Raica sara na lewena

Raica na lewenivola

Doudou o Josefa Mai Arimacea

Doudou o Josefa Mai Arimacea

E SEGA ni kila o Josefa mai Arimacea ni rawa ni lai vosa vua na kovana ni Roma. E turaga yalodredre o Ponitio Pailato. Ia me bulu vinaka na yago i Jisu, ena vinakati me lai kerei na yagona vei Pailato. A sega ni dredre nodrau veivosaki me vaka e nanuma o Josefa. E vakadonuya qori o Pailato ni taroga oti e dua na sotia ke sa mate o Jisu. Se rarawa tiko ga o Josefa, e vakariri tale ina vanua e lili tu kina o Jisu.—Mari. 15:42-45.

  • O cei mada o Josefa mai Arimacea?

  • E mai kilai Jisu tu vakacava?

  • Na cava mo kauaitaka kina na ka me baleti koya?

 LEWE NI SANADRINI

E vakatokai Josefa na Kosipeli i Marika me “turaga nuitaki ena Matabose.” Ena tikinivolatabu qo, na Matabose e dusia na Sanadrini, oya na mataveilewai cecere nodra na Jiu, e vosayaco tale ga ena nodra itikotiko, ena matanitu, kei na lotu. (Mari. 15:1, 43) O Josefa gona e dua na nodra iliuliu na Jiu, e rawa kina ni rau veivosaki kei na kovana ni Roma. Sa rauta me turaga vutuniyau tale ga.—Maciu 27:57.

O na doudou ni tukuna ni nomu Tui o Jisu?

Era cati Jisu na lewe ni Sanadrini. Era via vakamatei koya. Ia o Josefa e kilai me “turaga vinaka qai turaga yalododonu.” (Luke 23:50) E duidui vei ira e levu na lewe ni Sanadrini, ni turaga daudina, e vinaka nona itovo, e gu na lomana me muria na ivakaro ni Kalou. E “waraka tale tiko ga na Matanitu ni Kalou,” qori na vuna eda rawa ni kaya kina ni tisaipeli i Jisu. (Mari. 15:43; Maciu 27:57) E rairai taleitaka na itukutuku i Jisu ni bibi vua na dina kei na lewadodonu.

SEGA NI VAKATAKILAI KOYA ME TISAIPELI

E kaya na Joni 19:38 ni o Josefa e “tisaipeli tale ga i Jisu, ia ena nona rerevaki ira na Jiu e sega kina ni dau vakatakilai koya.” Na cava e rerevaka? E kila nira cati Jisu na Jiu, ra qai saga mera vakatalai mai valenilotu o ira na vakabauti koya. (Joni 7:45-49; 9:22) Ke dua e caka vua qori, ena vosataki, vakanadakui, ra qai sega ni kauaitaki koya na Jiu. E rere gona o Josefa me tukuna e matanalevu ni vakabauti Jisu, ni na vakaleqa na nona itutu kei na kena irogorogo.

E sega ni sotava duadua o Josefa na leqa qo. E kaya na Joni 12:42, “Era mani vakabauti koya e levu na nodra iliuliu. Ia era sega ga ni tukuni koya ena vukudra na Farisi de ra vakatalai mai na nodra valenilotu.” E dua tale ga na lewe ni Sanadrini e yaco vua qori, o Nikotimo.—Joni 3:1-10; 7:50-52.

O Josefa e dua na tisaipeli, ia e sega ni vinakata me kilai. E dua na leqa levu qori nida vakasamataka na ka e tukuna o Jisu: “O koya e dau tukuni au vei ira na tamata, au na tukuni koya tale ga vei Tamaqu mai lomalagi. Ia o koya e cakitaki au vei ira na tamata, au na cakitaki koya tale ga vei Tamaqu mai lomalagi.” (Maciu 10:32, 33) E kilai Jisu o Josefa, a sega ga ni doudou ni tukuna ni kilai koya. Vakacava o iko?

E volatukutukutaki ga me baleti Josefa ni sega ni tokona nodra via nakicataki Jisu na lewe ni Sanadrini. (Luke 23:51) De dua era kaya eso ni a sega ni tiko ena gauna e lewai kina o Jisu. Se mani cava e yaco, a rarawataka sara ga o Josefa na kena vakatanitaki na lewa, e sega ni tarova rawa!

 VUKI NA UTO

Ni sa mate o Jisu, sa oti tale ga na rere nei Josefa, e vakatulewataka sara me tokoni ira na imuri i Jisu. E laurai na vakatulewa qori ena Marika 15:43: “E doudou me kerea na yago i Jisu vei Pailato.”

Kena irairai ni a tiko o Josefa ena gauna e mate kina o Jisu. E kila tale ga e liu vei Pailato. Ni kerea gona na yagona, e “via kila mada o Pailato se sa mate o Jisu se sega.” (Mari. 15:44) Ni vakadinadinataka o Josefa na rarawa i Jisu ena kau, vakacava e uqeti nona lewaeloma me tokona na ka dina? Io e uqeti koya sara ga qori. Sa sega tale ni tisaipeli vuni.

BULUTI JISU O JOSEFA

E vakaroti ena nodra lawa na Jiu mera bulu na totogi mate ni se bera ni dromu na siga. (Vkru. 21:22, 23) Ia e kena ivalavala vei ira na kai Roma mera vakaliligi tu ga ena kaunirarawa na daubasulawa me yacova nira vuca, se mera biu ena ibulubulu ni lewenivanua. Ia e sega ni vakasamataka tiko qori o Josefa me baleti Jisu. E taya e dua na qara vatu volekata ga na vanua e lili tu kina o Jisu. Ni se sega ni vakayagataki vakadua na ibulubulu qo, e dusia ni se qai toki vou ga i Jerusalemi o Josefa mai Arimacea. * E namaki tale ga ni na vakayagataka na vanua qori mera dau bulu kina nona vuvale. (Luke 23:53;  Joni 19:41) Nona buluti Jisu ena vanua qori e ivakaraitaki ni veinanumi, me vakayacori kina na parofisai ni na bulu na Mesaia “kei ira na vutuniyau.”—Aisea 53:5, 8, 9.

O vakabibitaka na nomu veiwekani kei Jiova se dua tale na ka?

E tukuni ena va na Kosipeli, ni ologi na yago i Jisu ena lineni vinaka qai vakadavori ena nona ibulubulu ni kau sobu mai na kaunirarawa. (Maciu 27:59-61; Mari. 15:46, 47; Luke 23:53, 55; Joni 19:38-40) O Nikotimo duadua ga e cavuti ni vukei Josefa, ni kauta yani na waiwai boivinaka. Ni rau vakaitutu ruarua, era vukei rau eso ena kau ni yago i Jisu. E vakabauti ni rau vakayagataki ira na dauveiqaravi ena kena laveti qai bulu na yago i Jisu. Se mani cava a caka e sega ni cakacaka lailai, ni o koya e tara na yagonimate ena sega ni savasava o koya kei na ka kece e tara me vitu na siga. (Tiko 19:11; Akeai 2:13) Era na lai tiko ga vakatikitiki ena dua na vanua ra qai sega ni vakaitavi ena macawa ni Lakosivia, na kena vakatatabu kei na kena soqo. (Tiko 9:6) Era na rawa ni vakasewasewani Josefa na nona itokani ni tuvanaka me bulu o Jisu. Ia e bolea na veika kece qori ni via buluti Jisu vinaka, me vakatakilai koya tale ga ni nona tisaipeli.

IOTIOTI NI GAUNA E CAVUTI KINA

Ni bulu oti ga o Jisu e sega tale ni qai cavuti na yaca i Josefa mai Arimacea ena Kosipeli, vure kina na taro qo: Na cava e qai yacovi koya? Eda sega sara ga ni kila. Ia mai na veika eda sa veivosakitaka oti, a rairai vakatakilai koya e matanalevu ni lotu vaKarisito. Ena gauna tale ga e vakatovolei se yacovi koya kina na ka rarawa sa qai qaqaco ga na nona vakabauta, e doudou tale ga vakalevu. Dua dina na ivakaraitaki vinaka.

E laurai ena itukutuku qo e dua na vakasama meda nanuma dei: E dodonu ga me bibi na noda veiwekani kei Jiova, sega ni noda itutu, cakacaka, veika eda taukena, veimositi vakaveiwekani, se na noda galala.

^ para. 18 E rairai kilai o Arimacea ni tauni o Rama, kilai na gauna qo me o Rentis (Rantis). Qo na vanua e susu kina na parofita o Samuela, e rauta ni 35 na kilomita ena vuaira kei Jerusalemi.—1 Sam. 1:19, 20.