Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

O se Nanuma Tiko?

O se Nanuma Tiko?

O bau wilika vinaka na itabataba ni Vale ni Vakatawa era se qai tabaki oti ga? Raica mada ke o rawa ni sauma e vica na taro qo:

Ena Naisani 14, gauna cava me na vakamatei kina na lami ni Lakosivia?

E volai ena so na ivakadewa ni iVolatabu ni dodonu me vakamatei ena “maliwa ni rua na yakavi,” qori me sa karobo na vanua—ni sa dromu na siga, ia e se sega ni butobuto sara. (Lako 12:6, NW)—15/12, tabana e 18-19.

Na ivakavuvuli vakaivolatabu cava e rawa nira vakayagataka na itabagone mera vakatulewa kina vakavuku?

Qo e tolu: (1) Vakaliuca taumada na Matanitu ni Kalou kei na nona yalododonu. (Maciu 6:19-34) (2) Marautaka nomu qaravi ira na so tale. (Caka. 20:35) (3) Marautaka nomu qaravi Jiova ni o se itabagone. (Dauv. 12:1)—15/1, tabana e 19-20.

O cei o ratou na va na dauvodo ose eratou sa tekivu yavala mai ena 1914?

O Jisu e vodoka tiko e dua na ose vulavula, e sa ravuti Setani kei ira na nona timoni mai lomalagi. O koya e vodoka na ose damudamu e vakatayaloyalotaka na rarawa e vakavuna na ivalu. O koya e vodoka na ose loaloa e vakaibalebaletaka na leqa ni kakana. O koya e vodo tiko ena ose dravu e dauveivakamatei ena mate rerevaki, nira mate kina e vica vata na milioni. (Vkta. 6:2-8)—1/2, tabana e 6-7.

Gauna cava ena vakayacori kina na ‘vakamau ni lami’? (Vkta. 19:7)

Ena “vakamau na Lami” ni sa vakacavara nona ravuravu na Tui o Jisu Karisito, qori ni sa vakarusai o Papiloni na Ka Levu, sa oti tale ga na ivalu na Amaketoni.—15/2, tabana e 10.

Na cava era “nanamaki” kina na Jiu ena imatai ni senitiuri ena nona basika na Mesaia? (Luke 3:15)

Eda sega ni rawa ni vakadeitaka ke ra kila na Jiu ena imatai ni senitiuri na parofisai i Taniela me baleta na Mesaia me vakataki keda. (Tani. 9:24-27) Ia de dua era sa na rogoca na ka e tukuna na agilosi vei ira na ivakatawanisipi se na ka e tukuna na parofita yalewa o Ana me baleta na nona raica na gonedramidrami o Jisu ena valenisoro. O ira tale ga na dauraikalokalo era vaqarai “koya e sucu me nodra tui na Jiu.” (Maciu 2:1, 2) E muri, sa qai vakaraitaka o Joni na Dauveipapitaisotaki ni sa vakarau basika na Karisito.—15/2, tabana e 26-27.

Na cava meda cakava meda dina kina ena noda vosa? (2 Kor. 1:18)

Eda dau vakadinata ni na tiko na ka ena vakadredretaka na noda dau dina ena noda vosa. Ia nida yalataka e dua na ka, e bibi meda solia noda vinaka taucoko meda dau dina.—15/3, tabana e 32.

Na cava meda cakava nida temaki meda raica na iyaloyalo vakasisila?

Qo e tolu na ka e rawa ni vukei keda. (1) Ke basika eso na iyaloyalo veivagarogaroi, rai tani sara vakatotolo. (2) Taqomaka nomu vakasama ni o vakasamataka na ka vinaka qai masuta na Kalou. (3) Kua ni sarava na iyaloyalo se Web site e laurai kina na iyaloyalo vakasisila.—1/4, tabana e 10-12.

Na leqa tawanamaki cava e rawa ni yaco ke dua na lotu vaKarisito e biuta nona vuvale me lai cakacaka ena dua tale na vanua?

Nira vakatulewataka na itubutubu mera kua ni tiko vata vakavuvale, ena rawa ni vakaleqai ira na gone. De dua era na cati ira na itubutubu. E rawa tale ga ni temaki ena veiyacovi e dua vei rau na isa ni vakawati e yawaki watina.—15/4, tabana e 19-20.

Na cava e dau musu kina na yavadra na dau basulawa era vakaliligi ena kau?

Era vakamatea eso na dau basulawa na kai Roma ena nodra vakaliligi ena kau. Era kerea na Jiu me musu na yavadrau na dau basulawa erau a vakaliligi ena yasa i Jisu. Qori era na sega kina ni cegu vinaka ra qai mate vakatotolo. Ena sega gona ni gadrevi mera vakaliligi tu ena kau ena bogi taucoko. (Vkru. 21:22, 23)—1/5, tabana e 11.

Na cava na va na taro meda vakasamataka tiko nida gole ena cakacaka vakaitalatala?

O cei au na sotava ena cakacaka vakavunau? E vei na vanua au na vunau kina? Na gauna veiganiti cava meu vunau kina? Au na torovi ira vakacava?—15/5, tabana e 12-15.

E vakacava na rerevaki ni vakatavako?

Ena senitiuri sa oti, era mate kina e le 100,000,000. Ena gauna mada ga qo, e rauta ni 6,000,000 era mate ena veiyabaki.—1/6, tabana e 3.