Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

Sala Meda Sulumaka Tiko ga Kina na iTovo Vou

Sala Meda Sulumaka Tiko ga Kina na iTovo Vou

“Sulumaka na itovo vou.”​—KOLO. 3:10.

SERE: 126, 28

1, 2. (a) Na cava eda kaya kina ni rawa nida bucina na itovo vou? (b) Cava eso na itovo vou e volai ena Kolosa 3:10-14?

“NA ITOVO vou.” E basika vakarua na matavosa qori ena vosa taumada ni iVolatabu. (Efeso 4:24; Kolo. 3:10) E vakaibalebaletaka na itovo e “buli me vaka na loma ni Kalou.” E rawa nida bucina na itovo vou qo. Na vuna? Ni buli keda o Jiova meda ucui koya, rawa kina nida vakatotomuria nona itovo talei.—Vkte. 1:26, 27; Efeso 5:1.

2 Ni rau vakavuna na imatai ni noda tubutubu meda valavala ca, e rawarawa kina ni vakaleqai keda noda gagadre ca. E rawa tale ga ni vakavuna na vanua eda bula tu kina. Ia ena veivuke vakayalololoma i Jiova, eda rawa ni veisau me vaka e vinakata. Meda rawata qori, eda na dikeva eso na itovo vou e vola na yapositolo o Paula. (Wilika Kolosa 3:10-14.) Eda na dikeva tale ga na sala meda vakayagataka kina ena noda cakacaka vakaitalatala.

“ONI SA DUABAU”

3. Na cava e dua na ka e kilai tani kina na itovo vou?

3 Ni oti nona veiuqeti o Paula meda tokara na itovo vou, e  vakamacalataka sara na noda sega ni veivakaduiduitaki, qori e dua na ka e kilai tani kina na itovo vou. E kaya: “E sega tale ni kilai kina na Jiu se kai Kirisi, na cili se sega ni cili, kaitani, Siciani, bobula, se tamata galala.” * Ena ivavakoso, na cava meda kua kina ni vakaduiduitaki ira na duikaikai, nodra vanua se nodra itutu? Baleta nida “duabau” na imuri ‘kece’ i Karisito.—Kolo. 3:11; Kala. 3:28.

4. (a) Me vakacava noda ivalavala na dauveiqaravi i Jiova vei ira eso tale? (b) Na ituvaki cava e dau vakadredretaka na noda duavata na lotu vaKarisito?

4 Nida tokara na itovo vou, eda na dokai ira na tacida kei ira e taudaku, se mani duidui nodra isususu se nodra vanua. (Roma 2:11) Ena sega ni rawarawa qo ena so na vanua. Kena ivakaraitaki mai Sauca Aferika, levu era se vakaduiduitaki tiko ga ena nodra itikotiko—nodra vanua na vutuniyau, nodra tauni na yago loaloa, se vanua era dau tu kina na dra veisola. Koya gona me rawa nira uqeti na tacida mera “lomasavu,” e vakadonuya na iLawalawa Dauvakatulewa ena Okotova 2013 na kena tuvanaki nodra veimaliwai na mataveitacini mera veikilai vinaka. (2 Kor. 6:13.) Na cava e okati kina?

5, 6. (a) Na ituvatuva cava e caka ena dua na vanua me vaqaqacotaka nodra duavata na mataveitacini? (Raica na imatai ni iyaloyalo.) (b) Na cava e yaco kina?

5 E tuvanaki e rua na ivavakoso era duikaikai, duidui tale ga na vosa e vakayagataki kina mera dau sota ena vica na muanimacawa. Era vakaitavi na mataveitacini ena ivavakoso ruarua qori ena cakacaka vakavunau, era tiko ena soqoni, ra qai dau veigadivi. E sivia na duanadrau na ivavakoso era vakaitavi kina, ratou taura tale ga na valenivolavola ni tabana e levu na itukutuku marautaki ena ka e tuvanaki qo, era vakavinavinaka tale ga mai eso era sega ni tacida. Kena ivakaraitaki, e kaya e dua na italatala ni lotu, “Au sega ni iVakadinadina i Jiova, sa bau tuvanaki vinaka sara ga nomuni cakacaka vakavunau, oni duavata tale ga vakamatatamata.” E yaga vakacava na ituvatuva qori vei ira na mataveitacini?

6 A lomalomarua e dua na tacida yalewa o Noma e vosa vaXhosa, me sureti ira na mataveitacini yago vulavula era tiko ena ivavakoso vosa vakavalagi ina nona vale, e ka lailai toka ga. Ia ni oti nona vunau kei na dua na tacida yago vulavula, kei na nona gade ena nodra vale, e kaya, “Era vakataki keda ga!” Gauna era veisureti kina na nona ivavakoso vei ira na vosa vakavalagi, e vakasaqa sara qai veisureti. E maliwai ira na nona vulagi e dua na qase ni ivavakoso yago vulavula. E tukuna o Noma, “Au drukataka sara ga nona yalorawarawa ni dabe ena fuloa ena yasa ni dua na kisi palasitika.” Ni toso tiko ga na ituvatuva qo, e levu na mataveitacini era veitokani sara kina, ra qai vakadeitaka mera lomasavu tiko ga nira veimaliwai.

“YALO NI VEIKAUAITAKI DINA, YALOLOLOMA”

7. Na cava meda dau veikauaitaki tiko ga kina?

7 Eda na sotava tiko ga na veika dredre nida se bula tiko ena vuravura i Setani. Kena ivakaraitaki na leqa ni cakacaka, tauvimate bibi, veivakacacani, leqa tubukoso, yali vakadua noda iyau ena vuku ni basulawa se so tale na ituvaki dredre. Ena vinakati gona me vu dina mai lomada noda veilomani me rawa nida veivukei. Na noda dau veikauaitaki, ena uqeti keda meda yalololoma. (Efeso 4:32)  Na itovo vou qo ena uqeti keda meda vakatotomuria na Kalou, da qai veivakacegui.—2 Kor. 1:3, 4.

8. E yaga vakacava noda dauloloma kei na veikauaitaki ena ivavakoso? Tukuna na kena ivakaraitaki.

8 Na cava meda cakava meda kauaitaki ira kina vakalevu na vulagi se o ira na vinakata tu mera vukei ena ivavakoso? E bibi meda veitokani, mera vakila tale ga nira yaga ena ivavakoso. (1 Kor. 12:22, 25) Dikeva mada na ka e yaco vei Dannykarl mai na Yatu Filipaini a toki e Japani. Era sega ni kauaitaki koya na itaukei e valenicakacaka. E qai gole ena noda soqoni na iVakadinadina i Jiova. E kaya o Dannykarl: “Voleka nira kai Japani kece na tiko kina, ia dua na ka nodra kauaitaki au, e vaka sara ga keimami sa veikilai makawa tu.” Qori e uqeti koya me toso vakayalo, e papitaiso, nikua sa qase tiko ni ivavakoso. Era kaya na nona itokani qase ni rau vu ni veivakalougatataki ena ivavakoso o Dannykarl kei na watina o Jennifer. Era kaya na qase me baleti rau: “Erau painia, rau bula rawarawa ga, rau qai ivakaraitaki vinaka ni rau vakaliuca na Matanitu ni Kalou.”—Luke 12:31.

9, 10. Tukuna eso na ivakaraitaki nodra vakaicovitaki eso nira veikauaitaki ena cakacaka vakaitalatala.

9 Nida wasea na itukutuku vinaka, sa rawa nida “caka vinaka vei ira na tamata kece.” (Kala. 6:10) Levu na tacida era vulica e dua na vosa vou nira kauaitaki ira na curuvanua. (1 Kor. 9:23) E vu dina ni veivakalougatataki qori. Kena ivakaraitaki, e dua na tacida yalewa painia mai Ositerelia o Tiffany. E vulica na vosa vakaSwahili me veivuke ena ivavakoso e vakayagataki kina na vosa qori ena siti o Brisbane. E sega ni rawarawa na vulica na vosa qori, ia e vakalougatataki kina o Tiffany. E kaya: “Ke o taleitaka na cakacaka vakaitalatala, ena ganiti iko na veiqaravi ena ivavakoso e vakayagataki kina e dua tale na vosa. E vaka ga ni o lako tu ia o tiko ga ena nomu vanua. O na raica sara ga na noda veikauaitaki vakamataveitacini e vuravura raraba, kei na noda duavata.”

Na cava e uqeti ira na lotu vaKarisito mera vukei ira na curuvanua? (Raica na parakaravu 10)

10 Dikeva tale ga na vuvale qo mai Japani. E kaya na luvedrau yalewa o Sakiko: “Ena veiyabaki ni 1990, keitou dau sotavi ira na curuvanua mai Brazil ena cakacaka vakaitalatala. Ni keitou wilika na iVolatabu vakaPotukali na Vakatakila 21:3, 4 se Same 37:10, 11, 29, era dau vakarorogo, eso na gauna e tuturu na wainimatadra.” Ia e sega ni yala ga e keri na nodratou veivuke. E kaya o Sakiko: “Ni keitou raica  na nodra walokai tu vakayalo, keitou vulica kina vakavuvale na vosa vakaPotukali.” Na nodratou veivuke e tauyavu kina na ivavakoso vosa vakaPotukali. Toso na gauna, ratou veivuke na vuvale qo vei ira na curuvanua mera qaravi Jiova. E kaya o Sakiko: “E cakacaka levu toka na vuli vosa vakaPotukali, ia e talei sara na kena veivakalougatataki ni vakatauvatani kei na noda sasaga. Dua na ka neimami vakavinavinakataki Jiova.”—Wilika Cakacaka 10:34, 35.

‘VAKAISULU ENA YALOMALUMALUMU’

11, 12. (a) Na cava e bibi kina me donu na inaki ni noda tokara na itovo vou? (b) Cava ena vukei keda meda yalomalumalumu tiko ga?

11 Me inaki ni noda sulumaka na itovo vou, oya me rokovi kina o Jiova, sega ni noda vakacaucautaki. Nanuma tiko ni dua mada ga na ibulibuli vakayalo a valavala ca ni tuburi koya na dokadoka. (Vakatauvatana Isikeli 28:17.) Sa qai wacava na kena dredre vei keda na tamata ivalavala ca me kua ni rawai keda na dokadoka kei na viavialevu! Ia se rawa tiko ga nida sulumaka na yalomalumalumu. Na cava ena vukei keda?

12 Meda yalomalumalumu tiko ga, ena vinakati na gauna meda vakananuma kina vakatitobu e veisiga na ka eda wilika ena Vosa ni Kalou. (Vkru. 17:18-20) Ena vinaka meda vakasamataka na ivakavuvuli i Jisu kei na nona ivakaraitaki vakasakiti ni veiqaravi ena yalomalumalumu. (Maciu 20:28) E vuya mada ga na yavadratou na nona yapositolo. (Joni 13:12-17) Ena vinakati tale ga meda kerea wasoma na yalo tabu meda valuta kina noda via uasivi ira eso tale.—Kala. 6:3, 4; Fpai. 2:3.

13. Na cava na icovi ni yalomalumalumu?

13 Wilika Vosa Vakaibalebale 22:4. E vinakati vei keda kece na dausokalou dina meda yalomalumalumu, eda na vakaicovitaki tale ga kina vakalevu. Noda yalomalumalumu ena vukei keda meda veiyaloni qai duavata ena ivavakoso. Nida bucina meda yalomalumalumu tiko ga, ena yaga vei keda na loloma soli wale ni Kalou. E tukuna na yapositolo o Pita: “Moni sulumaka kece na yalomalumalumu ena nomuni veimaliwai baleta ni cati ira na viavialevu na Kalou, ia e vakaraitaka nona loloma soli wale vei ira na yalomalumalumu.”—1 Pita 5:5.

‘VAKAISULU ENA YALOMALUA KEI NA VOSOVOSO’

14. O cei na ivakaraitaki vinaka duadua ni yalomalua kei na vosovoso?

14 Nikua, era raici mera ka malumalumu o ira na yalomalua kei ira na dau vosovoso. Ia e cala na vakasama qori! Na itovo talei qo e vakavuna sara ga o koya e kaukaua duadua ena lomalagi kei na vuravura. O Jiova e ivakaraitaki vinaka duadua ni yalomalua kei na vosovoso. (2 Pita 3:9) Vakasamataka mada nona vakayagataki ira na agilosi me saumi kina na taro nei Eparama kei Loti. (Vkte. 18:22-33; 19:18-21) E sivia tale ga ni 1,500 na yabaki nona vosota tiko o Jiova nona murilomana na matanitu o Isireli.—Isik. 33:11.

15. E ivakaraitaki vinaka vakacava o Jisu ena yalomalua kei na vosovoso?

15 E “yalomalumalumu” o Jisu. (Maciu 11:29) E vosovoso vakalevu ni vosota nodra malumalumu nona imuri. Ena nona cakacaka vakaitalatala e vuravura, e vosota tale ga nodra veivakalewai na iliuliu ni lotu dauveitusaqati. Ia e yalomalua qai vosovoso me yacova ni vakamatei vakatawadodonu. Dua na ka na levu ni nona mosi o Jisu ena kaunirarawa, ia e masulaka vei Tamana me vosoti ira na vakamatei  koya, ni tukuna, “era sega ni kila na ka era cakava tiko.” (Luke 23:34) Dua dina na ivakaraitaki vakasakiti ni yalomalua kei na vosovoso ena ituvaki mosimosi qai veivakaocai!—Wilika 1 Pita 2:21-23.

16. Eda na vakaraitaka vakacava na yalomalua kei na vosovoso?

16 Eda na yalomalua vakacava qai vosovoso? E vakamacalataka o Paula e dua na sala ena nona vola vei ira nona itokani vakabauta: “Moni dau yalorawarawa, ni dau veivosoti tale ga vakarawarawa ke dua e didivaka e dua na ka vua e dua tale. Moni dau veivosoti me vaka ga na nona vosoti kemuni vakarawarawa o Jiova.” (Kolo. 3:13) Io, e vinakati na yalomalua kei na vosovoso meda talairawarawa kina ina ivakaro qo. Nida dau veivosoti eda uqeta kina na duavata ena ivavakoso.

17. Na cava e bibi kina na yalomalua kei na vosovoso?

17 E dodonu ga meda sulumaka na lotu vaKarisito na yalomalua kei na vosovoso. E bibi qori nida na vakabulai kina. (Maciu 5:5; Jeme. 1:21) E bibi sara ni rokovi kina o Jiova, eda na vukea tale ga eso mera muria na ivakasala vakaivolatabu.—Kala. 6:1; 2 Tim. 2:24, 25.

“SULUMAKA NA LOLOMA”

18. E veisemati vakacava na loloma kei na noda sega ni veivakaduiduitaki?

18 Na itovo kece eda sa dikeva mai e veisemati kei na loloma. Kena ivakaraitaki, o Jemesa e vakasalataki ratou na tacina me ratou kua ni lomani ira ga na vutuniyau. E vakamacalataka ni valavala qori e beci kina na lawa ni tui: “Mo lomana na kainomu me vaka nomu lomani iko.” E kuria: “Ke oni veivakaduiduitaki tiko ga, oni sa valavala ca.” (Jeme. 2:8, 9) Ia na loloma ena uqeti keda meda kua ni veivakaduiduitaki ena vuku ni ivakatagedegede ni vuli, matatamata, se itutu. E bibi meda kua ni dau veivakaduiduitaki. E dodonu me vu sara ga mai lomada na itovo qori.

19. Na cava e bibi kina meda sulumaka na loloma?

19 Na loloma tale ga e “vosovoso qai yalovinaka,” e “sega ni dokadoka.” (1 Kor. 13:4) Ena vinakati sara ga na vosovoso, yalololoma, kei na yalomalumalumu meda vunautaka tiko ga kina na itukutuku vinaka vei ira na kainoda. (Maciu 28:19) E vakarawarawataka na noda veimaliwai kei ira kece na tacida ena ivavakoso. Eda na vakaicovitaki vakacava nida dau loloma? E vakaduavatataka na ivavakoso ni rogo vinaka kina o Jiova, qai uqeti ira na tataleitaki. E veiganiti kina na kena tukuni vakadodonu ena iVolatabu na ka dina qo: “Me kena ilutua, moni sulumaka na loloma ni qo na ivau vinaka duadua ni duavata.”—Kolo. 3:14.

“MONI QAI VAKAVOUI” TIKO GA

20. (a) Na cava meda tarogi keda kina, na vuna? (b) Cava eda vakanamata kina?

20 E vinaka meda dui tarogi keda, ‘Na cava tale au rawa ni cakava meu luvata tani kina na itovo makawa, meu kua tale ni sulumaka?’ Bibi meda masuta vagumatua na veivuke i Jiova meda valuta kina na itovo se ivalavala eda na sega kina ni rawata na Matanitu ni Kalou. (Kala. 5:19-21) Meda taroga tale ga, ‘Vakacava e vakavoui tiko ga na igu e lewa na noda ivakarau ni vakasama?’ (Efeso 4:23, 24) E dodonu meda sulumaka da qai vakaitovotaka tiko ga na itovo vou me yacova na gauna eda sa na uasivi kina. Vakasamataka mada na totoka ni bula nira sa na uasivi kece na noda itokani era sulumaka na itovo vou!

^ para. 3 Ena gauna vakaivolatabu, era dau beci na Siciani ni torosobu nodra itovo.