Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

Ra iTabagone​—“Ni Sasagataka Tiko ga na Nomuni Bula”

Ra iTabagone​—“Ni Sasagataka Tiko ga na Nomuni Bula”

“Me vaka e dau nomuni ivakarau moni talairawarawa, . . . ni sasagataka tiko ga na nomuni bula ena rere kei na sautaninini.”—FPAI. 2:12.

SERE: 133, 135

1. Na cava e ikalawa bibi kina na papitaiso? (Raica na imatai ni iyaloyalo.)

E VICA vata na udolu na vuli iVolatabu era papitaiso e veiyabaki. Levu era itabagone, eso era gone sara, era susu tale ga ena dina. Vakacava o dua vei ira? Ke vaka kina, mo vakavinavinakataki. Ni dodonu mera papitaiso kece na lotu vaKarisito, e ikalawa bibi tale ga me rawati kina na bula.—Maciu 28:19, 20; 1 Pita 3:21.

2. Na cava mo kua kina ni rerevaka na yalayala?

2 Levu na sala o na vakalougatataki kina ni o sa papitaiso, ia e salavata mai kei na itavi. Ena sala cava? Ena siga o papitaiso kina, o vakaio ena taro qo, “Ena yavu ni isoro i Jisu Karisito, o sa veivutunitaka nomu ivalavala ca, o yalataka tale ga vei Jiova mo cakava na lomana?” Nomu papitaiso e vakaraitaka ni o sa yalayala. O yalataka vei Jiova ni o na lomani koya, o na vakaliuca na lomana qai muri na ka kece. Qori na yalayala bibi. Vakacava e dodonu mo veivutunitaka?  Sega, me kua ni cala nomu rai. Nomu vakatautaka nomu bula vei Jiova, e vakatulewa vinaka duadua. Ia ke dua e sega ni qaravi Jiova, sa na vakarurugi ena veiliutaki i Setani. E sega ni taleitaka na Tevoro mo rawata na bula. Ena marautaka mo to vua ena saqati ni veiliutaki cecere i Jiova, mo kua ni rawata na bula tawamudu.

3. E yaga vakacava na nomu yalayala vei Jiova?

3 Vakasamataka mada na veivakalougatataki ni nomu yalayala kei na papitaiso. Ni o solia nomu bula vei Jiova, o na nuidei vakalevu mo kaya: “E tu e yasaqu o Jiova, au na sega ni rere. Cava ena cakava rawa vei au na tamata?” (Same 118:6) E sega tale ni dua na ka dokai me tautauvata kei na nomu to ena yasa ni Kalou, me vakadonui iko tale ga.

NOMU ITAVI

4, 5. (a) Na cava me qarava duadua kina o koya e yalayala na itavi ena salavata mai? (b) Na ituvaki dredre cava era sega ni sotava duadua na itabagone?

4 Ni o sa papitaiso, na nomu veiwekani kei Jiova e sega ni ka ni vuvale, se me ratou okati kina na lewe ni vuvale. Sa na vakatau sara ga vei iko nomu vakabulai, ke o se tiko mada ga kei rau nomu itubutubu. Na cava e bibi kina mo nanuma qori? Ni o sega ni kila na ituvaki dredre o na sotava ena veigauna se bera mai. Kena ivakaraitaki, o na rairai papitaiso ni o se gone, ia gauna o sa itabagone kina, ena vou vei iko eso na ituvaki se veivakatovolei. E kaya e dua na goneyalewa itabagone: “Ke dua na gone e vakuai koya ena keke ni siganisucu e koronivuli, ena sega ni rarawataka ni iVakadinadina i Jiova. Ia ni oti e vica na yabaki ni sa kaukaua na gagadre ni veiyacovi, ena vinakati me vakadeitaka ni vakatulewa vinaka duadua na kena muri na lawa i Jiova.”

5 Eda dau sotava kece na ituvaki ena rairai vou vei keda. O ira mada ga era papitaiso nira sa uabula, e levu na veivakatovolei tawanamaki era na rairai sotava ena nodra bula vakawati, cakacaka se nira tautauvimate. Koya gona se mani vakacava na yabaki ni noda bula, eda na sotava kece na ituvaki ena vinakati kina meda yalodina vei Jiova.—Jeme. 1:12-14.

6. (a) Na cava o sega ni rawa ni veisautaka kina na nomu yalayala vei Jiova? (b) Cava eda vulica ena Filipai 4:11-13?

6 Me rawa ni o yalodina ena duidui ituvaki, nanuma tiko ni o na sega ni rawa ni veisautaka na ka o yalataka vei Jiova. O yalataka vua na Turaga Cecere ena lomalagi kei na vuravura ni o na qaravi koya tiko ga ke ra sega ni cakava qori nomu itokani kei na nomu itubutubu. (Same 27:10) Ena ituvaki kece o sotava, o rawa ni kerea na veivuke i Jiova mo dina tiko ga ena nomu yalayala.—Wilika Filipai 4:11-13.

7. Na cava e kena ibalebale mo sasagataka na nomu vakabulai ena “rere kei na sautaninini”?

7 E vinakata o Jiova mo nona itokani. Me dei nomudrau veitokani, mo rawata tale ga na bula, ena vinakati na sasaga. E tukuni ena Filipai 2:12: “Ni sasagataka tiko ga na nomuni bula ena rere kei na sautaninini.” Macala eke ni vinakati mo vakasamataka na ka mo cakava me dei kina nomu veitokani kei Jiova, kei na nomu yalodina tiko ga vua ena ituvaki dredre. Mo kua ni nuitaki iko vakasivia. Era tawayalodina mada ga eso era qaravi Jiova tu vakadede. Koya gona, na cava o na cakava mo vakabulai kina?

 BIBI NA VULI IVOLATABU

8. Na cava e okati ena vuli vakataki iko, na cava e bibi kina?

8 E vinakati na vakarorogo kei na veivosaki nida veitokani kei Jiova. Na noda vulica vakataki keda na iVolatabu e sala bibi meda rogoci Jiova kina. E okati kina noda wilika na Vosa ni Kalou kei na ivola vakaivolatabu qai vakasamataka vakatitobu. Nanuma tiko, qo e sega ni tautauvata kei na vuli e koronivuli. O sega ni wiligusutaka na itukutuku mo rawata kina na veitarogi. Me yaga na vuli, mo raica me vaka tiko na vakadidike, mo dikeva se vulica kina eso na ka vou ena itovo i Jiova. Ena uqeti iko mo toro volekata na Kalou, ena qai toro volekati iko.—Jeme. 4:8.

E dei tiko nomudrau veitokani kei Jiova? (Raica na parakaravu 8-11)

9. Na ivukevuke cava e yaga ena nomu vuli?

9 E vakarautaka na isoqosoqo i Jiova e levu na ivukevuke me yaga kina nomu vuli. Kena ivakaraitaki e yaga vakalevu na “Lesoni ni Vuli iVolatabu” ena nomuni iwasewase na “iTabagone” ena jw.org, ni o na vulica kina na tikina yaga ena itukutuku vakaivolatabu. E tiko tale ga kina na idusidusi ni vuli, “Na Cava Mada e Kaya na iVolatabu?” ni na uqeti iko mo vakadeitaka na ka o vakabauta. Ena uqeti iko tale ga ena ka mo cakava mo wasea kina nomu vakabauta. Eso tale na vakatutu e tiko ena ulutaga “Ra Taroga na iTabagone . . . Rawa Niu Marautaka Vakacava na Wili iVolatabu?” ena Yadra! ni Epereli 2009. E bibi dina na vuli kei na vakasama vakatitobu ena nomu vakabulai.—Wilika Same 119:105.

BIBI NA MASU

10. Na cava e bibi kina na masu vei ira na lotu vaKarisito papitaiso?

10 Eda vakarorogo vei Jiova nida vuli vakataki keda, ia nida masu eda vosa vua. Meda kua gona ni raica na masu me ivakarau tu ga ni ka e caka; se dua na ‘kaukaua vuni’ ena yaga ena nomu sasaga. Nida masu eda veivosaki sara tiko ga kei na Dauveibuli. E via rogoci iko sara ga o Jiova. (Wilika Filipai 4:6.) Ke o lomaocaoca, e veiuqeti na iVolatabu mo “biuta vei Jiova na nomu icolacola bibi.” (Same 55:22) Vakacava  o vakabauta qori? Era na vakadeitaka vei iko na vica na milioni na tacimu vakayalo na yaga ni nodra cakava qori. Ena yaga tale ga vei iko!

11. Na cava mo vakavinavinaka kina vei Jiova e veigauna?

11 Ena sega ni uqeti iko wale ga na masu mo kere veivuke vei Jiova. E kaya na iVolatabu: “Me laurai na nomuni vakavinavinaka.” (Kolo. 3:15) Ena so na gauna, eda rawa ni kauaitaka vakalevu noda leqa, eda guilecava na levu ni ka eda vakalougatataki kina. Mo vakasamataka e veisiga e tolu na ka o vakalougatataki kina. Oti mo masu sara vei Jiova mo vakavinavinakataka. E kaya e dua na yalewa itabagone o Abigail, e papitaiso ni sa yabaki 12: “Au vakabauta ni o Jiova duadua ga e dodonu me vakavinavinakataki ena lomalagi kei na vuravura. Meda vakavinavinakataki koya ena veigauna ena veika e solia. Au sega ni guilecava rawa e dua na ivosavosa: Ke da yadra nimataka da qai raica ni tiko ga vei keda na ka vata ga eda vakavinavinakataka nikua, ena sega sara ga ni dua na kena yaga.” *

YAGA NI VEIKA EDA SOTAVA

12, 13. Na cava e bibi kina mo vakasamataka na yaga ni nomu tovolea na vinaka i Jiova?

12 Levu na veivakatovolei mosimosi e sotava o Tui Tevita qai vukei kina. E lagata: “Tovolea mada qai raica ni vinaka o Jiova, e marau na tamata e vakaruru vua.” (Same 34:8) E vakabibitaki eke na yaga ni ka eda dau sotava. Ni o wilika na iVolatabu, noda ivola, se lako ina soqoni, o na rogoca na kedra italanoa eso era yalodina tiko ga ena veivuke ni Kalou. Ni o toso tiko vakayalo, ena vinakati mo vakadinata sara ga na veivuke i Jiova ena nomu bula. Sala cava o tovolea kina na vinaka i Jiova?

13 E tiko e dua na sala eda tovolea kece kina na lotu vaKarisito na vinaka i Jiova. Qori noda sureti meda toro voleka vua na Kalou kei na Luvena. E kaya o Jisu: “Ena sega ni lako mai vei au e dua ke sega ni vagolei koya mai o Tamaqu e talai au mai.” (Joni 6:44) Vakacava o vakabauta na vosa qori? Ena rairai vakasamataka e dua na itabagone, ‘O Jiova e vagolei rau mai noqu itubutubu, au vakamumuri tu ga.’ Ni o sa yalataki iko vei Jiova qai papitaiso, o vakaraitaka ni o sa mai kilai Jiova, o volekati koya tale ga. Kena ibalebale, sa kilai iko o koya. E vakadeitaka na iVolatabu: “Ke dua e lomana na Kalou, e kilai koya na Kalou.” (1 Kor. 8:3) Mo mareqeta gona e veigauna qai doka nomu itavi ena isoqosoqo i Jiova.

14, 15. Ena vaqaqacotaka vakacava nomu vakabauta na cakacaka vakaitalatala?

14 Dua tale na sala o tovolea kina na vinaka i Jiova, oya nona tokoni iko ni o wasea nomu vakabauta e matanalevu se koronivuli. Eso e dredre mera vunau vei ira nodra icaba e koronivuli. O na rairai kila na vuna e dredre kina. Ni o sega ni kila na ka era na tukuna. Ia ena dredre sara mo vosa ina dua na ilawalawa ni vakatauvatani kei na nomu vosa vua e dua ga drau vuli vata. Na cava o rawa ni cakava?

15 Kena imatai, vakasamataka na vuna o vakadeitaka kina ni dina na ka o vakabauta. Vakacava e tabaki ena nomu  vosa na idusidusi ni vuli ena jw.org? Ke o sega ni vakadeitaka, vakacava mo raica mada. E vakarautaki qori me uqeti iko mo vakasamataka na ka o vakabauta, na vuna o vakabauta kina, kei na sala mo wasea kina. Ni o sa vakadeitaka ni dina na ka o vakabauta, o vakavakarau vinaka tale ga, o na uqeti mo tukuna yani na yaca i Jiova.—Jere. 20:8, 9.

16. Na cava o rawa ni cakava ni o madua ni wasea nomu vakabauta?

16 Ke o mani vakavakarau vinaka, o na rairai madua tiko ga ni wasea nomu vakabauta. E kaya e dua na tacida yalewa yabaki 18, e papitaiso ni se yabaki 13, “Au kila na ka au vakabauta, ia e dredre ena so na gauna meu vakamacalataka.” Na cava sa qai cakava? E kaya: “Au cakava me vaka ga na veitalanoa. Ratou sega ni madua na lewe ni noqu kalasi na talanoataka na ka eratou dau cakava. Meu kua tale ga ni madua. Koya gona ni keitou veitalanoa au na tukuna ga va qo, ‘Au veivakavulici tiko ena iVolatabu ena siga ya, au qai . . . ’ Oti au na tomana tale noqu italanoa. Ena rairai sega ni sema ena iVolatabu, ia levu na gauna era dau via kila sara ga na noqu veivakavulici ena iVolatabu. Eso tale na gauna era taro. Na levu ga ni noqu vakayagataka na iwalewale qori, na kena rawarawa vei au. Au dau marautaka!”

17. Na rai donu cava ena uqeti iko mo vunau?

17 Ni o veidokai qai veikauaitaki, ena rawarawa nira rogoci iko. E kaya o Olivia e yabaki 17, e papitaiso ni se gone: “Au dau rere meu vakamacalataka na iVolatabu, nira na nanuma niu viavia lotu.” Sa qai veisautaka nona rai. E sega ni via lomaleqa vakalevu, e vakasamataka ga: “Levu na itabagone era sega ni kilai keda na iVakadinadina i Jiova. Neitou itavi sara ga me keitou vunau vei ira. Na neitou ivalavala ena rawa ni uqeti ira mera vakarorogo se sega. Vakacava ke keitou madua, rere, dredre ni tukuna na neitou vakabauta, se taqaya? Era na rairai nanuma ni keitou sega ni sakitaka na ka keitou kilai kina. De ra sega kina ni vakarorogo. Ia ke keitou vosa ena doudou qai matata vinaka, me vaka ga e dau caka ena veivosaki, ena rawarawa sara nira veidokai.”

SASAGA TIKO GA MO VAKABULAI

18. Na cava e okati ena nomu sasaga tiko ga mo vakabulai?

18 Me vaka ga eda veivosakitaka mai, e itavi bibi na nomu sasaga mo vakabulai. E okati kina nomu wilika na Vosa ni Kalou, vakasamataka vakatitobu, masulaka vei Jiova, kei na nomu vakasamataka na sala e vakalougatataki iko kina. Qori ena vakanuideitaki iko ni ka dokai duadua mo drau veitokani. Ena uqeti iko tale ga mo wasea na nomu vakabauta.—Wilika Same 73:28.

19. E yaga vakacava na nomu sasaga mo vakabulai?

19 E kaya o Jisu: “Ke dua e via muri au, me kua tale ni muria na lomana, me colata ga na nona kaunirarawa qai muri au tiko ga.” (Maciu 16:24) Kena ibalebale na veivakatisaipelitaki, wili kina na yalayala kei na papitaiso e noda itavi kece na lotu vaKarisito. E rawa kina nida vakalougatataki vakalevu nikua, meda rawata tale ga na bula tawamudu ena vuravura vou. Io, e tiko na vuna vinaka mo sasaga tiko ga kina mo vakabulai!

^ para. 11 Eso tale na vakatutu e tiko ena jw.org ena ulutaga “Ra Taroga na iTabagone—Why Should I Pray?” kei na ka me vakaleweni.