Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

“Ke sa Rawa Vei Kingsley, Au Rawa Tale ga ni Cakava!”

“Ke sa Rawa Vei Kingsley, Au Rawa Tale ga ni Cakava!”

TEKIVU wili iVolatabu o Kingsley ni tavi oti ga na tabana, qo na imatai ni gauna e vakaitavi kina ena Koronivuli ni Vuli Vunau ena ivavakoso. E qarauna me cavuta vinaka na vosa, kei na tagonivosa. Na cava ga e sega ni raica tiko kina na nona iVolatabu?

E tiko mai Sri Lanka o Kingsley qai mataboko. E didivara qai vinakati me dua na nona idabedabe qiqi me veitosoyaki kina. E mai kilai Jiova vakacava qai curu ena Koronivuli ni Vuli Vunau? Meu talanoataka mada.

Na imatai ni gauna keirau sota kina kei Kingsley, e tarai au sara ga nona via kila na ka dina. Sa vuli iVolatabu o koya kei na vica na iVakadinadina, sa kakabasubasu na ilavelave ni nona ivola Ka Mo Kila Mo Bula Tawamudu Kina ena vosa vakaBraille. * A ciqoma noqu sureti koya me vuli iVolatabu tale, ia e rua na ituvaki dredre keirau sotava.

Kena imatai, e tiko ena valenimalumalumu o Kingsley kei na so tale e vakaleqai tu na yagodra. Au dau vosa sara e cake ena vuku ni nona didivara kei na kosakosa ni vanua ya. Era rogoca kece ga na tu ekea na neirau vuli iVolatabu ena veimacawa!

 Kena ikarua, e lailai ga na ka e katona rawa o Kingsley ena gauna kece ni nona vuli. Me yaga na neirau vuli, dua na ka nona dau vakavakarau vinaka o Kingsley. Dau wilika vakavica o koya na ka me keirau vulica, wilika na tikinivolatabu ena iVolatabu vakaBraille, qai dau vakasamataka na isaunitaro. E yaga dina na iwalewale qo. Ena dau dabe vakatoga ena ibe ni valagi, lakovata nona tavia toka na fuloa kei na domona i cake ni vakamacalataka na ka e vulica. Sega ni dede keirau sa dau vuli vakarua ena dua na macawa ena loma ni rua na aua!

TIKO ENA SOQONI QAI VAKAITAVI

O Kingsley kei Paul

Dua na ka nona vinakata o Kingsley me gole ina soqoni, ia e cakacaka levu toka qo. E vinakati me dua e vukei koya ena idabedabe qiqi, vodo ena motoka kei na loma ni Vale ni Soqoni. Era dau veivuketaka na ivavakoso na vukei koya, ra qai okata qori me itavi dokai. Ena gauna ni soqoni e dau biuta voleka i daligana o Kingsley e dua na sipika me vakarorogo vinaka kina, qai vakamacala tale ga ena so na gauna!

Ni sa toso tiko nona vuli iVolatabu a nanuma sara o Kingsley me curu ena Koronivuli ni Vuli Vunau. Ni vo e rua na macawa me wili iVolatabu ena imatai ni gauna, au tarogi koya sara ke sa vakatovotovo tiko mai. E tukuna ena yalodei, “Io Taciqu, au vakatovotovo vaka30.” Au vakavinavinakataki koya sara ena nona sasaga qai kerea vua meu vakarogoci koya ni wiliwili. E cega nona iVolatabu, biuta toka nona iqaqalo ena matanivola vakaBraille, qai wiliwili. Au raica ni sega ni veitosoyaki tiko na nona iqaqalo ena drauniveva me vaka era dau cakava na mataboko. A nanuma kece o koya na wase ni iVolatabu me wiliki!

E tuturu na wainimataqu e baluqu, au sega sara ga ni vakabauta. Au tarogi Kingsley se rawa vakacava me nanuma vinaka ni vakatovotovo ga vaka30. E kaya: “Sega, au vakatovotovo vaka30 ena dua na siga.” E sivia e dua na vula, a dabe toka ena nona ibe ni valagi o Kingsley qai wiliwili vakavicavata me yacova ni sa rawa ni nanuma kece na wase ni iVolatabu me wilika.

Yaco mai na siga me sa vakaitavi ena Vale ni Soqoni. Ni oti nona itavi, era vakasausau na mataveitacini, levu tale ga era tagi nira raica nona sasaga na gonevuli vou qo. Dua na dautukutuku sa sega ni vakaitavi tu ena koronivuli ni dau rere, a kerea me sa curu tale. Na vuna? E kaya, “Ke sa rawa vei Kingsley, au rawa tale ga ni cakava!”

Ni oti nona vuli iVolatabu me tolu na yabaki, e vakaraitaka e matanavotu nona yalayala o Kingsley ni papitaiso ena Seviteba 6, 2008. Dua na iVakadinadina yalodina me yacova nona mate ena Me 13, 2014. E vakadeitaka o Kingsley ni na tomana nona veiqaravi ena yalodina ena vuravura Parataisi ni sa na kaukaua qai bulabula vinaka. (Aisea 35:5, 6)—Talanoataka o Paul McManus.

^ para. 4 Tabaki ena 1995; sa sega ni tabaki tale na gauna qo.