Raica sara na lewena

Raica na lewenivola

Taro na Dauwiliwili

Taro na Dauwiliwili

E vola na yapositolo o Paula ni o Jiova ena “sega ni vakalaiva moni sotava na ka ni veivakatovolei oni na sega ni taqea rawa.” (1 Kor. 10:13) Kena ibalebale qo ni o Jiova sa dikeva rawa tu na ituvaki eda rawa ni vosota, qai digia na ituvaki meda vakatovolei kina?

Raica mada na ka e rawa ni yaco ena rai va qori. E taroga e dua na turaga e vakamatei koya ga na luvena tagane: ‘Vakacava, sa kila rawa tu o Jiova ni keirau na rawa ni vosota vakaveiwatini nona vakamatei koya ga na luvei keirau? Se a yaco na ka qori baleta ni sa kila rawa tu o Jiova ni keirau na rawa ni vosota?’ E tiko na vuna vinaka meda vakabauta kina ni o Jiova e dau veisautaka na veika e yaco ena noda bula ena sala eda sega ni bau kila?

Kena dikevi tale na vosa i Paula ena 1 Korinica 10:13 eda kila kina qo: E sega na yavu vakaivolatabu me vakabauti kina ni o Jiova sa dikeva rawa tu na ituvaki eda rawa ni vosota, qai digia o koya meda vakatovolei kina. Meda dikeva mada qo e va na sala e donu kina qori.

Kena imatai o Jiova e solia vei keda na galala ni vakatulewa. E vinakata meda vakatulewataka ga na bula meda muria. (Vkru. 30:19, 20; Josua 24:15) Ke da digidigi donu, eda rawa ni nuitaki Jiova me dusimaka noda ilakolako. (Vkai. 16:9) Ia ke da digidigi cala eda na tamusuka ga na vuana. (Kala. 6:7) Ke digia o Jiova na veika dredre meda sotava, vakacava ena sega ni vakamaumautaka kina na isolisoli ni galala ni vakatulewa?

Kena ikarua, e sega ni taqomaki keda o Jiova mai na “gauna kei na ka e sega ni namaki.” (Dauv. 9:11) Dau yaco eso na vakacalaka lelevu e dau tini ca sara, baleta nida rairai tu ena vanua kei na gauna eda sega ni namaka me yaco kina. A tukuna o Jisu e dua na vakacalaka era mate kina e le 18 ni baleti ira na valececere, qai vakamacalataka ni sega ni inaki ni Kalou qori. (Luke 13:1-5) Cava gona o nanuma, e ka vakayalomatua meda tinimaka ni sa vakatulewataka rawa tu na Kalou o koya me mate ena dua na ituvaki?

Kena ikatolu, eda okati kece ena ile e vauca na yalodina. Nanuma tiko ni a vakalewa o Setani na nodra yalodina o ira kece na qaravi Jiova, e kaya nida na sega ni yalodina vei Jiova ke da vakatovolei. (Jope 1:9-11; 2:4; Vkta. 12:10) Ke tarova o Jiova na noda sotava na veika dredre ni kila nida na sega ni  taqea rawa, sa na qai dina ga na vakalelewa i Setani nida qarava tiko na Kalou meda rawaka ga kina.

Kena ikava, e sega ni vinakati sara me kila kece na Kalou na veika matailalai e yaco vei keda. Na vakasama ni sa digitaka rawa tu na Kalou na veivakatovolei eda na sotava, e rawa ni tukuni kina ni kila vinaka tu o koya na noda veigauna se bera mai. E sega ga ni vakaivolatabu na vakasama qori. Io e rawa ni kila na Kalou na noda veigauna se bera mai. (Aisea 46:10) Ia e kaya na iVolatabu ni dau digia o koya na veika me kila me baleta na veigauna se bera mai. (Vkte. 18:20, 21; 22:12) E veiraurautaka na kaukaua e tu vua me kila kina na veika se bera ni yaco, e doka tale ga noda dodonu ni vakatulewa. Qori ga na ka e dodonu meda namaka vua na Kalou e mareqeta na noda galala, e veiraurau tale ga nona dau vakaraitaka na nona itovo talei.Vkru. 32:4; 2 Kor. 3:17.

Meda kila gona vakacava na ibalebale ni vosa qo i Paula: “Na Kalou . . . [e]na sega ni vakalaiva moni sotava na ka ni veivakatovolei oni na sega ni taqea rawa”? E vakamacalataka tiko e ke o Paula na ka e cakava o Jiova ena gauna eda vakatovolei kina, sega ni se bera qori. * E vakadeitaka vei keda na yapositolo o Paula se mani dredre vakacava na noda vakatovolei, ke da nuitaki Jiova ena vakaukauataki keda o koya. (Same 55:22) Na vosa veivakauqeti qo e yavutaki ena rua na ivakavuvuli dina e bibi.

Kena imatai, eda dau sotava na veivakatovolei e sega ni “duatani mai na kena era dau sotava na kena vo.” E sega gona ni ka vou na veika dredre e dau yaco. Eda rawa ni taqea na veivakatovolei—ke da nuitaka na Kalou. (1 Pita 5:8, 9) Ena ikotokoto gona ni 1 Korinica 10:13, e vakaibalebaletaka tiko o Paula ina veika dredre era sotava na Isireli ena vanua talasiga. (1 Kor. 10:6-11) E sega gona ni dua na ituvaki dredre qori mera sega ni taqea rawa na Isireli se me dredre vei ira. Ia e kaya vaka va o Paula “eso vei ira” e talaidredre. Ka ni rarawa, eso na Isireli era sikalutu ena gagadre ca nira sega ni vakararavi vua na Kalou.

Kena ikarua, e ‘Kalou yalodina.’ E laurai ena itukutuku ni ka e cakava o Jiova vei ira na nona tamata ni dau vakaraitaka na dei ni nona loloma vei ira “era lomani koya ra qai muria na nona ivakaro.” (Vkru. 7:9) E laurai tale ga ni dau dina tu ga ina ka e yalataka. (Josua 23:14) Ena vuku ni nona dau dina, era rawa kina ni nuidei o ira na lomani koya ra qai dau talairawarawa vua ni na dina ena rua na ka e yalataka ni na cakava ena gauna era na vakatovolei kina: (1) Ena sega ni vakalaiva na veika dredre me sa lai dredre sara meda sega kina ni taqea rawa, kei na (2) “ena vakarautaka . . . na sala” meda vosota kina.

O Jiova “e vakacegui keda ena veika dredre kece”

E vakarautaka vakacava o Jiova na sala vei ira na vakararavi vua nira sotava na veika dredre? Ke nona inaki ena rawa sara ga ni vakaotia. Mo nanuma tiko ga na ka e tukuna o Paula: “Ena vakarautaka tale ga [o Jiova] na sala moni vosota rawa kina.” Levu na gauna e “vakarautaka na sala” ni vakarautaka na veika meda vosota rawa kina. Dikeva mada eso na sala e vakarautaka o Jiova:

  • E “vakacegui keda ena veika dredre kece.” (2 Kor. 1:3, 4) O Jiova e rawa ni vakaceguya noda vakasama, kei na lomada ena vuku ni nona Vosa, yalona tabu kei na kakana vakayalo e vakarautaka na dauveiqaravi yalodina.Maciu 24:45; Joni 14:16, vmr., Roma 15:4.

  • Ena dusimaki keda ena yalo tabu. (Joni 14:26) Ni yaco na veika dredre, ena vukei keda na yalo tabu meda nanuma eso na italanoa vakaivolatabu kei na kena ivakavuvuli, da qai vakatulewataka na sala vuku meda muria.

  • E rawa ni vakayagataki ira na agilosi ena vukuda.—Iper. 1:14.

  • E rawa ni vukei keda ena vukudra na tacida vakabauta vata nira “dau vakayaloqaqataki” keda ena nodra vosa kei na ka era cakava.Kolo. 4:11, vmr.

Na cava gona meda tinimaka ena ibalebale ni vosa i Paula e volai toka ena 1 Korinica 10:13? E sega ni digia se lewa o Jiova na veika dredre me yaco. Ia e dua na ka eda rawa ni vakadeitaka ke mani yaco vei keda: Ke da nuitaki Jiova vakatabakidua ena sega ni vakalaiva me sivita na noda kaukaua vakatamata meda sega kina ni vosota rawa, ena tiko ga na sala e vakarautaka meda vosota kina. Sa bau veivakacegui dina qori!

^ para. 2 Na vosa vaKirisi ni “veitemaki” e rairai kena ibalebale “veivakatovolei.”