Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

O Ciqoma Tiko na ‘Kakana ena Kena Gauna Donu’?

O Ciqoma Tiko na ‘Kakana ena Kena Gauna Donu’?

EDA bula tu qo ena gauna dredre duadua ena ivolatukutuku ni kawatamata. (2 Tim. 3:1-5) E vakatovolei e veisiga na noda lomani Jiova kei na noda sasaga meda muria nona ivakatagedegede savasava. E kila o Jisu ni na yaco nikua na ituvaki qori, e yalataka gona vei ira nona imuri nira na vakayaloqaqataki mera vosota me yacova na icavacava. (Maciu 24:3, 13; 28:20) Me rawa ni vakayaloqaqataki ira o Jisu, e lesia kina na dauveiqaravi yalodina e vuku me vakarautaka na ‘kakana vakayalo ena kena gauna donu.’—Maciu 24:45, 46.

A lesi ena 1919 na dauveiqaravi yalodina, vica vata na milioni na ‘lewenivale’ mai na duidui vosa era sa kumuni ena isoqosoqo i Jiova, ra qai vakani tale ga vakayalo. (Maciu 24:14; Vkta. 22:17) Ia eso na noda ivola e sega ni tabaki ena vosa kece, e levu tale ga e sega vei ira na Internet se iyaya vakalivaliva mera raica kina na noda ivola. Kena ivakaraitaki, e levu e sega vei ira na vidio ni isoqosoqo kei na ulutaga era tabaki ena jw.org. Kena ibalebale, ni so era na sega ni kaukaua vakayalo nira sa calata tiko na kakana vakayalo? Me rawa nida sauma qori, de vinaka meda dikeva mada e va na taro bibi.

 1. Na cava na isaluaki levu duadua e tiko ena kakana e dau vakarautaka o Jiova?

Ni temaki Jisu o Setani me vukica na vatu me madrai, a qai tukuna vua o Jisu: “E sega ni bula na tamata ena madrai wale ga, e bula ga ena vosa kece e lako mai na gusu i Jiova.” (Maciu 4:3, 4) E volatukutukutaki ena iVolatabu na vosa i Jiova. (2 Pita 1:20, 21) Koya gona, na isaluwaki levu duadua ni keda kakana vakayalo na iVolatabu.—2 Tim. 3:16, 17.

Na isoqosoqo i Jiova e vakarautaka taucoko se vakatikina na New World Translation of the Holy Scriptures ena sivia na 120 na vosa. E veiyabaki e vakadewataki tiko ga qori ena levu tale na vosa. Kena ikuri, vica vata na bilioni na ilavelave ni so tale na itabataba ni iVolatabu era vakarautaki taucoko se vakatikina ena vica na udolu na vosa. Na tubu vakasakiti qori e salavata kei na inaki i Jiova, oya mera “bula na veimataqali tamata kece, mera kila tale ga na ka dina.” (1 Tim. 2:3, 4) Me vaka ni “sega ni vunitaki [vei Jiova] e dua na kabuli,” eda nuidei ni na vagolei ira mai ena nona isoqosoqo o ira era ‘kauaitaka nodra bula vakayalo’ qai vakarautaka na kedra kakana vakayalo.—Iper. 4:13; Maciu 5:3, 6; Joni 6:44; 10:14.

2. E yaga vakacava na noda ivola ena noda vakani vakayalo?

Me rawa ni kaukaua nona vakabauta e dua, ena sega ni vinakati ga me wilika na iVolatabu. Ena vinakati me kila na ka e wilika qai bulataka na ka e vulica. (Jeme. 1:22-25) A vakadinata sara ga qori na matanivanua ni Iciopea ena imatai ni senitiuri. A wilika tiko na Vosa ni Kalou, mani tarogi koya na dauvunau o Filipi: “O kila na ka o wilika tiko?” E sauma na matanivanua: “Meu kila vakacava ke sega ni dua e vakavulici au?” (Caka. 8:26-31) E vukei koya sara o Filipi me rawata na kilaka dodonu ena Vosa ni Kalou. Na levu ni nona taleitaka na matanivanua na ka e vulica, e papitaiso sara kina. (Caka. 8:32-38) Na noda ivola tale ga vakaivolatabu e vukei keda meda rawata na kilaka dodonu me baleta na ka dina. E tara na lomada, e uqeti keda sara ga meda bulataka na ka eda vulica.—Kolo. 1:9, 10.

Ena noda ivola, eda sa vakamamautaki dina vakayalo ena ka meda kania kei na ka meda gunuva. (Aisea 65:13) Kena ivakaraitaki, e tabaki na Vale ni Vakatawa ena sivia na 210 na vosa, e vakamacalataki kina na parofisai vakaivolatabu, e vakalevutaka na noda kila na ka titobu vakayalo, e uqeti keda tale ga meda muria e veigauna na ivakavuvuli vakaivolatabu. E rauta ni 100 na vosa e tabaki ena Yadra!, e vakarabailevutaka noda kilaka me baleta na nona ibulibuli o Jiova, e vakaraitaka tale ga na sala meda muria kina na ivakavuvuli yaga vakaivolatabu. (Vkai. 3:21-23; Roma 1:20) Na dauveiqaravi yalodina e vakarautaka na ivola vakaivolatabu ena 680 vakacaca na vosa! Vakacava o dau biuta vakatikitiki e dua na gauna e veisiga mo wilika kina na iVolatabu? O dau wilika na mekesini vovou kei na ivola vovou kece e tabaki ena nomu vosa e veiyabaki?

Na isoqosoqo i Jiova e vakarautaka tale ga na suinivunau mera vakayagataki ena noda soqoni, soqo ni tabacakacaka kei na soqo ni veiwasewase. O dau taleitaka na rogo ivunau, drama, vakatasuasua kei na veitarotarogi ena noda soqoni se soqo? Io, e vakarautaka vakayauyau o Jiova na keda magiti vakayalo!—Aisea 25:6.

 3. Ke sega ni tabaki kece ena nomu vosa na noda ivola, kena ibalebale qori o sa na lai malumalumu vakayalo?

Sega. Meda kua ni kurabuitaka ni na tiko na gauna era na ciqoma eso na dauveiqaravi i Jiova e levu na kakana vakayalo ni vakatauvatani kei na so tale na tacida. Baleta? Vakasamataki ratou mada na yapositolo. Eratou dusimaki se vakasalataki vakalevu ni laurai vata kei na so tale na tisaipeli ena imatai ni senitiuri. (Mari. 4:10; 9:35-37) Ia era sega ni walokai vakayalo na tisaipeli qori, era ciqoma sara ga na ka era vinakata dina.—Efeso 4:20-24; 1 Pita 1:8.

Meda nanuma tiko, e levu na ka e cavuta se cakava o Jisu e vuravura e sega ni volatukutukutaki ena Kosipeli. E vola na yapositolo o Joni: “E levu tale na ka e cakava o Jisu, ke ra volai kece vakamatailalai au vakabauta ni na sinai o vuravura ena kena ivolavivigi.” (Joni 21:25) E levu sara na ka era kila na imuri i Karisito ena imatai ni senitiuri me baleti Jisu ni vakatauvatani kei keda, ia e sega ni kena ibalebale qori nida kalouca. E raica ga o Jiova me veiganiti na itukutuku e vakarautaki meda kila me baleti Jisu meda muria kina na weniyavana.—1 Pita 2:21.

Vakasamataka tale ga na ivola eratou vola na yapositolo vei ira na ivavakoso ena imatai ni senitiuri. Dua mada ga na ivola e vola o Paula a sega ni biu ena iVolatabu. (Kolo. 4:16) Vakacava sa sega ni veirauti na keda kakana vakayalo baleta ni sega vei keda na ivola ya? Sega. E kila o Jiova na ka eda vinakata, e veirauti gona na ka e vakarautaka meda kaukaua tiko ga kina vakayalo.—Maciu 6:8.

E kila o Jiova na ka eda vinakata, e veirauti gona na ka e vakarautaka meda kaukaua tiko ga kina vakayalo

Nikua, eso na tacida era ciqoma e levu na kakana vakayalo ni vakatauvatani vei ira na so tale. Vakacava o vosataka tiko e dua na vosa e vica ga na noda ivola e tabaki kina? Ke dina qori, nanuma tiko o Jiova e kauaitaki iko. Vulica tiko mada ga na ivola sa tabaki ena nomu vosa. Ke rawa, tikova na soqoni ena vosa o kila. Mo nuidei ni o Jiova ena vakaukauataki iko vakayalo.—Same 1:2; Iper. 10:24, 25.

4. Ke sega vei iko na ivola e tabaki ena jw.org, vakacava o na malumalumu vakayalo?

E tiko ena noda Web site na mekesini kei na so tale na ivola vakaivolatabu. E tiko tale ga kina na ulutaga ena vukei ira na veiwatini, itabagone kei ira na gonelalai. Ena yaga vei ira na vuvale nodra vulica na ulutaga qori ena nodra Sokalou Vakavuvale. Kena ikuri, e tabaki ena noda Web site na macala ni soqo lavotaki, me vaka na Koronivuli e Kiliati kei na bose vakayabaki. E vakasavui tale ga kina vei keda na mataveitacini e vuravura raraba na itukutuku ni leqa tubukoso kei na kisi ni veilewai e vauci keda na tamata i Jiova. (1 Pita 5:8, 9) E yaga tale ga ena noda veivakavulici, ni rawa mada ga vei ira na vanua e vakatabui tu kina na noda cakacaka mera kila na itukutuku vinaka.

Ia ke tiko nomu Internet se sega, e se rawa tiko ga ni o kaukaua vakayalo. Dua na ka na sasaga e cakava na dauveiqaravi yalodina me veirauti na ivola e tabaka meda vakani kina vakavinaka na lewenivale. Mo kua ni nanuma ni dodonu me voli na iyaya vakalivaliva mo raica kina noda Web site. Eso na tacida era na rairai tabaka eso na ulutaga e tiko ena jw.org mera solia vei ira na mataveitacini e sega na nodra Internet. Ia ena sega ni vinakati me cakava sara qori na ivavakoso.

Eda vakavinavinakataka nona dina o Jisu ena nona yalayala me qarava na veika eda gadreva vakayalo. Ni sa voleka sara tiko me cava na iotioti ni veisiga ni vuravura ca qo, eda nuidei ni o Jiova ena vakarautaka tiko ga na ‘kakana vakayalo ena kena gauna donu.’