Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

E Lomana na Kawatamata

E Lomana na Kawatamata

“Au taleitaki ira vakalevu na luve ni tamata.”VKAI. 8:31.

1, 2. E vakadinadinataka vakacava o Jisu na levu ni nona lomani keda na kawatamata?

NA ULUMATUA ni Kalou e imatai ni sala e vakaraitaka kina vakavinaka o Jiova na nona vuku e sega ni katumi rawa. O koya na vatuka ni vuku qai “matai ligamaqosa” ena yasa i Tamana. Sa wacava na marau kei na nona lomavakacegu ni raici Tamana ni ‘vakarautaka na lomalagi’ qai “vakarautaka na yavu ni vuravura.” E marautaka na veika buli qo na ulumatua ni Kalou, ia e “taleitaki ira vakalevu na luve ni tamata.” (Vkai. 8:22-31) Io, ni bera mada ga ni mai bula vakatamata o Jisu, sa dau vakaraitaka o koya nona taleitaki keda na kawatamata kei na nona lomani keda.

2 A yalorawarawa na Ulumatua ni Kalou ni “vakadravudravuataki koya” me mai bula vakatamata, e vakadinadinataka kina nona yalodina kei na nona lomani Tamana, vaka kina nona lomani keda vakalevu “na luve ni tamata.” E cakava qori me vakarautaka kina na “kedra ivoli e le levu.” (Fpai. 2:5-8; Maciu 20:28) Dua na ka nona lomani keda na kawatamata! Ni se bula tiko e vuravura o Jisu, a solia vua na Kalou na kaukaua me cakamana me vakaraitaka ni lomani keda vakalevu. E  vakatakila o Jisu na levu ni ka vakatubuqoroqoro ena vakarau yaco e vuravura raraba.

3. Na cava eda na vulica ena ulutaga qo?

3 Nona lako mai vuravura o Jisu e rawa kina vua me “tukuna tale ga na itukutuku vinaka ni Matanitu ni Kalou.” (Luke 4:43) E kila o Jisu ni Matanitu ga qo ena vakarokorokotaki kina na yaca i Tamana, qai iwali tudei ni mate kece ni kawatamata. Sega ni kurabuitaki, ni vakilai ena nona cakacaka vakavunau o Jisu na nona kauaitaki ira dina na kawatamata. Na cava e bibi kina qo vei keda? Na ka eda na vulica kina ena solia vei keda na nuidei kei na vakabauta me baleta na veigauna se bera mai. Meda raica sara mada qo e va na cakamana i Jisu.

“TU VUA NA KAUKAUA I JIOVA ME VEIVAKABULAI”

4. Vakamacalataka na ka e yaco ni sotava e dua na vukavuka o Jisu.

4 A toso totolo sara tiko nona vunau e matanalevu o Jisu, qai oti ga qo na vanua o Kalili. Dua na ituvaki vakaloloma e raica o Jisu ena dua na korolevu mai Kalili. (Mari. 1:39, 40) Duri tu e matana e dua na turaga e takavi koya tu na mate rerevaki na vukavuka. Me vakadinadinataki na kena tete na mate, e vakamacalataka na vuniwai o Luke ni “vukavuka na yagona taucoko.” (Luke 5:12) “Ni raici Jisu ga [o koya e tauvi vukavuka], e davo vakatoboicu qai kerea: ‘Turaga, ke oni vinakata, ni vakasavasavataki au mada.’” E sega tale ni vakatitiqataka na turaga qo ni tiko vei Jisu na kaukaua me vakabulai koya kina, e vinakati ga me kila ke vinakata dina o Jisu me vakabulai koya se sega. Na cava ena cakava o Jisu ena nona vakamamasu? Na cava e vakasamataka tu o Jisu ni tarai koya na turaga e rairai bulicaki vakaca tu na yagona? Vakacava o Jisu, ena vakataki ira na Farisi era sega ni via lomani ira na tauvi vukavuka? Na cava o na cakava?

5. Na cava e uqeti Jisu me tukuna “Au vinakata” ni vakabulai koya na vukavuka?

5 Rairai a guilecava na turaga e tauvi vukavuka me kailavaka “Dukadukali, dukadukali!” me vaka e lavaki ena Lawa e soli vei Mosese. A sega ni kauta cake mai qori o Jisu. A kauaitaka ga na turaga ya kei na ka e gadreva. (Vunau 13:43-46) Eda sega ni vakadeitaka na ka e vakasamataka tu o Jisu, eda kila ga na ivakarau ni lomana. E uqeti koya na loloma me cakava kina na veika veivakurabuitaki. E dodoka yani na ligana, tarai koya na vukavuka, e qai vakavotuya na kaukaua kei na yalololoma na rorogo ni domona, e kaya kina o Jisu: “Au vinakata. Mo savasava mai.” Mani “yali vakasauri na nona vukavuka.” (Luke 5:13) E tiko dina e kea na kaukaua i Jiova. Na kaukaua qori e cakamana kina o Karisito, e vakaraitaka tale ga kina o Jisu na levu ni nona lomani keda.—Luke 5:17.

6. Na cava e duatani kina na cakamana i Jisu, na cava tale ga e vakaraitaka qo?

6 Na kaukaua ga ni Kalou e rawa kina vei Jisu me cakava e levu na cakamana vakatubuqoroqoro. E sega ni vakabulai ira ga na vukavuka kei na so tale na mate e takavi ira tu na lewenivanua. E tukuna vei keda na iVolatabu: “Nodra kurabui na ilala levu nira raica nira sa vosa na galu, era vakabulai na vakaleqai tu na yagodra, lako na lokiloki, rai na mataboko.” (Maciu 15:31) Me vakaraitaka na yalololoma va qo, a sega ni vinakati vei Jisu me taura tale mai e dua na gacagaca ni tamata me sosomitaka vua e dua tale. A vakabula sara ga na tikiniyago kei na gacagaca kece e leqa tu! Totolo tale ga nona veivakabulai, so na gauna ni tu mada ga mai vakayawa e se veivakabulai ga. (Joni 4:46-54) Na cava e vakaraitaka na  veika vakatubuqoroqoro qo? O Jisu na Tui sa veiliutaki tiko ena gauna qo mai lomalagi e tu vua na kaukaua, e vinakata tale ga me veivakabulai tawamudu. Noda vulica na ka e cakava o Jisu vei ira na lewenivanua e vakadeitaka vei keda ni na vakayacori ena vuravura vou na parofisai vakaivolatabu e tukuni kina: “Ena lomani ira na vakaloloma kei na dravudravua.” (Same 72:13) O Jisu ena cakava na ka e vu dina mai lomana me vukei ira kece na vakaleqai tu.

“TUCAKE, TAURA NOMU IDAVODAVO, MO LAKO”

7, 8. Vakamacalataka na veika e yaco ni bera ni lai raica o Jisu e dua na turaga paralasi ena yasa ni tobu ni sili mai Peceseita.

7 Sa oti e vica na vula nona vakabula na vukavuka o Jisu mai Kalili. E lai vunautaka na itukutuku vinaka ni Matanitu ni Kalou e Kalili me yaco sara e Jutia. Rairai uqeti ira e udolu na nona itukutuku o Jisu, e veiuqeti tale ga na sala e cakava kina qori o koya. E matata ni vinakata o koya me vunautaka na itukutuku vinaka vei ira na dravudravua, me vunautaka na veisereki vei ira na vesuki tu, qai vakabulai ira na vusolo na lomadra.—Aisea 61:1, 2; Luke 4:18-21.

8 Yaco mai na vula o Naisani. Ni talairawarawa ena ivakaro i Tamana, e gole i Jerusalemi o Jisu me lai tiko ena Lakosivia. E maqusa na korolevu nira gole yani mai na veiyasana mera lai tiko ena soqo tabu qo. Ena yasana e cake ni valenisoro e tiko kina e dua na tobu ni sili e vakatokai o Peceseita, qai raica e kea o Jisu e dua na turaga tauvimate.

9, 10. (a) Na cava era lako kina ena tobu ni sili e Peceseita na lewenivanua? (b) Na cava a cakava o Jisu ena yasa ni tobu, na cava tale ga eda vulica kina? (Raica na imatai ni yaloyalo.)

9 Era tabili yani e Peceseita o ira na tauvimate kei ira na vakaleqai tu. Na cava era lakova e kea? Era vakabauta ke dua e tauvimate qai siro ena tobu ni yavalati na wai ena vakabulai vakacakamana. Vakasamataka mada na ivakarau ni lomadra o ira na gole yani ena vanua ya! E macala ga ni na laurai na vaqara bula, nuiqawaqawa, kei na vakanuinuikara. Na cava ga e lako kina e kea o Jisu, ni turaga uasivi e sega ni leqa tu na yagona? E uqeti Jisu na loloma me toro yani vua na turaga a tauvimate tu mai vakabalavu ni bera mada ga ni mai bula vakatamata e vuravura o Jisu.—Wilika Joni 5:5-9.

10 O rawa ni raitayaloyalotaka nona lomaleqa na turaga tauvimate qo ni tarogi koya yani o Jisu ke via bula? Sega ni bera nona vakadonuya. A vinakata me bula, e sega ga ni kila na sala ena rawa kina qori ni sega ni dua e keveti koya ena tobu. Mani vakarota o Jisu me taura na nona idavodavo qai taubale, na ka sara ga a sega tu ni rawa ni cakava na turaga qo. E muria na ka e tukuna o Jisu ni taura nona idavodavo qai taubale sara. Vakaciriloloma dina noda raitayaloyalotaka na ka ena cakava o Jisu ena vuravura vou! Eda raica votu tale eke nona yalololoma o Jisu. E dau vaqarai ira era gadreva dina tu na veivuke. Me uqeti keda mada ga na ivakaraitaki i Jisu nida vaqarai ira tiko ga ena noda yalava era lomabibitaka tu na veika ca e yaco tu qo e vuravura.

“O CEI E TARA NA NOQU ISULU E SAU?”

11. E vakaraitaki vakacava ena Marika 5:25-34 nona lomani ira na tauvimate o Jisu?

11 Wilika Marika 5:25-34. A 12 na yabaki nona madua voli na marama qo. E tara na nona bula taucoko na mate e tauvi koya voli mai, okati tale ga kina na nona sokalou. E “vosota e levu na veiqaravi vakavuniwai, e vakayagataka kece kina na nona  iyau,” sa qai ca ga na kena ituvaki. Dua na siga a veisau na ka e cakava me rawa kina ni bula. A saga me volekati Jisu. E ciqi yani ena kedra maliwa na ilala levu qai tara na isulu e sau i Jisu. (Vunau 15:19, 25) E vakila o Jisu ni yali vua na kaukaua, mani taroga se o cei e tarai koya. “E rere qai sautaninini,” na marama ni “tekiduru e mata i Jisu qai tukuna vua na ka dina kece.” Ni kila o Jisu ni vakabulai koya o Jiova na Tamana, e tukuna vua ena yalovinaka: “Luvequ, sa vakabulai iko na nomu vakabauta. Lako ena vakacegu, mo bula mai na kemu mate bibi.”

E vakadinadinataka o Jisu ena nona cakamana ni kauaitaki keda dina kei na noda leqa (Raica na parakaravu 11, 12)

12. (a) O na vakamacalataki Jisu vakacava ena ka eda sa vulica mai? (b) Na cava eda vulica vei Jisu?

12 Sa dua na ka nona yalovinaka o Jisu! Eda raica ni dau vu mai lomana nona vukei ira na tauvimate. E vinakata o Setani meda nanuma nida sega ni lomani qai sega na beteda. Eda kila vinaka ena cakamana i Jisu ni kauaitaki keda dina, e kila vinaka tale ga na noda leqa. Sa dua dina na Tui qai Bete Levu dauloloma! (Iper. 4:15) De dua e dredre vei keda meda kila na ivakarau ni lomadra o ira na tauvimate bibi, vakauasivi ke se bera vakadua ni yaco vei keda. Meda kua ni guilecava ni sega vakadua ni tauvimate o Jisu, ia e lomani ira tiko ga na tauvimate. Me uqeti keda mada ga na ivakaraitaki i Jisu meda cakava qori ena noda vinaka taucoko.—1 Pita 3:8.

“E TAGI O JISU”

13. Na cava e laurai vei Jisu ni vakaturi Lasarusa?

13 Dau tarai Jisu na nodra rarawa eso tale. Ni raica na kena tarai ira eso tale na nona mate na nona itokani o Lasarusa, e “vusolo na loma” i Jisu. E va qori na ivakarau ni lomana, ia e kila o koya ni na vakaturi Lasarusa ena dua ga na gauna lekaleka ya. (Wilika Joni 11: 33-36.) E sega ni madualaka o Jisu me vakaraitaka na ivakarau ni lomana. Era raica na vakararai tu na nona lomani Lasarusa kei ratou na nona vuvale o Jisu. Dua na ka na nona loloma ni vakayagataka na kaukaua e solia vua na Kalou me vakaturi koya kina na nona itokani!—Joni 11:43, 44.

14, 15. (a) Na cava e vakadinadinataka ni vinakata dina o Jiova me vakaotia na rarawa? (b) Na cava e okati ena matavosa “ibulubulu nanumi”?

14 Na iVolatabu e vakamacalataki Jisu ni “ucui koya vinaka [na Dauveibuli].” (Iper. 1:3) Na cakamana i Jisu e vakadinadinataka ni rau vinakata vakaveitamani me rau vakaotia na rarawa ni tauvimate kei na mate. Na gagadre qori e sega ni yalani ga ena veivakaturi e volai tu ena iVolatabu. E kaya o Jisu: “Sa voleka mai na gauna mera rogoca kina na domona o ira kece na tu ena ibulubulu nanumi mera tucake mai.”—Joni 5:28, 29.

15 E veiganiti nona tukuna o Jisu na “ibulubulu nanumi” ni qo e okati kina na nona vakanananu na Kalou. Na Kalou Kaukaua Duadua e bulia na lomalagi kei na vuravura, e rawa me nanuma na itukutuku matailalai kece me baleti ira na wekada era sa mate. (Aisea 40:26) E sega wale ga ni rawa vei Jiova me nanumi ira, e vinakata tale ga kei Luvena me cakava. Nona vakaturi o Lasarusa kei na so tale e volai tu ena iVolatabu e dusia na ka ena yaco e vuravura raraba ena vuravura vou.

O IKO KEI NA CAKAMANA I JISU

16. Na ka dokai cava era na vakila o ira na yalodina tiko ga?

16 Ke da yalodina tiko ga, eda na vakadinadinataka kina na cakamana levu duadua, oya noda bula ena veivakararawataki levu. Ni oti na Amaketoni, ena levu tale na cakamana meda bulabula vinaka kina. (Aisea 33:24; 35:5, 6; Vkta. 21:4) Vakasamataka mada nida raica ni sa kolotaki laivi na matailoilo ni wilivola, sa na sega na ititoko, na idabedabe qiqi, na irogorogo, kei na so tale. E tiko na vuna vinaka me solia kina o Jiova vei ira na bula ena Amaketoni na bulabula vinaka ni yago. O ira na bula yani qo e tiko na nodra cakacaka. Era na cakacaka ena marau nira veisautaka na noda vuravura me parataisi, na isolisoli e solia vei ira na Kalou.—Same 115:16.

17, 18. (a) Na cava e cakamana kina o Jisu? (b) Na cava mo saga kina mo bula ena vuravura vou ni Kalou?

17 Nona veivakabulai o Jisu ena gauna makawa e uqeta na “isoqosoqo levu” nikua, e vakadeitaka tale ga na gauna marautaki nida vakabulai mai na mate kece. (Vkta. 7:9) E dusia na nona veivakabulai na ivakarau ni lomana kei na levu ni nona lomana na kawatamata o koya na Ulumatua ni Kalou. (Joni 10:11; 15:12, 13) E vakavotui ena yalololoma i Jisu na nona kauaitaki ira yadua na nona dauveiqaravi o Jiova.—Joni 5:19.

18 Era vutugu na kawatamata, era rarawa ra qai mate. (Roma 8:22) Eda gadreva na vuravura vou ni Kalou, na vanua sa na sega tale kina na vakaleqai ni yago me vaka e yalataka o koya. Na Malakai 4:2 e uqeti keda meda nuitaka nira na “ladelade me vaka na luvenibulumakau yagovinaka” o ira na vakabulai, era na marau nira sa sereki mai na ivalavala ca. Me vu mada ga mai lomada noda vakavinavinakataka na Kalou, qai dei noda vakabauta nona vosa ni yalayala. Meda uqeti mada ga meda cakava ena gauna qo na ka eda rawa ni cakava meda bula kina ena vuravura vou. Veiuqeti dina noda kila ni cakamana i Jisu e vuravura e ivakaraitaki wale ga ni vakacegu tawamudu sa na voleka qo meda marautaka ni veiliutaki vakaMesaia o Jisu!