Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

Rau kele toka qo na painia o George Rollston kei Arthur Willis me tawa na wai ni motoka.—Donuya na yabaki 1933 ena Northern Territory

 VANUA E MAROROI KINA NA KEDA ITUKUTUKU MAKAWA

“Sega ni Dua na ka e Dredre”

“Sega ni Dua na ka e Dredre”

ENA ika26 ni Maji, 1937, rau draiva lesu tiko i Serene, e Ositerelia e rua na turaga. Dua na ka nodrau wawale, qai vavaku na kuvu ni soso ena nodrau lori. Rau a biubiu ena dua na yabaki yani e liu me rau gole ina levu na vanua yawa qai sukusukura, sivia na 19,300 na kilomita. Rau sega ni dau sikovanua se rau vaqara rogo tiko se iyau. Ia rau painia gugumatua, rau qai saga me vunautaki na itukutuku vinaka ni Matanitu ni Kalou ina lomanivanua e Ositerelia. Qo o Arthur Willis kei Bill Newlands.

Ni voleka na icavacava ni veiyabaki ni 1920, e dua na iwiliwili lailai ni Gonevuli ni iVolatabu * era vunau vakalevu ena koro volekata na veitaoni kei na baravi. Ia e levu era veituyaki ena lomanivanua, na levu tale ga ni vanua dravuisiga e sivia na veimama ni vanua o Merika. Era kila vinaka tu na tacida qo ni dodonu mera vunautaki Jisu na nona imuri ina “veivanua yawa sara kei vuravura” okati kina na lomanivanua e Ositerelia. (Caka. 1:8) Ia ena rawati vakacava na cakacaka vakaitamera qo? Era vakabauta dei ni na vakalougatataka o Jiova nodra sasaga, ra via solia gona nodra vinaka kece.

ERA TEKIVUTAKA NA PAINIA

Ena 1929, era bulia ra qai vakarautaka vinaka ena ivavakoso e Kuinisiladi vaka kina ena Ra kei Ositerelia e vica vata na lori me vakayagataki ena lomanivanua. Era vakayagataka ga na lori qori na painia momoqaqa era rawa ni draivataka ena gaunisala sukusukura, era rawa tale ga ni ripeataka ke dua na ka e leqa kina. Levu sara na vanua a sega ni dau tarai tu e liu era lakova na painia qo.

O ira na painia era sega ni vakalori, era vodo basikeli ga nira gole yani ena lomanivanua. Kena ivakaraitaki ena 1932, a gole o Bennett Brickell, e yabaki 23 mai Rockhampton, e Kuinisiladi, me lai vunau me lima na vula ena vualiku ni lomanivanua mai kea. E vakabibitaka na nona iusana ni basikeli, na itutuvi, isulu, kakana kei na ibinibini ivola. Ni vakarabaraba nona taya ni basikeli, ena saga me toso tiko ga ni nuitaka na veidusimaki i Jiova. E dau biliga nona basikeli ni sa vo ga e 320 na kilomita, donuya na vanua era dau cibati ira  kina e levu ena vuku ni karamaca. Na 30 tale na yabaki e tarava, e lakova e vica vata na drau na udolu na maile o Brother Brickell ena nona basikeli, motopai kei na motoka. E tekivu vunau vei ira na itaukei kei Ositerelia, tauyavutaka tale ga eso na ivavakoso, e mani kilai levu qai dokai ena veivanua qori.

VOSOTI TIKO GA NI ITUVAKI DREDRE

Era le lailai na tiko e Ositerelia, vakauasivi na lomanivanua, nira veituyaki kina na lewenivanua. Ia era gumatua na tamata i Jiova mera vakasaqarai ira.

E laurai sara ga qori vei Stuart Keltie kei William Torrington. Rau takosova na Simpson Desert ena 1933, qo e dua na vanua nuku dravuisiga ena taoni o Alice Springs, e toka ena lomadonu ni vanua. E yava kau o Brother Keltie, ia ni ca nona motoka, e vodo kameli me tomana tiko ga nona cakacaka vakavunau! E vuavuaivinaka na nodrau sasaga na painia qo ni rau qai sotava e dua na itaukei ni otela e William Creek, na vanua e dau kele kina na sitimanivanua. E taleitaka na ka dina na itaukei ni otela qori, o Charles Bernhard, mani volitaka nona otela qai painia duadua tu me 15 na yabaki ena so na vanua dravuisiga ena lomanivanua kei Ositerelia.

Vakarau biubiu tiko o Arthur Willis ena dua na ilakolako ni cakacaka vakavunau ena lomanivanua mai Perth, ena Ra kei Ositerelia, donuya na yabaki 1936.

E vinakati mera yaloqaqa ra qai tudei na painia taumada, mera vosota kina e levu na ituvaki dredre. Rau a vunau tiko ena dua na lomanivanua e Ositerelia o Arthur Willis kei Bill Newlands, rau a vakamacalataki taumada. Ena bisa ni uca e luvu qai lolobo na vanua dravuisiga qori, e rua na macawa nodrau vosota tiko me rau lakova e 32 na kilomita. So na gauna rau dau buno, rau qai oca ena todra ni siga ni rau biliga tiko nodrau lori ena vanua nuku dravuisiga qai veivatuvatu, rau takosotaka tale ga na uciwai. Levu na gauna e dau ca nodrau lori. Ke yaco qori, rau na taubale se vodo basikeli me vica na siga ina taoni voleka duadua. Rau na lai waraka tu e kea na kena yaco yani na iyaya me vakavinakataki kina na lori. E levu na ituvaki dredre va qori rau sotava ia e donu tiko ga nodrau rai. E cavuta tale o Arthur Willis e dua na ka a volai ena mekesini na Golden Age: “Sega ni dua na ka e dredre vei ira na ivakadinadina.”

E vakamacalataka e dua sa painia dede tu, o Charles Harris ni vakavolekati koya vei Jiova nona sa lai tu duadua voli kei na ituvaki dredre ni bula ena lomanivanua. E tomana: “Ena rawarawa ga na bula ke sega ni levu noda iusana. E yalorawarawa o Jisu me moce tu ga e tautuba ena cila ni kalokalo, meda yalorawarawa tale ga ke vinakati meda cakava qori ena noda ilesilesi.” Qori sara ga na ka era cakava e levu na painia. Eda vakavinavinakataka na nodra gumatua tiko ga, e tukuni rawa kina na itukutuku vinaka ena veiyasa i vuravura, mera vukei kina e levu mera tutaka na Matanitu ni Kalou.

^ para. 4 Ra vakayagataka na Gonevuli ni iVolatabu na yaca iVakadinadina i Jiova ena 1931.Aisea 43:10.