Raica sara na lewena

Raica na lewenivola

Yadra Tiko e Via Tilomi Iko o Setani!

Yadra Tiko e Via Tilomi Iko o Setani!

“Ni yadra tiko. E veilakoyaki voli na kemuni meca, na Tevoro, me vaka na laione e tagi, e vakasaqara tiko e dua me tiloma.”1 PITA 5:8.

1. Vakamacalataka nona veisau e dua na kabula vakayalo me Setani.

DUA na gauna e vakadonui koya o Jiova. Ia mani veisau na kabula vakayalo qo, e vinakata mera sokaloutaki koya na tamata. E sega ni cavuraka na gagadre ca qo, e bucina ga qai vakasucuma sara kina na ivalavala ca. (Jeme. 1:14, 15) Eda kila ni o koya na kabula qori o Setani, e “sega ni dei ena dina.” E vorati Jiova, mani vakatokai kina me “tama ni lasu.”—Joni 8:44.

2, 3. Na cava e dusia na icavuti “Setani,” “Tevoro,” “gata makawa,” kei na “gata levu” me baleta na meca levu i Jiova?

2 Me tekivu mai na nona veivorati o Setani, e vakadinadinataka ni o koya na meca levu i Jiova, e sega sara ga ni itokani ni kawatamata. Na icavuti e soli vei Setani e vakaraitaka na torosobu ni nona ivalavala. Na ibalebale ni Setani oya na “Dauveivorati,” e dusia ni o koya na kabula vakayalo ca qo e sega ni tokona na veiliutaki cecere ni Kalou; e cata, e tusaqata vakaukaua tale ga. E vinakata sara ga me tinia na veiliutaki cecere i Jiova.

3 Me vaka e volai ena Vakatakila 12:9, e vakatokai o Setani  me Tevoro, kena ibalebale “Dauvakaucaca.” Eda nanuma kina ni o Setani e vakaucacataki Jiova ni tukuna ni lasulasu o koya. Na vosa “gata makawa” e dusia na siga e vakacalai Ivi kina ena were o Iteni ni vakayagataka na gata. Na vosa “gata levu” e dusia na manumanu rerevaki, e veiganiti qo ni vakaraitaka nona saqata matua o Setani na kena vakayacori na inaki i Jiova kei na nona via vakarusai ira nona tamata.

4. Na cava ena veivosakitaki ena ulutaga qo?

4 E matata vakasigalevu ni o Setani e saga vakalevu me vakaleqa noda yalodina. Oya na vuna e vakadreti keda kina na iVolatabu: “Moni yalomatua, ni yadra tiko. E veilakoyaki voli na kemuni meca, na Tevoro, me vaka na laione e tagi, e vakasaqara tiko e dua me tiloma.” (1 Pita 5:8) Me salavata ga kei na veivakadreti qo, ena veivosakitaki ena ulutaga qo e tolu na itovo i Setani e vakaraitaka ni bibi me qarauni na meca lawakica qo i Jiova, e keda meca tale ga.

E KAUKAUA O SETANI

5, 6. (a) Tukuna eso na ivakaraitaki nira “cecere ena kaukaua” na kabula vakayalo. (b) Ena sala cava e ‘vakavuna kina na mate’ o Setani?

5 O ira na kabula vakayalo era vakatokai mera agilosi era “cecere ena kaukaua.” (Same 103:20) Era torocake vei keda na tamata, e levu gona nodra vuku kei na kaukaua. O ira na agilosi yalodina era vakayagataka nodra kaukaua ena ka vinaka. Kena ivakaraitaki, ena dua na gauna e vakamatea e dua na agilosi i Jiova e 185,000 na meca era sotia ni Asiria. Sa na sega tu ga ni rawa ni cakava e dua na tamata, ena dredre mada ga me cakava qori e dua na mataivalu. (2 Tui 19:35) Ena dua tale na gauna e qaseqase e dua na agilosi ni vakayagataka nona kaukaua levu me sereki ratou na yapositolo i Jisu mai valeniveivesu. E sega ni tarovi koya na kabula vakayalo qo na itataqomaki ni valeniveivesu, e dolava na katuba, e kaya vei ratou na yapositolo me ratou lako mai tuba, qai sogota tale na katuba. E cakava qo nira duri voleka tu na yadra!—Caka. 5:18-23.

6 Era vakayagataka na kabula vakayalo yalodina nodra kaukaua mera caka vinaka, ia o Setani e vakayagataka nona kaukaua me caka ca. E dua na ka nona kaukaua kei na nona veivakamuai! E kaya na iVolatabu ni o koya na “turaga ni vuravura qo,” e “kalou ni veika vakavuravura qo.” (Joni 12:31; 2 Kor. 4:4) E rawa mada ga vei Setani na Tevoro me “vakavuna na mate.” (Iper. 2:14) Sega ni kena ibalebale qo ni vakamatea vakadodonu na tamata kece. E curuma tu na vuravura qo na yalo e tu vua, oya mera daulaba. Kena ikuri, ni vakabauta na lasu i Setani o Ivi kei na nona talaidredre vei Jiova o Atama, e dewa kina vei ira na tamata kece na ivalavala ca kei na mate. (Roma 5:12) Ena sala qo, e tukuni kina ni “vakavuna na mate” na Tevoro. E tukuna gona o Jisu ni o Setani e “daulaba.” (Joni 8:44) E kaukaua sara ga o Setani na keda meca!

7. Era vakaraitaka vakacava na timoni nira kaukaua?

7 Nida vorati Setani, eda sa vorati ira tale ga era tovata kei koya ena ile me baleta na dodonu ni veiliutaki ni Kalou. Era okati kina e dua na iwiliwili levu ni kabula vakayalo era veivorati, se o ira na timoni. (Vkta. 12:3, 4) Era dau vakaraitaka na timoni nira kaukaua cake vei keda na tamata, era dau vakasagai ira eso qai vakararawataki ira. (Maciu 8:28-32; Mari. 5:1-5) Meda kua ni beca na kaukaua e tu vei ira na agilosi ca qo, se na “nodra iliuliu na timoni.” (Maciu 9:34) Ke sega ni vukei keda o Jiova, eda na sega ni qaqa vei Setani.

 E VORAVORA O SETANI

8. (a) Na cava na inaki i Setani? (Raica na imatai ni iyaloyalo.) (b) Na nomu rai, era vakaraitaka vakacava na vuravura qo na itovo voravora i Setani?

8 Na yapositolo o Pita e vakatauvatani Setani me “laione e tagi.” E tukuna e dua na ivola idusidusi ni vakadewa ni “tagi” ena vosa vaKirisi, e dusia na “tagi ni dua na manumanu kila ni mate ena viakana.” E vakamacalataka vinaka qori na itovo voravora i Setani! Sa lewa tu na vuravura o Setani, ia se vinakata ga me tiloma e levu. (1 Joni 5:19) E nona takete sara ga o ira na vo ni lumuti kei na nodra itokani na ‘so tale na sipi.’ (Joni 10:16; Vkta. 12:17) E nona inaki o Setani me vakawabokotaki ira na tamata i Jiova. Na nodra vakacacani na imuri i Jisu me tekivu ena imatai ni senitiuri me yacova mai qo e vakaraitaka na ca ni loma i Setani.

9, 10. (a) Na cava e cakava o Setani me tarova nona inaki na Kalou me baleta na matanitu o Isireli? (Tukuna eso na ivakaraitaki.) (b) Na cava e dau sagai ira kina na Isireli makawa o Setani? (c) Na cava o nanuma e nona rai o Setani ni dua na dauveiqaravi i Jiova e valavala ca bibi ena gauna qo?

9 Ni saga o Setani me tarova na inaki ni Kalou, e vakaraitaka o koya e dua tale na sala e vakadomobula kina. Na laione e walokai tu e sega ni lomana na manumanu e vakasasa. E yali vua na loloma ni vakarau vakamatea, e sega tale ga ni veivutuni ni sa vakamatea na manumanu qori. Ena sala vata qori, o Setani e sega ni lomani ira e via tiloma. Kena ivakaraitaki, vakasamataka mada nona lako vunivuni o Setani na Tevoro nira coko na Isireli ena ivalavala ca me vaka na veiyacovi tawadodonu kei na kocokoco. Ni o wilika na itinitini vakaloloma i Simiri ni vakayacora na ivalavala tawakilikili kei Kiesai ni kocokoco, vakacava o rawa ni “raica” ni tagi ena marau na laione ena nona ravuravu?—Tiko 25:6-8, 14, 15; 2 Tui 5:20-27.

E marau o Setani ni dua na dauveiqaravi i Jiova e valavala ca (Raica na parakaravu 10)

10 E tiko na vuna vinaka e sagai ira kina na Isireli makawa o Setani. Na matanitu qo ena basika kina na Mesaia—o koya ena qaqi Setani, ena vakacerecerea tale ga na veiliutaki i Jiova. (Vkte. 3:15) E sega ni vinakata o Setani mera tiko vinaka na Isireli, e sasaga vakaukaua me vakadukadukalitaki ira mera valavala ca. Kua ni nanuma ni lomani Tevita o Setani ena gauna e veibutakoci  kina, se me rarawa ni sa sega tale ni vakadonui na parofita o Mosese me butuka na Vanua Yalataki. Kena veibasai ga, e marau vakalevu ni dua na dauveiqaravi ni Kalou e vakadukadukalitaki ni valavala ca bibi. Qo eso na ka e qaqa kina o Setani, ena rairai vakayagataka me beitaki Jiova kina.—Vkai. 27:11.

11. Na cava e vinakata kina o Setani me sagai Sera?

11 E cata sara ga o Setani na iyatukawa ena basika kina na Mesaia. Kena ivakaraitaki, vakasamataka na ka e yaco ni tukuni vei Eparama ni na “matanitu levu” o koya. (Vkte. 12:1-3) Ni rau tiko e Ijipita o Eparama kei Sera, e mani kau o Sera ina vale i Fero—kena irairai ni vinakata me watina. Ia e tarova o Jiova qai taqomaki Sera mai na ituvaki ririkotaki oya. (Wilika Vakatekivu 12:14-20.) Ni bera ni sucu o Aisake, e yaco tale ga e dua na ituvaki va qori voleka e Kira. (Vkte. 20:1-7) Vakacava e bukana o Setani na ituvaki qori? E vinakata me rawai o Sera ena totoka ni valenitui i Fero kei Apimeleki, me vaka ni a bula tu mai ena korolevu vutuniyau o Uri? A nanuma tiko o Setani ni na sega ni yalodina o Sera vei watina kei Jiova, me vakawati veibutakoci? E sega ni tukuna na iVolatabu, ia e tiko na yavu vinaka meda vakabauta kina ni na marau o Setani me kua ni vakadonui o Sera me basika mai vua na kawa yalataki. Ena sega ni ca na loma i Setani ni vakacacani na nona vakawati e dua na marama vinaka, kena irogorogo, kei na nona veiwekani kei Jiova. E vakadomobula sara ga o Setani!

12, 13. (a) E vakaraitaka vakacava o Setani nona ivakarau vakadomobula ni sa sucu o Jisu? (b) Na cava o nanuma na nona rai o Setani me baleti ira na gonelalai nikua era lomani Jiova ra qai vinakata mera qaravi koya?

12 E sucu o Jisu ni oti e vica vata na senitiuri mai na gauna i Eparama. Kua ni nanuma ni a vakasamataka tiko o Setani ni gonedramidrami qo e rairai vinaka, e munemuneke, qai taleitaki. Sega, e kila o Setani ni o koya na gone sucuvou qo ena yaco me Mesaia yalataki. Io, e imatai ni wase ni kawa i Eparama o Jisu, o koya ena “vaqeavutaka na cakacaka ni Tevoro.” (1 Joni 3:8) E nanuma o Setani ni na sivia tale ke vakamatea na gonedramidrami qo? E sega na ivakatagedegede dodonu e dau muria o Setani. E sega tale ni wawa o Setani ni sa tiko na gone o Jisu. Cava e cakava?

13 E rarawa vakalevu o Tui Eroti nira taroga na dauraikalokalo me baleti ‘koya ena sucu me nodra tui na Jiu,’ e nakita sara me vakamatei koya. (Maciu 2:1-3, 13) Me vakadeitaka ni na yaco qo, e vakarota mera vakamatei na gonetagane kece yabaki rua lako sobu era tiko e Peceliema kei na veivanua volekata. (Wilika Maciu 2:13-18.) E vakabulai o Jisu ena veivakamatei vakadomobula oya, ia na cava e dusia qori me baleta na keda meca o Setani? E macala ni sega sara ga ni kauaitaka na bula ni tamata na Tevoro. E sega mada ga ni kauaitaki ira na gonelalai. O Setani e dua dina na “laione e tagi.” Kua ni vakawalena na nona ivakarau vakadomobula!

VEIVAKACALAI O SETANI

14, 15. Sala cava e ‘vakamatabokotaka kina na nodra vakasama na tawavakabauta’ o Setani?

14 E dau vakacala na kawatamata o Setani mera vakanadakuya na Kalou dauloloma o Jiova. (1 Joni 4:8) E vakacala na kawatamata o Setani mera kua ni “kauaitaka nodra bula vakayalo.” (Maciu 5:3) Kena itinitini ni “vakamatabokotaka na nodra vakasama . . . me kua ni cilavi ira kina na tawavakabauta na itukutuku vinaka lagilagi me baleti Karisito, na iyaloyalo ni Kalou.”—2 Kor. 4:4.

 15 E dau vakayagataka vakalevu na lotu lasu o Setani me veivakacalai kina. Dua na ka nona marau me raica nodra sokaloutaki na qase, na veika bula, se manumanu—na tamata se dua na ka, me kua ga ni qaravi o Jiova o koya e “vinakata me qaravi duadua ga”! (Lako 20:5) O ira mada ga era nanuma ni donu tiko nodra qaravi Kalou era vesuki tu ena vakabauta lasu kei na ivakarau ni sokalou e sega na betena. Era tu ena ituvaki vakaloloma, e vakataki ira ga e vakamasuti ira o Jiova: “Na cava oni vakayagataka kina na ilavo ena ka e sega ni madrai, kei na kemuni isau ena ka oni sega ni mamau kina? Moni vakarorogo sara vei au, moni kania na ka vinaka, oni na marautaka vakalevu na ka uro.”—Aisea 55:2.

16, 17. (a) Na cava e tukuna kina o Jisu vei Pita: “Lako tani i dakuqu, Setani”? (b) Ena vakacalai keda vakacava o Setani meda kua ni yadra tiko?

16 E rawa mada ga vei Setani me vakacalai ira na dauveiqaravi gugumatua i Jiova. Kena ivakaraitaki, vakasamataka na gauna e tukuna kina o Jisu vei ratou nona tisaipeli ni sa vakarau vakamatei. E vinaka na inaki i Pita ni kauti koya vakatikitiki qai tukuna vua: “Me kua ni va qori nomuni rai Turaga, ena sega sara ni yaco qori vei kemuni.” E tukuna vakadodonu o Jisu vei Pita: “Lako tani i dakuqu, Setani!” (Maciu 16:22, 23) Na cava e tukuna kina vei Pita “Setani”? Ni matata tu vei Jisu na ka sa vakarau yaco. Sa voleka mai na gauna ena mate kina me isoro ni veivoli qai vakadinadinataka ni lasulasu na Tevoro. Ena gauna bibi oya ena ivolatukutuku ni kawatamata, e sega ni kena gauna me ‘veisau kina nona rai’ o Jisu. E vinakata sara ga o Setani me vakawelewele o Jisu.

17 Ni sa voleka ni cava na ituvaki ni vuravura qo, eda bula tale tiko ga ena gauna dredre. E vinakata o Setani meda vakawelewele, me ‘veisau noda rai’ meda rawaka kina ena vuravura qo, da qai lokuyara. Me kua ni yaco qori vei iko! Mo “yadra tiko.” (Maciu 24:42) Kua ni vakabauta na veivakacalai i Setani me baleta na icavacava, oya ni se yawa se ni na sega ni yaco mai.

18, 19. (a) Ena saga vakacava o Setani me cala noda rai me baleti keda? (b) E vukei keda vakacava o Jiova meda yalomatua da qai yadra tiko?

18 E saga me vakacalai keda o Setani ena dua tale na sala. E vinakata meda vakabauta ni sega ni lomani keda o Jiova, ena sega tale ga ni vosota na noda ivalavala ca. Qo e wili kece tiko ena ivakavuvuli veivakacalai i Setani. Ia o cei e sega dina ni lomana o Jiova? O Setani. O cei e sega ni dau veivosoti? O Setani. Ia e vakadeitaka vei keda na iVolatabu: “Ni sega ni tawayalododonu na Kalou me guilecava na nomuni cakacaka kei na loloma oni vakaraitaka ena vuku ni yacana.” (Iper. 6:10) E marautaka o Jiova na noda sasaga meda vakamarautaki koya, ena sega ni guce na noda sasaga. (Wilika 1 Korinica 15:58.) Meda kua mada ga ni rawai ena ivakavuvuli veivakacalai i Setani.

19 Eda sa dikeva mai ni o Setani e kaukaua, e vakadomobula, qai dau veivakacalai. Eda na vorati koya vakacava na meca rerevaki qo? E vakaiyaragitaki keda o Jiova. E vakavulici keda ena nona Vosa me baleta na iwalewale e vakayagataka o Setani, eda na ‘sega kina ni lecava na nona ilawaki.’ (2 Kor. 2:11) Nida sa kila vinaka na iwalewale i Setani, eda na yalomatua qai yadra tiko. E sega ni rauta ga meda kila na nona ilawaki. E kaya na iVolatabu: “Vorata na Tevoro, ena qai dro tani vei kemuni.” (Jeme. 4:7) Ena veivosakitaki ena ulutaga tarava e tolu na sala meda vorati Setani kina meda qaqa.