Raica sara na lewena

Raica na lewenivola

Taro na Dauwiliwili

Taro na Dauwiliwili

Vakacava na veika e vakamacalataka o Tevita ena Same 37:25 kei na itukutuku i Jisu ena Maciu 6:33, e kena ibalebale ni na raica o Jiova me tu ga na kena kakana na lotu vaKarisito?

A vola o Tevita ni “sega ni raica na yalododonu ni sa biu laivi, Se na nona kawa ni ra sa vosai kedra madrai.” E vakamacalataka tiko o Tevita na ituvaki a sotava. E vakila na vinaka ni veitaqomaki ni Kalou. (Same 37:25) Ia e sega ni kena ibalebale, ni na tu ga na kedra na dauveiqaravi i Jiova se ra na sega ni sotava na leqa ni kakana.

A sotava tale ga o Tevita eso na gauna dredre. Dua na gauna a drovaki Saula voli mani lailai kina na kena, tini sara me ratou kere madrai kei na nona ilala. (1 Sam. 21:1-6) E macala ena ituvaki ya ni ‘kere madrai’ o Tevita. E vakila na leqa ia e vakabauta dei ni sega ni biuti koya o Jiova. Eda raica ni sega ni bula o Tevita ena kere madrai.

E vakadeitaka vei keda o Jisu ena Maciu 6:33, ni Kalou ena vakarautaka na veika era gadreva nona dauveiqaravi ke ra vakaliuca tiko ga na nona Matanitu. E kaya o Jisu: “Moni vakaliuca tiko ga na matanitu ni Kalou kei na nona yalododonu, ena qai soli vei kemuni na ka kece qo [na kedra, na medra, kei na nodra isulu].” E tukuna tale ga o Jisu nira na rairai sotava na “tacina” na viakana ena vuku ni veivakacacani. (Maciu 25:35, 37, 40) Qori sara ga na ka e sotava na yapositolo o Paula. Vakavica nona viakana qai viagunu.—2 Kor. 11:27.

E tukuna vei keda o Jiova nida na vakacacani ena levu na sala. Ena rawa mada ga ni vakatabui vei keda e levu na ka nida saga meda vakalasuya na veibeitaki ni Tevoro. (Jope 2:3-5) Kena ivakaraitaki eso na tacida lotu vaKarisito era biu ena nodra keba ni veivakararawataki na Nazi, e leqataki sara ga na ituvaki era sotava ena vuku ni veivakacacani qori. E dua na ivadi qaseqase me vakatovolei kina nodra yalodina na iVakadinadina i Jiova oya mera kua ni vakani. Nira yalodina vei Jiova na nona iVakadinadina ra qai talairawarawa tiko ga vua, e sega tale ga ni biuti ira o koya. E vakalaiva mera sotava na veivakatovolei qori me vaka era sotava tale ga na vo ni lotu vaKarisito. Ia e laurai ni tokoni ira tiko ga o Jiova ena vuku ni yacana. (1 Kor. 10:13) Eda lai nanuma kina na ka e tukuni ena Filipai 1:29: “Ni soli vei kemuni na ilesilesi dokai qo ena vuku i Karisito, moni kua wale ga ni vakabauti koya, moni vakararawataki tale ga ena vukuna.”

E yalataka o Jiova ni na tiko vata kei ira na nona dauveiqaravi. Kena ivakaraitaki ena Aisea 54:17, e kaya: “Nai yaragi kecega sa caka me kemu ena sega ga ni yaco.” Na yalayala qori kei na levu tale e vakadeitaka vei ira na tamata ni Kalou nira na taqomaki. Ena yasana adua, ena rawa ni vakatovolei e dua na lotu vaKarisito me tini vakamatei sara.