Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 ULUTAGA NI VULI 38

“Ni Lako Mai Vei Au, . . . Au na Vakacegui Kemuni”

“Ni Lako Mai Vei Au, . . . Au na Vakacegui Kemuni”

“Ni lako mai vei au o kemuni kece oni oca, oni bikai voli ena icolacola bibi, au na vakacegui kemuni.”—MACIU 11:28.

SERE 17 “Au Vinakata”

KA ENA VULICI *

1. Na cava e yalataka o Jisu ena Maciu 11:28-30?

ERA vakarogoci Jisu tiko e dua na ilala levu, e qai yalataka vei ira e dua na ka totoka. E kaya: “Ni lako mai vei au, . . . au na vakacegui kemuni.” (Wilika Maciu 11:28-30.) E dau vakayacora dina o Jisu na ka e yalataka. Kena ivakaraitaki, vakasamataka mada nona vakabula na marama e tauvi koya tu e dua na mate levu.

2. Na cava e cakava o Jisu vua na marama e tauvimate?

2 E vaqara bula sara tu ga na marama qori, ya na vuna e lai raica kina e levu na vuniwai, ni via bula. E 12 na yabaki nona rarawa tu, e sega ni dua e vakabulai koya. E tukuni ena Lawa e solia o Jiova vei Mosese ni dukadukali na marama qori. (Vunau 15:25) E rogoca sara ni rawa ni vakabulai ira na rarawa o Jisu mani lai vaqarai koya. Ni raici Jisu, e tara na tutu ni nona isulu e sau qai bula! Sega ni o koya ga qori, e vakila tale ga na marama ya ni lomani koya o Jisu, e dokai koya tale ga ena itautau ni nona vosa. Kena ivakaraitaki e kacivi koya: “Luvequ.” E macala ga ni vakacegui na marama qori, e vakayaloqaqataki tale ga!—Luke 8:43-48.

3. Na taro cava eda na sauma?

3 Na cava a cakava na marama qori? E sasaga me lako vei Jisu. E va tale ga qori nikua, e vinakati na sasaga meda “lako” vei Jisu. Ena sega ni vakabulai ira vakacakamana ena gauna qo na tauvimate era “lako” yani vua. Ia se sureti keda tiko ga: “Ni lako mai vei au, . . . au na vakacegui kemuni.” Eda na sauma ena ulutaga qo e lima na taro: Eda na “lako” vakacava vei Jisu? Na cava e vakaibalebaletaka o Jisu ni kaya: “Ni mai cola na noqu ivua? Na cava eda vulica vei Jisu? Na cava e veivakacegui kina na cakacaka e lesia vei keda? Eda na vakacegui tiko ga vakacava nida cola na nona ivua?

 “NI LAKO MAI VEI AU”

4-5. Na cava eso na sala eda “lako” kina vei Jisu?

4 Na cava eso na sala eda “lako” kina vei Jisu? Dua, oya meda vulica vagumatua na ka e tukuna kei na ka e cakava. (Luke 1:1-4) E sega tale ni dua ena cakava qori vei keda, o keda sara ga. E noda itavi meda vulica na ka e kaya na iVolatabu me baleti Jisu. Na ikarua ni sala eda “lako” kina vei Jisu, oya nida vakatulewataka meda papitaiso meda tisaipeli i Karisito.

5 Kena ikatolu, meda lai raici ira na qase ni ivavakoso mera vukei keda. E vakayagataki ira na “isolisoli tamata” qori o Jisu mera qarava na nona sipi. (Efeso 4:7, 8, 11; Joni 21:16; 1 Pita 5:1-3) Ke da vinakata na nodra veivuke, meda sasaga meda lai raici ira. Meda kua ni nanuma nira kila na qase ni ivavakoso na ka e tu ena noda vakasama kei na ka eda vinakata. Kena ivakaraitaki, dikeva mada na ka e tukuna e dua na tacida tagane o Julian: “Au cegu ena noqu veiqaravi e Peceli niu tauvimate, e qai vakasalataki au e dua noqu itokani meu kerea e dua na qase me vakayaloqaqataki au. Ena imatai ni gauna au rogoca kina qori, au nanuma ni sega ni ganiti au. Ia ena dua na gauna e muri, au qai kerea meu vakayaloqaqataki. Au raica qori me dua na iloloma talei.” Me vakataki rau na qase ni ivavakoso rau sikovi Julian, era na vukei keda tale ga na qase yalodina nikua me tiko vei keda na “rai i Karisito,” meda kila qai muria na ivakarau ni nona rai kei na itovo. (1 Kor. 2:16; 1 Pita 2:21) Na nodra veivuke va qori na qase e dua vei ira na iloloma vinaka e rawa nira solia vei keda.

“NI MAI COLA NA NOQU IVUA”

6. Na cava e vakaibalebaletaka o Jisu ni kaya: “Ni mai cola na noqu ivua”?

6 Ni kaya o Jisu: “Ni mai cola na noqu ivua,” na cava e vakaibalebaletaka? De dua e kaya tiko: “Vakamalumalumu ena noqu lewa,” se “Daru cola na noqu ivua, me daru cakava vata na loma i Jiova.” Se mani cava e vakaibalebaletaka na rua na yatuvosa qori, e dusia tiko ga ni vinakati na cakacaka.

7. Na itavi cava e lesi vei keda ena Maciu 28:18-20? Cava eda vakadeitaka?

7 Eda ciqoma na veisureti i Jisu nida yalataka noda bula vei Jiova qai papitaiso. E sureti keda kece o Jisu meda lako vua, ena tu vakarau me ciqomi ira na vinakata dina mera qarava na Kalou. (Joni 6:37, 38) E dua dina na itavi dokai meda cakava na cakacaka e lesi Jisu kina o Jiova. Eda vakadeitaka gona ni na tiko vata kei keda o Jisu me tokoni keda ena cakacaka qori.—Wilika Maciu 28:18-20.

“MONI VULI VEI AU”

Mo veivakacegui me vakataki Jisu (Raica na parakaravu 8-11) *

8-9. Na cava era dau volekati Jisu kina na yalomalumalumu? Cava meda taroga?

8 Era dau volekati Jisu na tamata yalomalumalumu. (Maciu 19:13, 14; Luke 7:37, 38) Na vuna? Meda dikeva mada na duidui ni nodra itovo na Farisi kei Jisu. Era dau dokadoka na iliuliu ni lotu qori qai sega ni dauloloma. (Maciu 12:9-14) Ia e dau yalomalumalumu o Jisu qai veikauaitaki. Era dau via rogo na Farisi qai dokadokataka na nodra itutu. Ia e cata o Jisu na mataqali rai va qori, e vakavulici ratou na nona tisaipeli me ratou dau yalomalumalumu qai qaravi ira eso tale. (Maciu 23:2, 6-11) Era dau rerevaki ira na Farisi na lewenivanua nira dau veivakasaurarataki. (Joni 9:13, 22) Ia e dau veivakacegui o Jisu ni dauloloma, e dau vosa tale ga vakayalovinaka.

9 Vakacava o sa vakatotomuri Jisu tiko? Mo taroga: ‘Au dau kilai ena yalomalua kei na yalomalumalumu? Au dau tu vakarau  meu cakava na cakacaka e rairai beci meu qaravi ira kina eso tale? Au dau veikauaitaki?’

10. Na cava era vakila na tisaipeli i Jisu nira cakacaka vata kei koya?

10 Nira cakacaka vata kei Jisu na nona tisaipeli, era vakila na vakacegu, era marautaka tale ga na cakacaka vata kei koya. E dau taleitaka o Jisu me vakavulici ira. (Luke 10:1, 19-21) E uqeti ira na nona tisaipeli mera dau taro, e tu vakarau tale ga me rogoci ira. (Maciu 16:13-16) Me vaka ga na bulabula ni kau e qaravi vinaka, era bulabula tale ga vakayalo na tisaipeli i Jisu nira maliwai koya. Era dau rogoca na ka kece e vakavulica, e vinaka tale ga na ivakarau ni nodra cakacaka.

Mo torovi rawarawa, dau veikauaitaki

Mo vakaitavi wasoma, gugumatua

Mo yalomalumalumu, cakacaka vakaukaua *

11. Na cava meda taroga?

11 Vakacava o lesi mo veiliutaki? Mo taroga: ‘Na cava era vakila o ira keimami cakacaka vata, se o ira e vale? Era vakila na vakacegu kei na marau? Au dau uqeta eso tale mera taro? Au dau yalorawarawa ni rogoca na nodra vakatutu?’ Meda kua vakadua ni vakataki ira na Farisi. Era dau cudruvi ira na via taro, era vakalolomataki ira tale ga na sega ni duavata kei na nodra rai.—Mari. 3:1-6; Joni 9:29-34.

“ONI NA KUNEA KINA NA VAKACEGU”

12-14. Na cava e veivakacegui kina na cakacaka e lesia vei keda o Jisu?

12 Na cava e veivakacegui kina nida cakava na cakacaka e lesia vei keda o Jisu? E levu na vuna, ia meda dikeva mada e vica.

13 Era vinaka na liutaki keda. O Jiova na noda iLiuliu Levu Duadua, e sega ni dau voravora se beci ira na nona tamata. E mareqeta na noda cakacaka. (Iper. 6:10) E solia na kaukaua meda qarava kina na noda itavi. (2 Kor. 4:7; Kala. 6:5, vmr.) E ivakaraitaki vinaka tale ga na noda Tui o Jisu ena itovo meda vakaraitaka. (Joni 13:15) Era tiko tale ga na qase ni ivavakoso era vakatawai keda, era saga mera vakatotomuria na nona ivakaraitaki na “ivakatawanisipi levu” o Jisu. (Iper. 13:20; 1 Pita 5:2) Era saga mera dau yalovinaka, veivakauqeti qai yaloqaqa nira veivakavulici, era karoni keda tale ga.

14 Era tiko na noda itokani vinaka. O keda ga na tamata i Jiova e vakainaki na noda cakacaka, e levu tale ga noda itokani dauloloma. Vakasamataka mada: Eda cakacaka vata kei ira na tacida e vinaka na nodra itovo, era sega tale ga ni dau veisisivi. E levu na nodra taledi, ia era sega ni tukutukuni ira, era okati ira na tacidra mera uasivi ira. Era sega wale ga ni cakacaka vata kei keda, ia eda veitokani. E dei na noda veilomani, era tu vakarau mera bolemate ena vukuda!

15. Meda raica vakacava na cakacaka eda qarava?

15 E vinaka duadua na cakacaka eda qarava. Eda vakavulici ira na lewenivanua ena ka dina me baleti Jiova, eda vakatakila tale ga na lasu e vakatetea na Tevoro. (Joni 8:44) E vakararawataki ira na tamata o Setani ena levu na lasu mera yalolailai kina. Kena ivakaraitaki, e vinakata meda vakabauta ni o Jiova ena sega ni vosota noda cala, e sega tale ga ni lomani keda. Qori e dua na lasu levu e veivakayalolailaitaki! Nida “lako” vei Karisito, e vosoti na noda cala. E lomani keda vakalevu o Jiova. (Roma 8:32, 38, 39) Eda marautaka vakalevu meda vukei ira na lewenivanua mera nuitaki Jiova, eda raica tale ga nira veisautaka na ivakarau ni nodra bula!

 VAKACEGUI TIKO GA NI O COLA NA IVUA NEI JISU

16. E duidui vakacava na ivua e kerea o Jisu meda cola kei na so tale na itavi?

16 E duidui na ivua e kerea o Jisu meda cola kei na so tale na itavi meda qarava. Kena ivakaraitaki, levu era dau oca ni cava e dua na siga ni cakacaka saumi, era sega tale ga ni lomavakacegu. Ia e duidui sara nida vakayagataka noda gauna meda qaravi Jiova kina kei Karisito. Eda marau, eda lomavakacegu tale ga. Eda na rairai oca ni cava e dua na siga ni cakacaka, ia eda sasaga ga meda tiko ena soqoni. Nida lesu i vale, eda vakacegui, eda vakaukauataki. Qori tale ga na ka eda vakila nida vunau kei na noda vuli vakataki keda!

17. Me vakacava na noda rai? Na cava meda vakasamataka vinaka?

17 E bibi me donu na noda rai ni vakaiyalayala ga na noda kaukaua. E dodonu gona meda vakasamataka vinaka na ka eda via cakava. Kena ivakaraitaki, eda rawa ni vakalusia na noda igu nida saga meda kumuna na ka vakayago. Dikeva na ka e kaya o Jisu ni tarogi koya na cauravou vutuniyau: “Na cava meu cakava meu bula tawamudu kina?” E muria tiko na cauravou qori na Lawa. E macala ni cauravou vinaka, ni vakamatatataka na Kosipeli i Marika ni “dua na ka nona lomani koya” o Jisu. E mani sureti koya o Jisu: “Lai volitaka na ka kece e tu vei iko . . . oti mo mai muri au.” E lomalomarua na cauravou qori, kena rairai ni sega ni via biuta na ‘levu ni iyau e taukena.’ (Mari. 10:17-22) Cava e yaco? E sega ni via cola na ivua nei Jisu, e mani bobula tiko ga ena “iYau.” (Maciu 6:24) Ke o biuti iko ena kena ituvaki na cauravou ya, na cava o na cakava?

18. Na cava meda dau cakava ena so na gauna? Na vuna?

18 E vinaka meda dau vakasamataka ena so na gauna na ka eda vakaliuca tiko. Na vuna? Me rawa nida vakayagataka vakavinaka na noda kaukaua. Qo na ka e tukuna e dua na cauravou itabagone o Mark: “Vica vata na yabaki noqu nanuma tu niu sa bula rawarawa tiko. Au painia, ia au dau vakasamataka tu ga na ilavo kei na sala meu rawata kina na bula vinaka. Au vaqaqa se cava au lomaocaoca tiko kina. Au qai liaca niu qara tiko ga na ka au vinakata, au solia tiko vei Jiova na ivovo ni noqu gauna kei na igu.” E mani veisautaka o Mark na nona ivakarau ni bula kei na nona rai me solia e levu na gauna vei Jiova. E kaya: “Au dau lomaleqataka na ilavo ena so na gauna, ia ena veitokoni i Jiova kei Jisu, au dei tiko ga ena noqu veiqaravi.”

19. Na cava e bibi kina me donu tiko ga na noda rai?

19 Nida cola na ivua nei Jisu, eda na vakacegui tiko ga nida cakava e tolu na ka. Kena imatai, me donu tiko ga na noda rai. Eda qarava tiko na itavi e lesia o Jiova, kena ibalebale me caka ena kena ivakarau e vinakata. Eda tamata cakacaka, o Jiova na noda Turaga. (Luke 17:10) Ke da saga meda cakava na itavi qori ena kena ivakarau ga eda vinakata, ena dredre. Vakasamataka mada e dua na bulumakau kaukaua e via lewa ga na vanua e lakova, e sega ni vakamalumalumu ena ivua e vakarautaka na kena itaukei. Ena rawa ni mavoa, e oca tale ga. Ia o keda, nida cakava na cakacaka i Jiova ena kena ivakarau e vinakata, eda na qarava rawa na itavi eda nanuma ni dredre. Eda na vosota tale ga na ituvaki eda nanuma nida sega ni taqea rawa. Nanuma tiko ni sega ni dua e rawa ni tarova na inaki i Jiova!—Roma 8:31; 1 Joni 4:4.

20. Na cava me noda inaki nida mai cola na ivua nei Jisu?

20 Kena ikarua, meda cakava na ka ena  inaki vinaka. Me noda inaki meda vakalagilagia na Tamada dauloloma o Jiova. Ena gauna i Jisu, era sega ni marau o ira na cakava na ka ena kocokoco se nanumi ira ga, era biuta tale ga na ivua nei Jisu. (Joni 6:25-27, 51, 60, 66; Fpai. 3:18, 19) Ia vakacava o ira na cakava na ka nira lomana na Kalou kei na kainodra? Era marau ni cola na ivua nei Jisu ena nodra bula taucoko e vuravura, era nuitaka mera veiliutaki kei Karisito i lomalagi. Eda na marau tale ga nida cola na ivua nei Jisu ena inaki vinaka.

21. Me vaka e cavuti ena Maciu 6:31-33, na cava meda namaka vei Jiova?

21 Kena ikatolu, me donu na ka eda namaka. Eda sa digia meda vakuai keda, meda gumatua tale ga ena noda veiqaravi. E vakasalataki keda o Jisu nida na vakacacani. Meda namaka gona ni na solia vei keda o Jiova na kaukaua meda vosota kina na veika dredre. Na levu ga ni noda vosota, eda na dei tiko ga. (Jeme. 1:2-4) Na cava tale meda namaka? Ni na vakarautaka o Jiova na ka meda bula kina, ena vakatawai keda o Jisu, era na vakayaloqaqataki keda tale ga na tacida. (Wilika Maciu 6:31-33; Joni 10:14; 1 Ces. 5:11) Io, e vakarautaka o Jiova na ka kece meda vosota kina na veika dredre.

22. Na cava meda vakavinavinakataka?

22 Na marama e vakabula o Jisu e vakacegui ga ena siga e vakabulai kina. Ia e rawa ni tawamudu na vakacegu qori ke mai tisaipeli yalodina i Karisito. Na cava mada e qai vakatulewataka? Ke digia me cola na ivua e vakarautaka o Jisu, vakasamataka na ka ena vakalougatataki kina, oya me veiliutaki kei Jisu i lomalagi! Ena sega ni matewale na ka kece e vakuai koya kina me muri Karisito. Ke da bula tawamudu i lomalagi se vuravura, eda na vakavinavinaka vakalevu nida ciqoma na veisureti i Jisu: “Ni lako mai vei au!”

SERE 13 Karisito na Noda iVakaraitaki

^ para. 5 E sureti keda o Jisu meda lako vua. Na cava meda cakava meda ciqoma kina na nona veisureti? Eda na veivosakitaka ena ulutaga qo na kena isau, eda na vulica tale ga na sala eda na vakacegui kina nida cakacaka vata kei Karisito.

^ para. 60 IVAKAMACALA NI IYALOYALO: Levu na sala e dau veivakacegui kina o Jisu.

^ para. 66 IVAKAMACALA NI IYALOYALO: E veivakacegui tale ga va qori e dua na tacida tagane.