Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 ULUTAGA NI VULI 41

Mo Yalodina Tiko ga ena “Veivakararawataki Levu”

Mo Yalodina Tiko ga ena “Veivakararawataki Levu”

“Lomani Jiova, o kemuni kece na yalodina vua! O Jiova e dau taqomaka na yalodina.”—SAME 31:23.

SERE 129 Eda na Vosota Tiko Ga

KA ENA VULICI *

1-2. (a) Na cava era na vakarau kacivaka na veimatanitu? (b) Na taro cava me saumi?

RAITAYALOYALOTAKA mada nira sa kacivaka na veimatanitu na itukutuku sa parofisaitaki tu mai oya na “vakacegu kei na sautu.” De dua era na tukuna ena dokadoka ni sa qai tikovakacegu o vuravura. Era na vinakata meda nanuma nira sa walia na leqa kece kei vuravura. Ia era na sega ni tarova rawa na ka ena yaco tarava! Na vuna? Me vaka e parofisaitaki, ena “yaco vakidacala vei ira na rusa . . . era na sega ni dro rawa.”—1 Ces. 5:3.

2 E tiko gona eso na taro bibi meda sauma: Na cava ena yaco ena “veivakararawataki levu”? Na cava e vinakata o Jiova meda cakava tiko ena gauna qori? Eda na vakarautaki keda vakacava qo meda yalodina?—Maciu 24:21.

NA CAVA ENA YACO ENA “VEIVAKARARAWATAKI LEVU”?

3. Me vaka e tukuni ena Vakatakila 17:5, 15-18, ena vakarusai “Papiloni na Ka Levu” vakacava na Kalou?

3 Wilika Vakatakila 17:5, 15-18. Ena vakarusai o “Papiloni na Ka Levu”! Me vaka sa tukuni mai, era na sega ni tarova rawa na veimatanitu na ka ena yaco ena gauna qori. Na vuna? Ni na “uqeta na lomadra na Kalou mera cakava na nona inaki.” Na cava na inaki qori? Me vakarusai na lotu lasu kece e vuravura wili kina o lotu ni Veivanua vaKarisito. * Na Kalou ena uqeta na “tini na ileu” ni “manumanu kila kulakula” me cakava na nona inaki. Na tini na ileu e dusia na veimatanitu kece era tokona na “manumanu kila,” oya na Matabose kei Vuravura. (Vkta. 17:3, 11-13;  18:8) Na gauna era ravuti lotu lasu kina na iliuliu kei vuravura, qori na ivakatakilakila ni sa tekivu na veivakararawataki levu. Ena vakasauri, ena vakadomobula tale ga vei ira na lewe i vuravura.

4. (a) Na iulubale cava era na rairai tukuna na veimatanitu mera vakarusa kina na lotu lasu kece? (b) Cava era na rairai tukuna na lewe ni lotu qori?

4 Eda sega ni kila na iulubale era na rairai tukuna na veimatanitu mera vakarusai Papiloni na Ka Levu kina. De dua era na kaya ni vakalatilati tiko o lotu ena rawati ni vakacegu, e dau siova tale ga na veika vakapolitiki. Se ra kaya ni sa rui sivia tale nona iyau kei na veika e taukena. (Vkta. 18:3, 7) Na vakarusai ni lotu lasu e rairai sega ni dusia nodra vakarusai kece na lewe ni lotu qori. E rairai dusia ga nodra vakarusa na veimatanitu na isoqosoqo ni lotu kece. Nira sa rusa kece na isoqosoqo qori, era na qai kila na kena lewenilotu nira sega ni dina na nodra iliuliu ni lotu ena ka era yalataka. Era na rairai tukuna kina nira sega ni lewe ni lotu qori.

5. Na cava e yalataka o Jiova me baleta na veivakararawataki levu? Na vuna?

5 E sega ni tukuna na iVolatabu na balavu ni gauna ena vakarusai kina o Papiloni na Ka Levu, ia eda kila ni na yaco qori ena loma ni dua na gauna lekaleka. (Vkta. 18:10, 21) E yalataka o Jiova ni na “vakalekalekataka na gauna” ni veivakararawataki levu mera bula kina na nona “digitaki” kei na lotu dina. (Mari. 13:19, 20) Ia na cava e vinakata o Jiova meda cakava tiko ni tekivu na veivakararawataki levu me yacova yani na ivalu na Amaketoni?

TUTAKA TIKO GA NA SOKALOU SAVASAVA VEI JIOVA

6. Na cava tale e vinakati nida sa galala vei lotu lasu?

6 Me vaka eda vulica ena ulutaga sa oti, e namaka o Jiova mera tawasei ira na nona dauveiqaravi mai vei Papiloni na Ka Levu. Ia e sega ni vinakati ga meda galala mai vei lotu lasu. E bibi meda tutaka na sokalou dina, oya na sokalou savasava vei Jiova. Dikeva  e rua na sala meda cakava kina qori.

Meda kua vakadua ni biuta na soqoni vata, ke dredre mada ga na ituvaki (Raica na parakaravu 7) *

7. (a) Eda na muria dei vakacava na ivakatagedegede savasava i Jiova? (b) E matata vakacava ena Iperiu 10:24, 25 ni bibi meda sosoqoni vata nikua?

7 Kena imatai, meda muria dei na ivakatagedegede savasava i Jiova. E dodonu meda cata na rai kei na itovo ni vuravura. Kena ivakaraitaki, eda cata na veimataqali veiyacovi tawadodonu, wili kina na veiwatini vakayalewa se vakatagane kei na kena ivakarau kece. (Maciu 19:4, 5; Roma 1:26, 27) Kena ikarua, meda duavata kei ira na tacida meda sokalou tiko ga vei Jiova. Eda saga meda cakava qori ena gauna kece ena Vale ni Soqoni se nodra vale na tacida ena vuku ni ituvaki, se cakava vuni. Se mani cava e yaco, eda na sega ni cegu ena noda soqoni vata meda sokalou. Io, e bibi meda soqoni “vakalevu nida raica ni sa voleka mai na siga.”—Wilika Iperiu 10:24, 25.

8. Ena rairai veisau vakacava na itukutuku eda vunautaka ena gauna se bera mai?

8 Ena veivakararawataki levu, ena rairai veisau na itukutuku eda vunautaka. Nikua eda se kacivaka tiko na itukutuku vinaka ni Matanitu ni Kalou, eda gumatua tale ga ena veivakatisaipelitaki. Ia ena gauna ya, eda na rairai vunautaka e dua na itukutuku warumisa e vaka na ucaqereqere. (Vkta. 16:21) De dua eda na kacivaka ni sa vakarau vakarusai na vuravura ca i Setani. Ni toso na gauna eda na qai kila vinaka na itukutuku meda kacivaka kei na iwalewale me vakarogoi kina. Vakacava eda na muria na iwalewale eda vakayagataka voli mai ena sivia ni 100 na yabaki? Se dua tale na iwalewale? Ena qai tukuna ga o gauna. Se mani iwalewale cava eda vakayagataka, e kena irairai ni lesi keda o Jiova meda kacivaka nona itukutuku ni vakataulewa!—Isik. 2:3-5.

9. Na cava era na rairai cakava na veimatanitu nira rogoca na itukutuku eda kacivaka? Cava meda nuidei kina?

9 E kena irairai ni na vakacudrui ira na veimatanitu na itukutuku eda kacivaka, era na saga gona mera tarova vakadua na noda cakacaka vakavunau. Me vaka ga noda nuitaka na veitokoni i Jiova ena cakacaka vakaitalatala nikua, e bibi tale ga meda nuitaki koya ena gauna ya. Eda nuidei ni na sobuti keda nona kaukaua meda vakayacora vinaka na lomana.—Maika 3:8.

MEDA VAKARAUTAKI KEDA NI BERA NIDA RAVUTI

10. Me vaka e tukuni ena Luke 21:25-28, ena vakacava nodra rai e levu ena veivakararawataki levu?

10 Wilika Luke 21:25-28. Ena veivakararawataki levu, era na kidroa e levu ni sa vakarusai na veika era dau nuitaka. Era na “yaluma” nira leqataka de ra vakamatei ena gauna ca duadua ena ivolatukutuku ni kawatamata. (Sefa. 1:14, 15) Kena irairai ni sa na qai dredre ga na bula ena gauna qori, vei keda mada ga na qaravi Jiova. Nida sega ni vakavuravura, eda na rairai sotava kina na veika dredre. De dua sa na sega ena gauna qori eso na ka e dau yaga ena noda bula.

11. (a) Na cava era na via ravuti keda kina na veimatanitu? (b) Cava meda kua ni leqataka kina na veivakararawataki levu?

11 Toso na gauna, era na cudru na dau lewena tu na lotu sa vakarusai. Na vuna? Ni sega ni vakarusai na noda lotu na iVakadinadina i Jiova. Eda rawa ni raitayaloyalotaka na ka era na rairai cakava ena levu ni nodra cudru, wili kina na ka era biuta ena Internet. Era na cati keda na veimatanitu kei na nodra iliuliu o Setani ni sega ni vakarusai na noda lotu na tamata i Jiova. Era liaca gona ni se vo tiko e dua na  lotu. Era na veinanuyaka na ka mera cakava vei keda. Qori na gauna era na kilai kina na veimatanitu me o Koki ena vanua o Mekoki. * Era na duavata ena nodra sasaga taucoko mera ravuti keda na qaravi Jiova. (Isik. 38:2, 14-16) Eda na rairai leqataka na veika ena yaco ni se sega ni matata vei keda na kena matailalai. Ia qo ga na ka eda vakadeitaka: E sega ni dodonu meda rerevaka na veivakararawataki levu. Ena dusimaki keda o Jiova meda vakabulai kina. (Same 34:19) Eda rawa gona ni “tu vakadodonu” meda “tacake” nida kila nida sa “vakarau vakabulai.” *

12. E vakarautaki keda tiko vakacava “na dauveiqaravi yalodina e vuku” ena veika ena yaco ena gauna se bera mai?

12 E vakarautaki keda tiko “na dauveiqaravi yalodina e vuku” meda yalodina tiko ga ena veivakararawataki levu. (Maciu 24:45) E levu na sala e cakava kina qori, ia dikeva mada e dua: na kena yaco donu mai na porokaramu ni soqo ni veiwasewase ena 2016-2018. Eda uqeti kina meda vaqaqacotaka na itovo ena yaga vei keda ni voleka mai na siga i Jiova. Meda veivosakitaka mada na itovo qori.

ME DEI TIKO GA NOMU YALODINA, VOSOTA, KEI NA YALOQAQA

Vakavakarau rawa qo mo bula ena “veivakararawataki levu” (Raica na parakaravu 13-16) *

13. Eda na yalodina tiko ga vakacava vei Jiova? Cava meda cakava ena gauna qo?

13 Yalodina: Qo na usutu ni soqo ni veiwasewase ni 2016 “Yalodina Tiko ga Vei Jiova!” Eda vulica ena porokaramu qori nida na yalodina vei Jiova ke dei noda veiwekani kei koya. Eda vulica ni na vaqaqacotaki noda veiwekani kei Jiova nida masu mai vu ni lomada, nida vulica tale ga vagumatua na nona Vosa. Qori ena vakayaloqaqataki keda meda vosota na veika dredre cava ga. Ni sa voleka mai na gauna me vakarusai kina na vuravura ca i Setani, meda namaka ni na vakatovolei sara vakalevu noda yalodina vua na Kalou kei na nona Matanitu. Eda na rairai vakalialiai tiko ga. (2 Pita 3:3, 4) De dua ena yaco qori ni vakatovolei wasoma noda tawaveitovaki. E dodonu meda yalodina tiko ga ena gauna qo me rawa nida yalodina ena veivakararawataki levu.

14. (a) Ena veisau vakacava o ira na liutaki keda e vuravura? (b) Cava e bibi kina meda yalodina ena gauna qori?

14 Ena veivakararawataki levu, sa na veisau o ira na liutaki keda e vuravura. Era na kumuni kece i lomalagi na ivovo ni lumuti mera vakaitavi ena ivalu na Amaketoni. (Maciu 24:31; Vkta. 2:26, 27) Kena ibalebale sa na sega ni tiko na iLawalawa Dauvakatulewa e vuravura. Ia ena tuvanaki vinaka tiko ga na isoqosoqo levu. Era na liutaka na cakacaka na tacida era lewe ni so tale na sipi. Ena vinakati gona meda vakaraitaka noda yalodina nida tokoni ira na tacida qori, meda muria tale ga nodra veidusimaki. Ena vakatau kina noda vakabulai!

15. E vakatau ena cava na noda vosota? Cava e bibi kina qori nikua?

15 Vosota: Qo na usutu ni soqo ni veiwasewase ni 2017 “Kua ni Soro!” Eda vulica ena soqo qori na sala eda na vakayaloqaqataki kina meda vosota na veivakatovolei. Eda vulica tale ga ni sega ni vakatau noda vosota ena vinaka ni ituvaki, e  vakatau ga ena noda nuitaki Jiova. (Roma 12:12) Meda kua mada ga ni guilecava na yalayala i Jisu: “O koya e vosota me yacova na icavacava ena vakabulai.” (Maciu 24:13) Kena ibalebale e bibi meda yalodina tiko ga se mani dredre vakacava na ituvaki. Nida vosota na veivakatovolei ena gauna qo, ena dei na noda vakabauta ni bera ni tekivu na veivakararawataki levu.

16. E vakatau ena cava na noda yaloqaqa? Cava meda cakava meda yaloqaqa vakalevu ena gauna qo?

16 Yaloqaqa: Qo na usutu ni soqo ni veiwasewase ni 2018, “Mo Yaloqaqa!” Eda vulica ena soqo qori ni noda yaloqaqa e sega ni vakatau ena ka eda rawata. Me vaka ga na vosota, eda na yaloqaqa ke da nuitaki Jiova. Na cava meda cakava meda nuitaki Jiova vakalevu? Meda wilika e veisiga na Vosa ni Kalou qai vakasamataka vakatitobu nona dau vakabulai ira na nona tamata ena gauna sa oti. (Same 68:20; 2 Pita 2:9) Nira ravuti keda na veimatanitu ena veivakararawataki levu, ena vinakati meda yaloqaqa, meda nuitaki Jiova tale ga vakalevu. (Same 112:7, 8; Iper. 13:6) Ke da nuitaki Jiova ena gauna qo, eda na yaloqaqa ni ravuti keda o Koki. *

NANAMAKI MO VAKABULAI

Sa voleka me vakarusai ira na meca ni Kalou o Jisu kei na nona mataivalu vakalomalagi ena ivalu na Amaketoni! (Raica na parakaravu 17)

17. Na cava meda kua kina ni lomaleqataka na Amaketoni? (Raica na iyaloyalo ena waqana.)

17 Me vaka e tukuni ena ulutaga sa oti, e levu vei keda eda bula donuya na iotioti ni veisiga. Eda rawa tale ga ni bula sivia na veivakararawataki levu. Na ivalu na Amaketoni ena vakarusa vakadua na vuravura ca i Setani. Ia meda kua ni lomaleqa. Na vuna? Ni na vala o Jiova, sega ni o keda. (Vkai. 1:33; Isik. 38:18-20; Saka. 14:3) Ena veidusimaki i Jiova, ena liutaka o Jisu na mataivalu ni Kalou me ravuravu. Era na tomani koya na lumuti era sa vakaturi kei na dua na iwiliwili levu ni agilosi. Era na duavata mera valuti Setani, ira nona timoni, kei ira na nona mataivalu e vuravura.—Tani. 12:1; Vkta. 6:2; 17:14.

18. (a) Na cava e yalataka o Jiova? (b) E veivakadeitaki vakacava na Vakatakila 7:9, 13-17 me baleta na veigauna se bera mai?

18 E yalataka tu o Jiova: “Ena tawayaga na iyaragi kece e buli mo valuti kina.”  (Aisea 54:17) Ena “bula sivia na veivakararawataki levu” na “isoqosoqo levu” era lewena na dausokalou yalodina i Jiova! Oti qori era na tomana tiko ga nodra veiqaravi tabu. (Wilika Vakatakila 7:9, 13-17.) Io, e veivakadeitaki na iVolatabu nida na taqomaki ena gauna se bera mai! Eda kila ni o “Jiova e dau taqomaka na yalodina.” (Same 31:23) Era na marau vakalevu o ira kece na lomani Jiova kei ira na dau vakacaucautaki koya. Na vuna? Ni sa vakalasuya kece o Jiova na veika e vakalewai kina na yacana tabu.—Isik. 38:23.

19. Na inuinui totoka cava eda nanamaki kina?

19 Vakasamataka mada ke veisau na ibiubiu ni ka e tukuni ena 2 Timoci 3:2-5 me dusi ira na bula ena vuravura vou e sega ni veivakacalai kina o Setani. (Raica na kato “ Nodra iTovo ena Gauna Ya.”) E vakamacalataka va qo o Brother George Gangas, * a lewe tale ga ni iLawalawa Dauvakatulewa: “Vakasamataka nida bula ena vuravura era lewena ga na mataveitacini! Sa voleka meda marautaka na bula ena vuravura vou. Eda na bula tu ga me vakataki Jiova. Io, eda na bula tawamudu.” Qori e dua dina na inuinui totoka!

SERE 122 Tudei, Tawayavala!

^ para. 5 Eda kila ni sa voleka sara na “veivakararawataki levu” e vuravura. Na cava ena yaco vei ira na dauveiqaravi i Jiova ena gauna qori? Na cava e vinakata o Jiova meda cakava ena gauna qori? Na itovo cava meda vaqaqacotaka rawa qo meda yalodina tiko ga? Ena saumi qori ena ulutaga qo.

^ para. 3 IVAKAMACALA NI VOSA: Era lewe ni lotu ni Veivanua vaKarisito na lotu kece era kaya tiko nira lotu vaKarisito ia era sega ni vakavuvulitaka me sokaloutaki o Jiova me salavata kei na nona ivakatagedegede.

^ para. 11 IVAKAMACALA NI VOSA: Na matavosa Koki ena vanua o Mekoki (kena ivakaleka o Koki) e dusia na nodra duavata na veimatanitu e vuravura mera ravuti ira na dausokalou savasava ena veivakararawataki levu.

^ para. 11 Mo kila eso tale na ka me baleta na veika ena yaco ni bera na ivalu na Amaketoni, raica na wase 21 ni ivola Sa Veiliutaki na Matanitu ni Kalou! Mo kila eso tale na ka me baleta nona ravuravu o Koki ena vanua o Mekoki kei na sala ena taqomaki ira kina nona dauveiqaravi o Jiova ena Amaketoni, raica na wase 17 kei na 18 ni ivola Vakalesui Mai na Sokalou Savasava i Jiova!

^ para. 16 Qo na usutu ni soqo ni veiwasewase ni 2019 “E Sega Vakadua ni Seavu na Loloma!” E veivakadeitaki na soqo qori nida na taqomaki tiko ga ena loloma i Jiova.—1 Kor. 13:8.

^ para. 19 Raica na ulutaga “E Muri Koya na Nona iValavala” ena Vale ni Vakatawa ni Tiseba 1, 1994.

^ para. 65 IVAKAMACALA NI IYALOYALO: Era yaloqaqa na lewe ni iwasewase lailai qo mera soqoni e veikau ena veivakararawataki levu.

^ para. 67 IVAKAMACALA NI IYALOYALO: Ena bula sivia na veivakararawataki levu e dua na isoqosoqo levu era lewena na dausokalou yalodina i Jiova, dua na ka nodra marau!