Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

Qaravi Jiova ena “Gauna ni Rarawa”

Qaravi Jiova ena “Gauna ni Rarawa”

E TUKUNA ena vutugu o Ernst, sa yabaki 70 vakacaca: “E vakaleqai au vakalevu na bula tautauvimate.” * O dau rogoca qori? Ke o sa qase tiko mai, o vakila ni o sega ni bulabula vinaka qai lailai nomu kaukaua, o na rairai duavata kei na ivakamacala e volai ena Dauvunau wase 12. Ena tikina 1, e vakatokai na gauna eda qase kina me “gauna ni rarawa.” Ia e sega ni kena ibalebale me lewai iko na bula rarawa. Se rawa tiko ga ni vakainaki nomu bula ni o qaravi Jiova ena mamarau.

DEI TIKO GA ENA VAKABAUTA

Oni sega ni sotava duadua na ituvaki qo na mataveitacini itabaqase. Era sotava tale ga na dredre na dauveiqaravi i Jiova era itabaqase ena gauna vakaivolatabu. Me kena ivakaraitaki, e buawa na matadratou o Aisake, Jekope, kei Eaija. (Vkte. 27:1; 48:10; 1 Tui 14:4) E vakila o Sera ni “sa qase sara.” (Vkte. 18:11, 12) O Tui Tevita e ‘sega ni katakata rawa.’ (1 Tui 1:1) Na turaga vutuniyau o Pasilai e sega ni vakila na ikanakana ni kakana se me rogoca na ivakatagi. (2 Sam. 19:32-35) E vosota o Eparama kei Neomai ni takali na watidrau.—Vkte. 23:1, 2; Ruci 1:3, 12.

Na cava e vukei ira yadua mera yalodina vei Jiova ra qai marau tiko ga? Ni sa qase sara o Eparama e vakabauta tiko ga na vosa ni yalayala ni Kalou, e tukuni ni “sa qai kaukaua ga na nona vakabauta.” (Roma 4:19, 20) Bibi tale ga me dei noda vakabauta. Na vakabauta va qo e sega ni vakatau ena yabaki ni bula, noda kaukaua, se ituvaki. Kena ivakaraitaki, ni sa malumalumu na peteriaki o Jekope, e mataboko, qai davo tu ena idavodavo, e vakabauta tiko ga na vosa ni yalayala ni Kalou. (Vkte. 48:1-4, 10; Ipe. 11:21) Na tacida yalewa o Ines e yabaki 93, e dau malumalumu na nona masela, ia e kaya: “E vakalougatataki au o Jiova e veisiga. Au vakasamataka na Parataisi ena veisiga. E vukei au meu nuidei.” Totoka sara ga na rai qo!

E kaukaua noda vakabauta nida masu, dikeva na Vosa ni Kalou, kei na noda tiko ena soqoni vaKarisito. Ni sa qase na parofita o Taniela e dau masu vakatolu e veisiga qai dau vulica na Vosa ni Kalou. (Tani. 6:10; 9:2) Sa kenamarama na yada o Ana, ia “e sega vakadua ni yali mai na valenisoro.” (Luke 2:36, 37) Ni o tiko wasoma ena soqoni qai vakaitavi, o na bulabula kina ra qai marau tale ga na vo ni mataveitacini. E dau marautaka o Jiova na nomuni masu, ke lailai mada ga na ka oni cakava.—Vkai. 15:8.

Veivakayaloqaqataki

Levu vei kemuni na itabaqase oni diva moni kaukaua moni tiko kina ena soqoni, moni raica qai rogoca, ia e dredre vei kemuni, se sa sega sara ga ni rawa. Na cava moni cakava? Vakayagataka vinaka na veika sa tu rawa. Levu vei ira na sega ni tiko rawa ena soqoni era vakarorogo ena talevoni. Kena ivakaraitaki o Ini, sa malumalumu sara na matana. Ia e vakavakarau ena soqoni ni vakayagataka na ivola e tabaki ena kompiuta e volai ena matanivola lelevu, e vakarautaka vua e dua na tacida ena ivavakoso.

De dua e tiko vei iko e dua na ka era vinakata eso tale—na gauna. Vakacava mo vakayagataka vinaka nomu gauna mo rogoca kina na katokatoni ni iVolatabu kei na ivola vakaivolatabu, na vunau, kei na drama rogoci? O na rairai vakaliuliu mo qiriti ira na mataveitacini mo wasea vei ira na isolisoli vakayalo, qai marautaka na “veivakayaloqaqataki.”—Roma 1:11, 12.

GUMATUA TIKO GA ENA VEIQARAVI

Vunau

E kaya ena rarawa o Christa, na tacida yalewa sa yabaki 80 vakacaca: “E rarawataki dina ni sa sega ni levu na ka o cakava me vaka e liu.” Rawa gona vakacava mera mamarau tiko ga na itabaqase? E kaya o  Peter sa yabaki 75: “Me tiko vei iko na rai donu, mo kua ni nanuma tiko ga na ka o sa sega ni rawa ni cakava, ia mo marautaka na ka o se cakava tiko ena gauna qo.”

O rawa ni vakasamataka eso na sala mo vunau kina? E sega ni rawa ni vunau e veivale o Heidi me vaka e liu. Ni sa yabaki 80 vakacaca, e vulica me taba kompiuta me volavola kina. Eso na dautukutuku itabaqase era tekivutaka na veivosaki ena iVolatabu nira dabe tiko ena idabedabe ena vanua ni gade se na ikelekele ni basi. Ke o tiko ena vale ni malumalumu, vakacava o rawa ni vunau vei ira na qaravi iko tiko kei na so tale era tiko e kea?

Dau veikauaitaki

Ena iotioti ni vica na yabaki ni nona bula, e gumatua o Tui Tevita me tokona na sokalou savasava. E cau ena kena tara na valenisoro qai tuvanaka na ka me caka. (1 Vei. 28:11–29:5) O rawa tale ga ni gumatua mo tokona na ka e caka tiko me baleta na vunau e veiyasa i vuravura. Vakacava mo tokoni ira na painia kei ira na dautukutuku gugumatua ena nomu ivavakoso ni o veivakayaloqaqataki, solia e dua na iloloma lailai, se vakarautaka na kakana mamada? O rawa ni masulaki ira na itabagone, ira na vuvale, na veiqaravi vakatabakidua, ira na tautauvimate, kei ira ena ivavakoso e levu nodra itavi.

Oni vakamareqeti vakalevu, vaka kina na nomuni veiqaravi. Ena sega ni biuti kemuni na itabaqase na Tamada vakalomalagi. (Same 71:9) E lomani kemuni o Jiova, e vakamareqeti kemuni tale ga. Sa voleka sara na gauna meda bula tiko ga da qai sega ni rarawa. Eda na kaukaua tiko ga da qai bulabula vakayago meda qarava me tawamudu na Kalou dauloloma o Jiova!

^ para. 2 Eso na yaca sa veisau.