Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

“Dou na Qai Tukuni Au”

“Dou na Qai Tukuni Au”

‘E kaya vei iratou o Jisu, Dou na qai tukuni au ena veivanua yawa sara kei vuravura.’—CAKA. 1:7, 8.

1, 2. (a) O cei na ivakadinadina uasivi i Jiova? (b) Na cava na ibalebale ni yaca i Jisu? E vakaraitaka vakacava na Luve ni Kalou ni dina ena ibalebale ni yacana?

“QO NA vuna au sucu mai kina, qo tale ga na vuna au lako mai kina i vuravura meu tukuna na ka dina.” (Wilika Joni 18:33-37.) Qori na ka e tukuna o Jisu Karisito vua na kovana ni Roma e Jutia ena gauna a veilewaitaki tiko kina. E se qai vakatakilai koya ga o Jisu me tui. Oti e vica na yabaki, e qai cavuta na yapositolo o Paula na ivakaraitaki ni yaloqaqa i Jisu, “na ivakadinadina a vunau sara ga vakavinaka ena matai Ponitio Pailato.” (1 Tim. 6:13) Io, eso na gauna e vinakati vakalevu na yaloqaqa me rawa nida dua na ‘ivakadinadina yalodina da qai daudina’ ena vuravura i Setani e levu kina na veicati!—Vkta. 3:14.

2 Me vaka ni lewe ni matanitu vakaJiu o Jisu, e okati kina me dua na ivakadinadina. (Aisea 43:10) Ia a qai yaco me ivakadinadina levu duadua e bau tubera na Kalou me vakatokayacataki ena yacana. E raica vakabibi o Jisu na ibalebale ni nona vakatokayacataki ena yaca ni Kalou. E tukuna na agilosi vua na tamai Jisu vakacabecabe o Josefa ni na bukete o Meri ena vuku ni yalo tabu, e tomana na agilosi: “Ena vakasucuma e dua na gonetagane, me yacana o Jisu, ni na vakabulai ira nona tamata mai na nodra ivalavala ca.” (Maciu 1:20, 21) Era tukuna na daudikeva na iVolatabu, ni yaca i Jisu e yavutaki mai ena dua na yaca vakaIperiu na Jeshua, e ivakalekaleka ni yaca ni Kalou e kena ibalebale “Veivakabulai  o Jiova.” Me salavata kei na ibalebale ni yacana, o Jisu e vukei ira “na sipi ni matanitu o Isireli era yali tu” mera veivutunitaka nodra ivalavala ca me rawa ni vakadonui ira o Jiova. (Maciu 10:6; 15:24; Luke 19:10) Qori na vuna e dau gugumatua kina o Jisu me vakadinadinataka na Matanitu ni Kalou. E volatukutukutaka na dauvola Kosipeli o Marika: “Sa qai lako i Kalili o Jisu me lai vunautaka kina na itukutuku vinaka ni Kalou ena nona kaya: ‘Sa yaco mai na gauna lokuci, sa voleka na matanitu ni Kalou. O koya gona, moni veivutuni, ni vakabauta na itukutuku vinaka.’” (Mari. 1:14, 15) E yaloqaqa tale ga o Jisu me vunauci ira na iliuliu ni lotu Jiu, qori e dua na vuna era vakoti koya kina.—Mari. 11:17, 18; 15:1-15.

“NA VEIKA VAKATUBUQOROQORO ME BALETI KOYA NA KALOU”

3. Na cava e qai yaco ni oti e tolu na siga nona mate o Jisu?

3 Ia dua na ka vakatubuqoroqoro a qai yaco! Ena ikatolu ni siga mai na gauna a vakamatei kina o Jisu, a qai vakaturi koya o Jiova ena yago tawamate vakayalo, sega ni yago vakatamata. (1 Pita 3:18) E rairai ena yago vakatamata o Jisu me vakadinadinataka vei ira na nona tisaipeli ni sa vakabulai tale. A rairai vakalima o Jisu vei ratou na duidui tisaipeli ena siga ga a vakaturi kina.—Maciu 28:8-10; Luke 24:13-16, 30-36; Joni 20:11-18.

4. Na cava e cakava o Jisu ni rairai vei ratou na nona yapositolo? Na itavi cava e vakamatatataka vei ira ena gauna qori?

4 Eratou a soqoni tu na yapositolo kei na so tale ena ikalima ni gauna e rairai kina o Jisu. Ena gauna guiguilecavi dredre qori, a veivakavulici kina o Jisu ena Vosa ni Kalou. E “vakararamataka na lomadra mera kila na ibalebale ni iVolatabu.” Era sa qai kila gona ni nona vakaturi vakacakamana kei nona vakamatei ena ligadra na meca ni Kalou e sa parofisaitaki tu ena iVolatabu. Ni sa voleka ni cava na soqoni qori, sa qai vakamatatataka o Jisu na nodra itavi. E tukuna ni na “vunautaki ina matanitu kece na veivutuni me vosoti kina na ivalavala ca ena yacana, me tekivu e Jerusalemi.” E tomana: “Oni na tukuna yani na ka kece qo.”Luke 24:44-48.

5, 6. (a) Na cava e tukuna kina o Jisu: “Dou na qai tukuni au”? (b) Na inaki vou cava i Jiova mera na vakatakila na tisaipeli i Jisu?

5 Ni oti e 40 na siga mai na iotioti ni nona rairai o Jisu, eratou sa na kila na nona yapositolo na ivakaro matata qo: “Dou na qai tukuni au e Jerusalemi, e Jutia, e Samaria, kei na veivanua yawa sara kei vuravura.” (Caka. 1:8) Na cava e tukuna kina o Jisu: “Dou na qai tukuni au,” sega ni tukuni Jiova? A rawa ni kaya me ratou tukuni Jiova, ia a vosa tiko vei ira era Isireli, era sa nona ivakadinadina rawa tu o Jiova.

Nida tisaipeli i Jisu, eda na vakatakila tiko ga na inaki i Jiova me baleta na veigauna se bera mai (Raica na parakaravu e 5, 6)

6 Ia sa na vinakati vei ira na tisaipeli i Jisu mera vakatakila e dua na ka vou me baleta na inaki i Jiova—qo e uasivi sara mai na nodra vakabulai na Isireli ena nodra vakabobulataki i Ijipita kei na nodra kau vakavesu e muri i Papiloni. Nona mate kei na nona vakaturi o Jisu Karisito e rawa kina nida sereki mai na veivakabobulataki levu duadua, oya na ivalavala ca kei na mate. Ena Penitiko 33 S.K., era vakatakila kina na tisaipeli i Jisu era se qai lumuti ga “na veika vakatubuqoroqoro me baleti koya na Kalou,” ra qai yaco e levu mera vakabauta. Ni tu mai lomalagi o Jisu ena liga imatau i Tamana, sa tekivu raica na kena sa qai vakaibalebale tiko ga vakalevu na yacana. Qori nona raica nira veivutuni e vica vata na udolu ra qai vakabauta ni vakayagataki koya o Jiova me veivakabulai.—Caka. 2:5, 11, 37-41.

“ME KEDRA IVOLI E LEWE LEVU”

7. Na cava e vakadeitaka na veika era yaco ena siga ni Penitiko 33 S.K.?

7 E vakadeitaki ena veika e yaco ena Penitiko 33 S.K. ni sa ciqoma  vakayalololoma o Jiova na yaga ni nona cabora o Jisu na yagona uasivi vakatamata me vosoti se me ubia kina na ivalavala ca. (Iper. 9:11, 12, 24) Me vaka ga e tukuna o Jisu “ni a sega ni lako mai . . . me qaravi, ia me veiqaravi ga, me solia tale ga na nona bula me kedra ivoli e lewe levu.” (Maciu 20:28) Na vosa “levu” e dusia ni na sega ni yaga na ivoli vei ira ga na Jiu era sa veivutuni. Ia e nona inaki na Kalou “me bula na veimataqali tamata kece,” me vaka ni na “kauta tani na nodra ivalavala ca na kai vuravura” na ivoli.—1 Tim. 2:4-6; Joni 1:29.

8. Na cava e rawa ni tukuni me baleta na nodra vunau na tisaipeli i Jisu, e rawati vakacava qori?

8 Vakacava era yaloqaqa na tisaipeli i Jisu mera vakadinadinataki koya tiko ga ena gauna e liu? Io era yaloqaqa, ia era sega ni cakava qori ena nodra kaukaua ga. E uqeti ira qai vakaukauataki ira na yalo tabu i Jiova mera vakadinadina tiko ga kina. (Wilika Cakacaka 5:30-32.) Rauta na 27 na yabaki ni oti na Penitiko 33 S.K., e rawa ni tukuni ni sa vunautaki ‘na itukutuku dina me baleta na itukutuku vinaka’ vei ira na Jiu kei ira na kai veimatanitu era “kabuli kece e ruku i lomalagi.”—Kolo. 1:5, 23.

9. Me vaka ga a parofisaitaki, cava a qai yaco ena ivavakoso vaKarisito taumada?

9 Ia e ka ni rarawa ni a qai vakadukadukalitaki na ivavakoso vaKarisito a tauyavutaki taumada. (Caka. 20:29, 30; 2 Pita 2:2, 3; Juta 3, 4) Me vaka ga a tukuna o Jisu, ena uqeta na “Vunica” o Setani me tete na vukitani qai vakabuawataka na ivakavuvuli dina vaKarisito. Qori ena yaco tiko me yacova sara na “ivakataotioti ni veika vakavuravura.” (Maciu 13:37-43) Oti qori, o Jiova ena qai lesi Jisu me nodra Tui na kawatamata e vuravura. A yaco qori ena Okotova 1914, na itekitekivu ni “iotioti ni veisiga” ni ituvaki ca i Setani.—2 Tim. 3:1.

10. (a) Na tikinisiga bibi cava era sa tukuna makawa tu na lotu vaKarisito lumuti? (b) Na cava a yaco ena Okotova 1914? Eda kila vakacava qori?

10 Ni bera na Okotova 1914, era sa tukuna makawa tu na lotu vaKarisito lumuti ni tikinisiga bibi ya. Era yavutaka qori ena parofisai i Taniela me baleta e dua na vunikau levu a lau ta, e qai tubu tale ni oti e “vitu na gauna.” (Tani. 4:16) A vakaibalebaletaka tiko o Jisu na gauna qori me “nodra gauna lokuci na veimatanitu” ena nona parofisai me baleta na nona tiko ena  gauna se bera mai kei na “ivakataotioti ni veika vakavuravura.” Me tekivu mai na 1914, sa qai matata tiko ga vei keda na ‘ivakatakilakila e dusia ni sa tiko o Karisito,’ na Tui vou kei vuravura. (Maciu 24:3, 7, 14; Luke 21:24) Koya gona, sa okati tiko ena “veika vakatubuqoroqoro me baleti koya na Kalou” na nona lesi Jisu o Jiova me nodra Tui na kawatamata e vuravura.

11, 12. (a) Ena 1919 ni sa oti na ivalu, na cava a tekivu cakava na Tui vou kei vuravura? (b) Na cava e sa qai matata me tekivu mai na loma ni veiyabaki ni 1930? (Raica na imatai ni iyaloyalo.)

11 Ni Tui vou kei vuravura o Jisu Karisito, sa tekivu vakabulai ira tiko na nona imuri lumuti mai na ivesu kei “Papiloni na Ka Levu.” (Vkta. 18:2, 4) Ni oti na ivalu ena 1919, sa rawarawa sara ni vunautaki e veiyasa i vuravura na sala e veivakabulai kina o Jiova kei na itukutuku vinaka me baleta na Matanitu ni Kalou. Era vakayagataka vinaka sara na lotu vaKarisito lumuti na gauna qori mera vunau kina, e yaco mera kumuni e vica vata tale na udolu na lumuti mera vakaivotavota ena veiliutaki kei Karisito.

12 Sa qai matata ena loma ni veiyabaki ni 1930 ni sa tekivu kumuna tiko o Karisito e vica vata na milioni na ‘so tale na sipi.’ O ira qo era lewena na “isoqosoqo levu” era cavutu mai na veimatanitu. Ena nodra veidusimaki na lotu vaKarisito lumuti, era vakatotomuria na isoqosoqo levu na ivakaraitaki ni yaloqaqa i Jisu ra qai vakatakila e matanalevu nira vakabulai ena vuku i Jiova kei Karisito. Ke ra gugumatua ena cakacaka vakavunau ra qai cakacakataka tiko ga na nodra vakabauta na ivoli i Karisito, era na bula sivita “na veivakararawataki levu,” ni na vakaoti kina na vuravura i Setani.—Joni 10:16; Vkta. 7:9, 10, 14.

‘DOUDOU NI VUNAUTAKA NA ITUKUTUKU VINAKA’

13. Nida iVakadinadina i Jiova, na cava eda na vakadeitaka meda cakava? Eda na rawata vakacava qori?

13 E ka dokai meda vunautaka na “veika vakatubuqoroqoro” sa cakava tiko na Kalou o Jiova kei na ka e yalataka me baleta na veigauna se bera mai, e bibi gona meda vakamareqeta tiko ga qori. Ia ena sega ni rawarawa tu ga. E levu na tacida vakayalo era cakacaka ena yalava era sega ni kauai kina vakalevu na tamata, era vakalialiai se ra vakacacani. Eda rawa ni vakatotomuria ga na ka a cakava na yapositolo o Paula kei ira na nona itokani. E tukuna: ‘Ena veivakaukauataki ni Kalou keitou sa qai doudou ga me keitou tukuna vei kemuni na itukutuku vinaka ni Kalou, dina ni keitou tusaqati.’ (1 Ces. 2:2) Meda kua gona ni soro. Meda vakadeitaka ga nida na dina ena noda yalayala me yacova ni sa vakarusai na vuravura i Setani.  (Aisea 6:11) Ia eda na sega ni cakava rawa qori ena noda kaukaua ga, e bibi meda vakatotomuri ira na lotu vaKarisito taumada, ena noda masuti Jiova me solia vei keda na yalona tabu meda rawata kina “na kaukaua e uasivia na kaukaua ni tamata.”—Wilika 2 Korinica 4:1, 7; Luke 11:13.

14, 15. (a) Na cava era sotava na lotu vaKarisito ena imatai ni senitiuri, na cava e tukuna vei ira na yapositolo Pita? (b) Nida iVakadinadina i Jiova, meda raica vakacava na veitusaqati e caka vei keda?

14 E vica vata na milioni nikua era kaya nira lotu vaKarisito, “ia era cakitaki koya [na Kalou] ena ka era cakava, nira vakasisila ra qai talaidredre. Se mani ka vinaka cava era cakava, era na sega ga ni vakadonui.” (Taito 1:16) E vinaka meda nanuma tiko ni levu era cati ira na lotu vaKarisito dina ena imatai ni senitiuri. Oya na vuna e vola kina na yapositolo o Pita: “Ke oni vakasewasewani ena yaca i Karisito, moni marau ni tiko vata kei kemuni na igu savasava ni Kalou.”—1 Pita 4:14.

15 Vakacava e dusi ira tale ga na iVakadinadina i Jiova nikua na tikinivolatabu qori? Io, baleta nida vakadinadinataka se vunautaka tale ga na veiliutaki vakatui i Jisu. Koya gona, nida cati ena noda vakatokayacataki ena yaca i Jiova, e tautauvata vinaka kei na noda “vakasewasewani ena yaca i Karisito,” ni a tukuna vei ira na tusaqati koya: “Au lako mai ena yaca i Tamaqu, ia oni sega ni vakabauti au.” (Joni 5:43) Ke mani dua tale na gauna o tusaqati ni o vunau tiko, mo yaloqaqa ga. Na veitusaqati va qori e vakadeitaka ni vakadonui iko na Kalou, e ‘tiko vata tale ga kei iko’ na yalona tabu.

16, 17. (a) Na cava era sa vakadinadinataka tiko na dauveiqaravi i Jiova e veiyasai i vuravura? (b) Na cava o vakadeitaka mo na cakava?

16 Ena gauna vata qori meda nanuma tiko ni levu mai na veiyasa i vuravura era sa mai kila na ka dina. Ena yalava mada ga e sa dau tarai vakalevu, eda se rawa ni kunei ira tiko ga na tataleitaki mera rogoca na itukutuku totoka ni veivakabulai. Meda gumatua mada ga ni lesuvi ira na tataleitaki, ke rawa meda vakavulici ira ena iVolatabu da qai vukei ira mera yalayala ra qai papitaiso. De dua o na duavata kei na tacida yalewa o Sarie mai Sauca Aferika, e sa sivi qo e 60 na yabaki na nona gugumatua tiko ena cakacaka vakavunau. E tukuna, “Dua na ka na noqu dau vakavinavinakataka na isoro ni veivoli i Jisu, baleta niu rawa ni veiwekani vinaka kina kei Jiova na Turaga Cecere ni lomalagi kei vuravura, au marautaka tale ga niu rawa ni vakatakila na yacana lagilagi.” Ena veivuke i Sarie kei watina o Martinus, e levu era sa mai sokaloutaki Jiova, okati kina na tolu na luvedrau. E tomana o Sarie: “E sega tale ni dua na cakacaka e veivakacegui, o Jiova tale ga e vakayagataka na yalona tabu meda cakava tiko ga kina na cakacaka ni veivakabulai.”

17 Ke da mani lotu vaKarisito papitaiso se da sasaga tiko meda sauva qori, e tiko na vuna vinaka meda vakavinavinakataka kina ni ka dokai noda lewena na ivavakoso ni iVakadinadina i Jiova e veiyasa i vuravura. Koya gona, meda vunau tiko ga vakavinaka nida saga tiko meda savasava ena vuravura dukadukali qo i Setani. Nida cakava qori eda sa rokova tiko kina na Tamada vakalomalagi dauloloma, ni ka dokai meda vakatokayacataki ena yacana lagilagi.