Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

Marau Nida Qarava na “Kalou Mamarau”

Marau Nida Qarava na “Kalou Mamarau”

“Era marau na tamata e nodra Kalou o Jiova!”—SAME 144:15.

SERE: 44, 125

1. Na cava eda dau mamarau kina na dauveiqaravi ni Kalou? (Raica na imatai ni iyaloyalo.)

EDA dau mamarau na iVakadinadina i Jiova. E dau rogo vinaka noda veitalanoa kei na veidredrevaki ena noda soqoni, soqo lelevu, kei na soqo ni marau. Na cava eda dau mamarau kina? Dua na vuna levu, oya nida kilai Jiova, eda qaravi koya, eda vakatotomuri koya tale ga, ni “Kalou mamarau.” (1 Tim. 1:11; Same 16:11) Ni ivurevure ni marau o Jiova, e vinakata sara ga meda marau, e vakaraitaka tale ga na vuna meda marau kina.—Vkru. 12:7; Dauv. 3:12, 13.

2, 3. (a) Na cava na marau? (b) Cava e sega ni rawarawa kina meda marau?

2 Vakacava o iko? O marau tiko? O rawa ni marau vakalevu? E vakamacalataki na marau “me dua na ka e dodonu me tudei. O koya e vakila na marau qo e lomavakacegu, e rekitaka vakalevu nona bula, qai sega ni vinakata me seavu.” Na iVolatabu e vakaibalebaletaka ni marau dina e dusia na ka e vakila e dua e vakalougatataki koya o Jiova. Ia e sega ni rawarawa meda mamarau ena vuravura nikua. Na vuna?

3 Ni rawa ni vakararawataki keda na ituvaki dredre, me  vaka na nona takali e dua eda dau lomana, vakasivoi, veisere se noda vakacegui mai na cakacaka. E rawa ni vakavu rarawa na duidui e basika ena vuvale kei na noda sega ni veivosaki vinaka kei ira eso. E rawa tale ga ni seavu noda marau nira veivakalialiai e vanua ni cakacaka se koronivuli, saqati noda vakabauta se curu e valeniveivesu. Qori tale ga na ka ena yaco nida tautauvimate, tauvimate levu se lomabibi. Ia e marautaka o Jisu Karisito, na “Turaga Kaukaua mamarau,” me vakacegui keda, meda marau tale ga kina. (1 Tim. 6:15; Maciu 11:28-30) Ena nona Vunau ena Ulunivanua, a vakamacalataka o Jisu eso na itovo eda rawa ni vakaitovotaka meda marau tiko ga kina ena vuravura i Setani.

BIBI MEDA KAUKAUA VAKAYALO

4, 5. Rawa vakacava nida marau? Eda na marau tiko ga vakacava?

4 E bibi duadua na imatai ni ka e vakamacalataka o Jisu: “Era marau o ira na kauaitaka nodra bula vakayalo, nira na wili mera lewe ni Matanitu vakalomalagi.” (Maciu 5:3) Eda na kauaitaka vakacava noda bula vakayalo? Qori nida vakayagataka na kakana vakayalo, eda vakamareqeta na veika vakayalo, da qai vakaliuca na noda sokalou vua na Kalou mamarau. Nida cakava qori, eda na marau vakalevu, ena dei noda vakabauta na yalayala ni Kalou, ena vakacegui keda tale ga na “inuinui marautaki” e volai ena Vosa ni Kalou.—Taito 2:13.

5 Me rawa nida marau tu ga, e bibi me vinaka tiko ga noda veiwekani kei Jiova. E uqeti na yapositolo o Paula me vola: “Moni marau tiko ga ena vuku ni Turaga [o Jiova]. Au kaya tale moni marau!” (Fpai. 4:4) Me rawa nida marautaka na veiwekani talei qori, bibi meda rawata na vuku vakalou. E tukuni ena nona Vosa: “E marau na tamata e kunea na vuku kei koya e rawata na yalomatua, e kau ni bula vei ira na taura, era marau o ira na taura matua tiko.”—Vkai. 3:13, 18.

6. E vakatau ena cava na noda marau tu ga?

6 Me rawa nida marau tu ga, e bibi meda muria na ka eda wilika ena Vosa ni Kalou, sega ni wilika wale ga. E vakabibitaka na tikina qori o Jisu ni kaya: “Ke dou kila na ka kece qo, dou na qai marau ke dou cakava.” (Joni 13:17; wilika Jemesa 1:25.) Qori sara ga na sala bibi eda kauaitaka kina noda bula vakayalo, ena tawamudu tale ga noda marau. Ia eda na marau vakacava ni levu na ituvaki nikua e vakavu rarawa? Meda dikeva mada na ka e tukuna tarava o Jisu ena Vunau ena Ulunivanua.

ITOVO EDA NA MARAU KINA VAKALEVU

7. Era na marau vakacava o ira na rarawa tu?

7 “Era marau na rarawa, nira na vakacegui.” (Maciu 5:4) Era na vaqaqa eso, ‘Rawa vakacava nira marau o ira na rarawa tu?’ O Jisu e sega ni tukuni ira kece na rarawa tiko. O ira mada ga na tamata ca era rarawataka tu nikua na ituvaki e “vakilai kina e levu na ka dredre.” (2 Tim. 3:1) Ia na nodra rarawa qori e sega ni vakavolekati ira vua na Kalou, sega tale ga nira marau kina. O Jisu a rairai vakaibalebaletaki ira na kauaitaka nodra bula vakayalo, ra qai rarawataka na ituvaki ca vakayalo sa takalevu tu. Era rairai vakadinata  tale ga nira tamata ivalavala ca, vaka kina na ituvaki vakaloloma e vu mai na nodra sega ni uasivi. O Jiova e kauaitaki ira na rarawa va qori; ena vakacegui ira vakayalo, era na mamarau qai rawata na bula.—Wilika Isikeli 5:11; 9:4.

8. E rawa vakacava nira marau na yalomalua?

8 “Era marau na yalomalua, nira na taukena na vuravura.” (Maciu 5:5) Rawa vakacava nira marau na yalomalua? Ni sa vulica na ka dina e dua, e rawa ni cakava na veiveisau. De dua e dau voravora tu e liu, veiba qai dau cudrucudru. Ia sa sulumaka na “itovo vou,” e vakaraitaka na “yalo ni veikauaitaki dina, yalololoma, yalomalumalumu, yalomalua, kei na vosovoso.” (Kolo. 3:9-12) E yaga vakacava qori? Sa na bula veiyaloni, yalololoma qai mamarau. E yalataka tale ga na Vosa ni Kalou ni na “taukena na vuravura.”—Same 37:8-10, 29.

9. (a) Sala cava era ‘taukena kina na vuravura na yalomalua’? (b) E rawa vakacava nira marau o ira na “via kania era via gunuva na ivalavala dodonu”?

9 E rawa vakacava nira “taukena na vuravura” na yalomalua? Era na taukena na vuravura na tisaipeli lumuti i Jisu nira tui, era bete tale ga nira sa veiliutaki. (Vkta. 20:6) Era na taukena na vuravura na vica vata na milioni era sega ni lumuti, nira bula tawamudu e vuravura, era na uasivi, veiyaloni qai mamarau. O ira tale ga qo e tukuni nira marau baleta nira “via kania era via gunuva na ivalavala dodonu.” (Maciu 5:6) Ena qai vakacegui vakadua ena vuravura vou na nodra walokai vakayalo kei na nodra vinakata na ivalavala dodonu. (2 Pita 3:13) Gauna sa na vakaotia kina o Jiova na veika ca kece, ena sega vakadua ni vakaleqa noda marau na ivalavala tawadodonu.—Same 37:17.

10. Na cava na ibalebale ni dauloloma?

10 “Era marau na dauloloma, nira na lomani.” (Maciu 5:7) Na vu vakaIperiu e dau vakayagataki vata kei na vosa dauloloma e kena ibalebale ‘ena laurai e matada noda veikauaitaki kei na veinanumi.’ Na vu tale ga vaKirisi e tiko kina na vakasama ni noda kauaitaka e dua. Na dauloloma e tukuni eke, e sega ni noda veikauaitaki wale ga. Ena iVolatabu, e rawa ni kena ibalebale na noda vakaraitaka sara ga noda veinanumi ena noda loloma.

11. Na cava eda vulica me baleta na dauloloma ena vosa vakatautauvata ni kai Samaria?

11 Wilika Luke 10:30-37. Na vosa vakatautauvata i Jisu me baleta na kai Samaria e vakaraitaka na bibi ni noda dauloloma. Ena levu ni nona veinanumi kei na nona loloma na kai Samaria, e qara kina na sala me veivuke. Ni vakamacalataka oti o Jisu na vakatautauvata qori, e kaya sara: “Lako mo lai cakava tale ga qori.” Eda na rairai taroga: ‘Vakacava au cakava tale tiko ga ya? Au sa vakatotomuria tiko na kai Samaria dauloloma? Au rawa ni yalololoma vakalevu, meu kauaitaki ira tale ga na vinakata na veivuke? Kena ivakaraitaki, au rawa ni vukei ira na itabaqase, ira na yada, kei ira na luveniyali ena ivavakoso? Vakacava au rawa ni vakaliuliu meu “vosa vakayalovinaka vei ira na yalolailai”?’—1 Ces. 5:14; Jeme. 1:27.

Nida vakaliuliu meda dauloloma, eda na marau kina vakalevu (Raica na parakaravu 12)

12. Eda na marau vakacava nida dauloloma?

12 Eda na marau vakacava nida dauloloma? Eda na vakila na marau e vu mai na noda soli ka. Eda kila ni marau kina o Jiova. (Caka. 20:35; wilika Iperiu 13:16.) E kaya o Tui Tevita me baleti  koya e dau veikauaitaki: “Ena taqomaki koya o Jiova qai vakabulai koya tiko ga. Ena vakatokai me tamata mamarau e vuravura.” (Same 41:1, 2) Ena yalololoma vei keda o Jiova nida dau soli ka, ena tawamudu tale ga noda marau.—Jeme. 2:13.

VUNA ERA MARAU KINA O IRA E “SAVASAVA NA LOMADRA”

13, 14. E veisemati vakacava na marau kei na savasava ni lomada?

13 E kaya o Jisu: “Era marau o ira e savasava na lomadra, nira na raica na Kalou.” (Maciu 5:8) Me rawati qori, ena vinakati me savasava na ivakarau ni lomada kei na ka eda dau gadreva. Ena vinakati me savasava noda vakanananu, me kua ni tauvi duka noda sokalou vei Jiova.—Wilika 2 Korinica 4:2; 1 Tim. 1:5.

14 O ira e savasava na lomadra, era na marau ni vinaka nodra veiwekani kei Jiova, ni kaya: “Era marau o ira era vakasavasavataka na nodra isulu.” (Vkta. 22:14) Na cava na kena ibalebale mera “vakasavasavataka na nodra isulu”? Ni cavuti qori vei ira na lotu vaKarisito lumuti, e dusia nira savasava vei Jiova, era na sega ni mate rawa, ra qai marautaka me tawamudu nodra itavi e lomalagi. O ira na isoqosoqo levu era nuitaka na bula e vuravura e rawa tale ga nira veiwekani vinaka kei na Kalou, mera nona itokani. Nikua era ‘savata tiko nodra isulu balavu ra qai vakavulavulataka ena dra ni Lami.’—Vkta. 7:9, 13, 14.

15, 16. E rawa vakacava nira “raica na Kalou” o ira e savasava na lomadra?

15 E rawa vakacava vei ira na savasava na lomadra mera “raica na Kalou,” ni sega mada ga ni ‘dua e raica rawa na Kalou qai bula tiko’? (Lako 33:20) Na vosa vaKirisi ni “raica” e rawa ni kena ibalebale “raica ena vakasama, matata na kena ibalebale, meda kila sara.” O ira gona era raica na Kalou e ‘lomadra,’ era sa mai kilai Jiova vinaka ra qai taleitaka na nona itovo. (Efeso 1:18) A vakatotomuria vinaka o Jisu na itovo ni Kalou, ya na vuna e tukuna kina: “O koya sa raici au sa raici Tamaqu tale ga.”—Joni 14:7-9.

16 Me ikuri ni noda kila na itovo ni Kalou, e rawa nida “raica na Kalou” nida dikeva na ka e dau cakava vei keda. (Jope 42:5) Eda na raica tale ga na Kalou e ‘lomada’ nida vakasamataka na veivakalougatataki totoka e yalataka tu vei ira na guta mera savasava tiko ga ra qai sokalou ena yalodina. Na gauna tale ga era vakaturi kina na lumuti, era na raici Jiova nira sa rawata nodra icovi i lomalagi.—1 Joni 3:2.

 MARAU TIKO GA NI DREDRE NA ITUVAKI

17. Ena rawa vakacava nida marau ke da dau veisaututaki?

17 E tukuna tarava o Jisu: “Era marau o ira na saga na veisaututaki.” (Maciu 5:9) E tiko na vuna mera marau kina o ira na vakaliuliu mera veisaututaki se veiyaloni. E vola na tisaipeli o Jemesa: “Na vua ni yalododonu e kaburaki ena gauna ni vakacegu vei ira na dau veiyaloni.” (Jeme. 3:18) Ke da sega ni veimaliwai vinaka kei na dua ena ivavakoso se vuvale, eda rawa ni kerea me uqeti keda na Kalou meda dau veiyaloni. Ena dusimaki keda na yalo tabu i Jiova, ena uqeti keda tale ga na ivalavala dodonu kei na noda via marau. E tukuna o Jisu na bibi ni noda vakaliuliu meda veisaututaki ena nona kaya: “O koya gona, ke o kauta na nomu isoro ina icabocabonisoro o qai nanuma ni beitaki iko na tacimu ena dua na ka, biuta tu na nomu isoro ena mata ni icabocabonisoro, lako drau lai veivakameautaki mada kei tacimu, oti qai lesu mo vakacabora nomu isoro.”—Maciu 5:23, 24.

18, 19. Na cava eda rawa ni marau tiko ga kina nida tusaqati?

18 “Moni marau ni oni vakasewasewani, vakacacani, se vosavakacacataki ena vukuqu.” Na cava e vakaibalebaletaka o Jisu? E tukuna tarava: “Ni marau, io moni marau vakalevu, ni na levu na kemuni isau mai lomalagi, nira vakacacani tale ga va qori na parofita era liu vei kemuni.” (Maciu 5:11, 12) Ni ratou mokulaki na yapositolo qai vakaroti me ratou kua ni vunau, ‘eratou biubiu mai na matadra na Sanadrini. Dua na ka nodratou marau.’ Sega ni kena ibalebale ni ratou marautaka nodratou moku. Ratou marau ga “ni vakadonuya na Kalou me ratou vakacacani ena vuku ni yaca i Jisu.”—Caka. 5:41.

19 Ena noda gauna, era marau tiko ga na dauveiqaravi ni Kalou nira tusaqati ena vuku ni yaca i Jisu se nira sotava na ituvaki dredre. (Wilika Jemesa 1:2-4.) Me vakataki ratou na yapositolo, eda sega ni marautaka na veika rarawa eda sotava. Ia ke da yalodina tiko ga nida vakatovolei, ena vukei keda o Jiova meda yaloqaqa me rawa nida vosota. Kena ivakaraitaki ena Okosita 1944. Eso na vakailesilesi ni matanitu era vesuki Henryk Dornik kei tacina, rau qai kau ina keba ni veivakararawataki. Qo na ka era vakadinata na dauveitusaqati: “E dredre me rau vakamuai. Erau marautaka na ka dredre rau sotava.” E kaya o Brother Dornik: “Au sega ni vinakata meu vakararawataki va qo, ia na noqu yaloqaqa kei na noqu yalodina vei Jiova e vakavu marau. . . . Na noqu gumatua ena masu e vakavolekati au vei Jiova, e sega tale ga ni tu suka me veivuke.”

20. Na cava eda marau kina nida qarava na “Kalou mamarau”?

20 Ni vakadonui keda o Jiova na “Kalou mamarau,” eda na marau tiko ga ke ra mani tusaqati keda eso na matalotu, saqati e vale, tautauvimate se bula vaqase. (1 Tim. 1:11) Eda marau tale ga ena vuku ni yalayala totoka ni Kalou, “o koya e sega ni lasu rawa.” (Taito 1:2) Na vakatubuqoroqoro ni kena yaco na yalayala qori e mamada wale ga kina na ituvaki dredre kei na veivakatovolei eda sotava tiko nikua. Ena Parataisi sa voleka, eda na sega ni katuma rawa na veivakalougatataki i Jiova. Ena sega tale ga ni tukuni rawa na levu ni noda marau. Io, eda na “kunea na marau vakasakiti ena levu ni vakacegu.”—Same 37:11.