavakacegu da qai veiyaloni. E yalololoma dina o Jiova ni digia me vakatakila na ka dina qori!

11. Na cava e yalataka o Jiova e laurai kina nona loloma kei na nona kauai?

11 Na tama dauloloma e kauaitaka na nodra veigauna se bera mai na luvena, e vinakata me vakainaki dina nodra bula. E ka ni rarawa ni levu nikua era sega ni kila na nodra veigauna se bera mai, se ra vakaliuca na ka e matewale. (Same 90:10) Nida luve ni Kalou, eda vakila nida lomani ni yalataka vei keda o Jiova na veika totoka ena gauna se bera mai. Qori e vakainaki kina noda bula.

VEIVAKASALATAKI KEI NA VEIVAKAVULICI

12. E laurai vakacava na loloma i Jiova ena nona vakasalataki Keni kei Peruki?

12 “Na cava o sa rui cudru kina o qai matararawa? Ke o veisau mo caka vinaka, o na ciqomi tale, se vakacava? . . . Vakaevei o na lewai koya [na ivalavala ca]?” (Vkte. 4:6, 7) E taudonu na veivakasalataki qori qai yaga dina. A vakasalataki Keni o Jiova ni raica na ka ca e vakarau cakava. E ka ni rarawa ni sega ni muria o Keni na ivakasala qori, e sotava kina na  leqa. (Vkte. 4:11-13) Ni oca qai yalolailai na vunivola i Jeremaia o Peruki, a vakasalataki koya o Jiova me raica na vu ni nona leqa. Ia e duatani sara vei Keni o Peruki ni ciqoma na ivakasala i Jiova, e vakabulai sara kina.—Jere. 45:2-5.

13. Na cava e vakalaiva kina o Jiova mera vakatovolei nona dausokalou yalodina?

13 E vola o Paula: “O koya e lomana o Jiova e vakavulica, e kuitataki koya e okata me luvena.” (Iper. 12:6) Na veivakavulici e sega ni okati ga ena veivakatotogitaki. E okati kina eso tale na ka. E tiko ena iVolatabu na kedra italanoa na dausokalou yalodina era sotava na ituvaki dredre sara. Na ituvaki dredre qori e vakavulici ira se vakarautaki ira. Kena ivakaraitaki o Josefa, Mosese kei Tevita. E volai vakamatailalai ena iVolatabu na kedratou italanoa, ni vakatauvatani kei ira na talanoataki ena iVolatabu. Nida wilika na sala e tokoni ira kina o Jiova ena ituvaki dredre qori kei na sala e qai vakayagataki ira kina vakalevu, eda vakila na nona loloma kei na nona kauaitaki ira nona dauveiqaravi o Jiova.—Wilika Vosa Vakaibalebale 3:11, 12.

14. Eda na vakila vakacava na loloma i Jiova ni vakavulici keda?

14 E vakavotui ena veivakavulici i Jiova e dua tale na sala e lomani keda kina. Nira ciqoma na veivakavulici i Jiova o ira na caka cala ra qai veivutuni, ena “veivosoti vakalevu o koya.” (Aisea 55:7) Na cava e kena ibalebale qori? E vakaciriloloma na ka e tukuna o Tevita me baleta na veivosoti i Jiova: “E vosota o koya na nomu cala kece qai vakabulai iko mai na kemu mate kece, e vakalesuya mai na qara na nomu bula, qai vakaisalataki iko  ena dei ni nona loloma kei na yalololoma. Me vaka na yawa ni icabecabe ni siga mai na idromudromu ni siga, sa biuta vakayawa vei keda o koya na noda cala.” (Same 103:3, 4, 12) Meda kauaitaka mada ga na ivakasala kei na veivakavulici i Jiova da qai totolo ni muria, nida kila ni sega ni vakaiyalayala nona lomani keda.—Same 30:5.

TAQOMAKI KEDA O JIOVA

15. Na cava e vakaraitaka nida ka talei vei Jiova?

15 Na tama dauloloma ena taqomaka nona vuvale mai na leqa. Qori tale ga na ka e cakava na Tamada vakalomalagi. E kaya na daunisame me baleti Jiova: “E taqomaka o koya na nodra bula na yalodina vua, e vakabulai ira mai na ligana na daucaka ca.” (Same 97:10) Kena ivakaraitaki: O na totolo ni taqomaka na matamu ni ka talei vei iko! Qori na ka ena cakava o Jiova vei ira nona dauveiqaravi. (Wilika Sakaraia 2:8.) Io, eda ka talei vei Jiova!

16, 17. Vakamacalataka na sala e veitaqomaki kina o Jiova ena gauna sa oti kei na gauna qo.

16 Dua na sala e taqomaki keda kina o Jiova, oya ni vakayagataki ira nona agilosi. (Same 91:11) A vakabulai Jerusalemi e dua ga na agilosi nira kabakoro na kai Asiria. E vakamatea kina e 185,000 na sotia ena dua ga na bogi. (2 Tui 19:35) Na agilosi e sereki Pita, Paula kei na so tale mai valeniveivesu. (Caka. 5:18-20; 12:6-11) Nikua tale ga, e sega ni lekaleka na liga i Jiova. A sikova na valenivolavola ni tabana e Aferika e dua na mata mai na Valenivolavola Liu, a tukuna ni vakaleqa sara ga na vanua ya na veileti vakapolitiki kei na lotu. Na veivala, butako, kucu, kei na veivakamatei e vakavuna nodra veilecayaki kei na nodra tiko yavavala na lewenivanua. Levu na tacida era vakayalia na ka era taukena kei na ka mera bula kina, ia e sega ni dua e vakaleqai nona bula. Nira tarogi se ra vakacava tiko, era sauma ena matadredredre: “E vinaka tu na ka kece, me vakavinavinakataki ga o Jiova!” Era vakila ni lomani ira na Kalou.

17 Ena so na gauna, o Jiova e vakalaivi ira na meca mera vakamatei ira nona dausokalou yalodina, me vakataki Sitiveni. Ia e taqomaki ira vakailawalawa nona tamata na Kalou ena nona vakarautaka na ivakasala ena kena gauna donu me baleta na ivadi qaseqase i Setani. (Efeso 6:10-12) E vakayagataka o Jiova nona Vosa kei na ivola vakaivolatabu e tabaka nona isoqosoqo me vukei keda meda kila na ka dina me baleta na veibacani ni iyau, na ka ni veivakamarautaki vakasisila qai voravora, vakayagataki cala ni Internet kei na so tale. Io, ni Tama dauloloma, e kauaitaka o Jiova na noda bula kei na noda tiko vinaka.

KA DOKAI DUADUA

18. Na cava o nanuma me baleta na nona lomani iko o Jiova?

18 Nida dikeva mai na vica na sala e vakaraitaka kina o Jiova nona lomani keda, eda duavata kei na ka e tukuna o Mosese. Ni vakasamataka o Mosese na dede ni nona qaravi Jiova, e kaya kina: “Ena mataka, ni vakacegui keimami ena dei ni nomuni loloma, me keimami kaila kina ena marau, me keimami marau vakalevu ena veisiga kece ni neimami bula.” (Same 90:14) E ka dokai duadua nikua qai veivakalougatataki meda vulica qai vakila na loloma i Jiova. Eda na duavata kei na ka e cavuta na yapositolo o Joni: “Ni raica mada na levu ni nona lomani keda na Tamada!”​—1 Joni 3:1.