Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

Na iSoro e “iSolisoli Uasivi” ni Kalou

Na iSoro e “iSolisoli Uasivi” ni Kalou

‘Na iloloma vinaka kece kei na isolisoli uasivi kece e vu mai vua na Tamada.’JEME. 1:17.

SERE: 20, 15

1. Na veivakalougatataki cava e rawati ena vuku ni isoro?

EDA vakalougatataki vakalevu ena vuku ni isoro ni veivoli i Jisu Karisito. Kena ivakaraitaki eda rawa ni lewena na vuvale ni Kalou ke da taleitaka na yalododonu. E rawa tale ga nida bula mamarau me tawamudu. Ia e tiko eso tale na ka e yaga kina na isoro i Karisito. Na nona yalorawarawa o Jisu me mate me tokona na yalododonu i Jiova e vakavotui kina na ka e bibi duadua e lomalagi kei na vuravura.Iper. 1:8, 9.

2. (a) Ena masu i Jisu, na cava e bibi duadua e lomalagi kei na vuravura? (Raica na imatai ni iyaloyalo.) (b) Na cava eda na vulica ena ulutaga qo?

2 Ni vo e rua na yabaki me mate o Jisu me vakarautaka na isoro ni veivoli, e vakavulici ratou nona tisaipeli me ratou masuta: “Tamai keimami mai lomalagi, me vakarokorokotaki na yacamuni. Me yaco mai na nomuni Matanitu. Me caka na lomamuni e vuravura me vaka e caka tiko mai lomalagi.” (Maciu 6:9, 10) Me rawa nida vakavinavinakataka vakalevu na  isoro, meda dikeva mada na sala e tokona kina na vakarokorokotaki ni yaca ni Kalou, na veiliutaki ni Matanitu ni Kalou kei na vakayacori ni nona inaki.

“ME VAKAROKOROKOTAKI NA YACAMUNI”

3. Na cava e vakavotui ena yaca i Jiova? E vakaucacataka vakacava o Setani na yaca tabu qori?

3 Na imatai ni ka e cavuta o Jisu ena nona masu me vakarokorokotaki na yaca ni Kalou. Na yaca i Jiova e vakavotuya vinaka na nona cecere, lagilagi kei na savasava. Ena dua tale na nona masu, e cavuta vei Jiova o Jisu me “Tamaqu yalosavasava.” (Joni 17:11) Ni savasava o Jiova, na ivakavuvuli kei na lawa kece e vakarautaka e ka savasava se ka tabu. Ia e sega ni kauaitaka qori o Setani, e qaseqase ni taroga na dodonu e tu vua na Kalou me lewa na ivakatagedegede me muria na tamata. E lasutaka o Setani na ka me baleti Jiova, e vakaucacataka na yaca tabu ni Kalou.Vkte. 3:1-5.

4. E vakaitavi vakacava o Jisu ena rokovi ni yaca ni Kalou?

4 Ia e duidui o Jisu, e lomana dina na yaca i Jiova. (Joni 17:25, 26) E vakaitavi mada ga ena rokovi ni yaca ni Kalou. (Wilika Same 40:8-10.) Ni uasivi nona bula e vuravura, e vakadinadinataka o Jisu ni ka vakayalomatua qai dodonu ga me lewa o Jiova na ivakatagedegede mera muria nona ibulibuli vuku. A vakavuna o Setani me mate vakararawa o Jisu, ia e yalodina tiko ga vua na Tamana vakalomalagi. Ni yalodina o Jisu, e vakadeitaka kina ni rawa vua na tamata uasivi me talairawarawa ina ivakatagedegede savasava ni Kalou.

5. Eda na vakaitavi vakacava ena rokovi ni yaca ni Kalou?

5 Eda na vakaraitaka vakacava nida lomana na yaca i Jiova? Ena noda itovo. E vinakata o Jiova meda savasava. (Wilika 1 Pita 1:15, 16.) Kena ibalebale eda na sokalou duadua ga vei Jiova, eda na talairawarawa vua mai vu ni lomada. Ke da mani vakararawataki, eda na saga ena noda vinaka taucoko meda muria na ivakavuvuli dodonu kei na lawa ni Kalou. Ni dodonu na noda ivalavala, eda sa vakacila rarama tiko, ena vakalagilagi tale ga kina na yaca i Jiova. (Maciu 5:14-16) Nida savasava, ena kilai mai na noda ivakarau ni bula ni vinaka na lawa i Jiova, ni lasu na veibeitaki i Setani. Ke da mani cala nida sega ni uasivi, eda na veivutuni dina qai biuta na ivalavala e beci kina o Jiova.Same 79:9.

6. Eda sega ni uasivi, ia rawa vakacava ni okati keda o Jiova meda yalododonu?

6 Ena vuku ni isoro i Karisito, o Jiova ena vosota na nodra cala o ira na vakaraitaka nodra vakabauta. Ena okati ira na yalayala vua mera lewe ni nona vuvale. E okati ira na lotu vaKarisito lumuti mera yalododonu nira luvena, na “so tale na sipi” era yalododonu mera nona itokani. (Joni 10:16; Roma 5:1, 2; Jeme. 2:21-25) Ena gauna mada ga qo, ena vuku ni isoro e rawa kina meda yalododonu vua na Tamada, meda vakaitavi tale ga ena vakarokorokotaki ni yacana.

“ME YACO MAI NA NOMUNI MATANITU”

7. Ena vuku ni isoro, na veivakalougatataki cava ni Matanitu ni Kalou eda na marautaka?

7 Ena masu e vakavulica o Jisu, e kerei Tamana: “Me yaco mai na nomuni Matanitu.” E sema vakacava na isoro ina Matanitu ni Kalou? Ena vuku ni isoro, e  rawa kina nira kumuni na 144,000 mera veiliutaki vakatui, mera bete tale ga kei Karisito e lomalagi. (Vkta. 5:9, 10; 14:1) O Jisu kei ira na itokani lumuti era veiliutaki ena Matanitu ni Kalou, era na raica me yaga vei keda na talairawarawa na isoro ena loma ni duanaudolu na yabaki. Ena veisau na vuravura me parataisi, eda na uasivi na tamata yalodina kece, sa na taucoko noda duavata na vuvale ni Kalou e vuravura kei lomalagi. (Vkta. 5:13; 20:6) Ena qaqia na ulu ni gata o Jisu, ena bokoca laivi e vuravura kei lomalagi na revurevu kece ni veivorati i Setani.Vkte. 3:15.

8. (a) E vukei ratou vakacava nona tisaipeli o Jisu me ratou raica vakabibi na Matanitu ni Kalou? (b) Eda tokona vakacava na Matanitu ni Kalou nikua?

8 Ni tiko e vuravura o Jisu, e vukei ratou nona tisaipeli me ratou raica vakabibi na Matanitu ni Kalou. Ni papitaiso oti ga, e kacivaka sara o Jisu “na itukutuku vinaka ni Matanitu ni Kalou” ena veivanua kece. (Luke 4:43) Ena iotioti ni nona vosa vei ratou nona tisaipeli ni bera ni gole i lomalagi, e vakasalataki ratou me ratou tukuni koya ena “veivanua yawa sara kei vuravura.” (Caka. 1:6-8) Ena cakacaka gona vakavunau, levu mai na veiyasa i vuravura e rawa nira mai kila na isoro, me liutaki ira tale ga na Matanitu ni Kalou. Nikua, eda tokona na Matanitu ni Kalou nida vukei ira na taci Karisito nida vakayacora na noda itavi meda vunautaka na itukutuku vinaka ni Matanitu e vuravura.Maciu 24:14; 25:40.

“ME CAKA NA LOMAMUNI”

9. Na cava eda nuidei kina ni na vakayacora o Jiova nona inaki me baleti keda?

9 Na cava e vakaibalebaletaka o Jisu ni cavuta: “Me caka na lomamuni”? E Dauveibuli o Jiova. Ni yalataka e dua na ka, e vaka ga sa vakayacora oti. (Aisea 55:11) Ena sega ni vakatara na veivorati i Setani me vakaseva na nona inaki vei keda. Ena ivakatekivu, a inaki i Jiova mera tawana na vuravura na luvei Atama kei Ivi era uasivi. (Vkte. 1:28) Ke rau sega ni vakaluveni o Atama kei Ivi, ena sega ni yaco na inaki taumada ni Kalou me baleta na vuravura. Ni rau valavala ca oti, e vakatara o Jiova me rau vakaluveni. Ena vuku ni isoro, e rawa kina vua na Kalou me solia vei ira na vakabauta na bula uasivi, kei na bula tawamudu ena parataisi e vuravura. E lomani keda o Jiova, e nona inaki tale ga mera bula na talairawarawa me salavata kei na ka e vinakata.

10. E yaga vakacava na isoro vei ira na sa takali?

10 Ia vakacava o ira na lewe bilioni era sega ni bau kilai Jiova se qaravi koya era sa takali? E rawa na veivakaturi ena vuku ni isoro. Ena vakaturi ira na tamada vakalomalagi dauloloma, mera vulica na nona inaki mera bula tawamudu. (Caka. 24:15) E vinakata o Jiova meda bula, meda kua ni mate. Ni vurevure ni bula na Kalou, ena qai Tamadra o ira kece na vakaturi. (Same 36:9) Sa rauta me vakavulici keda o Jisu meda masuta: “Tamai keimami mai lomalagi.” (Maciu 6:9) O Jiova e lesia vei Jisu na itavi dokai me vakaturi ira na mate. (Joni 6:40, 44) Ena Parataisi, ena vakayacora o Jisu nona itavi me “veivakaturi” qai ‘veivakabulai.’Joni 11:25.

11. Na cava na inaki ni Kalou vei ira na “isoqosoqo levu”?

11 Na lomasavu i Jiova e sega ni yalani ga vei ira na le vica, ni tukuna o Jisu: “O  koya ga e cakava na loma ni Kalou e taciqu, e ganequ, e tinaqu.” (Mari. 3:35) E inaki ni Kalou mera lewena nona vuvale na “isoqosoqo levu” e sega ni wiliki rawa mai na veimatanitu, veiyavusa kei na duivosavosa. O ira na vakabauta na isoro i Karisito ra qai cakava na loma ni Kalou, era na kailavaka tale ga: “E vakabulai keimami na neimami Kalou e dabe tiko ena idabedabe vakaturaga, na Lami tale ga.”Vkta. 7:9, 10.

12. E vakavotui vakacava ena masu e vakavulica o Jisu na inaki i Jiova vei keda na talairawarawa?

12 E macala mai na masu e vakavulica o Jisu na inaki ni Kalou vei keda. Me salavata kei na masu qori, eda na saga ena noda vinaka kece meda vakarokorokotaka na yaca i Jiova, se raica me ka tabu. (Aisea 8:13) Na yaca mada ga i Jisu e vakaibalebaletaka “Veivakabulai o Jiova.” Na noda vakabulai tale ga ena vuku ni isoro, ena vakarokorokotaki qai vakalagilagi kina na yaca i Jiova. Ena vakavotui ena Matanitu ni Kalou na yaga ni isoro vei ira na talairawarawa. Io, na masu e vakavulica o Jisu e vakadeitaka ni sega ni dua ena vakaseva na inaki ni Kalou.Same 135:6; Aisea 46:9, 10.

VAKAVINAVINAKATAKA NA ISORO

13. Na cava e dusia nida papitaiso?

13 Dua na sala eda na vakavinavinakataka kina na isoro, oya meda ciqoma na veisureti meda lewe ni vuvale i Jiova. Qori ena noda yalataki keda vua nida vakabauta na isoro, da qai papitaiso. Noda papitaiso e dusia nida “nei Jiova.” (Roma 14:8) E vakatayaloyalotaka noda kerea vua na Kalou na lewaeloma e savasava. (1 Pita 3:21) Ena rogoca noda kerekere o Jiova ni vakayagataka na dra ni isoro i Karisito me veivakasavasavataki.  Eda nuidei ni na solia o Jiova na ka kece e yalataka vei keda.Roma 8:32.

Eda na vakaraitaka vakacava nida vakavinavinakataka na isoro? (Raica na parakaravu 13, 14)

14. Na cava eda vakaroti kina meda lomani ira na kainoda?

14 Na cava e dua tale na sala eda vakavinavinakataka kina na isoro? Na ka kece e cakava o Jiova e yavutaki ena loloma. E nona inaki gona mera vakaraitaka vakalevu na nona lewenivuvale na loloma. (1 Joni 4:8-11) Nida lomani ira na kainoda, eda sa vakaraitaka tiko nida vinakata meda ‘luvei Tamada e tiko mai lomalagi.’ (Maciu 5:43-48) Na ivunau meda lomani ira na kainoda, e tarava ga na ivunau levu duadua meda lomani Jiova. (Maciu 22:37-40) Dua na sala eda lomani ira kina na kainoda, oya noda talairawarawa ina ivunau meda vunautaka na itukutuku vinaka ni Matanitu ni Kalou. Nida dauloloma, eda sa vakavotuya tiko na lagilagi ni Kalou. E ‘taucoko sara na noda vakaraitaka’ na loloma ni Kalou nida talairawarawa ina ivunau meda dauveilomani, vakabibi vei ira na tacida.1 Joni 4:12, 20.

NA ISORO E BALETA NA “GAUNA NI VEIVAKABULABULATAKI” I JIOVA

15. (a) E vakalougatataki keda vakacava o Jiova? (b) Na veivakalougatataki cava eda vakanamata kina?

15 Sa rawa nida vosoti vakadua ke da vakaraitaka nida vakabauta na isoro. E vakadeitaka na Vosa ni Kalou ni rawa ni “bokoci” noda ivalavala ca. (Wilika Cakacaka 3:19-21.) Eda sa dikeva mai ni susugi ira na lumuti o Jiova mera luvena ena vuku ni isoro. (Roma 8:15-17) Me baleti keda na “so tale na sipi,” e vaka ga e vakalewena o Jiova na ivola ni veisusu qai biuta kina na yacada. Gauna eda sa uasivi kina, da qai bula sivita na iotioti ni veivakatovolei, ena vaka ga e sainitaka na fomu qori me okati keda meda luvena lomani e vuravura. (Roma 8:20, 21; Vkta. 20:7-9) E tawamudu nona lomani keda o Jiova nida ka talei vua. E tawamudu na yaga ni isoro. (Iper. 9:12) Ena sega vakadua ni seavu na yaga ni iloloma qori. Ena sega tale ga ni dua me kauta laivi vei keda.

16. E sereki keda vakacava na isoro?

16 E sega ni dua na ka e rawa ni cakava na Tevoro me tarovi ira na veivutuni dina era via lewena na vuvale i Jiova. E gole mai vuravura o Jisu me mate ‘ga vakadua’ ena vukuda. Sa sega tale kina nida dinau tiko. (Iper. 9:24-26) E bokoca sara ga vakadua na itotogi e vakadewa mai o Atama. Eda vakavinavinaka ena vuku ni isoro i Karisito, eda sa sereki mai na veivakabobulataki ni vuravura i Setani, eda sega tale ga ni rerevaka na mate.Iper. 2:14, 15.

17. E vakaibalebale vakacava vei iko na loloma i Jiova?

17 E nuitaki vakaoti na yalayala ni Kalou. Me vaka ga na dei ni nona lawa me baleta nona ibulibuli, ena dina tale ga vei keda. E sega vakadua ni veisau. (Mala. 3:6) E solia o Jiova na isolisoli ni bula, e lomani keda tale ga. “Keitou sa mai kila, keitou vakabauta tale ga na nona lomani keitou na Kalou.” (1 Joni 4:16) Ena marautaki ni sa parataisi na vuravura taucoko, era na vakavotuya kece na loloma ni Kalou o ira na bula kina. Meda duavata mada ga kei ira na kabula vakayalo mai lomalagi ena noda kaya: “Me vakacaucautaki mada ga me tawamudu na noda Kalou, me vakalagilagi, me vakarokorokotaki, me vakavinavinakataki, ni o koya ga e vuku, e kaukaua, e qaqa. Emeni.”Vkta. 7:12.