Raica sara na lewena

Raica na lewenivola

O Via Kila na ka Dina?

O Via Kila na ka Dina?

Na noda kila na ka dina ena vakatau kina na bula kei na mate. Kena ivakaraitaki, ni o vakasamataka noda bula, o na sauma vakacava na taro qo: E dewa vakacava na tauvimate?

A sega tu ni kilai na isaunitaro qori ena vica na udolu na yabaki sa sivi, e laurai tale ga nira mate e le vica vata na milioni ni takavi ira na matedewa. Ia toso na gauna era qai kila na saenitisi na kena isau. Era dikeva nira vakadewa tiko na tauvimate na manumanu somidi me vaka na germs, bacteria se virus. Era marautaka na itukutuku qori e vica vata na bilioni nira sa kila na sala mera taqomaki ira kina, bula balavu, ra bulabula tale ga.

Vakacava qori ga na taro e vinakati me saumi? Cava nomu rai me baleta na kilai ni ka dina? Vakasamataka mada e vica na taro qo:

  • O cei na Kalou?

  • O cei o Jisu Karisito?

  • Na cava na Matanitu ni Kalou?

  • Ena vakacava na bula ena veigauna se bera mai?

E le vica vata na milioni era sa kila na isaunitaro qori, ra saga tale ga me vinaka nodra ivakatagedegede ni bula. Ena rawa ni yaga tale ga vei iko.

 O RAWA NI KILA NA KA DINA

O na rairai vaqaqa, ‘Ena kilai vakacava na ka dina me baleta e dua na ka?’ Na cava sa qai dredre tiko ga kina me kilai na ka dina me baleta e levu na ka?

Levu era sega ni nuitaka na matanitu, veika vakabisinisi se tabana ni itukutuku mera kila na ka dina. E dredre kina mera vakaduiduitaka rawa na itukutuku e dina, e vakatikina, lasutaki kei na kena e biu vaqaseqase me nanumi tu ni dina. Ni va qori na ituvaki, sa dau veiletitaki gona na itukutuku dina, se na kena yaga ena nodra bula.

E ka ni sasaga toka, ia se rawa tiko ga ni saumi eso na taro bibi eda dau via kila. Ena sala cava? Muria ga na iwalewale o cakava e veisiga mo kila kina na isau ni nomu vakatataro.

SAGA MO KILA NA KA DINA

De dua e nomu ivakarau mo kila na ka dina me baleta e dua na ka. Vakasamataki Jessica mada, e kaya: “E dau lako vakaca vei luvequ na pinati, ke dua mada ga na pinati lailai e kania e rawa sara ga ni vakaleqai koya.” E kauaitaka vakabibi o Jessica na kakana e volia vei luvena. E tomana: “Ni bera niu volia e dua na kakana, au na wilika e liu na ivakamacala e kabi toka ena kena pakete kei na so tale na kena itukutuku. Au na taro tale ga ina kabani e bulia, meu rawa ni vakadeitaka ni na sega ni lako vakaca vei luvequ. Au nuidei tale ga nira kaya eso ni kabani vinaka, e caka tale ga vakavinaka na kakana ratou bulia.”

Na nomu via kila na ka dina ena rairai sega ni vaka sara na ka e cakava o Jessica. Ia o rawa ni vuli ena nona ivakaraitaki mo rawa ni kila eso na isaunitaro o vaqaqa tu:

  • Kila na itukutuku dina kece.

  • Vaqaqa e levu tale na kena itukutuku.

  • Vakadeitaka me nuitaki na yavu ni nomu itukutuku.

Ena rawa ni saumi kina e levu na taro bibi o dau vaqaqa. Ena sala cava?

 IVOLA VAKASAKITI NI KA DINA

Na iwalewale e cakava o Jessica me dikeva kina na kakana e lako vakaca vei luvena, e vakayagataka tale ga qori me kila na ka dina vakaivolatabu. E kaya, “Au dau wilika vinaka na iVolatabu, vakadidike tale ga vakatitobu meu kila kina na ka dina.” Me vakataki Jessica, e vica vata tale na milioni era vulica ena iVolatabu na isaunitaro qo:

  • Eda mai bula tu vakacava e ke?

  • Cava e yaco nida mate?

  • Cava eda rarawa tiko kina?

  • Cava ena cakava na Kalou me vakaotia kina na rarawa kece?

  • Ena bula marau vakacava noda vuvale?

O rawa ni kila na isau dina ni vica na taro qori kei na so tale ni o wilika na iVolatabu, vakadidike tale ga ena internet ena www.jw.org.