Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

iTuvatuva Vakayalololoma na Veivakasivoi

iTuvatuva Vakayalololoma na Veivakasivoi

E KAYA e dua na tacida tagane o Julian: “Niu rogoca ni kacivaki ni sa vakasivoi na luvequ tagane, e ca sara ga vei au na bula. E luvequ ulumatua, keirau dau veivolekati qai cakacaka vata vakalevu. E dau ivakaraitaki vinaka, ia vakasauri ga sa veisau nona itovo. E rubica na tagi o watiqu, au sega ni kila meu vakacegui koya vakacava. Keirau dau lomatarotarotaka se keirau vakayacora vinaka neirau itavi vakaitubutubu se sega.”

E ka mosimosi ni vakasivoi e dua na lotu vaKarisito, ia na cava e tukuni kina ni ituvatuva vakayalololoma? Na yavu vakaivolatabu cava e tokona na kena tau vakaukaua na veivunauci va qo? Na cava e vakasivoi kina e dua?

RUA NA YAVU NI VEIVAKASIVOI

E rua na ka e rawa ni vakasivoi kina e dua na iVakadinadina i Jiova. Kena imatai, e valavala ca bibi e dua na iVakadinadina papitaiso. Kena ikarua, e sega ni veivutunitaka nona cala.

E sega ni namaka o Jiova meda uasivi, ia e vinakata meda muria nona ivakatagedegede savasava. Kena ivakaraitaki, e vinakata o Jiova meda qarauna na ivalavala ca bibi me vaka na veiyacovi tawadodonu, qaravi matakau, daubutako, dau kovea na ka, laba, kei na qaravi tevoro.—1 Kor. 6:9, 10; Vkta. 21:8.

Vakacava, o vakadinata ni dodonu na ivakatagedegede savasava i Jiova qai vakarautaki me taqomaki keda? O cei e cata me maliwai ira na tamata nuitaki, era dau veiyaloni qai vinaka nodra itovo? Eda raica ga qori vei ira na tacida vakayalo, eda vakavinavinakataka gona noda yalayala vua na Kalou nida yalataka meda muria nona veidusimaki ena nona Vosa.

Vakacava ke valavala ca bibi e dua na lotu vaKarisito papitaiso ena vuku ni nona malumalumu? Era ivalavala ca bibi tale ga na dauveiqaravi yalodina i Jiova ena gauna makawa, ia e sega ni vakanadakui ira na Kalou. Dua na ivakaraitaki kilai levu o Tui Tevita. E veidauci qai laba, ia e tukuna vua na parofita o Necani: “Sa vosota . . . o Jiova na nomu ivalavala ca.”—2 Sam. 12:13.

E vosota o Jiova na cala i Tevita ni a veivutunitaka dina nona cala. (Same 32:1-5) Ena vakasivoi tale ga e dua na dauveiqaravi i Jiova nikua ke sega ni veivutunitaka nona cala se tomana tiko ga nona ivakarau ca. (Caka. 3:19; 26:20) Ke ratou raica na qase eratou lewena na komiti ni veilewai ni sega ni veivutunitaka dina nona cala, e dodonu me vakasivoi.

Eda na rairai nanuma ni sa rui kaukaua tale se sega ni ka vakayalololoma na vakatulewa e tau vua e cala, vakauasivi ke da veiwekani. Ia e tiko na yavu vinaka ena Vosa i Jiova meda vakabauta  kina ni vakatulewa va qori e ka vakayalololoma.

YAGA NI VEIVAKASIVOI

E tukuna o Jisu ni na “kilai na vuku ena ka e cakava.” (Maciu 11:19) Ena yaga na vakatulewa me vakasivoi kina e dua e sega ni veivutunitaka nona cala. Dikeva mada e tolu na sala:

Na veivakasivoi e dokai kina na yaca i Jiova. Nida vakatokayacataki ena yaca i Jiova, na ka eda cakava ena vakatau kina na kena irogorogo. (Aisea 43:10) Me vaka ga ni vakatau na kedrau irogorogo e dua na itubutubu ena itovo i luvedrau, na nodra rai na lewenivanua me baleti Jiova ena vakatau tiko ena noda itovo nida vakatokayacataki ena yacana. Ena dokai tiko ga na yaca vinaka i Jiova ke ra muria na nona ivakatagedegede savasava o ira na vakatokayacataki ena yacana. E tautauvata qori kei na gauna i Isikeli nira veimaliwai kei ira na veimatanitu o ira na Jiu era vakatokayacataki ena yaca i Jiova.—Isik. 36:19-23.

Ena rogorogoca na yaca tabu ni Kalou ke da vakayacora na itovo vakasisila. E vakasalataki ira na lotu vaKarisito o Pita: “Me vaka na gone talairawarawa, ni kua ni muria tiko na gagadre ca a tu vei kemuni e liu ni oni a lecaika, ia me vaka ni Kalou Savasava o koya e kacivi kemuni, me savasava tale ga na nomuni ivalavala kece, ni sa volai: ‘Moni savasava niu savasava o yau.’” (1 Pita 1:14-16) Na itovo savasava e dokai kina na yaca ni Kalou.

Ke ivalavala ca e dua na iVakadinadina i Jiova, era na rairai kila qori ena dua na gauna e muri na nona itokani se nona veikilai. Na veivakasivoi e vakaraitaka nira savasava na dauveiqaravi i Jiova, era muria na veidusimaki ena iVolatabu me rawa nira savasava tiko ga. E gole ena soqoni e dua na turaga ena Vale ni Soqoni mai Suwitisiladi qai vinakata me dua na lewe ni ivavakoso. E vakasivoi na ganena ni vakayacora na itovo vakasisila. E tukuna ni vinakata me lewena na isoqosoqo e “sega ni tokona na itovo ca.”

Na veivakasivoi e taqomaka na savasava ni ivavakoso vaKarisito. E vakasalataki ira mai Korinica o Paula ena leqa e rawa ni yaco ke ra veimaliwai tiko ga kei ira era nakita mera ivalavala ca. E vakatauvatana na nodra veivakamuai ca o ira qori ina leveni e vakatubutaka na ibuli taucoko. E vola ni “leveni lailai ena vakatubutaka na ibuli taucoko.” E mani vakasalataki ira: “Biuta tani na daucaka ca qori mai na kemuni maliwa.”—1 Kor. 5:6, 11-13.

O koya e “daucaka ca” e cavuta o Paula e sega ni madualaka nona vakayacora na ivalavala vakasisila. Era vakadonuya na nona ivalavala eso ena loma ni ivavakoso. (1 Kor. 5:1, 2) Ke vakatarai tiko ga na itovo lolovira qo, era na rairai vakamuai na lotu vaKarisito mera muria tale ga na ivakarau vakasisila e dau vakayacori ena korolevu era tiko kina. Ke sega ni kauaitaki na ivalavala ca e nakiti, ena rawa nira raica vakamamada na ivakatagedegede savasava. (Dauv. 8:11) Kena ikuri, o ira na sega ni veivutunitaka nodra cala era na vaka “na vatu e dromu e lomaniwai,” era vakavuna me voca nodra vakabauta eso ena ivavakoso.—Juta 4, 12.

Na veivakasivoi ena rawa ni kilaiyalona tale kina o koya e cala. E talanoataka o Jisu na cauravou e biuta na vale nei tamana qai vakasabusabutaka nona iyau ena ivakarau ni bula torosobu sara. Ena sala mosimosi, e vulica na gone cidroi ni tawayaga na ivakarau ni bula e tu kina, e sega kina na veinanumi. E kilaiyalona tale, veivutuni qai sasaga me lesu tale vei ratou na nona vuvale. (Luke 15:11-24) Eda kila na ivakarau ni nona rai o Jiova ni vakamacalataka o Jisu na marau nei tama dauloloma ni sa veisau o luvena. E vakadeitaka vei keda o koya: “Au sega ni vinakata me mate na tamata ca, au vinakata ga me veisautaka na nona itovo na tamata ca me bula.”—Isik. 33:11.

O ira na vakasivoi era sa sega ni lewe ni ivavakoso vaKarisito, oya na nodra vuvale vakayalo, era na rairai liaca na ka era sa biuta tu mai. Na vua ni nodra ivalavala ca, salavata kei na nodra nanuma na gauna vinaka era marautaka tu kina nodra veiwekani vinaka kei Jiova kei na nona tamata, ena rawa ni vakavuna mera kilaiyalodra tale.

 E bibi na veivosaki vakadodonu kei na yalololoma. E kaya na daunisame o Tevita: “Ke totogitaki au na yalododonu, qori na ivakaraitaki ni loloma e dei, ke mani vunauci au o koya, ena vaka na waiwai e uluqu.” (Same 141:5) Kena ivakaraitaki: Vakasamataka mada na dautaubale e malumalumu ena vuku ni draki batabata. Sa tekivu curumi koya na batabata qai viamoce. Ena mate ke mocelutu ena ucacevata. Ni waraka tiko na veivuke, eratou sabaki koya vakavica na nona itokani me vakayadrati koya. Ena rairai mosi na isaba, ia ena vakabulai koya. E liaca tale ga o Tevita ni vinaka me vakadodonutaki koya na tamata yalododonu me vinaka kina, dina ni na mosimosi.

E dau caka na veivakasivoi me vakadodonutaki kina o koya e cala. Rauta ni tini na yabaki sa qai veisau na luve i Julian, sa vakamacalataki oti mai, mani lesu ina ivavakoso, ena gauna qo sa dua na qase ni ivavakoso. E vakadinata, “Au sa mai raica na vua ni noqu ivakarau ni bula niu vakasivoi. E rauti au vinaka na veivakadodonutaki va ya.”—Iper. 12:7-11.

SALA YALOLOLOMA MERA RAICI KINA NA VAKASIVOI

Na veivakasivoi e vakaraitaka na vakaloloma ni ituvaki vakayalo, ia meda raica tiko ga na yasana vinaka. E noda itavi kece meda raica me yaco na inaki ni veivakasivoi.

E sagai mera vukei o ira na veivutuni mera lesu vei Jiova

O ira na qase ni ivavakoso era vakatulewataka me vakasivoi e dua era na saga mera vakatotomuria na loloma i Jiova. Nira vakaraitaka na nodra vakatulewa vei koya ena vakasivoi, era na tukuna vakamatata ena yalovinaka na ka me cakava me vakalesui tale ina ivavakoso. Era na veisiko ena so na gauna na qase mera tukuna vei ira na vakasivoi na ka mera cakava mera lesu kina vei Jiova. Ena caka ga qo vei ira na vakaraitaka eso na ivakatakilakila ni veisau. *

O ira na lewe ni vuvale era na vakaraitaka nodra lomana na ivavakoso kei ira na cala nira doka na vakatulewa ni veivakasivoi. E kaya o Julian, “E se luvequ tiko ga, ia e tawasei keirau na nona ivakarau ni bula.”

O ira na lewe ni ivavakoso era na vakaraitaka na loloma e yavutaki ena ivakavuvuli vakaivolatabu nira sega ni veivosaki kei koya e vakasivoi. (1 Kor. 5:11; 2 Joni 10, 11) Era tokona kina na veivakadodonutaki e cakava o Jiova ena vukudra na qase. Kena ikuri, mera lomani ratou vakalevu na lewe ni vuvale i koya e vakasivoi, mera tokoni ratou tale ga. Eratou na rarawa vakalevu na vuvale oya, ia me ratou kua ni nanuma ni ratou sega ni rawa ni veimaliwai kei ira na mataveitacini.—Roma 12:13, 15.

E tinia o Julian, “E bibi me tiko na ituvatuva ni veivakasivoi, ena vukei keda meda muria na ivakatagedegede i Jiova. E ka mosimosi, ia e yaga ni toso na gauna. Keu a vakadonuya na ivakarau ca i luvequ, ke a sega ni veisau.”

^ para. 24 Raica na Vale ni Vakatawa vakavalagi ni 15 Epereli, 1991, tabana e 21-23.