Raica sara na lewena

Raica na lewenivola

Biuta Vei Jiova Nomu Lomaocaoca Kece

Biuta Vei Jiova Nomu Lomaocaoca Kece

“Biuta [vei Jiova] na nomuni lomaocaoca kece, ni kauaitaki kemuni o koya.”​—1 PITA 5:7.

SERE: 38, 7

1, 2. (a) Na cava meda kua kina ni kurabui nida lomaocaoca? (Raica na imatai ni iyaloyalo.) (b) Cava eda na dikeva ena ulutaga qo?

EDA bula tu qo ena gauna dredre. E cudru katakata o Setani na Tevoro ni ‘veilakoyaki voli me vaka na laione e tagi, e vakasaqara tiko e dua me tiloma.’ (1 Pita 5:8; Vkta. 12:17) E sega gona ni kurabuitaki nida dau lomaocaoca ena so na gauna na dauveiqaravi ni Kalou. O ira mada ga na dauveiqaravi ni Kalou ena gauna e liu era dau “nuiqawaqawa” ena so na gauna. (Same 13:2) Vakasamataka na nona dau “lomaleqataka na ivavakoso kece” na yapositolo o Paula. (2 Kor. 11:28) Cava eda rawa ni cakava nida lomaleqa se nuiqawaqawa?

2 Na Tamada vakalomalagi e vukei ira na nona dauveiqaravi ena gauna e liu, e rawa tale ga ni vakarautaka nikua na sala meda vakacegui kina mai na noda lomaleqa se nuiqawaqawa. E uqeti keda na iVolatabu: “Biuta vua na nomuni lomaocaoca kece, ni kauaitaki kemuni o koya.” (1 Pita 5:7) Eda na cakava vakacava qori? Meda dikeva mada qo e va na sala—masu mai vu ni lomada, wilika na Vosa ni Kalou da qai vakananuma vakatitobu, kerea na veivuke ni yalo tabu i Jiova, qai talaucaka na lomamu vua na nomu itokani o nuitaka. Nida sa dikeva na va  na sala qo, tovolea mo raica na ka o rawa ni vakavinakataka.

“BIUTA VEI JIOVA NA NOMU ICOLACOLA BIBI”

3. Ni o masu o na “biuta” vakacava “vei Jiova na nomu icolacola bibi”?

3 Na imatai sara ga ni ka meda cakava oya meda masu vei Jiova mai vu ni lomada. Ke dua na ituvaki e vakalomaocaocataki iko tiko, se o nuiqawaqawa kina, talaucaka na lomamu vua na Tamada vakalomalagi dauloloma. Na daunisame o Tevita e vakamasuti Jiova ni kaya: “Ni rogoca na noqu masu, kemuni na Kalou.” Ena same vata tiko ga qori e cavuta kina: “Biuta vei Jiova na nomu icolacola bibi.” (Same 55:1, 22) Ni o sa solia nomu vinaka kece ena kena wali e dua na leqa, ena vukei iko nomu masu mai vu ni lomamu mo kua ni lomaleqa tale tiko. Ena vukei keda ga vakacava na masu me kua ni curuoso noda vakasama se nuiqawaqawa vakalevu?—Same 94:18, 19, vmr.

4. Na cava e bibi kina na masu nida lomaocaoca?

4 Wilika Filipai 4:6, 7. E rawa ni rogoca o Jiova na noda gumatua kei na noda cikecike ena masu. Ena sala cava? Ena solia vei keda na lomavakacegu me kua kina ni curuoso tale tiko noda vakasama kei na lomada. Levu era sa vakadinadinataka na tikina qo ena ka sara ga era sotava. Era sa sega tale ni lomaocaoca, se vusolo tiko ga na lomadra, ni vukei ira na Kalou mera vakila na vakacegu kei na marau e sega ni solia rawa na tamata. Qori tale ga na ka o rawa ni vakila. “Na vakacegu ni Kalou” ena ulabaleta na ituvaki dredre e dau yaco vei keda. Eda rawa ni nuitaka vakaoti na nona vosa vakayalololoma o Jiova ni kaya: “Kua ni taqaya niu nomu Kalou. Au na vakaukauataki iko, io, au na vukei iko.”—Aisea 41:10.

VAKACEGU MAI NA VOSA NI KALOU

5. Ena vakacegui keda vakacava na Vosa ni Kalou?

5 Na ikarua ni sala meda vakila kina na vakacegu oya noda wilika eso na tikinivolatabu da qai vakananuma vakatitobu. Na cava e bibi kina qo? E tiko ena iVolatabu na idusidusi vakayalo e yaga meda kila kina na ka meda cakava meda vorata kina na lomaocaoca, se meda vakalailaitaka. Kua ni lecava ni yaga qai veivakacegui na Vosa ni Kalou ni tiko kina na nona vosa vuku na Dauveibuli. Ni o vakasamataka na nona rai na Kalou ena siga kei na bogi, qai dikeva na sala mo vakayagataka kina, ena vakaukauataki iko qori. E sema vata o Jiova na wiliki ni nona Vosa ina ‘yaloqaqa mo kaukaua’ kei na noda “kua ni domobula se rere.”—Josua 1:7-9.

6. Ena yaga vakacava vei iko na vosa i Jisu?

6 E laurai ena iVolatabu na nona vosa vakayalovinaka o Jisu. E vu ni vakacegu vei ira na rogoci koya na nona vosa kei na nona veivakavulici. Levu era torovi koya nira kila ni dau veivakacegui vei ira na vusolo na lomadra, na lomabibi, qai vakaukauataki ira na malumalumu. (Wilika Maciu 11:28-30.) E kauaitaka nodra bula vakayalo eso tale, na ivakarau ni lomadra kei na ka era gadreva vakayago. (Mari. 6:30-32) Se veivakacegui tiko ga ena gauna qo na nona vosa ni yalayala. Ena rawa ni dina qori vei iko me vaka ga na kena dina vei ira na yapositolo era dau salavata kei koya. Sega ni kena ibalebale qo mo tiko sara ga kei Jisu mo vakila kina na kena yaga. Me vaka ni Tui vakalomalagi, e se kauai tiko ga. Ni o lomaocaoca gona, e rawa vua me ‘vukei iko’ ena gauna sara ga o ‘gadreva kina.’ Io, e rawa ni vukei iko o Jisu mo vosota na nuiqawaqawa, mo yaloqaqa qai vakauqeti iko ena inuinui.—Iper. 2:17, 18; 4:16.

 UQETA NA YALO TABU NA ITOVO VAKALOU

7. Na cava ena cakava na Kalou ni o kerea na yalo tabu?

7 E yalataka o Jisu ni na solia na Tamada mai lomalagi na yalo tabu vei ira na kerea vua. (Luke 11:10-13) Lai basika kina na ikatolu ni sala e vakarautaki vei keda meda kua soti kina ni lomaocaoca—na vua ni yalo tabu. Na itovo vinaka kece e okati ena vua ni yalo tabu e dusia na nona itovo sara ga na Kalou kaukaua duadua. (Wilika Kalatia 5:22, 23; Kolo. 3:10) Ena vinaka na nomu veiwekani kei ira eso tale ni o bucina na itovo e okati ena vua ni yalo tabu. O na raica ni na sega ni basika e levu na ituvaki e vakavuna na lomaocaoca. Dikeva mada na sala ena uqeti iko kina na itovo e okati ena vua ni yalo tabu.

8-12. Ena vukei iko vakacava na itovo e okati ena vua ni yalo tabu mo kua kina ni lomaocaoca vakasivia?

8 “Na loloma, marau, vakacegu.” Ke o dau veidokai, ena rawarawa mo vakavinakataka na ivakarau ni lomamu. Ena sala cava? Kaya mada ni o vakaraitaka na loloma vakaveitacini, o dau veikauaitaki, qai veirokovi, o na sega ni vakila na ituvaki e vakavuna na nuiqawaqawa.—Roma 12:10.

9 Na “vosovoso, yalololoma, yalovinaka.” Eda na veimaliwai vinaka nida muria na ivakasala e tukuni kina: “Moni veilomani, ni veinanumi, ni yalorawarawa moni veivosoti.” (Efeso 4:32) Nida muria qori, eda na sega kina ni lai cakava na ka e vakavuna na lomaocaoca. Ena yaga tale ga qori ena so na ituvaki e vu mai na noda ivalavala ca.

10 Na “vakabauta.” Nikua eda dau lomaocaocataka na veika vakailavo kei na veika vakayago. (Vkai. 18:11) Ke kaukaua na noda vakabauta na yalololoma i Jiova, qori ena vukei keda meda vosota se meda kua ni lomaocaoca. E rawa vakacava qori? O na rawa ni vorata nomu lomaocaoca ni o muria na vosa uqeti ni yapositolo o Paula meda ‘lomavakacegu ga ena ka sa tiko vei keda.’ E kuria o Paula: “Ni a kaya [na Kalou]: ‘Au na sega sara ni laivi iko, au na sega tale ga ni biuti iko.’ O koya gona, meda yaloqaqa da qai kaya: ‘E dau vukei au o Jiova, au na sega ni rere. Cava ena cakava rawa vei au na tamata?’”—Iper. 13:5, 6.

11 Na ‘yalomalua, kei na lewai keda vinaka.’ Vakasamataka na yaga kei na sala e rawa kina ni muri na itovo e rua qori. O na cata kina mo cakava na ka e vakavu lomaocaoca vei iko, o na sega tale ga ni ‘yaloca, cudrucudru, yalokatakata, karakara, kei na vosavakacaca.’—Efeso 4:31.

12 E vinakati dina na yalomalumalumu, meda rawa ni vakamalumalumutaki keda “ena liga kaukaua ni Kalou” da qai ‘biuta vua na noda lomaocaoca kece.’ (1 Pita 5:6, 7) Ni o yalomalumalumu, o na rawata kina na nona veivakadonui na Kalou, ena tokoni iko tale ga. (Maika 6:8) Ni o kila vinaka na kemu ituvaki vakayago, na ivakarau ni nomu vakasama kei na lomamu, ena sega kina ni bikai iko na lomaocaoca, o na vakararavi tale ga vua na Kalou.

‘KUA VAKADUA NI LOMAOCAOCA’

13. Na cava e vakaibalebaletaka o Jisu ni tukuna: ‘Kua vakadua ni lomaocaoca’?

13 E vakabibitaka o Jisu ena Maciu 6:34 (wilika), meda ‘kua vakadua ni lomaocaoca.’ De rairai dredre me muri na ivakasala qori. Na cava e vakaibalebaletaka o Jisu ni tukuna: ‘Kua vakadua ni lomaocaoca’? Macala ga ni sega ni tukuna tiko nida na sega ni dau lomaocaoca na dauveiqaravi ni Kalou; eda sa  dikeva oti mai na nodrau vosa o Tevita kei Paula me baleta na tikina qo. E vukei ira tiko ga na nona tisaipeli o Jisu mera kila ni sega ni iwali ni leqa noda lai kauaitaka na ka e sega ni dodonu meda lomaocaocataka se meda lomaocaoca kina vakasivia. Na veisiga kece e tiko vata kei na kena leqa, meda kua ni lomaocaocataka nikua na veika sa yaco oti, kei na veika e se bera mai. O na vakacegui vakacava mai na lomaocaoca vakasivia ni o muria na ivakasala i Jisu?

14. Na cava o rawa ni cakava ke o lomaocaocataka na veigauna makawa?

14 De dua eso era dau lomaocaocataka na ka era cakava se lekata ena gauna makawa. De vakaleqai koya tiko na cala e cakava ena dua na gauna makawa sara. So na gauna e dau vakila o Tui Tevita ni nona ‘cala sa sivia na uluna.’ E tukuna vakadodonu: “Na yaluma ni lomaqu sa vakavuna me rogolevu noqu vutugu.” (Same 38:3, 4, 8, 18) Ena ituvaki va qo, na cava na ka vakavuku me cakava o Tevita? Na cava e qai cakava? E nuitaka na yalololoma kei na veivosoti i Jiova. E tukuna ena vakabauta: “E marau o koya sa vosoti na nona cala.”—Wilika Same 32:1-3, 5.

15. (a) Na cava mo kua kina ni lomaocaocataka na ka o sotava tiko? (b) O na vakalailaitaka vakacava na lomaocaoca? (Raica na kato “ Sala me Vakalailaitaki Kina na Lomaocaoca.”)

15 So tale na gauna o na lomaocaocataka na veika o sotava tiko. Kena ivakaraitaki, ni vola o Tevita na Same 55 a rivarivabitaka nona bula. (Same 55:2-5) A sega ga ni vakalaiva nona lomaocaoca me vakaleqa nona nuitaki Jiova. A talaucaka o Tevita nona leqa ena masu, e kila tale ga na sala yaga me vorata kina na lomaocaoca. (2 Sam. 15:30-34) Vuli vei Tevita. Me kua ni bikai iko na lomaocaoca, cakava na ka mo vosota kina, qai nuitaki Jiova ni o biuta vua nomu leqa.

16. Ena vakaukauataka vakacava nomu vakabauta na ibalebale ni yaca ni Kalou?

16 Levu na gauna e dau vakavu lomaocaoca na noda kauaitaka vakasivia na leqa e se bera ni yaco. Kua ni lomaocaocataka, se lomaleqataka na veika o sega sara ga ni kila kina e dua na ka. Na cava na vuna? Levu na gauna eso na ituvaki e sega ni ca sara me vaka na ka eda nanuma. E sega ni dua na ka e dredre vua na Kalou, o rawa ni biuta vua na nomu lomaocaoca kece. Na yacana sara mada ga e kena ibalebale “O Koya e Vakavuna me Yaco.” (Lako 3:14) Na titobu ni ibalebale ni yaca ni Kalou e vakadeitaka ni rawa vua me vakayacora na nona inaki ena vukudra na nona dauveiqaravi. Mo vakadeitaka ni rawa vei Jiova me vakaicovitaki ira na yalodina qai vukei ira ena ka era lomaocaocataka ena gauna makawa, nikua kei na gauna se bera mai.

VEIVOSAKI VINAKA

17, 18. Ena vukei iko vakacava na veivosaki vinaka mo vosota kina na lomaocaoca?

17 Na ikava ni sala ena vukei iko mo vosota na lomaocaoca oya na nomu  veivosaki vinaka kei na dua na nomu itokani nuitaki ni o talaucaka vua na lomamu. E rawa ni vukei iko na watimu, dua na itokani voleka se qase ni ivavakoso me donu tiko nomu rai me baleta na nomu lomaocaoca. “Na nuiqawaqawa ni loma ni tamata e lomabibi kina, ia na vosa vinaka ena vakamarautaka.” (Vkai. 12:25) Ena veivuke sara vakalevu na veivosaki vakadodonu kei na dau dina mo kila kina na ka mo cakava ni o lomaleqa. E tukuna vei keda na iVolatabu: “E seva na ka e nanumi ni sega na veivosaki, ia e vakavatukana na sasaga ni levu na daunivakasala.”—Vkai. 15:22.

18 E vukei keda tale ga o Jiova meda vosota na lomaocaoca ena noda soqoni e veimacawa. Qori na vanua eda maliwai ira kina na tacida era dau veikauaitaki, era veivakayaloqaqataki tale ga. (Iper. 10:24, 25) Na “veivakayaloqaqataki” ena vakavinakataka tale nomu veika vakayalo, ena rawarawa kina mo vosota na lomaocaoca.—Roma 1:12.

BIBI DUADUA NOMU VEIWEKANI KEI JIOVA

19. O kila vakacava ni bibi nomu veiwekani kei Jiova?

19 Raica mada qo na sala e vakila kina e dua na qase ni ivavakoso na yaga ni nona biuta vei Jiova na nona lomaocaoca. E osooso vakalevu ni qasenivuli qai dauniveivakasalataki, e dau lomaocaoca tale ga vakasivia. A vosota rawa vakacava na tacida qo? E vakamacalataka “Au raica ni bibi duadua ena noqu vosota na lomaocaoca, noqu sasaga me vinaka na neirau veiwekani kei Jiova. Na nodra veitokoni na itokani dina kei ira na taciqu vakayalo e yaga vakalevu ena gauna dredre. Au dau dina qai vakaraitaka vakadodonu vei watiqu na lomaqu. Era veivuke tale ga na itokani qase kei na ivakatawa ni itabacakacaka me donu tiko ga noqu rai. Au qara tale ga na veiqaravi vakavuniwai, cakava na veiveisau ena noqu vakayagataki gauna, me tiko tale ga na gauna ni vakacegu kei na vakaukauayago. Toso na gauna au sa qai kila na ka meu cakava. Keu sega ni cakava rawa kina e dua na ka, au na biuta ga vei Jiova.”

20. (a) Eda na biuta vakacava vei Jiova noda lomaocaoca? (b) Na cava eda na veivosakitaka ena ulutaga tarava?

20 Eda vulica ena ulutaga qo na yaga ni noda biuta vei Jiova na noda lomaocaoca nida masu mai vu ni lomada, wilika nona Vosa da qai vakananuma vakatitobu. Eda dikeva tale ga na yaga ni noda bucina na itovo e okati ena vua ni yalo tabu, noda talaucaka na lomada vua na noda itokani nuitaki, kei na noda vakayaloqaqataki ena noda veimaliwai vaKarisito. Ena veivosakitaki ena ulutaga tarava na sala e vakaukauataki keda kina o Jiova ni vakarautaka na inuinui meda vakaicovitaki kina.​—Iper. 11:6.