Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

Vakacava a basika na Mesaia ena iyatukawa i Jekope ni soli vua na dodonu vakaulumatua i Iso?

Taro na Dauwiliwili

Taro na Dauwiliwili

Vakacava, e basika na Mesaia ena iyatukawa ni ulumatua e Isireli makawa?

Qori na ka eda dau kaya ena so na gauna. E via tautauvata kei na ka e kaya na Iperiu 12:16. E tukuni kina ni “beca na veika tabu” o Iso ni “solia vei Jekope na nona dodonu vakaulumatua” me isosomi ni dua na veleti kakana. Ena rairai tukuni gona ni gauna e rawata kina o Jekope na “dodonu vakaulumatua,” e basika na Mesaia ena nona iyatukawa.—Maciu 1:2, 16; Luke 3:23, 34.

Ia ni dikevi na itukutuku vakaivolatabu e laurai ni sega ni vinakati me ulumatua sara e dua me qai basika ena nona iyatukawa na Mesaia. Vakasamataka mada eso na ivakadinadina qo:

O ira na luvei Jekope (Isireli), nona ulumatua vei Lia o Rupeni. Oti qori e vakaluveni tale vei Raijeli na watina e dau lomana, nona ulumatua kina o Josefa. Ni veibutakoci gona o Rupeni e dewa kina na dodonu vakaulumatua vei Josefa. (Vkte. 29:31-35; 30:22-25; 35:22-26; 49:22-26; 1 Vei. 5:1, 2) Ia a sega tiko ga ni basika na Mesaia ena iyatukawa i Rupeni se o Josefa. E basika ga ena iyatukawa i Juta, na  ikava ni luvei Jekope vei Lia.—Vkte. 49:10.

E vakamacalataki ena Luke 3:32 e le va tale e basika na Mesaia ena nodratou iyatukawa. Kena irairai ni ratou ulumatua kece. O Poasa e tama i Opeti, e luvena o Jese.—Ruci 4:17, 20-22; 1 Vei. 2:10-12.

Ia o Tevita e sega ni ulumatua nei Jese. E itini sara vei ratou na le walu na luvena tagane. E qai basika na Mesaia ena iyatukawa i Tevita. (1 Sam. 16:10, 11; 17:12; Maciu 1:5, 6) E tarava yani o Solomoni, ia e sega ni ulumatua i Tevita.—2 Sam. 3:2-5.

E sega ni kena ibalebale qo mera beci kina na ulumatua. E dau bibi na itavi era lesi kina, nira veisosomitaki sara ga mera ulunivuvale. Ena vakaruataki tale ga vei ira na iwasewase ni ka kece me nodra.—Vkte. 43:33; Vkru. 21:17; Josua 17:1.

Ena rawa ni soli tale vua e dua na dodonu vakaulumatua. E sega ni vakadonui Isimeli o Eparama, mani soli na dodonu vakaulumatua vei Aisake. (Vkte. 21:14-21; 22:2) Me vaka sa tukuni oti, ni a soli vei Josefa na dodonu vakaulumatua, sega ni o Rupeni.

Meda raica tale mada na Iperiu 12:16, e tukuni kina: “Me kua tale ga ni dua vei kemuni e dau veiyacovi tawadodonu, se beca na veika tabu me vakataki Iso ni a solia na nona dodonu vakaulumatua me isosomi ni dua na veleti kakana.” Na cava e vakabibitaki tiko eke?

E sega ni vakamacalataka tiko e keri na yapositolo o Paula na nona kawa na Mesaia. E uqeti ira tiko ga na lotu vaKarisito mera ‘vakadodonutaka na sala e muria na yavadra.’ Me kua kina ni ‘bureitaki vei ira na loloma soli wale ni Kalou,’ e rawa sara ga ni yaco ke ra veiyacovi tawadodonu. (Iper. 12:12-16) Era na vakataki Iso ke ra cakava qori. E “beca na veika tabu,” e rawai ena ka ca.

A bula tiko o Iso ena nodra gauna na peteriaki, rairai vakaitavi tale ga ena so na gauna ena vakacaboisoro. (Vkte. 8:20, 21; 12:7, 8; Jope 1:4, 5) Ia ni tiko vua na rai vakayago, e vakawalena na itavi dokai kece qori me veisautaka kei na dua na veileti kakana. A rairai sega ni vinakata me tau vua na itotogi e parofisaitaki vei ira na kawa i Eparama. (Vkte. 15:13) E vakaraitaka tale ga o Iso nona beca se sega ni taleitaka na veika tabu, ni vakawatitaka e rua na yalewa lotu butobuto, rau rarawa kina vakalevu na nona itubutubu. (Vkte. 26:34, 35) E duidui sara vei Jekope, ni vakawatitaka ga e dua e qarava na Kalou dina!—Vkte. 28:6, 7; 29:10-12, 18.

Na cava gona eda rawa ni kaya me baleta na iyatukawa e basika kina na Mesaia o Jisu? So na gauna ena donui koya e ulumatua, so tale na gauna ena sega. Era kila qori na Jiu, era ciqoma tale ga ena gauna era vakatusa kina ni basika o Karisito ena iyatukawa i Tevita, e gone duadua vei ira na luvei Jese.—Maciu 22:42.