Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

E Vakalagilagi na Kalou ena Nomu iSulusulu?

E Vakalagilagi na Kalou ena Nomu iSulusulu?

“Cakava na ka kece me vakalagilagi kina na Kalou.”​—1 KOR. 10:31.

SERE: 34, 61

1, 2. Na cava eda raica kina vakabibi na iVakadinadina i Jiova na noda isulusulu? (Raica na imatai ni iyaloyalo.)

E TUKUNI ena dua na niusiveva ni Necaladi me baleta nodra bose na iliuliu ni lotu: “Ni katakata na draki era vakaisulu tu ga me rawa. E duidui qori mai na nodra soqo na iVakadinadina i Jiova. . . . Era vakote, ra vakaneketai na tagane qai rakorako na balavu ni nodra liku na yalewa, dina ni ka ni gauna qo.” Eda vakacaucautaki na iVakadinadina i Jiova nida dau dara “na isulu dokai, e rakorako, [e] laurai kina na yalomatua . . . ena sala ga e rakorako kei ira na . . . kaya nira qarava na Kalou.” (1 Tim. 2:9, 10, vmr.) A vakaibalebaletaka tiko qori na yapositolo o Paula vei ira na yalewa, e yaga tale ga na kena ivakavuvuli vei ira na tagane lotu vaKarisito.

2 Nida dauveiqaravi i Jiova, e bibi me rakorako na noda isulusulu ni kauai tale ga kina na Kalou eda qarava. (Vkte. 3:21) Na ka e kaya na iVolatabu me baleta na isulusulu kei na sasauni e dusia ni vinakata na Turaga Cecere ni lomalagi kei na vuravura me veiganiti na ivakatagedegede ni nodra isulusulu na nona dauveiqaravi. Na noda isulusulu kei na sasauni me kua ni vakatau ena ka eda taleitaka. Meda kauaitaka tale ga na ka ena vakamarautaki Jiova na Turaga Cecere Duadua.

3. Na cava eda kila mai na Lawa ni Kalou vei ira na Isireli me baleta na isulusulu?

 3 Kena ivakaraitaki, e bulia na Lawa na Kalou e vauci ira na Isireli me taqomaki ira mai na nodra ivakarau vakasisila na vo ni matanitu. E vakavotui ena Lawa na rai i Jiova me baleta nona sega ni duavata kei na isulu era dara ruarua tu na tagane kei na yalewa. (Wilika Vakarua 22:5.) Eda kila mai na ivakaro ni Kalou ni sega ni taleitaka o koya na isulusulu era vaka kina na irairai ni yalewa na tagane se kena veibasai, se na kena e dredre kina meda vakaduiduitaka na tagane se yalewa.

4. Na cava ena vukei keda meda vakatulewataka vinaka kina noda isulusulu?

4 E tu ena Vosa ni Kalou na ivakavuvuli ena vukei keda meda vakatulewataka vinaka kina na noda isulusulu. E yaga qori ena vanua cava ga eda tiko kina, na ivakarau vakavanua se draki eda donuya. E sega ni gadrevi me volai vakamatailalai na isulu e veiganiti kei na kena e sega. Ia me dusimaki keda na ivakavuvuli vakaivolatabu meda digia kina na ka eda taleitaka. Nida digia na ka meda dara, meda dikeva mada eso na ivakavuvuli vakaivolatabu e rawa ni yaga nida vakatulewataka na ka e “vinaka, e yaga, qai uasivi [ena] loma ni Kalou.”​—Roma 12:1, 2.

“KEITOU VAKADINADINATAKA NI KEITOU ITALATALA NI KALOU”

5, 6. Me vakacava nodra rai eso me baleta noda isulusulu?

5 E uqeti vakalou na yapositolo o Paula me vakabibitaka na ivakavuvuli ena 2 Korinica 6:4. (Wilika.) E tukuni keda vakalevu na keda irairai. Levu era yavutaka nodra rai me baleti keda mai na ka ga era ‘raica e sau.’ (1 Sam. 16:7) Nida italatala gona ni Kalou eda kila nida na sega ni dara ga na isulu eda taleitaka. Na ivakavuvuli eda kila mai na Vosa ni Kalou e dodonu me uqeti keda meda kua ni dara na isulu e kabita na yago, mamare se laurai kina vakalevu na yago se veivagarogaroi. Qori e okati kina na isulu e laurai se vakavotui mai kina na ibulibuli ni yagoda tabu. Na noda isulusulu me kua ni vakavuna nodra raici keda vakatani na tamata.

6 Ni maqosa, savasava, qai rakorako noda isulusulu, era na dokai keda vakalevu na tamata nida nona italatala o Jiova na Turaga Cecere Duadua. De dua era na via qarava tale ga na Kalou eda sokaloutaka. Noda isulusulu tale ga ena rogo vinaka kina na isoqosoqo eda matataka. Qo era na via rogoca kina e levu na noda itukutuku ni veivakabulai.

7, 8. Gauna cava e bibi kina me rakorako noda isulusulu?

7 Eda dinau se tiko noda itavi vua na noda Kalou savasava, ira na tacida, kei ira ena yalava, oya meda dara na isulu e rokovi kina na itukutuku eda vakatetea, e vakalagilagi tale ga kina o Jiova. (Roma 13:8-10) E bibi sara qo nida qarava na itavi vaKarisito, me vaka na soqoni se cakacaka vakavunau. Meda vakaisulu “ena sala ga e rakorako kei ira na . . . kaya nira qarava na Kalou.” (1 Tim. 2:10) Ena tiko ga na isulusulu ena rakorako ena so na vanua, ia ena sega ena dua tale na vanua. Eda kauaitaka gona vakabibi na iVakadinadina i Jiova na ivakarau vakavanua meda kua ni vakacudrui ira eso.

Vakacava ena dokai na Kalou o matataka ena nomu isulusulu? (Raica na parakaravu 7, 8)

8 Wilika 1 Korinica 10:31. Nida gole ena noda soqo lalai se soqo lelevu, e bibi me rakorako qai veiganiti noda isulusulu, me kua ni sivia tale me vaka e takalevu tu e vuravura. Meda qarauna me  kua ni sakuca se sakulevu noda isulusulu nida gole se biubiu mai na otela se noda gauna galala ni bera se ni oti noda soqo. Eda na sakitaka kina nida iVakadinadina i Jiova. Eda na tu vakarau tale ga meda vunau ena gauna kece ga.

9, 10. Na cava me nanumi tiko kina na Filipai 2:4 ena isulu eda dara?

9 Wilika Filipai 2:4. Na cava meda kauaitaka kina na lotu vaKarisito na nodra rai na tacida me baleta noda isulusulu? Dua oya ni ka ni sasaga meda muria na dauveiqaravi ni Kalou na ivakasala vakaivolatabu qo: “Moni vakamatea gona na gagadre ni veitikiniyagomuni vakavuravura, na veiyacovi tawadodonu, na ivalavala dukadukali, na garogaro vakasisila.” (Kolo. 3:2, 5) Eda sega ni via vakadredretaka vei ira na tacida mera muria na ivakasala qori. De dua era saga tiko ga na tacida era biuta na ivalavala vakasisila mera valuta na ka e dau malele kina na lomadra. (1 Kor. 6:9, 10) Eda na sega ni vakadredretaka na nodra sasaga.

10 Nida veimaliwai kei ira na tacida, na noda isulusulu e dodonu me uqeta tiko ga na itovo savasava ena ivavakoso. Me laurai tale ga qori nida veimaliwai ena soqoni se dua tale na vanua. E tu vei keda na galala meda lewa ga na isulu eda dara. Ia meda vakadeitaka kece meda dara na isulu ena vakarawarawataka mera savasava tiko ga kina eso, mera savasava tiko ga ena ivakatagedegede ni Kalou ena ka e vauca na vakasama, vosa, kei na itovo. (1 Pita 1: 15, 16) Na loloma dina “e sega ni cakava na ka e sega ni rakorako, e sega ni kauaitaka ga na ka e baleti koya.”​—1 Kor. 13:4, 5.

ISULUSULU E VEIGANITI

11, 12. Na cava meda nanuma tiko nida vakatulewataka na isulu meda dara?

11 Nida vakatulewataka na dauveiqaravi ni Kalou na isulu meda dara, eda na kila tiko “ni vagauna na ka kece e vakayacori kei na cakacaka kece.” (Dauv. 3:1, 17) E macala ga ni na vakatau na isulu eda dara ena veiveisau ni draki, na keda ituvaki kei na noda itikotiko. Ia na ivakatagedegede i Jiova e sega ni veisau me salavata kei na draki.—Mala. 3:6.

12 E rawa ni dredre toka meda vakatulewataka na isulu ena rakorako qai veiganiti ena vanua katakata. Era marautaka ga na tacida nida sega ni dara na isulu e kabita vakalevu na yago se vakacirigalala e laurai tale kina na tikiniyago. (Jope 31:1) Me rakorako tale ga na mataqali isulu ni sisili eda dara nida gole ena baravi se so tale na vanua ni sisili. (Vkai. 11:2, 20) Ke levu era dara na isulu ni sisili e laurai kina vakalevu na tikiniyago, eda na kauaitaka ga na dauveiqaravi i Jiova me rokovi na Kalou savasava eda lomana ena noda isulusulu.

13. Na cava e yaga kina na muri ni ivakasala ena 1 Korinica 10:32, 33?

13 E tiko e dua tale na ivakavuvuli bibi e rawa ni yaga meda digia kina na isulu rakorako. Qori noda kauaitaka nodra lewaeloma eso tale—ke ra mani tacida se sega. (Wilika 1 Korinica 10:32, 33.) Meda kauaitaka vakabibi meda kua ni dara na isulu e rawa ni veivakatarabetaki. E vola o Paula: “Meda nanumi ira na tamata kece ena ka e yaga vei ira, me vakauqeti ira. O Karisito mada ga a sega ni nanumi koya ga.” (Roma 15:2, 3) Io, e kauaitaka vakabibi o Jisu na nodra vukei eso tale, qai muri na ka e baleti koya—e vakayacora sara ga kina na loma ni Kalou. Eda na sega gona ni dara na isulu eda rairai taleitaka e sega ni rogoci kina na ka eda vunautaka.

14. Era na vakavulici luvedra vakacava na itubutubu mera vakalagilagia na Kalou ena nodra isulusulu?

14 E nodra itavi na itubutubu vaKarisito mera vakavulici nodra lewe ni vuvale ena muri ni ivakavuvuli vakaivolatabu. Qori nodra vakadeitaka nira na saga vakavuvale mera tokara na isulu rakorako kei na sasauni ena vakamarautaka na Kalou. (Vkai. 22:6; 27:11) Nira ivakaraitaki vinaka na itubutubu ra qai veivakasalataki vakayalololoma, era na uqeti luvedra kina mera doka na Kalou savasava era sokaloutaka. E marautaki dina nira vakavulici luvedra na itubutubu ena vanua kei na sala mera kunea kina na isulu rakorako! E sega ni okati ga e keri na ka era taleitaka na gone, ia e vauci tale ga kina na ka ena vukei ira ena nodra itavi dokai nira matataka na Kalou o Jiova.

VAKAYAGATAKA VAKAVUKU NOMU GALALA NI VAKATULEWA

15. Ena laurai e vei na idusidusi me baleta na noda vakatulewataka noda isulu?

15 E tu ena Vosa ni Kalou na ivakasala yaga e rawa ni dusimaki keda meda vakatulewa vakavuku me vakalagilagi kina na Kalou. Ia na ka eda dara e se rawa ni kilai tiko ga kina na ka eda taleitaka. E duidui na ka eda taleitaka, vaka tale ga kina na keda ituvaki vakailavo. Ia me maqosa tu ga noda isulu, me savasava,  rakorako, me ganita na gauna kei na vanua eda vakaitikotiko kina.

16. E yaga vakacava nida saga me rakorako noda isulusulu?

16 E sega dina ni rawarawa meda yavutaka noda vakatulewa ena ka e vinaka, ena ka e rakorako kei na so tale. E volitaki ena levu na sitoa na ka e ganita na gauna kei na vanua eda vakaitikotiko kina, ena rairai taura kina e levu na gauna kei na sasaga meda kunea na isulu e rakorako e sega ni mokota na yago, me vaka na liku, vinivo, sote, kote kei na tarausese. Ia de dua era na raica qai marautaka na tacida na noda saga meda kunea na isulu totoka, e rakorako. E ka ni sasaga meda digia na isulu me vakalagilagi kina o Jiova, ia e marautaki vakalevu cake nida kila nida vakalagilagia na Tamada vakalomalagi dauloloma.

17. Na cava me nanumi tiko ke vakatulewataka e dua na tacida tagane me vakumi?

17 Vakacava e veiganiti mera vakumi na tacida tagane? E tukuni ena Lawa e soli vei Mosese mera vakumi na tagane. Ia eda sa sega ni vauci na lotu vaKarisito ena Lawa qori se vinakati meda muria. (Vunau 19:27; 21:5; Kala. 3:24, 25) Ena so na ivakarau vakavanua e veiganiti, e veidokai tale ga ke vuruvuru vinaka tu na kumi, de dua ena sega sara ga ni cati kina na itukutuku vinaka. Eso mada ga na tacida tagane era lesi ena ivavakoso era vakumi. Ia eso tale na tacida tagane era vakatulewataka mera kua ni vakumi. (1 Kor. 8:9, 13; 10:32) Ia ena so tale na vanua, e sega ni ciqomi se me kena ivakarau vei ira na italatala ni lotu vaKarisito na vakumi. Koya gona, ke dua na tacida tagane e vakumi e rawa ni vakaleqa nona vakalagilagia na Kalou na nona isulusulu kei na sasauni, ena rawa ni beitaki kina ena dua na ka.​—Roma 15:1-3; 1 Tim. 3:2, 7.

18, 19. E vukei keda vakacava na Maika 6:8 nida saga tiko me vakamarautaka na Kalou noda isulusulu?

18 Eda vakavinavinakataka dina ni sega ni vakamatailalaitaka o Jiova na lawa me baleta na isulusulu kei na sasauni. E solia ga vei keda na galala meda vakatulewa vakayalomatua, me qai salavata kei na ivakavuvuli yaga vakaivolatabu. Eda rawa gona ni vakaraitaka ena noda isulusulu kei na sasauni nida via ‘lako vata kei na Kalou ena yalomalumalumu.’​—Maika 6:8.

19 E okati ena noda yalomalumalumu noda dikevi keda me salavata kei na savasava i Jiova, nida nuitaka vakaoti na vinaka ni nona veidusimaki. E okati ena yalomalumalumu noda doka nodra rai na so tale. Eda na ‘lako vata gona kei na Kalou ena yalomalumalumu’ nida bulataka nona ivakatagedegede cecere da qai doka nodra rai na so tale.

20. Me uqeti ira vakacava eso tale na noda isulusulu kei na sasauni?

20 Na isulu eda digia e dodonu mera tukuna kina na tamata nida dausokalou i Jiova. Mera raica na tacida kei na so tale ni sa veiganiti dina noda matataka na Kalou yalododonu. E cecere nona ivakatagedegede, eda na saga tale ga ena marau meda muria qori. Mera vakavinavinakataki na tacida e vinaka na kedra irairai kei na nodra itovo. Qori e uqeti ira na yalomalumalumu mera taleitaka na itukutuku ni veivakabulai ena iVolatabu, e vakalagilagi qai marau kina o Jiova. Nida vakatulewataka vakavuku na ka meda dara, eda na vakalagilagi koya tiko ga e vakaisulu “ena lagilagi kei na veika totoka.”​—Same 104:1, 2.