Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

iLoloma Duatani Vei Ira E Japani

iLoloma Duatani Vei Ira E Japani

ENA dua na soqo lavotaki e vakayacori ena 28 Epereli, 2013, ena korolevu o Nagoya mai Japani, e kacivaka e dua na itukutuku marautaki o Anthony Morris e lewe ni iLawalawa Dauvakatulewa—oya na kena sevutaki na ivola vou ena vosa vakaJapani e kena ulutaga Na iVolatabu—Na Kosipeli i Maciu (The Bible—The Gospel According to Matthew). Era vakasausau vakabalavu e sivia na le 210,000 era tiko ena soqo kei ira na sema yani ena internet.

Na ivola qo e tabaki vou, e yavutaki ga ena ivakadewa vakaivolatabu na New World Translation ena vosa vakaJapani. E duatani toka na Kosipeli i Maciu oqo e 128 na tabana. E vakamacalataka o Brother Morris ni kena inaki me “ganita na yalava e Japani.” Na cava eso na ka e laurai ena ivola vakaivolatabu qo? Na cava e vakarautaki kina? Na cava era kaya na lewenivanua?

NA CAVA ESO NA KA E LAURAI KINA?

Era kurabuitaka na vakarorogo na volavolai ni Maciu. E rawa ni volai vakababa se tuvai sobu na matanivola vakaJapani, e levu na ka e tabaki, okati kina na noda ivola era volai vakababa. Ia na ivola vou qo e volai vakababa, qo na ivakarau ni volavola e vakayagataki vakalevu ena niusiveva e Japani kei na ivola tale eso. Levu na dauwiliwili e Japani era taleitaka na ivakarau ni volavola qo ni rawarawa na kena wiliki. Kena ikuri, na ulutaga ena tabana yadua sa volai e loma me ulutaga lalai, qo e vakarawarawataka vei ira na wiliwili mera raica na tikina bibi.

Era vakayagataka vinaka sara na mataveitacini e Japani na kena vakarautaki na Maciu. E kaya e dua na tacida yalewa sa yabaki 80 vakacaca: “Au sa wilika vakalevu na ivola i Maciu, ia na kena tuvai sobu na matanivola kei na ulutaga lalai e matata kina vei au na Vunau ena Ulunivanua.” E vola e dua tacida gone: “Au wilika kece na Maciu ena dua ga na gauna. Sa matau vei au na wilika na ivola e volai vakababa, ia e levu e Japani era taleitaka na wilika na ivola ni tuvai sobu.”

VAKARAUTAKI ME GANITI IRA E JAPANI

Na cava e veiganiti kina e dua na ivola vakaivolatabu qo vei ira e Japani? E levu vei ira na Japani era sega ni kila na iVolatabu era makutu na wilika. Na ilavelave ni Kosipeli i Maciu qo ena yaga vei ira era se sega ni raica na iVolatabu, mera taura sara ga e ligadra e dua na ivola ni iVolatabu mera wilika.

Na cava e digitaki kina na ivola i Maciu? E levu vei ira na Japani era vakasamataki Jisu Karisito nira rogoca na vosa “iVolatabu.” E digitaki kina na ivola i Maciu ni volai kina na iyatukawa i Jisu kei na nona sucu, na nona vunau rogo ena Ulunivanua, kei na nona parofisai me baleta na iotioti ni veisiga, na ulutaga era kauai kina e levu na Japani.

Era gumatua na dautukutuku i Japani na  veisoliyaka na ivola vou qo e veivale kei na veisikovi lesu. E vola e dua na tacida yalewa: “Au sa rawa ni solia vakalevu na Vosa ni Kalou vei ira na tiko ena neimami yalava. Au solia rawa e dua na ivola ena yakavi ni siga tiko ga e vakayacori kina na soqoni lavotaki!”

ERA RAICA VAKACAVA NA LEWENIVANUA?

Era vakamacalataka vakacava na dautukutuku na ivola i Maciu? Levu na lewenivanua i Japani era kila vinaka na ivosavosa me vaka na “matamata qiqo,” “mataniciva e matadra na vuaka,” kei na “kua sara ni lomaocaocataka na siga nimataka.” (Maciu 6:34; 7:6, 13) Era kurabui mera kila ni qo na vosa i Jisu Karisito. Nira raica na ivosavosa qo ena Kosipeli i Maciu, e levu era kaya: “Au dau vinakata tu meu wilika mada ga vakadua na iVolatabu.”

Nira lesu na dautukutuku mera lai raici ira na taura na ivola na Maciu, era dau kaya na itaukeinivale nira wilika eso na wase, se ra wilika taucoko. Dua na turaga yabaki 60 vakacaca e tukuna vua e dua na dautukutuku: “Au vuki wilika tiko ga na ivola qo, au lomavakacegu kina. Au kerea mo vakavulici au ena so tale na ka ena iVolatabu.”

E veisoliyaki ena vunau e matanalevu na ivola i Maciu. Ni vunau tiko e dua na tacida yalewa, e solia sara nona imeli vua e dua na goneyalewa e taura na ivola i Maciu. Oti e dua na aua sa vakauitukutuku yani na goneyalewa qo vua na tacida oya ena imeli, e kaya ni sa wilika e dua na iwase ni ivola vakaivolatabu oya, e via kila eso tale na ka. Oti e dua na macawa, e tekivu sara na vuli iVolatabu, sa tekivu soqoni tale ga.

E sivia ni 1,600,000 na ilavelave Na iVolatabu—Na Kosipeli i Maciu e vakau ina ivavakoso kece e Japani, ra qai solia e veivula na mataveitacini e vica vata na udolu. Na ivakamacala taumada ni itabataba qo e vakamacalataka na nodratou rai na tabaka: “E nuitaki ni na uqeti iko mo kauaitaka na iVolatabu na nomu wilika na ivola qo.”