Raica sara na lewena

Raica na lewenivola

 ULUTAGA NI VULI 40

Mo Gumatua Tiko ga ena “iOtioti ni Veisiga”

Mo Gumatua Tiko ga ena “iOtioti ni Veisiga”

“Ni tudei, kua ni yavala, dau vakaitavi vakalevu ena cakacaka ni Turaga.”—1 KOR. 15:58.

SERE 58 Vaqarai Ira na Yalomalua

KA ENA VULICI *

1. Eda vakadeitaka vakacava nida bula tiko ena “iotioti ni veisiga”?

VAKACAVA o sucu ni oti na yabaki 1914? Kena ibalebale o bula donuya sara ga na “iotioti ni veisiga” ni vuravura ca qo. (2 Tim. 3:1) Eda sa rogoca kece na kena yaco na veika sa tukuna tu o Jisu. Qori e okati kina na ivalu, leqa ni kakana, uneune, matedewa, tubu na ivalavala tawadodonu, kei na noda vakacacani na tamata i Jiova. (Maciu 24:3, 7-9, 12; Luke 21:10-12) Eda raica tale ga na itovo e tukuna na yapositolo o Paula ni na laurai vei ira na lewenivanua. (Raica na kato “ Nodra iTovo Nikua.”) Nida dauveiqaravi i Jiova, eda vakadeitaka nida bula tiko qo ena “iotioti ni veisiga.”—Maika 4:1, vmr.

2. Na taro cava meda sauma?

2 Sa oti qo e dua na gauna balavu me tekivu mai na 1914, e kena irairai gona nida donuya tiko na icavacava ni “iotioti ni veisiga.” Sa vakarau vakarusai na vuravura ca i Setani, e bibi gona meda kila na isau ni taro qo: Na cava ena yaco ni cava na “iotioti ni veisiga”? Na cava tale ga e vinakata o Jiova meda cakava tiko nida waraka tiko na gauna qori?

NA CAVA ENA YACO NI CAVA NA “IOTIOTI NI VEISIGA”?

3. Me vaka e parofisaitaki ena 1 Cesalonaika 5:1-3, na itukutuku cava era na kacivaka na veimatanitu?

3 Wilika 1 Cesalonaika 5:1-3. E cavuta na yapositolo o Paula na “siga i Jiova.” Na siga e cavuti ena tikinivolatabu qori e tekivu ena gauna ena ravuti kina o “Papiloni na Ka Levu” na lotu lasu kece kei vuravura, ena lai cava sara ena Amaketoni. (Vkta. 16:14, 16; 17:5) Na gauna sara ga e vakarau  tekivu kina na “siga” qori, era na kacivaka na veimatanitu na “Vakacegu kei na sautu!” (Eso na vakadewa e kaya: “Vakacegu kei na tikovinaka.”) Era dau cavuta ena so na gauna na iliuliu kei vuravura na matavosa va qori me dusia nodra sasaga me vinaka nodra veimaliwai na veimatanitu. * Ia e duatani na “vakacegu kei na sautu” e tukuna na iVolatabu ni na kacivaki. Na vuna? Gauna e yaco kina qori, levu na lewenivanua era na rairai nanuma nira sa vakavuna dina na iliuliu ni veimatanitu na tikovakacegu kei na sautu e vuravura. Ia ena qai “yaco vakidacala vei ira na rusa” ni na tekivu sara ga ena gauna qori na “veivakararawataki levu.”—Maciu 24:21.

Kua ni vakacalai nira kacivaka na veimatanitu na “vakacegu kei na sautu” (Raica na parakaravu 3-6) *

4. (a) Na cava eda sega ni kila me baleta na kacivaki ni “vakacegu kei na sautu”? (b) Cava eda kila tiko?

4 Eda sa kila tiko eso na ka me baleta na kacivaki ni “vakacegu kei na sautu.” Ia eso tale na ka eda sega ni kila. Eda sega ni kila na ka ena vakavuna na kena kacivaki se na sala ena kacivaki kina. Eda sega tale ga ni kila ena kacivaki ga vakadua se kacivaki veitaravi. Se mani cava e yaco, qo ga na ka eda kila: Meda kua ni vakacalai meda nanuma ni rawa nira vakavuna dina na iliuliu kei vuravura na sautu e vuravura. Qori sara ga na itukutuku eda vakadreti meda yadrava tiko. Na vuna? Qori na ivakatakilakila ni sa vakarau tekivu na “siga i Jiova”!

5. Me vaka e tukuni ena 1 Cesalonaika 5:4-6, meda vakarautaki keda vakacava ena “siga i Jiova”?

5 Wilika 1 Cesalonaika 5:4-6. Nida wilika na veivakadreti i Paula, eda kila kina na ka meda cakava meda vakarautaki keda ena “siga i Jiova.” Meda “kua ni moce me vakataki ira na kena vo.” E bibi meda “yadra tiko” meda kua ni wele. Kena ivakaraitaki, meda qarauna meda tawaveitovaki tiko ga oya nida sega ni vakaitavi ena veika vakapolitiki ni vuravura. Ke da tokona, e rawa nida “vakavuravura.” (Joni 15:19) Eda kila vinaka ni Matanitu ga ni Kalou ena kauta mai na vakacegu e vuravura.

6. Eda na vukea vakacava eso tale? Na vuna?

6 E sega ni vinakati ga meda yadra tiko, e bibi tale ga meda vukea e levu mera kila na ka e tukuna na iVolatabu ni na yaco e vuravura. Meda nanuma tiko qo: Ke dua e via qaravi Jiova ni tekivu na veivakararawataki levu, sa na bera. Qori na vuna e bibi kina meda vunau sara ga ena gauna qo! *

GUMATUA TIKO GA ENA VUNAU

Nida lai vunau, eda vakaraitaka ni Matanitu duadua ga ni Kalou ena kauta mai na vakacegu kei na sautu e vuravura (Raica na parakaravu 7-9)

7. Na cava e vinakata o Jiova meda cakava tiko?

7 Ena gauna lekaleka e vo tiko ni bera na “siga” i Jiova, e vinakata o Jiova meda gumatua tiko ga ena vunau. Meda vakadeitaka nida sa “vakaitavi [tiko] vakalevu ena cakacaka ni Turaga.” (1 Kor. 15:58)  Sa parofisaitaka tu o Jisu na ka eda na cakava. Ni vakamacalataka na veika lelevu ena yaco ena iotioti ni veisiga, e kaya: “Ena vunautaki tale ga e liu na itukutuku vinaka ina veimatanitu kece.” (Mari. 13:4, 8, 10; Maciu 24:14) Vakasamataka mada qori: Ena gauna kece o gole kina ina cakacaka vakaitalatala, o sa vakaitavi tiko ena vakayacori ni parofisai vakaivolatabu.

8. Eda kila vakacava ni vuavuaivinaka tiko na vunautaki ni itukutuku vinaka?

8 Vakacava e vuavuaivinaka tiko na vunautaki ni itukutuku ni Matanitu ni Kalou? Ena veiyabaki, e levu tale era mai rogoca na itukutuku vinaka. Kena ivakaraitaki, vakasamataka mada na tubu ni iwiliwili ni dautukutuku e vuravura raraba ena iotioti ni veisiga qo. Ena 1914, era le 5,155 na dautukutuku ena 43 na vanua. Nikua sa rauta ni 8.5 na milioni na dautukutuku ena 240 na vanua! Ia e se bera ni oti noda cakacaka. Meda vunautaka tiko ga ni iwali duadua ni leqa ni kawatamata na Matanitu ni Kalou.—Same 145:11-13.

9. Na cava meda vunautaka tiko ga kina na itukutuku ni Matanitu ni Kalou?

9 Ena qai cegu ga noda cakacaka vakavunau ni sa tukuna o Jiova me sa rauta. E vakacava gona na levu ni gauna e vo tiko mera vulica kina na lewenivanua na veika me baleta na Kalou o Jiova kei Jisu Karisito? (Joni 17:3) Eda sega ni kila. Na ka ga eda kila oya ni se rawa nira rogoca na ‘yalomalumalumu era via bula tawamudu’ na itukutuku vinaka ni bera ni tekivu na veivakararawataki levu. (Caka. 13:48) Eda na vukei ira gona vakacava ni se soli tu na gauna?

10. Na cava e vakarautaka o Jiova meda vakavulica kina na ka dina?

10 E vakarautaka vei keda o Jiova ena nona isoqosoqo na ka kece meda vakavulica kina na ka dina. Kena ivakaraitaki, eda vakavulici e veimacawa ena soqoni ena lomanimacawa. Eda vulica ena soqoni qori na ka meda tukuna ena imatai ni veisiko kei na veisikovi lesu. Eda vulica tale ga kina na iwalewale ni caka vuli iVolatabu. Na isoqosoqo i Jiova e vakarautaka tale ga vei keda na Teaching Toolbox se iVukevuke ni Veivakavulici. E vukei keda . . .

  • meda tekivuna na veivosaki,

  • me veiuqeti noda ivakamacala,

  • meda uqeta e levu mera kila eso tale na ka,

  •   meda vakavulica na ka dina ena vuli iVolatabu,

  • meda sureti ira na tataleitaki mera raica noda website kei na Vale ni Soqoni.

E sa vakarautaki na ivukevuke meda vakayagataka. E dodonu gona meda vakayagataka sara. * Kena ivakaraitaki, ni o vunau oti vua e dua na tataleitaki, o na solia vua e dua na tikidua se mekesini me kila eso tale na ka ni bera ni drau veitalanoa tale. E noda itavi yadua sara ga meda gumatua ena cakacaka vakavunau e veivula.

11. Na cava e vakarautaki kina na Online Bible Study Lessons se na vuli iVolatabu ena jw.org?

11 E dua tale na iwalewale e vukei ira kina na lewenivanua o Jiova mera vulica na ka dina, oya na Online Bible Study Lessons se na vuli iVolatabu ena jw.org®. Na cava e vakarautaki kina? E veivula e dua na iwiliwili levu ena veiyasa i vuravura era vaqaqara ena Internet mera vulica na iVolatabu. E yaga na kena lesoni mera tekivu vulica kina na ka dina ena Vosa ni Kalou. Eso eda vunau vei ira era na rairai sega ni vinakata meda vakavulici ira ena iVolatabu. Meda vakaraitaka gona vei ira na ivukevuke qori ena website se vakauta na kena isema (link). *

12. Na cava ena vulici ena Online Bible Study Lessons se vuli iVolatabu ena jw.org?

12 Qo eso na ulutaga e vulici ena Online Bible Study Lessons: “Na iVolatabu kei Koya e Vakavuna,” “Ira na Talanoataki ena iVolatabu,” kei “Na iNuinui e Tukuni ena iVolatabu.” E vulici ena lesoni qori:

  • Na yaga ni iVolatabu vei keda

  • O cei o Jiova, Jisu, kei ira na agilosi?

  • Na cava e buli keda kina na Kalou?

  • Na cava e yaco kina na ca kei na rarawa?

E vulici tale ga ena lesoni qori na sala ena . . .

  • vakaotia kina o Jiova na rarawa kei na mate,

  • vakaturi ira kina na mate

  • sosomitaka kina na matanitu vakatamata na Matanitu ni Kalou.

13. E sosomitaka na ituvatuva ni caka vuli iVolatabu na vuli iVolatabu ena jw.org? Vakamacalataka.

13 Na vuli iVolatabu ena jw.org e sega ni sosomitaka na ituvatuva ni caka vuli iVolatabu. E lesia vei keda o Jiova na itavi dokai meda veivakatisaipelitaki. Eda nuitaka nira na mareqeta na vuli iVolatabu ena jw.org na veika era vulica, mera via vulica kina eso tale na ka. De dua era na vakadonuya gona mera vuli iVolatabu. Ni cava na lesoni yadua, era dau sureti na vuli ena jw.org mera kerea e dua me vakavulici ira ena iVolatabu. Me kena ivakatautauvata, e sivia ni 230 e vuravura raraba era dau kerea e veisiga ena noda website mera vuli iVolatabu! E bibi dina me dua e vakavulici ira ena iVolatabu!

VUKEA TIKO GA ESO TALE MERA TISAIPELI

14. Me vaka e vakarota o Jisu ena Maciu 28:19, 20, na cava meda saga ena noda vinaka kece? Na vuna?

14 Wilika Maciu 28:19, 20. Nida caka vuli iVolatabu, meda saga ena noda vinaka kece mera “tisaipeli, . . .  [meda] vakavulici ira mera muria na ka kece [e] vakarota [o Jisu].” Meda vukei ira mera kila ni bibi mera vakatulewataka mera qaravi Jiova, mera tokona tale ga nona Matanitu. Kena ibalebale eda na uqeti ira mera mareqeta na ka dina nira muria na ka era vulica,  mera yalataki ira vei Jiova ra qai papitaiso. Na vakatulewa qori e vakatau kina nodra bula ena siga i Jiova.—1 Pita 3:21.

15. Na cava eda sega via cakava? Na vuna?

15 Me vaka sa tukuni mai, sa lekaleka sara na gauna sa vo me vakarusai kina na vuravura ca qo. Eda sega gona ni via vakaoti gauna meda vuli iVolatabu tiko ga kei ira na sega ni cakava na veiveisau me kilai nira via qaravi Jiova. (1 Kor. 9:26) E vakatotolotaki na noda cakacaka! Levu tale tu mera rogoca na itukutuku vinaka de bera.

MO GALALA MAI NA LOTU LASU KECE

16. Me vaka e tukuni ena Vakatakila 18:2, 4, 5, 8, na cava e dodonu meda cakava kece? (Raica tale ga na ivakamacala e ra.)

16 Wilika Vakatakila 18:2, 4, 5, 8. Eda vulica ena tikinivolatabu qo e dua tale na ka e vinakata o Jiova meda cakava. E dodonu meda vakadeitaka na lotu vaKarisito dina meda duatani tiko ga vei Papiloni na Ka Levu. Ni bera ni vuli iVolatabu e dua, e rairai lewena tu na lotu lasu. De dua e lai lotu kina, e vakaitavi tale ga ena veika e tuvanaka. Se rairai dau cau vakailavo ena isoqosoqo va qori. Ni bera gona ni vakadonui e dua na vuli iVolatabu me dautukutuku bera ni papitaiso, e dodonu me tawasei koya vakadua mai na lotu lasu. E dodonu me vola nona ivola ni kere vakacegu se me kua tale ni qai wili me lewe ni nona lotu makawa se so tale na isoqosoqo e sema vei Papiloni na Ka Levu. *

17. Na cakacaka saumi cava eda na qarauna na lotu vaKarisito? Na vuna?

17 Me vakadeitaka na lotu vaKarisito yadua me kua ni sema na nona cakacaka saumi vei Papiloni na Ka Levu. (2 Kor. 6:14-17) Kena ivakaraitaki, ena sega ni cakacaka ena dua na lotu. Na lotu vaKarisito tale ga e cakacaka tiko ena dua na kabani ena sega ni via cakava e levu na cakacaka ena vale e tokona na lotu lasu. Ke vakabisinisi, ena sega ni sainitaka se saga e dua na konitaraki ni cakacaka e sema vei Papiloni na Ka Levu. Na cava e dei kina va qori noda vakatulewa? Nida sega ni via okati ena sasaga kei na nodra ivalavala ca na isoqosoqo ni lotu e sega ni savasava ena mata ni Kalou.—Aisea 52:11. *

18. E dei tiko ga vakacava e dua na tacida ena ivakavuvuli vakaivolatabu?

 18 Ena vica na yabaki sa oti, e dua na turaga e vakonitaraki e kerea e dua na qase ni ivavakoso me lai veivuke ena so na ka vakamatai ena dua na valenilotu ena tauni e tiko kina. E kila na turaga qori ni sega vakadua ni dau cakacaka na qase ni ivavakoso ena valenilotu. Ia e vaqara tamata cakacaka sara tu ga. E dei ena ivakavuvuli vakaivolatabu na tacida qori qai sega ni vakadonuya. Ena macawa tarava, e tabaki ena niusipepa e dua tale na matai ni cobara tiko na kauveilatai ni valenilotu ya. Ke a sega ni dei na tacida qori, ke tabaki sara tu ga ena pepa. Vakasamataka na kena rawa ni vakararawataki ira na mataveitacini na nona ivakaraitaki! Vakasamataka tale ga na rai nei Jiova.

NA CAVA EDA SA VULICA?

19-20. (a) Na cava eda sa vulica? (b) Cava eso tale na ka meda vulica?

19 E kaya na iVolatabu ni sa vakarau vakayacori e dua na parofisai bibi, oya nodra kacivaka na iliuliu kei vuravura na “vakacegu kei na sautu.” Eda vakavinavinaka ni vakavulici keda o Jiova nira na sega ni kauta mai na veimatanitu na vakacegu dina kei na sautu e dei. Na cava meda cakava ni bera qori kei na veivakarusai ena tarava mai? E vinakata o Jiova meda gumatua ena vunau, meda vukea e levu tale mera tisaipeli. E vinakata tale ga meda tawasei keda mai na lotu lasu kece. E okati kina noda sega tale ni qai lewena, meda qarauna tale ga na cakacaka saumi era sema tiko vei Papiloni na Ka Levu.

20 Eso tale na ka ena yaco ena icavacava ni “iotioti ni veisiga” qo. E tiko eso tale na ka e vinakata o Jiova meda cakava. Na cava ya? Eda na vakarautaki keda vakacava ena ka kece ena vakarau yaco? Eda na raica qori ena ulutaga tarava.

SERE 71 Eda Sotia i Jiova!

^ para. 5 Eda namaka nira na vakarau kacivaka na veimatanitu nira sa rawata na “vakacegu kei na sautu!” Qori sara ga na ivakatakilakila ni sa vakarau tekivu na veivakararawataki levu. Na cava e vinakata o Jiova meda cakava tiko me yacova na gauna qori? Ena saumi qori ena ulutaga qo.

^ para. 3 Kena ivakaraitaki, e tukuni ena website ni Matabose kei Vuravura ni sa “vakavuna tiko nodra vakacegu kei na sautu na veimatanitu.”

^ para. 10 Me ikuri ni ivakamacala ena ivakavakayagataki ni iVukevuke ni Veivakavulici, raica na ulutaga “Meda Vakavulica na ka Dina” ena Vale ni Vakatawa ni Okotova 2018.

^ para. 11 E vakarautaki na lesoni ni vuli iVolatabu ena jw.org ena vosa vakavalagi kei na vosa vakaPotukali, ena vakarautaki ena so tale na vosa ni toso na gauna.

^ para. 16 E bibi tale ga meda kua ni lako ina reli se keba ni itabagone se vanua ni vakaukauayago, vanua ni sisili, se isoqosoqo e sema ina lotu lasu. Kena ivakaraitaki, ena ka e vauca na nodra isoqosoqo na tagane na YMCA (Young Men’s Christian Association), raica na “Questions From Readers” ena Vale ni Vakatawa vakavalagi ni Janueri 1, 1979. E tautauvata tale ga qori kei na nodra isoqosoqo na yalewa na YWCA (Young Women’s Christian Association). Era na rairai tukuna na isoqosoqo qori nira sega ni sema sara ina ka vakalotu, ia era uqeta tiko na ivakavuvuli kei na sasaga vakalotu.

^ para. 17 Me ikuri ni ivakamacala matailalai ena ka e vauca na cakacaka saumi e sema ina isoqosoqo ni lotu, raica na “Taro na Dauwiliwili” ena Vale ni Vakatawa ni Epereli 15, 1999.

^ para. 83 IVAKAMACALA NI IYALOYALO: Era kauai na tiko ena dua na valenikana ni kaburaki ena tivi ni sa kacivaki na “vakacegu kei na sautu.” Erau cegu vakalekaleka na veiwatini qo mai na cakacaka vakavunau, erau sega ni vakacalai ena itukutuku e kacivaki.