Raica sara na lewena

Raica na lewenivola

 ITALANOA NI NONA BULA

Ka Kece ga Vei Ira na Tamata Kece Ga

Ka Kece ga Vei Ira na Tamata Kece Ga

“Ke o papitaiso, au na biuti iko!” Qori na vosa e vakarerei Na kina o Ta ena 1941. E sega ni kauaitaka o Na na vosa qori, e toso tiko ga qai papitaiso me vakaraitaka nona yalayala vei Jiova. Mani biubiu dina o Ta me vaka a yalataka. Au se qai yabaki walu kina.

NI BERA qori au sa tekivu taleitaka na ka dina vakaivolatabu. Sa dau tiko vei Na eso na ivola vakaivolatabu, au dau taleitaka na vakawilika, vakauasivi na vosa vakatautauvata. Sega ni taleitaka o Ta me tukuna vei au o Na na veika sa vulica tiko. Ia dua na ka na noqu dau via kila, levu tale ga noqu taro, mani vakavulici au gona o Na ni sega ni tiko e vale o Ta. Toso na gauna au sa vakatulewataka meu yalataka noqu bula vei Jiova. Au papitaiso kina ena 1943 e Blackpool, mai Igiladi niu se qai yabaki tini.

TEKIVU NOQU QARAVI JIOVA

Me tekivu mai na gauna qori, keirau dau vakaitavi wasoma kei Na ena cakacaka vakavunau. Dau vakayagataki na qaramavoni me tekivutaki kina na ivakamacala vakaivolatabu. E ka levu qai toka na kena bi ena 4.5 na kilokaramu. Vakasamataka mada ga niu se gonelailai au sa colata tu na misini qori!

Au via painia sara ga niu sa yabaki 14. Kaya o Na me keirau veitalanoa mada kei na servant to the brethren (kilai ena gauna qo me ivakatawa ni tabacakacaka). E vakatututaka meu  bau kila toka e dua na taba ni cakacaka me vukei au ena noqu cakacaka vakapainia. Au mani cakava sara qori. Ni oti e rua na yabaki noqu cakacaka, au taroga tale e dua na ivakatawa ni tabacakacaka me baleta na veiqaravi vakapainia. E kaya, “Io, o rawa ni vakaitavi kina!”

Ena Epereli gona ni yabaki 1949, keirau veisoliyaka na iyaya era tu ena vale keirau a rede tiko kina, keirau qai toki i Middleton, volekati Manchester me keirau tekivu painia. Ni oti e va na vula, au digitaka e dua na tacida tagane me keirau painia vata. E tukuni mai na valenivolavola ni tabana me keirau toki ina dua na ivavakoso vou e Irlam. Sa qai painia o Na kei na dua na tacida yalewa ena dua tale na ivavakoso.

Au se qai yabaki 17, ia keirau sa vakacolati kei na tacida keirau painia vata me keirau veivakavulici ena soqoni, ni le lailai ga na tacida tagane era yacova na ivakatagedegede ni veiqaravi ena ivavakoso qori. Oti au sureti tale meu toki ina ivavakoso o Buxton, e vinakati kina na veivuke ni lailai ga na kena dautukutuku. Au vuli vakalevu ena noqu veiqaravi qori me vakarautaki au ena so tale na ilesilesi.

Keimami veisureti ina vunau e matanalevu ena 1953 mai Rochester, Niu Yoka

Ena 1951, au vakalewe fomu ni vuli ena Koronivuli o Kiliati. Ia ena Tiseba 1952, au kacivi meu curu ena mataivalu. Au vakasuka ena yavu niu via veiqaravi vakatabakidua, ia e sega ni via kila qori na mataveilewai, au mani  curu e valeniveivesu me ono na vula. Niu vesu tiko, au taura kina noqu ivola ni veisureti ina ika22 ni kalasi e Kiliati. Ena Julai ni 1953, au vodo ena waqa na Georgic meu soko i Niu Yoka.

Niu yaco ga yani au lai tiko sara ena soqo ni New World Society Assembly ena 1953. Oti au vodo sitimanivanua i South Lansing, Niu Yoka, na vanua e tiko kina na koronivuli. E sega ni levu na noqu ilavo niu se qai suka ga mai valeniveivesu. Niu tala mai na sitimanivanua, au na vodo tale ena dua na basi meu qai yaco i South Lansing, au mani kerea e 25 na sede me ikuri ni noqu ivodovodo vua e dua tale na pasidia.

VEIQARAVI E VANUATANI

E vakasakiti na vuli e Kiliati ni vakarautaki keda ena cakacaka vakaulotu meda “ka kece ga vei ira na tamata kece ga.” (1 Kor. 9:22) Keitou le tolu na lesi ina Yatu Filipaini—o yau, o Paul Bruun kei Raymond Leach. Vica vata na vula neitou waraka tiko na ivolatara ni curuvanua, oti keitou qai vodo waqa me 47 taucoko na siga ni keitou soko siviti Rotterdam, na Wasawasa na Mediterranean, na Suez Canal, na Indian Ocean, Malaysia, kei Hong Kong! Keitou yaco yani e Manila ena ika19 ni Noveba, 1954.

Kei na noqu itokani vakaulotu o Raymond Leach, ni keirau vodo waqa tiko ena Yatu Filipaini me 47 na siga

E levu tale na neitou veikilai, me keitou vakamatauni keitou tale ga ena vanua vou, kei na vosa vou. Ia keitou lesi ina dua na ivavakoso ena siti o Quezon, era levu ga kina na vosa vakavalagi. Ni oti e ono na vula, keitou kila toka ga e vica na vosa vakaTagalog. E qai kilai vinaka qori ena neitou ilesilesi e tarava.

Dua na siga ena Me 1955 ni keitou lesu yani e vale ena cakacaka vakavunau, keirau raica kei Brother Leach e vica na ivola ena neirau rumu. Neirau ilesilesi vou me keirau veiqaravi vakaivakatawa ni tabacakacaka. Au se qai yabaki 22, ia e vukei au na ilesilesi qo meu rawa kina ni “ka kece ga vei ira na tamata kece ga” ena so na sala vovou.

Vunau e matanalevu ena vosa vakaBicol ena soqo ni tabacakacaka

Kena ivakaraitaki, na imatai ni gauna au vunau kina au vunau sara tu ga e matanalevu ena dua na mata ni sitoa. Au sa qai kila ni ivakarau ni bula ena Yatu Filipaini ena gauna oya me vakayacori sara ga na vunau e matanalevu! Niu sikovi ira na ivavakoso ena tabacakacaka, au dau vunau ena vale era osota na lewenivanua, ena makete, mata ni olo e vakayagataka na matanitu e veliutaki tiko, vanua ni qito basketball, basenikau, kei na salatu ena siti. Dua na gauna a dodonu meu vunau ena makete ni siti o San Pablo, mani daro ni tau bi na uca, au vakatututaka sara vei ratou na tacida tagane era lesi meu vunau ga ena Vale ni Soqoni. Me vaka ni sega ni caka e matanalevu, ratou mani nanuma kina ke rawa ni wili ga qori me soqoni e matanalevu!

Au dau vakaicili ga ena nodra vale na mataveitacini. Era sega ni vakavale lelevu sara, ia e dau savasava tu ga. Dau tevu ga na ibe ena dela ni fuloa meu moce kina. Ni dola tu ga na valenisili, au dau kauaitaka na noqu isulu me rakorako niu sisili tiko. Niu veitosoyaki, au dau vodoka e dua na lori e vakayagataki tale ga me basi, so tale na gauna au na vodo waqa ga niu veisiko tiko ena veiyanuyanu. Au sega ni vakamotoka na gauna kece au veiqaravi tiko kina.

E vukea sara ga noqu kila na vosa vakaTagalog na noqu cakacaka vakaitalatala kei na noqu veisiko ena veivavakoso. E sega ni dua e vakavulici au ena vosa qori, au dau tomitomi ga niu vakarogoci ira tiko na mataveitacini ena cakacaka vakavunau vaka kina na soqoni. Era via vakavulici au kina na mataveitacini, au taleitaka tale ga nodra dau yalovosovoso kei na nodra dau vosa vakadodonu.

Ni toso na gauna, au tu vakarau ni veisau ni so tale na itavi vou au lesi kina. Ni veisiko yani  o Brother Nathan Knorr ena 1956 au lesi meu qaravi ira na lewenivanua era na tiko ena soqo ni matanitu qori. Au sega ni kila na veika e vauca, ra mani vukei au kina eso tale. Ni oti ga e dua na yabaki a tuvanaki tale e dua na soqo ni matanitu, me veisiko yani kina o Brother Frederick Franz mai na valenivolavola liu ni tabana. Niu ovasia tiko ni soqo qori, au vulica nona dau yalorawarawa o Brother Franz ina nodra ivakarau ni bula na lewenivanua. Era marautaka gona na mataveitacini e kea nodra raici Brother Franz ni tokara sara tu ga na isulu ni vanua ya e vakatokai me barong Tagalog ena gauna e vunau kina.

E levu na veisau ena vinakati meu cakava na gauna au lesi kina meu ivakatawa ni tikina. Na gauna qori e dau vakaraitaki kina e matanalevu na iyaloyalo The Happiness of the New World Society. So na gauna dau votivoti nodra veivakasosani na manumanu lailai. Era taleitaka na cina ni misini ni iyaloyalo, ra qai dau kabi kina. Dua toka na cakacaka levu na kena samaki ni oti qori! Sega ni rawarawa na kena tuvanaki me saravi na iyaloyalo, ia e marautaki ga nodra tataleitaki na tamata nira sa mai kila na isoqosoqo i Jiova e vuravura raraba.

Ra yavala na bete ni lotu Katolika mera uqeti ira na vakailesilesi me kua ni soli na ivolatara ni noda soqo. So na gauna era dau veivakasosani nira qiria tiko na lali ni lotu ena  gauna sara ga e vunau tiko kina e dua volekata nodra valenilotu. Ia e toso tiko ga na cakacaka, levu tale ga mai na yasayasa qori era sa mai sokaloutaki Jiova.

ILESILESI E VINAKATI KINA E LEVU TALE NA VEISAU

Au taura e dua na ivola ena 1959 meu sa na lai veiqaravi kina ena valenivolavola ni tabana. Levu tale na ka me na vulici kina. Toso na gauna, au lesi meu sikova eso na iwasewase kei vuravura. Dua gona na noqu veisiko tiko qori keirau veikilai kina kei Janet Dumond, e daukaulotu tiko mai Thailand. Keirau dau veivolavolai, oti keirau sa qai vakamau. Keirau marautaka vakaveiwatini e 51 taucoko na yabaki ni veiqaravi.

Kei Janet ena dua na yanuyanu mai na Yatu Filipaini

Au marau tale ga niu sikova e 33 na duidui vanua meu lai raici ira kina na tacida. Au vakavinavinaka gona ni vukei au vakalevu na noqu itekitekivu ni ilesilesi me vakarautaki au kina ena so tale na itavi lelevu me vaka nodra qaravi na duidui tamata! E vakarabailevutaka na noqu rai na veisiko qori, vukei au tale ga meu raica na nona vakadonui ira na veimataqali tamata o Jiova ena vuku ni nona loloma.—Caka. 10:34, 35.

Keirau saga me keirau dau vakaitavi vakalevu ena cakacaka vakaitalatala

SE VEISAU TIKO GA

E marautaki dina na veiqaravi vei ira na mataveitacini ena Yatu Filipaini! E vakatinitaki na kedra iwiliwili na dautukutuku ni vakatauvatani kei na gauna au tekivu veiqaravi kina e kea. Keirau se veiqaravi tiko ga qo kei Janet ena valenivolavola ena Yatu Filipaini ena siti o Quezon. Sa oti qo e sivia na 60 na yabaki ni noqu veiqaravi tiko e vanua tani, ia au tu vakarau meu veisautaka na noqu bula me veiganiti kei na ka e vinakata o Jiova. Na veiveisau e se qai yaco tiko ga qo ena noda isoqosoqo ena vinakati kina meda yalorawarawa ena noda veiqaravi vua na Kalou kei ira na tacida.

Keirau dau marautaka na tubu ni keda iwiliwili

Keirau saga me keirau ciqoma na ka kece keirau kila ni salavata kei na inaki i Jiova, qo e bula vinaka duadua. Keirau saga tale ga me keirau cakava na veiveisau me keirau qaravi ira vinaka kina na mataveitacini. Io, keirau nakita dei, me salavata kei na inaki i Jiova, me keirau “ka kece ga vei ira na tamata kece ga.”

Keirau se veiqaravi tiko ga ena valenivolavola ni tabana ena siti o Quezon